2 Tesalonika 2
2
Misamu mimonoko, tekesele nyisulu Mfumu
1Ngo mu mitariri nyisulu Mfumu yeetu Yisu Kiristo, na kukutukuna kuri nde, bampaangi, beetu tululoombo ti : 2Yaa luwasula na kumono mutima mambaawu ko, na yaa luba na boomo ko mu mbikululu, mu nyikusulu bunu pele mu mukaanda wubaleele ti wafumini kuri beetu ; bunu ti kiluumbu kya Mfumu ki mwaakwiisa. 3Muutu yaa kaluwuna mu ntoono ti mosi ko. Kiteesu kya nyekululu kanyi mu Nzaambi kyakiri kutekesele kwiisa, na muutu wahele na mangisi wakiri kumonokono, mwaana wa mfukusulu. 4Wunde wutelemese kitaatu, na wudzaangama ha busu bwa mpisi ki baleeriri ti nzaambi, bunu pele ki basaambilaana, natee mu kiteesu kya kudzakala mu Nzo-Nzaambi, na kuleele nde-meene ti nde ngo Nzaambi. 5Beenu lwahele kubaambuka mwooyo ti, me nyaluyaabisiri dyo, ha nyaba nyakiri kuri beenu ? 6Ngo mu lumalu beenu luyaari kikyo kyamukangikila, mpisi nde kaba kumonokono munu mu kilookolo kya nde-meene. 7Bukuri, nsweeki ya mamabi yeki mu kwesala ; ngo wunde wayikaanga yelemini kuba wayusulu. 8Tumi, wahele na mangisi kaba wamonokono, na hanaho, Mfumu Yisu kamudzusula mu muheebulu wupala mu munwa waandi, na kamudziimbisa, mu monokono yansiilulu dzaandi. 9Nyisulu ya wahele na mangisi sa yayirimina, mu makwa ma Saatana, mu biyiriki bya mpinu, na bidiimbu, na bimaangu byampya, 10na kunsa mawunu momanso, ma bubayi kuri babo bari mu kudziimbila, bukuri bahele kutaambula ntiilu yangwanwa, mu kuba babvuuka. 11Hango nkuumbu, Nzaambi wuri mu kubaheekele makwa ma kuwumuka, mpisi basiila kanyi mu mpya. 12Kuri heki, bobanso bahele kusa kanyi mu ngwanwa, ngo bamono kiminu mu bubayi, baba batsuundusu.
Beenu balusoolo mu kubvuuka
13Beetu ngo bari, tuyelemini kubvutula matoondo kuri Nzaambi mpisi ntaangu, mu ntoono beenu bampaangi batya kuri Mfumu, bukuri Nzaambi walusoolo bunu mintekesele, mu kuba babvuuka kunsa bungisi buluha Mpeeve, na kanyi mu ngwanwa. 14Mu didyo, Nzaambi kari kaluteele mbila mu Musamu Wamubwete, wu turi twaluyikisa, mu kubaka nkeembu ya Mfumu yeetu Yisu Kiristo. 15Hango nkuumbu, bampaangi, beenee bakwiikama, na kebeenu kikulu ki lwataamburi kuri beetu, mu nzoonsulu bunu pele mu mukaanda.
16Hemese Mfumu yeetu Yisu Kiristo nde-meene, na Taayi dyeetu Nzaambi, watutya na watuha mu bweese bwaandi, mboondulu ya bibvu ngo bibvu, na nsiitu yayibwete, 17kaboondo mitima myeenu, na kalukumisa mu biyiriki byobinso, na mu nzoonsulu dzadzibwete.
Currently Selected:
2 Tesalonika 2: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024