Eseteere 3
3
Kitaatu ha kakati dya Amani na Maredoki
1Ha mambisa ma misamu mimyo, mbyaasi Dzerekese wadzaangisa Amani, mwaana Hamedata wa mu kaanda dya Angangi#3.1 Angangi mbyaasi ba Amaleke, waba mutaatu Sawuli, kumono mu 1 Sa 15.. Nde wamudzaangisa mu kumusa mfumu yatete, ha yulu bamfumu bobanso baba kintwaari na nde. 2Bisari bya mbyaasi byobinso byaba kulukaana, na kutsukumaana ha busu bwa Amani, bunu bwaba lutumu lwa mbyaasi, ngo, Maredoki waba wahele kukulukaa na kutsukumaa. 3Bisari bya mbyaasi byakaka byaba ha mweelu nzo mbyaasi, byafuula Maredoki ti, mu nki ye wuri lutumu lwa mbyaasi kubvumina pe ? 4Mpisi kiluumbu, bo babamuleelaana bubwo, ngo nde waba wahele kubaywiilaana. Nde kabayaabisaa ti nde Muyudayo kari, bo ha beki kweemufuundaa kuri Amani, mu kumono kari tumi Maredoki kanamitina kusa bubwo. 5Amani kamonaa ti, Maredoki wahele kukuluka na kutsukuma ha busu bwa nde, nde wabaka nkesi. 6Ngo bukuri baba bamwaamuyaabisa kitsuumbu kya Maredoki, nde wasaka bwa kukwaamisa kari wunu Maredoki kitsu ko, ngo wasaka bwa kufuukisa kitsuumbu kya nde, Bayudayo bobanso bari mu nsi yoyinso, ya kimfumu kya Dzerekese. 7Mu ngoondo yatete bunu pele ya Nisani, mu mubvu wakuumi na myoolo wa kimfumu kya mbyaasi Dzerekese, batuba Mapurime mu kuta wari ha busu bwa Amani, mu mpisi kiluumbu, na mu mpisi ngoondo : Wari dyabwa mu ngoondo yakuumi na moolo bunu pele ya Adare.
Amani wasaka bwa kumana kudzusa Bayudayo
8Amani waleele kuri mbyaasi Dzerekese ti : « Kuri kitsuumbu kya baatu basoboko, batsamukina, na bari na manzelu ma bo-meene, ha kakati dya bitsuumbu byobinso, mu mankoonsi momanso ma kimfumu kya ye. Mangisi ma bo masoboko na mangisi ma bitsuumbu byakaka, na bo bahele kubvumina mangisi ma mbyaasi. Mu didyo, ye wuri na ndaandu yi wubaka ko, mu kuhemese baatu babo napii. 9Ngo mbyaasi, mbuti buri bwadzuka, lo ha lutumu lwatina mu mukaanda, mpisi bamana kubadzusa. Tumi me nteese bitalanta byapalata 10 000, bya kuha kuri bisari bya kimfumu, mpisi basuusa mu bisweekulu byamboongo bya mbyaasi. » 10Mbyaasi kayusulaana lungele#3.10 Lungele lwa mbyaasi ngo kidiimbu kya lutumu na kimfumu, mu lwo mwaba mwanyeteke kinyemu kya mbyaasi na muutu wubaheeri lwo wuri na miswa mya kuyirika mikatiiri mu nkuumbu ya mbyaasi. lwaba mu muleembu ha kaheeri kuri Amani, mwaana Hamedata wa mu kaanda dya Angangi, mutaatu Bayudayo. 11Mbyaasi waleele kuri Amani ti : « Kebe mboongo dzaaku, baatu babo se yirika bu tiiriri. »
12Mu kiluumbu kyakuumi na bitatu mu ngoondo yatete, batumisa batini ba mikaanda ba mbyaasi. Bo batina mikaanda bunu bwaba bitsimi bya Amani, baheeke myo kuri bimonikisi bya mbyaasi, kuri bakuutu ba mankoonsi, na bamfumu ba makaanda. Kuri mpisi nkoonsi mu lutinunu lwaandi, na mpisi baatu mu ndiinga ya bo-meene. Batina myo mu nkuumbu ya mbyaasi Dzerekese, na basa kinyemu kyaba mu lungele lwa mbyaasi. 13Baha mikaanda mimyo kuri banati ba mikaanda, mu kwesuusa mu mankoonsi momanso ma kimfumu, mpisi heki batsyaamuna, bafuukisa, bamana kudzusa Bayudayo bobanso, Bituuti, binuni, bakyeetu na baala bantele, na bamana kuwoolo bitotolo bya bo, mu kiluumbu kimosi kyakuumi na bitatu, mu ngoondo yakuumi na moolo bunu pele ya Adare. 14Mu mpisi nkoonsi, bu bataamburi mukaanda, bayelemini kuyaabisa kuri baatu bobanso, mpisi baba bayirima mu kiluumbu kikyo. 15Mu lutumu lwa mbyaasi, banati ba mikaanda bayende mu mawasu, na bayaabisa nzeengulu dzidzo mu bvula dya Suse. Mbyaasi bo na Amani baba badzakala mu kunwa malu, kuri lo bvula diri kunsa kisaangala.
Currently Selected:
Eseteere 3: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024