Biyiriki bya Bantumu 5
5
Ananyasi na Safira
1Kwaba muutu mosi nkuumbu yaandi Ananyasi, kintwaari na Safira mukasi waandi, wayarika lupaangu, 2wasweeke ndaambu mipata, wayukusina na mukasi, na wanata ndaambu yasiiri, na wasuusa ha miilu mya bantumu. 3Peetelo waleele ti : « Ananyasi, mu nkya ntoono Saatana kaluulusiri mutima ye, mu kuwuna Mpeeve Yangisi, na ye sweekiri ndaambu mipata, mi bakiryee mu lupaangu ? 4Ha buri lupaangu lwabee luri lwa ye ko, tekesele ye wuyarika lwo ? Na ha mambisa ma kuluyarika kari mboongo dzidzo dzibeeri dza ye-meene ko ? Dyaburi ye tsiminyee, ma bubwo ? Ye wahele kuwuna baatu, ngo Nzaambi. » 5Ananyasi, bu kayuka maampu mamo, wabwa na wafwa bata. Bobanso bayukiri babwiilikila boomo bwalaka. 6Bituuti bu byateleme byamudziinga mutulu, na bayende kweemudziika.
7Bilookolo kampe bitatu byaluta, mukasi waandi, kwahele kuyaaba malabukiri, wakoto. 8Peetelo wamufuula ti : « Leelee ti me, mu ntalu yiyo beenu luyarikiryee lupaangu ? » Nde wabvutula ti : "Hein-hein, mu ntalu yiyo." 9Peetelo waleele kuri nde ti : "Mu nki beenu luyukusinyee, mu kutsiitsa Mpeeve ya Mfumu ? Mono bitaambi bya babee kweedziika mulumi ye byeki ha mweelu, ye se beki kunata." 10Hanaho, nde se wabwa ha miilu mya Peetelo, na wafwa bata ; bituuti bimanaa kukoto, bamumono wafwa, bamunaanguna na bayende kweemudziika ha teke mulumi waandi. 11Boomo bwalaka bwabwiilikila dibuundu dyodinso, na bobanso bayuka misamu mimyo.
Bimaangu byalaka
12Bimaangu na bidiimbu byalaka byayirima mu myooko mya bantumu ha kakati dya baatu. Bobanso baba kubaanaa ha kimosi ha saansi dya Solomo. 13Mu baatu bakaka, kuri ti mosi ko waba tsiitsa kukoto mu kabu dya bantumu , koomosoko baatu baba kubasiikaanaa. 14Lutaangu lwa baatu basiiriri kanyi mu Mfumu, babakala na ma bakyeetu, lwaba kusa kwefununa. 15Baatu babanataa babeeru mu manzila, na baba basuusaana ha yulu mankwaala na ha yulu mambuka, mpisi heki, ha yooka Peetelo, kidziimunu kyaandi kibafuka. 16Mpuumbu baatu yafumuna mu mabvula madyengekele Yerusalemi, banata babeeru na bari na mampeeve mamabi, na bobanso babatsinikisaana.
Bantumu banwaanusu
17Mukuutu bangaanga-nzaambi wateleme na baba kintwaari na nde, kabu dya Basaduki, baluula mu musoki, 18bo bakaanga bantumu, na baba soko mu boroko dya bobanso. 19Kasi mbasi Mfumu wadzibula myeelu mya boroko mu butsuku, wabapalisa na wabaleele ti : 20"Yendeenu, lukoto mu Nzo-Nzaambi, na luyikisa baatu maampu momanso ma kidziingu kimaki." 21Bu bayuka bubwo, bo bakoto mu minkyeelu mya bwiisi mu Nzo-Nzaambi na bayikisa.
Mukuutu bangaanga-nzaambi bu katubuka, nde na baatu ba nde watumisa kikuutu kya Bayudayo, na mfuundu baala ba Iselili, baheeke baatu ku boroko, mu kweebaholo. 22Bu batubuka, bakebi bahele kubamono mu boroko ; bu babvutuka, bayaabisa mabamwiini, 23baleele ti : "Beetu tumwiinyee boroko dyakaanga mu bunkete bwobunso, bakebi bateleme ha myeelu, ngo bu tudziburi, twahele kumono muutu ti mosi munsa kati." 24Bu bayuka maampu mamo, mukuutu Nzo-Nzaambi na bakuutu ba bangaanga-nzaambi, makwa mabawa, na basaka mu kuyaaba mambangukulu ma mamo. 25Muutu mosi wayisa kubaleele ti : "Mono, baatu balwasokiri mu boroko, bateleme mu Nzo-Nzaambi na bari mu kuyikisa baatu.
26Haho mukuutu Nzo-Nzaambi wayende na bisari mu kubaholo, kari mu makwa ko, bukuri baba bata ti, baatu bakwiisa kubadzusila mu matari. 27Bu babanata, babatelemese ha busu bwa kikuutu. Mukuutu bangaanga-nzaambi wabafuula, 28wabaleele ti : "Beetu twaludikiri mu kuyikisa mu nkuumbu Yisu, na monee, beenu lumwaaluulusa Yerusalemi, mu nyikusulu dza beenu, na beenu lutiiri kutetekele makila ma muutu wunde ha yulu beetu." 29Peetelo na bantumu babvutula ti : "buri bwayelemene mu kutumuma kuri Nzaambi, nkani ka kuri baatu ko. 30Nzaambi ya bataayi beetu yafulukisi Yisu, wulwabee dzusa beenu kuri lumukomini ha muti. 31Nzaambi, wamudzaangisiri, mu koko kwaandi kwalubakala, mu kuba Mfumu na Mubvuukisi, mpisi kaha kuri Iselili, nyiingulu madyeele, na mpemusunu masumu. 32Beetu turi bambaangi ba myominso mimyo, na Nzaambi waha Mpeeve Yangisi kuri babo batumumaa kuri nde."
33Baatu bu bayuku mimyo, babaka nkesi, na basaka kudzusa bantumu. 34Mosi mu bo, mufarisi, nkuumbu yaandi Ngamalyeele, muyikisi mangisi, wuri baatu bobanso baba mubvuminaana, bu kateleme ha kakati dya kikuutu, waloombo kuri ti bapalisa bantumu mu mwaantaangu. 35Tumi nde waleele kuri bambaasi ti : "Baatu ba Iselili, kebee kweenu mu baatu bamaba, na mu mamo malutiiri kuyirika mu bo. 36Tekesele biluumbu bi, kwapala Tedase, waba kweleelaa ti nde muutu wa lukiinsu, baatu balaka bamunama, kampe nkama na, dza baatu. Bamudzusa, na baba ha lumbisa lwa nde batsamukina, musamu wunde wadzima. 37Ha mambisa ma nde, kwateleme Yuuda wa ku Ngalile, mu biluumbu bya ntaangulu baatu. Nde wawukumuna baatu, na wafwa, na bobanso baba kwemunamaana, babatsamikisi. 38Ngo mu lumalu, me nyileele kuri beenu ti : Yaa lunama misamu mya baatu bamaba ko, ngo bahemesee beende. Mbuti dyaambu di, bunu pele kisalu ki kya baatu, lo sa kyabwa kyomeene ; 39ngo mbuti kya Nzaambi, lo beenu lubangisina kubabwiisa ko. Yaa lusaka kunwaanisa Nzaambi ko !" Bo bataambula maka baleeriri nde. 40Bo ha batumusa bantumu, babalata nkwaasulu, na babasika mu kuhele kubweese kudzoonsolo mu nkuumbu Yisu, na babapatula. 41Hango bantumu bayende kwaaku, mu kiminu ha busu bwa kikuutu, bukuri bamonikini ti, bo bayelemene kubama mu ntoono Nkuumbu. 42Mpisi kiluumbu, ku Nzo-Nzaambi na mu manzo, bo baba bahele kuhoto mu kuyikisa na mu kuyaabisa Musamu Wamubwete wa Kiristo Yisu.
Currently Selected:
Biyiriki bya Bantumu 5: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024