Biyiriki bya Bantumu 4
4
Peetelo na Yowane ha busu bwa mfuundu ya kikuutu
1Peetelo na Yowane, baba bakiri mu kudzoonso kuri baatu, bakuutu ba bangaanga-nzaambi, mutumi Nzo-Nzaambi na Basaduki bayisa. 2Bu baba na nkesi mu ntoono yiri, bo babayikisaana baatu, na babayaabisaana mfulukulu ya bafwa mu Yisu. 3Bo babakaanga, na babasa mu boroko, natee bu bwakya ; bukuri yaba yeki nsinsika. 4Balaka bayukiri maampu, basiiriri kanyi, na lutaangu lwa baatu kampe lwakuka 5.000. 5Bukyaanaa, bamfumu ba bo, bakulu bababakala na Batini ba mangisi babvuutuna ku Yerusalemi. 6Haana, mukuutu bangaanga-nzaambi, Kayifa, Yowane, Alekandere na bobanso babutukila mu kikuutu kya kingaanga-nzaambi, 7bu basuusa Peetelo bo na Yowane ha kakati, babafuula ti : « Mu nkya mpinu, bunu pele, mu nkya nkuumbu, beenu luyirikiryee mamo ? » 8Hanaho, Peetelo kaluula mu Mpeeve Yangisi, waleele kuri bo ti : Bamfumu ba kaanda, na bakulu bababakala, 9mbuti lolo di, bari mu kutufuula, mu ntoono kiyiriki kyakibweete, mu muutu wabeele wutsiinikini, 10diba dyayabakana kuri beenu bobanso, na kuri kaanda dyodinso dya Iselili ti : Mu nkuumbu Yisu Kiristo, wa ku Nadzareti, wulwabee komono beenu, wuri Nzaambi wamufulukisi mu bafwa, mu nde, wumawu kari kateleme nangwii ha busu bwa beenu. 11Yisu ngo
"Tari, dyanyaafunu kuri beenu batuungi,
dyeki dyanguri ha nkuumbu."
12Mvuukulu yahele mu mukimi ; bukuri kwahele nkuumbu yikimi, ha butoto, yibari baha kuri baatu, yiri lo mu yo, beetu tubvuukiri.
13Bo bu bamono nsiitu dza ba Peetelo na Yowane, babakula, ti baatu ba bahele kuyika, na bahele na nyaabulu, bapamuka ; babayaabila ti bo babee kwebaanaa kintwaari na Yisu. 14Ngo bu bamono muutu wu batsinikisi, wateleme ha teke bo, bakoono kubaka dya kuleele. 15Bu babapalisa ku mbasi, kikuutu kyadzakala mu kusa mfuundu, 16baleele ti : « Nki tuseenee mu baatu bamaba ? Baatu bobanso bari ku Yerusalemi, bayaari mu ngwanwa kidiimbu kibayirikiri bo, na tubangisina kutuna kyo ko. 17Ngo mu kuri ti mihele kuba myatsamikisa kwalaka kunsa kaanda, tubaŋaŋineenu, mpisi bahele kubweese kudzoonsolo mu nkuumbu yiyo, kuri muutu ti mosi. »
18Babateelaana, babadika mu makwa, mu kudzoonsolo na kuyikisa mu nkuumbu Yisu. 19Peetelo na Yowane babvutula kuri bo, baleele ti : « Lalamee, mbuti buri bwasuunguma, ha busu bwa Nzaambi, mu kutumuma kuri beenu, ti na mu kutumuma kuri Nzaambi. 20Beetu lo tubangisina ko, mu kuhele kuyikisa maturi twamono na maturi twayuka. » 21Bo babaŋaŋinaana, babapaturi, bahele kubaka bwa kubaseembele, mu ntoono kaanda, bukuri bobanso baba dumusaa Nzaambi mu mayirimini. 22Muutu wunde, wabakiri butsiina, mu kimaangu kikyo, waba waluta mamvula makuumi mana.
Lusaambulu lwa basiila kanyi
23Babapatulaana, Peetelo na Yowane, bayende kuri ba bo-meene, na bayalimina momanso mabayirikiri bakuutu ba bangaanga-nzaambi, na bakulu bababakala. 24Bo se bamanaa kuyuka, mu mutima mosi, batoombolo mbeembu kuri Nzaambi, na baleele ti : « Mfumu, ye wayirika yulu na butoto, mubu na bitotolo byobinso biri mu byo, 25ye wadzoonsiri mu Mpeeve, mu munwa Daavidi, taayi dya beetu, kisari kyaaku ti » :
"Mu ntoono nki mansi makwesa kisaangala ?
Mu ntoono nki baatu bakwesa myahele mufunu ?
26Bambyaasi ba ha butoto bayirima,
na bamfumu bakutukina, babvuutuna ha kimosi
mu kunwaanisa Mfumu, Kiristo dyaandi."
27Mukwongo, mu ngwanwa, Eroode, Ponto Pilato kintwaari na bangooyi, na baatu ba Iselili, bamwaakutukina munsa bvula dimadi, mu kunwaanisa kisari kyaaku kyangisi, Yisu wu wuri wakusa maasi ; 28mu kukukisa myominso mi watsima ye mu mpinu, na bitaasi bya ye, tekesele miyirima. 29Na mu lumalu, Mfumu, mono kibakala kya bo, na ha kuri bisari byaaku, mu nsiitu yoyinso, mu kuyikisa maampu maaku. 30Laambula koko kwaaku mu kusoongo nsinukunu, bidiimbu na bimaangu mu nkuumbu ya kisari kyaaku kyangisi, Yisu. 31Bu baba mu kusaambila, kibeendu kibaba bakutukina kyatembele, na bo baluula mu Mpeeve Yangisi, na babeke kweyikisaa maampu ma Nzaambi mu nsiitu.
Basiila kanyi bakabula bi bari na byo
32Mukwongo mpuumbu ya baatu basiila kanyi yaba mutima mosi, na muheebulu mosi ; kuri muutu ko waba na bitotolo bwa nde-meene, ngo byobinso byaba byantwaari. 33Bantumu babataanaa kimbaangi, kya mfulukulu Mfumu Yisu, mu mpinu dzamakwa, na bweese bwabunene bwaba ha yulu bobanso. 34Kwaba kwahele muutu mu bo, waba wahelele kitotolo ; mpisi baba na manseke, bunu pele manzo, babayarikaana na babatwaalaa mboongo, dza bi bayarikiri, 35na baba suusaana ha miilu mya bantumu, baba kabulaa kuri mpisi nde bunu buri nzala yaandi. 36Yoosefi, wubaluka Baranaba kuri bantumu, mambangukulu ti mwaana wa mboondulu, mosi mu bisari kya mu Nzo-Nzaambi, wafuma ku Sipere, 37bu kaba na nseke yaandi, wayarika yo, wanata mboongo na wasuusa dzo ha miilu mya bantumu.
Currently Selected:
Biyiriki bya Bantumu 4: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024