Masmur 69
69
Ransyerano weotor Amisye anonae arono no nsosobe ama uga rai
1Masmur Daud po ratoe. Nto irati akari po vatano matayao ukiny maugavo ransyerane rai ai. Ransyerane so ama kine mo ransyerano kaijinta ramai tavon, namirati ama akari mare: ‘‘Aepare ama ug.’’
2Sya Amisy, syare Nyo inapaya kakaije rai,
weye soamo maisyare mana ndea nsopo sya isyisye rai to.
3Anakotaro nsosobe mangke rinai rave,
maisyare itemasyo karunseno nsararane rai wemaisy,
muno ibambunino ipaya rai kakai.
Anakotare umaso nde ti mo inakupi,
maisyare isayadi waro ntento rai,
muno manayame mo inaugave wemaisy.
4Syo Amisye winawain indamu Nyo sopambe rinai,
weramu syanonae tutira imaririmbe, muno inakuiny mbasyine ngkanen.
Syo Amisye winatunaowa nugoenta,
ti syoyova inami tuga so nsansenai.
5Vatane manuga mamuno rinai vayave ayao mamaisye jewene rai,
awa wanui mamo inakarivuinye so mamaun akato.
Sya marova ware wo inaupaeta nawamo wanui rave,
wangkarive ti wanaikebe rinai ware syanaonoambe.
Syanaonombe ananuge inta rai jewen,
weramu wo tuvake veano inave, ware syo ananu anaonoane inta raugakananto.
6Sya Amisy, Winyirati Nyo sya ayao kakai raen tenambe,
sya ana daveti ngkakainoanive mamo inta ngkokaibe no winamune ramu.
7Sya Akoe AMISY, Winyirati Akari Titi naito munijo ntiti,
syare vemo ribe samaneve arakovo manaveano winamene mai jinya.
Vatano Israel reama Amisy Winy,
syare vemo ribe ayaobe irati vatano ubeaje Winai mai jinya.
8Weye syanave Winai ti vatane wo inaura tantunawi,
weti sya tame ngkakai.
9No sya arakove mansamun, risyamo maisyare vatano marane wemaisy,
muno taune sya ananuinye wo rinaen risyamo maisyare vatano wanisen.
10Weye inanuga no Winya Yavare rai ntipu tutir,#69:10 Yoh. 2:17
weti vatane awa ayao wo winaura tantunawi mo rinaron tavon.#69:10 Rom. 15:3
11Syoyov muno inanasine so mpayaje inatawandi marore rai,
weramu wo inaura tantunawi rai tutir kobe.
12Syo mana raijame jewen muno syo ansuno wusyine obo rave#69:12 ansuno wusyine obo rave: no koano Israel raijamo wo iije vasye karisya veano maakuvi. weye inanimaumbe,
weramu wugoeno rinai.
13Vatano ude wanugambe no unsanda akoe sisa no munije rai wo inampami,
vatano umaene wo sya tame rambaono awa ransyerane rai.
14Weramu AMISY, risyamo syo nanajo tutir,
sya Amisy, syare Nyo sya ana danajo raveti mamai no Nya masyoto ngkove rai.
Winyamo nteto Nya urairi rai tutir, weti syare Nyo inapaya sya marova mai,
mamaisyo Nya muinyo manakoe no tawane rai.
15Syare Nyo rinapaya irati vatano manuga mamuno rinai mai,
maisyare Nyo rinakarimu sen no karunseno nsararane rai wemaisy,
vemo Nyo rinapayamo risayadi waro ntento rai nora.
16Syare vemo naneme mpaya rinai nora.
Weye ana nsosobe mangke rinai somamo
maisyare manayame mo inaugave wemaisy,
maisyare risayadi no mayan ate ntento rai wemaisy,
muno maisyare syasyo no atemo amanija ama ate rai wemaisy.
17AMISY, syare Nyo sya ana danajo ravera mamaisy,
weye Nya muinyo no tawane mamo ngkov dave.
Syare namumbe de rinai weye winaemeno rinai manakoe rave.
18Risyamo syanapatambe Nai, syare vemo winakirive rinai jinya,
weye rino ana nsosobe ama uga rai,
weti nyavave nde Nyo inapaya rai.
19Syare nde Nyo marimbe rinai,
Nyo rinapaya irati sya marova mai.
20Sya marova nawamo Amisye Winyo mansaen tenambe to.
Arono wo rinaura tantunawi, wo rinave samaneve,
muno wo sya tame raveti ngkakai mamo Nyo raen to.
21Awa ayao wo rinaura tantunawi mo inanuga so raveti mpatimu rave.
Ribeker syare vatane inta mansaemeno rinai, weramu ta mamaisye jewen,
syo vatano wo inayove makani weramu inanto inta mai ramu.
22Umba sya marova wo anaisyo nyowae rave rai raunande ridaisy,
arono rinawa ngkangkamandi, wo anggurijo nsaisyine raunande ridamanam.#69:22 Mat. 27:34,48; Mrk. 15:36; Luk. 23:36; Yoh. 19:29
23Amisy, syare Nyo mangke raugaje sya marova mansai!
Koveamo awa ono wo maere rameseo Amisye Ai mamo,#69:23 Paulus po ayao so raura kakavimbe no Roma 11:9-10. maisyare isyeano nsawa mai wemaisy,
muno omamo maisyare aviri awa arakove uparono rai tavone wemaisy.
24Koveamo mansamije ntuba indamu wo ana raene jewen,
muno makiri mona mayondi indamu umarovave rinai kakai.
25Syare Nya parijo mangke rasuire mansai,
muno Nya parijo mbe tanam mamoambe mo mawatan damu mo mansanen.
26Koveamo awa munijo utantuna raije mbabivi,
muno awa yavare ama uga nsugan.#69:26 Arakov. 1:20
27Amisy, Winyo vatano nanuga no maije manepat arono wo ayao kakai rave,
weramu sya marova wo vatano Nyo manepate mave pabe tutir,
muno useambe vatano Nyo mangke raugaje mai awa jajorame rai.
28Kovato awa ube tatugadije ratutumbe manuijo mai kai,
vemo Nyo awa ayao kakai rapaya mai nora.
29Koveamo awa tame raupae no buku muni tawane rai,
muno vemo awa tame ratoe tavon no vatano kove#69:29 vatano kove onawamo vatano ubeta Amisye Apa ananyao rai. matavon inya.
30Yara risyamo vatano inatawanto, weti inanuga njoram.
Sya Amisy, syare Nyo rinaijaseo, Nyo rinapaya marova mansaneme rai.
31Rikinyo ransyerane rai, syo Amisye Apa tame rangkakivambe,
muno syo kove raura seo Ai, syo aijaseo titive.
32Omamo ngkov akato irati syo maere rameseo Ai rai;
tugae, syo Amisye ararimbe mo syo sapi anya#69:32 Ayao Ibrani maisyare so: ‘‘sapi anya apa korodowai no ai ti panakoe to.’’ ameseo Ai rakivan.
33Weti vatano matawanto wo raen muno mansananibe,
vatano ubeaje Amisye Ai, mansanuga mbambunin akato!
34Weye vatano una irati awa ana jajewembe rai nawamo AMISY Po maraniv arono wo awain,
muno vatano makova nawamo ponae mai ramu.
35Inya, anakotaro ntuna no naume warae me mine so me,
muno mayane me ama anakotaro ntuna rai rautan, wapo Amisye ararimbe.
36Weye indati Amisye Po vatano una no Sion mapaya irati marova rai,
muno Po munijo Yehuda raijar akaseo ntet anyi.
Indati Amisye Apa kawasae utantuna rai, muno weyave rai.
37Muno indati awa arikainye, ajavije awa ura rai tawan tutir,
muno vatano manuga no Amisy Ai nawamo indati utantuna rai.
Currently Selected:
Masmur 69: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
