Eseteere 6
6
Amani wakeembese Maredoki
1Mu butsuku bubwo mbyaasi wakoono kubaka tolo. Nde waha lutumu mpisi bamutwaalikila mukaanda, wambambukulu mwooyo mu misamu mya kimfumu, na bamutaangula nde. 2Badzuukula ha kibeendu kyatinu maampu matariri Maredoki, dyaburi nde kayaabisiri kuri mbyaasi, kele dya Bingetani bo na Terese, bampokoro boolo ba mbyaasi babakebaana mweelu nzo mbyaasi, na babasaka bwa kudzusila mbyaasi Dzerekese. 3Hango, mbyaasi wafuula ti : « Nki bamuyirikiri, na nkya nkeembu yayinene baheeri kuri Maredoki ? » Bisari bya mbyaasi byabvutula ti : « Bahele kuyirika ti ntoono mosi mu nde. » 4Mbyaasi wafuula ti : « Na wuri ha mbasi ? » Hanaho, Amani watubuka ku mbasi, nde wayisiri mu kuloombo kuri mbyaasi ti, baleleke Maredoki mu kuunsi dikaba kamwamuyirikila. 5Bisari bya mbyaasi byabvutula ti : « Amani wuri ha mbasi. » Mbyaasi waleele ti : « Kakoto. » 6Amani wakoto, na mbyaasi wafuula kuri nde ti : « Nki me nyelemini kusa mu muutu wunde wuntiiri kukeembese ? » Amani watsima ti : « Na mukimi mbyaasi kari na nzala kukeembese, mbuti kari me ko ? » 7Nde wabvutula kuri mbyaasi ti : « Mbuti mbyaasi tiiri kukeembese muutu, 8lo batumisa kinkutu kya bumbyaasi, kiri mbyaasi mwaalwaata, na kabvaalu diri mbyaasi mwaanwaata, na lukoongolo lwa bumbyaasi, luri mbyaasi mwaateeteke ha yulu mutu. 9Baha kinkutu na kabvaalu kuri mosi, mu bakuutu balukiinsu ba mbyaasi, mpisi kalwiika muutu wunde wuri mbyaasi tiiri kumukeembese, kamunwaatisa ha yulu kabvaalu di kwemunata ha mbasi yayinene ya bvula, na bebikisa ha mankula ma nde ti : “Bumabu bwayelemene mu muutu, wuri mbyaasi tiiri kumukeembese !” »
10Hanaho, mbyaasi waleele kuri Amani ti : « Mawasu ! Holo kinkutu na kabvaalu, yirika maleeriri mamo mu Maredoki, Muyudayo wadzakala ha mweelu nzo ; yaa nyaafuna ti ntoono mosi ko mu maleeriri mamo. » 11Amani waholo kinkutu na kabvaalu, walwiika Maredoki, wamuteeteke ha yulu kabvaalu, wamunata ha mbasi yayinene ya bvula, kuri wukwebikisa ha mankula ma nde ti : « Bumabu bwayelemene mu muutu, wuri mbyaasi tiiri kumukeembese ! » 12Tumi Maredoki wabweese kubvutuka ha mweelu nzo mbyaasi, ngo, Amani wabingikila mu kweende ku nzo yaandi, kuri wafuka busu mu nsoni. 13Nde wayaabisa kuri mukasi waandi Dzerese, na kuri bambaasi baandi bobanso, mamo ma kabwanikini na mo. Bangaa-madyeele na mukasi waandi Dzerese bamuleele ti : « Mbuti Maredoki wuri mu kitsuumbu kya Bayudayo, lo yimayi mbandukulu kukulula kwa ye ha busu bwa nde ; ye ka wutsiitsa kuluuluka ha busu bwa nde ko, ye kunu kubwa wubwa ha busu bwa nde. » 14Bu baba bakiri mu kudzoonso, bampokoro bambyaasi batubuka, babingikila mu kunata Amani, ku mubuluku wamunene wayirikiri Eseteere.
Currently Selected:
Eseteere 6: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024