Ananyao 26
26
1Maisyare maru maje arono none tami muno arono uma mamoana nuge nanayao dave, wea mo ramaisye ramu,
maisyare omaisy vatano ponae anyao pa aijaseo vombea mo ramaisye ramu.
2Maisyare insani kamantiovan ujari tawan no kakavine warae wakaje mine rai jewen,
maisyare omaisy, anaamatano rave vayave vatano apa ana inta ngkakai jewene ai oma indati nande ai jewen.
3Kuda akiri mamo vuga omane veano ratamo rave, keledai apa isyisye mamo waije raporo rai rave, wirati ibeta nya mbekere rai,
maisyare omaisy vatano ponae anyao pamo kaije mantiro akiri mona rai rave.
4Vemo nyo vatano ponae anyaobe apa ayao rasakinavo apa pantatukambe rarijati nora,
indamu vemo winyo amaisy tavon inya.
5Arono vatano ponae anyaobe inta po apa pantatukambe raura nai, syare nyo ayao tugae obo raura kakavimbe ai mavabe,
indamu vemo po taune ararin inya.
6Arepi po vatano ponae anyaobe atutir inda to po apa ayao daura raura inta mai,
omamo maisyare taune po ajo radaut muno po ana ngkakai rawainde taune ai.
7Vatano ponae anyaobe po ananyao matu raura,
omamo maisyare vatano ajo no ivae weramu tunaive wemaisy.
8Vatane ubeajeo vatano ponae anyaobe aija mamaisye ramu,
weti amaisyare vatano po ato aokae matuve apae wine rai ti ratapoa to kakai wemaisy.
9Ananyao matu namirati vatano ponae anyaobe po raura omamo ama kove inta me ramu,
oma maisyare anaansinao patoto vatano maene aneme rai rauguje.
10Arepi po anakere raugaje vatano ponae anyaobe ai muno vatano kai vayave mai,
oma maisyare vatano po ato ratapo tatugadi vayave ti mo pare raugavo vatane mai.
11 #
2 Petrus 2:22
Maisyare make sarirae ti po apa nyinyoe raisy akato,
maisyare omaiti vatano ponae anyaobe pamo sarirae ti pakare po apa pantatukambe obo rave rijati tutir.
12Nyo vatano po taune akaraeya pare apa datantona ntiti aen,
opamo anyaowa nsosobe raveo vatano ponae anyaobe ai jakato.
13Napi pononae ti nove yavare bo rai pangkarive pare, ‘‘Make sivuinye pi no no unanui!
Make sivuinye no unanui raita raorana!’’
14Maisyare unsanda ama kawije ransawa ti matu umba raijadea ngkintunive,
maisyare omaisy napi pononae pa niki sariraebe vayave no vasyoto niki ri.
15Napi pononae pamo aneme rapaasyo anaisye rai no paurai ama uga,
weramu amune mpanyoano po raijaseo dausiso no awa raiji.
16Napi pononae pamo po taune akaraeya pare obo pi apa datantona mba dave,
po rakaraeya pare opi po vatano kaururumo wo ayao mamaisye raura makivan.
17Vatano to saowave vatano kai awa wayaowije rai,
opamo maisyare vatano pare pavakato po make sivuinye amarikoame raijar wemaisy.
18Maisyare vatano be anaivive inta po ato sansinao,
inta ratapo seo anyi ti vatane ugweneno rai,
19maisyare omaisy vatano po apa arakove maponaibe,
pangkarivea pare, ‘‘Somamo ta ibaon bayave ma.’’
20Ranivara nuja mewen, wea taname mpamo;
ranivara vatane inta wayao inta mai vayave jewen, weamo arare ma anamainitu rai.
21Maisyare tananama maweso nen muno nuja ma taname nen dai,
maisyare omaisy, vatano apa ayao mamoan mo arare raveti ntipu.
22Vatane inta mawa manavan daveyo wo vatane maura vayave ana mamaisye jewene inta rai,
weti vatane wo raunta no manuga to wemaisy.
23Maisyare kavinonamo perakije veano raiman ti ngkena dave, weramu oma ranari irati kopa rai,
maisyare omaisy vatane apa ayao ma manavan dave weramu anuga mamo ngkakaija.
24Vatano anuga ngkakai nai po ayao manavane veano naponae,
yara po natantona kakaive ma no anuga rai.
25Arono payao saumambe nande nai, vemo nyanave ai nora,
weye ana ngkakai obo mi no anuga rai.
26Ayao aarurijate raura inda mo anuga mamuno vatane mai rangkokaibe,
yara apa ana daveti ngkakaije mamo vatan tenambe wo raena.
27Arepi po ateme rawae inda mo vatane mansaman, wea indati taune temasyo rai,
arepi po orame raroyaro vatane mansaron, wea indati ndoyar ti makare mo taune atukamiri.
28Arepi po aarurijate ratoro yasyimbe vatano kaijinta mai, opa anuga mamuno mai muno po mave pabe to ije,
muno ayao manavane rave mo kakai ratande.
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)