Masmur 63
63
Sya jugara bekero Amisye Winai
1Masmur Daud po ratoe arono no no anoko ngkanembe maninimbe munijo Yehuda.#63:1 Daud kokaibe no anoko ngkanembe arono akarijo titi Saul pare po aubaisy. 1Sam. 23:14
2Amisy, Winyirati sya Amisy,
rinanuga no Nai rave ti syo nakani.
Sya jugara bekero Amisye Winai maisyare vatano awa ngkamandi ti bekero mana rai.
Inanasine tename so mayondi ti mbekero Nai maisyare mino mana ngkanen dai weti mbekero mana nde rai.
3Weti ribekero syore mararai no Amisye Winui, no Nya ntuna ri ndandinit rai,
indamu syo Nya vambunin muno Nya kovo ntiti raen.
4Syo Amisye winararimbe weye Nya muinyo no tawane#63:4 Ayao Ibrani hesed ama ine ratoe tumaimbe naiso mare: ‘‘muinye no tawan.’’ Ama ino manakoe mare: ‘‘Amisye Apa muinye muno Apa anakotaro Po raurairive ti no tawan tutiro Apa kawasae Israel mansai mamo Po raveti mamaisy.’’ mamo manakoe,
yara taune sya kovo mine somamo mamaun bayavea.
5Maisyare omaiti, risyo winararimbe no arono ta rikove so,
rinaneme raijaseo syo Nya tame rawain.
6Rinanuga so ranayanambe, igwain syo Amisy naijaseo titive muno syo nararimbe.
Sya jugara anayanambe Amisye Winai
maisyare vatano anayanambe weye po maero manavan dave raisy.
7Arono syaje niki no sya vasyoto niki ri inaemeno Amisye Winai,
namano waravainyowe syo natantonave rave.
8Rikinyo ransyerane rai inananibe, weye Amisye Nyo inayaranande mamo ngko dave,
maisyare mangkuero mo ama tuvane rarau wemaisy.
9Risyo Amisye winaijaro matuve rave,
weye Winya nanem ngkove#63:9 nanem ngkove: ama ine mare Amisye Apa vambunin. wemi mo rinasopan.
10Weramu vatano ware wo rinaubaisye wenawamo
indati ugwenen ti wo vatano ugwenen to awa una rije raronto.
11Onawamo ugweneno marova ama uga rai,
muno awa koke ntuna ti mbe anaibeo make anate mansai.
12Yara risy akari titi vatano Israel, rinanayanambe weye Amisye Po inayaranande;
muno vatano wo Amisye Apa tame veano awa urairije raokaisye nawamo umananibe ukangkamambe Ai.
Yara vatano wo aarurijate ratore nawamo indati Amisye Po mawa rakuvu.
Currently Selected:
Masmur 63: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
