Masmur 129
129
Amisye anajo indamu Po kakai rasakinavo marova mai
1Ransyerano Israel ukiny dai arono wanya usea no Yavar Amisy no Yerusalem.
‘‘Wama marova wo wansansuimbe no arono manasyine wea ndea naiso.’’
Omamo syare vatano Israel wapo raura nakato, wapare:
2‘‘Wama marova wo wansansuimbe no arono manasyine wea ndea naiso,
weramu wo wansapinde kakai.
3Wo wansanepati ti pare ntuna wansakiri mona so rai janyi,
maisyare vatane wo kopa rakarore ravabari ti ngkaipiti wemaisy.
4Weramu AMISY Opamo moyar,
Po wansapaya vatano mamune awa vambunine rai to.’’#129:4 Ayao Ibrani maisyare so: ‘‘Po inapaya irati vatano mamun awa kaijo waije rai.’’ Arono vatano Israel una no munijo aroo Mesir, vatano mamune wo kaijo waije veano vatano Israel manepato mansakiri mona rai, wo mansantitidi mangkebe awa anakere rai.
5Vatano mansanuga mamuno Sion#129:5 Unato Sion no no Yerusalem, Yavaro Amisye ntuna rije. rai nawamo,
koveamo Nyo mapinde indamu wansuk akirive usamane.
6Koveamo onawamo maisyare insumai ntubai no manyume von,#129:6 Arono wusyinoe vatano Israel awa yavare mamo yavaro oram ama vone mavae vayave muno kopa ntuna rai, weti intanamo insumai ntubai rai.
arono ntubai kaijoe, vatane wo rapatin akato ti mewen.
7Insumai umaso mo ininai ntubai no nawaisye ramaisy,
vatane wo raugave ramu yara wo rapatin ti ntuna vayave.
8Weti vemo vatane inta ube arakobe mai jinya,
vemo wo kove raura mai jinya, muno vemo usambayambe mai nora.
Currently Selected:
Masmur 129: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
