Masmur 135
135
AMISY Obo pirati mamaisyo ararimbe
1AMISY ararimbe!
AMISY Apa tame rararimbe!
Inya, vatano wapanapatambe AMISY Ai weap, wapo ararimbe!
2Inya, syeno wapanapatambe AMISY Ai no Apa Yavare uga weap,
weapirati wade wasambayambe no wama Amisye Apa Yavare ama wanijate.
3Wapo AMISY ararimbe weye Opamo kov dave,
wakinyo ransyerane rai, wapo Apa Tame rararimbe weye Opamo aemeno wansai rave.
4Weye AMISY Po Yakop apa susye matayao terave amarom,
Israel wenawirati kawasae taune Apa ura terave mai.
5Weye syo raen tugae, AMISY Opamo panakoeve rave,
Wepi rati Akoe, titi rave Po anawayo kotaro vatane wo masyanive makivan bintabo.
6Anakotar tenambe AMISY bekedaije mamo Po rave,
nai naume warae muno mine so,
mayane muno nawanano ntento.
7Nai mandepe ama ruduke rai, Wepi Po kamure raveti ntipu ti nde,
Wepi Po ivake raveti ntavono maruge rai,
muno Wepi Po ovare atutir indamu puje no apa tipugo raije rai.
8Wepi Po arikainyo anui vatano Mesir mao bintabo,
muno awa maere kotaro wo makume awa tuvano manasyin dave matavon.
9Wepi Po anainame muno anapaporainye rarorono vatano Mesir mai,
omamo mangke Po raugaje irati Piraon muno apa aneneme mai vintabo.
10Wepi Po susye kotare wanui mataopon,
muno Po awa akari titi awa vambunine rangkakeraive mansao:
11Wenawamo Amori awa akari titi Sihon,
munijo Basan awa akari titi Og,
muno akari titi susye kotaro ntuna no munijo Kanaan.
12Umba Po awa kopa raunanto irati Apa kawasae Israel mansai,
indamu Apa kawasae Po matayao so awa ura rai tawan tutir.
13Sya AMISY, Nya tame mamo indati no pitawabe ntoa nuge nuganui,
muno sya AMISY, Nya tame mamo indati susyo miridi nto wo raen.
14Weye AMISY Po moyare rapatimu Apa kawasae mansai,
muno aemen irati Apa vatano wanapatambe irati Aije mai.
15Susye kotare nanawamo ubeaje irati yaro taune wo ranari maneme raije rai,
omamo wo ranari irati peraki muno emasi rai.
16Mawa no mai, weramu wayaove kakai,
mamije no mai, weramu wo nuge raene jewen,
17mamarikoame no mai, weramu wo ana ranaune ramu,
weye manawayo meweno mai.
18Vatano wo yare ranari muno vatano wanave rai,
wenawamo indati awa vambunine meweno mai maisyare awa yare ramaisy.
19Inya, kawasae Israel, wapo AMISY ararimbe!
Inya, syeno susyo Harun, wapo ararimbe!
20Inya, vatano susyo Lewi#135:20 Susyo Lewi wanapatambe no Yavaro Amisy ama uga rai, wanapatambe irati syene awa anakere rai., wapo AMISY ararimbe!
Inya, vatan tenambe wabeaje AMISY Ai weap, wapo ararimbe!
21Wapo AMISY ararimbe no unato Sion,
nai Yerusalem Apa tuna ri.
AMISY ararimbe!
Currently Selected:
Masmur 135: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
