Biyiriki bya Bantumu 20
20
Budyeengi bwa Poolo ku Masedoni na ku nsi ya Bangereke
1Misamu mya tungu mimyo milutaana, Poolo watumisa bayiki, bu kabasyaamisa, nde wabaha mboto na wayende ku Masedoni. 2Bu kaba kwetaba mankoonsi mamo, nde wabasyaamisa mu maampu malaka, watubuka ku nsi ya Bangereke, 3nde walutisa mangoondo matatu kukwo. Nde bu kasaka kuholo bwaatu mu kweende ku Siri, nde wayuka kele dya Bayudayo mu nde, na wataambula kubvutukila mu nzila ya Masedoni. 4Babakweende na nde mu nzila ngo bamaba : Sopateri mwaana Piro wa ku Bere, Arisetarako na Sekundusi ba ku Tesalonika, Ngayo wa ku Derebe, Timote, Tisike na Terofime ba ku Adzya. 5Bamaba bateekilaana, batukiingila ku Torohasi. 6Beetu twakoto bwaatu ku Filipo, ha mambisa ma biluumbu bya mampa mahele lufunusu. Beetu twababakala ku Torohasi ha mambisa ma biluumbu bitaanu, na twalutisa lumiingu kukwo.
Budyeengi bwa mpotulu bwa Poolo ku Torohasi
7Kiluumbu kyatete kya lumiingu, bu twabvuutuna mu kubukuna mpa, Poolo wabadzoonsaana na babo, bukuri waba kweende mu kiluumbu kyaba nama, nde wanonono luyolo, natee mu kakati dya butsuku. 8Miinda myaba myalaka, mu kihekiri kya ku yulu, mu twaba twakutukina. 9Mwaa munkuula mosi, nkuumbu yaandi Etiko, waba wadzakala ha mweelu nzo wantele, wuri tolo twampoondo. Poolo wanamitina mu kudzoonso mu ntaangu yalaka. Ngo munkuula wunde, tolo bu twabvulila, wasonoko kuholosono mu mve yamatatu ya nzo natee ha nsi, na wafwa. 10Poolo bu kasunduka, wayilima mu nde, wamuholo munsa myooko myaandi, waleele ti : "Yaa lunyoongo ko, kiluunsi kyaandi kyakiri mu nde. 11Bu katoomboko, wabukuna mpa na wadya, walutisa ntaangu yalaka na wadzoonso natee ku nkyeelele bwiisi, na wayende. 12Bo banata mwaana wamwooyo na bataambula mboondulu yalaka.
Budyeengi bwa ku Torohasi natee ku Mitilene
13Beetu bu twatekesele mu bwaatu, twatalisa ku Asoso, ku twaketi kuholo Poolo. Bukuri nde watiiri kuholo nzila ya mu nsi. 14Bu katubakala ku Asoso, beetu twabweese kumuholo, na twayende ku Mitilene. 15Tuyisikaa haho, beetu twaholo nzila ya mu mubu. Mu kiluumbu kyanama, twatubuka ha simu dya Kyo. Mu kiluumbu kyabweese kunama beetu twataba Samosi, na mu kiluumbu kyakaka twatubuka ku Mileto. 16Poolo wabatiiri kulutila la na Efeso, mu kuhele kulutisa ntaangu ku Adzya, nde waba kwebingukila, bukuri wabatiiri ti, mbuti bwakuka, lo nde kaba ku Yerusalemi, mu kiluumbu kya Pantekote.
Poolo wadzoonso kuri bakulu bababakala ba ku Efeso
17Kuholosono ku Mileto, Poolo waheeke mukeensu ku Efeso mu kutumisa bakuutu ba dibuundu. 18Bu bayisa kutubuka hari nde, nde wabaleele ti : "beenu luyaari ti kuholosono kiluumbu kyatete, ki nyasuusiri me kitaambi kunsa Adzya, bunu bu nyabee na beenu mantaangu momanso.
19Me nyasalila Mfumu mu nkulukulu yoyinso ; kunsa bidilu, na kunsa nsindukulu, dzantubukila mu makele ma Bayudayo. 20Me nyahele kusweeke kitotolo ti kimosi, mu byaba mufunu kuri beenu, mu ntaangu ya kuyaabisa na kuyikisa, ha busu bwa baatu, na mu manzo. 21Me nyaloombo kuri Bayudayo na kuri Bangereke mu nyiingulu madyeele, mu Nzaambi na kusiila kanyi mu Mfumu yeetu Yisu. 22Mu lumalu me Mpeeve wankaanga, na me nyeensi ku Yerusalemi, kwahele kuyaaba misamu mi nyibwaanikina na myo ku mankula. 23Mpeeve Yangisi yiri mu kunswiikisila ti, mu bvula ngo bvula bikonyi na mpasi biri mu kunkiingila. 24Kasi ha miisu mya me, kidziingu kyaami kyahele mufunu, ngo miri mufunu kuri meenu, kusukisa nzila yaami na kisalu ki nyataamburi kuri Mfumu Yisu, kya kweta kimbaangi mu Musamu Wamubwete, mu bweese bwa Nzaambi.
25Mu lumalu me nyaari ti beenu lubweese kumono busu bwa me ko, beenu bobanso kunsa baatu ba nyabee kweluta mu kuyikisa maampu ma Kimfumu kya mayulu. 26Mu ntoono bubwo, me nyilutswiikisa mu kiluumbu kyalolo ti, mu makila ma beenu bobanso, me nyiri na kibila ko. 27Mu ngwanwa, me nyahele kulusweekele kitotolo ti kimosi, mu kuluyikisa kutya kwa Nzaambi. 28Seenee madyeele mu beenu-meene, na mu mpuumbu bimeeme yoyinso, yiri Mpeeve Yangisi wulutelemisi mu kuba bakebi. Buunguleenu dibuundu dya Nzaambi, dikari kabaka mu makila ma nde-meene. 29Me nyaari ti ha mambisa ma nyendukulu me, kunsa beenu bambulu bari na kibakala sa bakoto, na babvuukisa mpuumbu bimeeme ko ; 30na munsa beenu se sa kwateleme baatu bakwesa biwobiri, mu kunata bayiki ha mambisa ma bo. 31Mu ntoono bubwo, beene naana na baambukeenu mwooyo ti, mu lutaangu lwa mibvu mitatu, butsuku na mwiini, me nyahele kudzimbikina kulubula mpisi nde mu beenu, mu mansangisi.
32Mu lumalu, me nyiluyekele beenu bobanso kuri Nzaambi, na kuri maampu mabweese bwaandi, nde wuri na mpinu dza kutuunga nzo, na dza kuha saala kuri bobanso basakumunu. 33Me nyasii saka palata, bunu pele woolo, bunu pele binkutu bya muutu ko. 34Beenu-mee luyaari ti myooko mimami, mibakisiryee me-meene, na banduku baami mu manzala. 35Mu myominso, me nyasoongiri kuri beenu ti, mu kusala, beenu luyelemini kubakisa bari na buyonsi, na kubaambuka mwooyo mu maampu ma Mfumu Yisu, bukuri nde-meene waleeriri ti : "Kiminu kibvuri mu kuha, ti na mu kutaambula."
36Bu kamana kuleele mimyo, nde watsuka maboongo ha nsi, na wasaambila na bobanso. 37Bobanso bakoto kunsa bidilu byalaka, babeke kwemudumukina mu nkiingu, na kwemunyumbutina. 38Bo bamono ngebe mu ntoono yi kaleeriri ti, bo babweese kumono busu bwaandi ko. Bo bayende kumufila natee ku bwaatu.
Currently Selected:
Biyiriki bya Bantumu 20: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024