Masmur 74
74
Ransyerano weotor indamu Amisye aemeno Yerusalem rai
1Asap apa ransyerano ananyao.
Sya Amisy, winakirive reansai tutir bayave kobea e?
Mbe animaibe wimpari mangkebe Nya domba reansai?
2Syare naemeno reansai: reami Nya kawasae Nyo reansatayao no wusyinoe,
reami susyo Nyo reansapaya aroo rai, indamu nyeave reansai.
Syare naemeno unato Sion rai, namirati Nyo ratayao indamu taune ntuna rai.
3Syare nde nyanya munijo mandamisyi to umaso rai indamu ndaen,
Nya Yavare mamo marova wo randamisyi vintabo to.
4Nya marova ugwagwaimbe no Nya Yavare ama uga,
muno wo awa iije vasye rauseo ratugar, mbe rarorombe wo reansapinde to.
5Wenawamo maisyare vatano wo tama randarito inyo rai,
indamu wo inyo anate raturi aje wemaisy.
6Ude usisa no Nya yavare ama uga,
wo tama muno mambuv veano ama anainya ratotove raturi.
7Wo taname rapino Nya Yavare rai ti mangkudija masyo ruke rai rave,
muno Nya ntuna ri ndandinit raveti nggwambe no Namun.#74:7 Raen tavon no 2Raj. 25:9.
8Wo raura no manuga ware: ‘‘Wade ramu wamo vatano Israel makupi vintabo!’’
Umba wo taname rapino varodoro reambeaje Amisy Ai no munije so#74:8,12,20 munije so ama ine mare Israel. rai vintabo.
9Anapaporainye inta raroron akato ramu,
muno anawae Amisy inta no munije so rai akato ramu,
muno reamantukambe ntoa nanduija umba inta nande akato!
10Sya Amisy, ntoa nanduija umba reama marova wo winaura tantunawi,
muno wo Nya tame rambaone so ntoa nsopija?
11Mbe animaibe winaneme mpaya irati reansai,
muno naneme rakapan ti ntuna Nyo reansaen bayave?
12Weramu Amisy, Winyirati reama Akari Titive kobe no arono wusyinoe,
Winyirati Nyo reansapaya reama marova mai no muni so rai vintabo.
13Winyirati Nya vambunine mo mayane#74:13 Kuruno Ayao Amisy inta wo rakarae ware mayane so omamo Mayano Kolsum, namirati Amisye Po raotar arono vatano Israel wuje munijo aroo Mesir raora wem. Ranivara ama ine no tai maisy, weamo tawae so raurata irati naito Mesir mansai, nanawirati usayadi no Mayano Kolsum rai. Weramu kuruno Ayao Amisy kaijinta wo ratantona ware mayane so omamo mayano Amisye Po ranari arono munije ama manasyinoe. raota ti yasyine ngkanen,
muno Nyo tawae mansakari ratuturi tenambe no mayane von.#74:13 tawae mansakari ratuturi no mayane von ama ino kaijinta mare: Mesir awa naito nsayadi no Mayano Kolsum.
14Winyirati Nyo tawae akoe Lewiatan#74:14 tawae akoe Lewiatan: Arono wusyinoe vatano Israel wanave ware ana mamun maisyare tawae rako, jiane rako, mansakari mansak ti manui, inta ntuna no mayane rai. Wo tamo ‘‘Lewiatan’’ veano rawain. mansakari rakupi,#74:14 Kuruno Ayao Amisy inta wo ratantona ware Lewiatan mbe rarorombe munijo Mesir ama akari titi Piraon ai, napirati Amisye Po apinde no Mayano Kolsum.
muno Nyo awa ine raunanto ana mamun nsivuiny ntuna anoko kanene rai wo raisy.
15Winyirati Nyo mana muno mana ami rapapaya ti njam,#74:15 Kuruno Ayao Amisy inta wo ratantona ware Keluaran 17:1-6 mo ayao so raura kakavimbe, arono Amisye Po vambunine raugaje Musa ai, weti po oramo akoe raporar no anoko kanen, umba mana nsui uje rai.
yara mana njaisye mamo nyurarijato rai ti ngkanen.#74:15 Kuruno Ayao Amisy inta wo ratantona ware ayao so raura kakavimbe no Yosua moto 3 muno 4, arono Amisye Po mana akoe Yordan njam tutire ransopi, weti yasyine ngkanen.
16Winyirati Nyo sansimane me namane me yanari,
muno Nyo uma pe embae me yaosoro rai.
17Winyirati Nyo mine so ama anone raosor anyi,
Nyo none aveti tami muno maru raveti ntami.
18Sya AMISY, syare Nyo raen, weye Nya marova wo naura tantunawi rave,
muno susyo wantukambe Winaije wo Nya tame rambaon.
19Vemo Nyo Nya anugano Israel umaindi so maugavo marova manemo nsoowate mansaron inya!#74:19 Ayao Ibrani mo ayao ananeneae ratoe rai, mare: ‘‘Vemo Nyo Nya insani puname aunanto ana mamun usivuinye mai nora.’’ Ayao ‘‘insani puname’’ aurata irati kawasae Israel mansai, muno ‘‘ana mamun usivuiny’’ maurata irati Israel awa marova mansai.
Vemo winanimari tutir irati Nya kawasae matawanto so mai nora!
20Syare winteto Nya urairi ndaokae nande reansai rai indamu mamaisy,
weye munije so ntairi vatano mamun nanawirati ukaokaibe ama varodoro ngkaumudi raito tenambe mai.
21Nya kawasae matawanto sonawamo vemo naneme mpaya mai mo usamane inya,
yara koveamo vatano matawanto muno una siuri rai so wo Nya tame rararimbe.
22Sya Amisy, mbeseo ra Nyo taune Nya mamaisye rarorono vatane mansai,
syare Nyo raen, weye vatano wantatukambe Winaije wo naura tantunawi tutir.
23Nya marova wo winanenen, omamo vemo ndaraniv bayave inya,
namirati wo naura usoowato rai rave kobe wem.
Currently Selected:
Masmur 74: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
