Masmur 64
64
Mangke Amisye Po raugaje vatano mamune maijem
1Masmur Daud po ratoe. Nto irati akari po vatano matayao ukiny maugavo ransyerane rai ai.
2Sya Amisy, syare Nyo inaranivo sya ana danajo no arono rino ana nsosobe raije so rai,
syare Nyo inapaya irati sya marova syo masyaniv dave so mai.
3Syare Nyo inangkokaibe irati vatano mamun wanyinyaube rinai so mai,
no rinaora irati vatano mamun manatantonave kakai rai mai.
4Mansaunane mamo nsansinao dave maisyare omake wemaisy,
muno ayao wo ratore mamo mamun dave maisyare ato nsiu wemaisy.
5No varoro ukaokaibe ri we, wo vatano ayao kakai meweno mai makekebe,
awa ayao mamo wo rantotobe ramu maisyare ato wo veano mansaivuiny papabe wemaisy.
6Awa ubekero mamune obo mirati wo raijaro matuve,
wanugan ti wayao indamu wo aviri ratugaro maninimbe,
wo raura ware: ‘‘Vatane inta po wansaen dai ramu.’’
7Onawamo manatantonave ana mamaisye jewene rai,
wo raura ware: ‘‘Ana reamanyinyaube rai mamo reamanatatayaube raija mamai dave to.’’
Vatane awa ana wo ratantona no manuga mamo vatano kaijinta unanta rai kakai.
8Weramu Amisye Po parijo mangke veano matapo,
muno Po maivuiny ti kavuratawe utaopon.
9Ayao kakai taune wo ratore ama mangke rasakinav akare mai,
vatan tenambe wo mansaen makarije rangkiki mai, weye mangke raude mai mpanyoan dave.
10Naije kobe vatan tenambe ujani dave,
ti wo Amisye Apa ana dave so ratantonave inda unanta rai,
muno wo Apa ana dave ravovo vatano kaijinta mai.
11Vatano ubeta AMISY Ai umananibe Apa ana dave rai,
muno wakata mansamamavube Ai.
Vatano manuga nsarokiro Amisye Ai nawamo wo ararimbe.
Currently Selected:
Masmur 64: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
