Lukas 8
8
Kare uluh bawi je mandohop Yesus
1Limbas jite Yesus tulak bara kota akan kota tuntang bara desa akan desa. Iye mansanan kabar je bahalap akan uras uluh are mengenai karajaan Allah. Tuntang kadue belas biti murid-Ah umba pahayak Iye kea. 2Tuntang kea pire-pire uluh bawi je jadi imbebas awi Yesus bara kawan roh je papa tuntang mampakeleh bara karen panyakit, jadi manampa jalanan'ah umba Yesus. Yete Maria Magdalena bara kota Magdala, je jadi imbebas bara uju roh je papa, 3Tuntang Yohana sawan Chuza bandahara ayun Herodes, tuntang Susana tuntang kea are bawi je beken. Kawan bawi te mandohop Yesus tuntang kawan murid-Ah te hapan ramun ewen.
Suntu mengenai ije biti uluh pamalan
(Mat. 13:1-23; Mrk. 4:1-20)
4Intu ije andau, metuh Yesus mansanan kabar bahalap karajaan Allah akan uluh are bara karen kota hakumpul mangarumbung Yesus. Limbas te Yesus mangguna karen suntu akan majar mengenai kabar bahalap karajaan Allah akan ewen.
5Suntu te yetuh auh'ah: Ije biti uluh pamalan manawur binyi intu tana'ah. Metuh iye manawur binyi te sebagian manjatu intu saran jalan. Balalu binyi te kana injak awi uluh tuntang ikinan awi kawan burung bara langit te sampai lepah. 6Kilau te kea binyi je manjatu intu petak babatu. Kare binyi te uras belum ih tapi manjadi balayu awi jatunti badanum. 7Tuntang tege kea binyi te je manjatu intu pulau ruwut je baduhi. Kare binyi te bahali belum awi pulau ruwut je baduhi je mahapit binyi te sampai matei 8Tuntang tege kea binyi manjatu intu petak je bahalap. Binyi te belum dengan bahalap sampai mandinu hasil saratus kali lipet. Limbas jadi mansanan'ah kare suntu te Yesus hamauh: “Eweh uluh je tau mahining narai je jadi Aku sanan'ah, keleh ih iye ba'usaha mangertiah.” 9Balalu kawan murid Yesus bakisek umba-Iye: “Naraikah arti bara kare suntu te je jadi Ikau mansanan'ah te?” 10Balalu Yesus manjawab'ah: “Allah jadi manenga kamampuan akan ketun tau mangerti kare hal je tasahukan mengenai Karajaan Allah. Tapi Aku mansanan'ah suntu te akan majar uluh je dia umba Aku akan malalus narai je jadi inyampaiah awi nabi Yesaya bahwa ewen akan mananture narai je Aku nguanah tapi dia akan mangerti maksud'ah, tuntang ewen akan mahining narai je Aku sanan'ah tapi dia akan mangerti maksud'ah.” 11Yesus mansanan akan ewen arti bara suntu te: “Binyi je imbul te yete auh ajaran Allah.” 12Petak intu saran jalan sama kilau uluh je jadi mahining auh ajaran Allah, balalu roh je papa dumah manduan auh Ajaran Allah te bara huang atei ewen, mangat ewen dia percaya tuntang dia inyalamat. 13Petak je babatu sama kilau uluh je jadi mahining auh ajaran Allah tuntang manarima'ah dengan hanjak. Tapi uluh te dia bauhat sampai dia manguanah auh ajaran Allah je jadi iye hining ah maka uluh te dia percaya umba Allah intu katika je masalah 14Balalu petak je intu pulau ruwut je baduhi sama kilau uluh je mahining auh ajaran Allah te. Tapi pire-pire katika limbah te, iye impangaruh awi kakikeh, ramu, tuntang kamangat belum intu dunia sampai iye dia belum secara rohani. 15Petak je bahalap te sama kilau uluh je mahining tuntang manarima auh ajaran Allah te intu huang atei tuntang huang pikiran'ah. Iye kea manguan auh ajaran Allah te tuntang taat umba Allah.
Suntu Mengenai lampu
(Mrk. 4:21-25)
16Yesus malanjutah, metuh uluh mamapelum sumbu'ah, iye dia manutupah mahapan ketel atawa ma'andakah intu penda meja. Sebalik'ah, iye ma'andakah intu uka je gantung atawa hunjun meja, mangat tau mampalawa uras uluh je munduk intu huma te. 17Awi, uras sesuatu je inyahukan atawa dia uluh katawa intu akhir'ah akan ingatawan tuntang manjadi gitan. 18Awi te, hining ih bujur-bujur narai je ajar Ku, awi uluh je handak mangerti narai je Aku ajar'ah, Tuhan akan manenga are tutu pangertian, tapi akan uluh je dia handak mangerti, Tuhan akan manduan karati'ah je jadi ewen tempu'ah.
Yesus tuntang kawan pahari-Ah
(Mat. 12:46-50; Mrk. 3:31-35)
19Huang ije andau, metuh Yesus majar, indu tuntang kare andi-Ah dumah handak manyundau Iye. Tapi awi uluh are je mangarumbung intu kalilingah sampai ewen dia tau manukepah. 20Balalu ije biti uluh hamauh umba Yesus: “Indum tuntang kare andim-Mu tege intu hetuh handak manyundau Ikau, tuntang ewen manunggu intu luar.” 21Balalu Yesus manjawab auh ewen te: “Aku manganggap ewen je mahining atawa percaya auh Ajaran Allah tuntang manumun'ah narai je iander ah iye te sama kilau indu tuntang kare pahari-Ku.”
Riwut barat impatende ah
(Mat. 8:23-27; Mrk. 4:35-41)
22Intu ije andau, Yesus hamauh umba kawan murid-Ah: “Ayu itah mandimpah danau tuh akan sila.” Balalu, ewen lumpatah akan jukung tuntang tulak. 23Metuh ewen miyar, Yesus metuh te batiruh. Salenga dumah riwut barat hariwut intu danau te, tuntang jukung ewen iname awi danum are tutu sampai ewen handak bakahem. 24Balalu, kawan murid tulak mampisik Yesus tuntang hamauh: “Oi Guru, dohop ikei, awi ikei handak matei!” Yesus hingkat tuntang mampatende riwut tuntang galumbang, balalu riwut tende hariwut tuntang danau haluli manjadi teneng. 25Balalu Yesus hamauh umba kawan murid-Ah: “Buhen ikau tuh dia percaya umba Aku?” Kawan murid-Ah manjadi mikeh tuntang heran, balalu ewen bapander sama arep ewen: “Uluh macam naraikah Iye tuh?” Sampai karen riwut tuntang danum te uras manumun auh-Ah!
Yesus mambuhau roh je papa bara uluh kota Gerasa
(Mat. 8:28-34; Mrk. 5:1-20)
26Yesus tuntang kawan murid-Ah sampai intu pantai tukep kota Gerasa, je tege intu silan danau je tege intu daerah Galilea. 27Limbas te, Yesus tuntang kawan murid-Ah lumpat akan pantai te. Intu kota Gerasa te tege ije biti uluh hatue inyarung awi roh je papa. Tuntang iye dia babaju pakayan tuntang jatun huma'ah tapi iye melai intu uka kare kuburan tuntang kare gua. 28Metuh uluh te mananture Yesus, iye nangkariak tuntang sujud intu taharep pain Yesus. Uluh te kea hamauh dengan suara je hai tutu: “Yesus, Anak Allah je Hai tutu, buhen Ikau manderoh ikei, dohop ih ela mahukum ikei.” 29Balalu uluh te nangkariak awi Yesus jadi manyuhu kare roh je papa te: “Balua ih bara uluh tuh!” Kare uluh je jadi mameteng dengan rantai tuntang manjaga'ah tapi tatap ulih'ah malekak rantai te. Pire-pire kali kawan roh je papa te manyarung tuntang mangandali'ah tuntang mamaksa'ah akan tulak mangguang uka je benyem. 30Yesus mangisek umba iye: “Eweh aram mu ikau tuh?” Uluh te manjawab'ah: “Aran ikei tuh Legion Tentara.” Iye mansanan aran te awi are roh je papa je manyarung uluh te. 31Limbah jite kawan roh je papa te tatap balaku umba Yesus mangat Iye dia manyuhu ewen akan tame intu huang rumbak je handalem tutu.
32Metuh hal jite tarjadi, intu hete are kawan bawui je metuh manggau panginan'ah intu tukep pain bukit te. Kawan roh je papa te balaku umba Yesus manyuhu ewen tame intu huang kare bawui te tuntang Yesus kea manumun auh ewen te. 33Balalu, kawan roh je papa te balua bara uluh jite tuntang ewen tame huang kawanan bawui te. Balalu kea kawan bawui te tangkeru capat tutu akan saran tiwing bukit te tuntang manjatu akan danau balalu bawui te matei buseng
34Metuh uluh je manunuh kawan bawui te mananture narai je tarjadi dengan kawan bawui te, balalu ewen te buhau bara hete awi mikeh. Ewen tulak akan lewu tuntang akan tana je sakitar'ah tuntang mansanan kea narai je jadi tarjadi akan uras uluh. 35Limbah te are uluh tulak mangguang hete akan mananture narai je jadi tarjadi te. Sampai ndai ewen uka Yesus te tege tuntang mananture uluh je kasarungan roh je papa te jadi keleh awi Yesus metuh te munduk intu baun pain Yesus dengan tenang. Tuntang uluh te impakayan je bahalap awi iye jadi keleh tutu. Uras uluh are je mananture te, ewen uras mikeh umba Yesus. 36Ewen je jadi mananture narai je jadi tarjadi te mansanan'ah akan uluh are kilenampi uluh je inyarung awi kawan roh je papa te inyalamat awi Yesus. 37Balalu uluh intu daerah sakitar kota Gerasa balaku umba Yesus mangat tau buhau bara daerah ewen te, awi ewen mikeh tutu umba Yesus. Balalu, Yesus tuntang kawan murid-Ah lumpat akan jukung tuntang buhau bara uka te. 38Sahindai Yesus tuntang kawan murid-Ah tulak, uluh je kasarungan roh je papa te balaku umba Yesus: “Imbit ih aku umba Ikau.” Tapi Yesus manyuhu uluh te haluli akan uluh are tuntang hamauh, 39“haluli ih akan kare keluargammu tuntang sananih akan uras uluh mengenai uras je jadi Allah nguan akam mu.” Balalu, uluh te tulak akan uras kota tuntang mansanan akan uluh are: “Yesus jadi manguan kare hal je bahalap tutu akangku.”
Yesus mampelum anak Yairus tuntang mampakeleh ije biti uluh bawi je pandarahan
(Mat. 9:18-26; Mrk. 5:21-43)
40Metuh Yesus tuntang kawan murid-Ah sampai intu silan danau intu daerah Galilea, uluh are manyambut-Ah awi ewen uras manunggu pandumah-Ah. 41Limbah te dumah ndai uluh je ara te Yairus, uluh je jadi imam intu huma ibadah, balalu iye sujud intu taharep Yesus tuntang balaku umba Yesus mangat tau dumah akan huma'ah, 42awi anak'ah je bawi haban paham tutu tuntang handak matei.
Anak'ah te baumur due belas nyelu tuntang iye anak bawi kabuatah. Balalu, Yesus tulak umba Yairus, tuntang katika Iye mananjung, uluh are mangarumbung Yesus bara kueh bewei. 43Intu helat kakaren uluh te, tege uluh bawi haban awi pendarahan katahin due belas nyelu. Iye jadi mampalepah karen duitah hapa batatamba tapi jatun tau keleh. 44Balalu iye dumah mangguang Yesus bara likut tuntang manekap tapakan jubah Yesus. Metuh te kea pendarahan ah tende tuntang iye keleh kea. 45Balalu Yesus hamauh: “Tege uluh je manekap Aku. Eweh kah iye te?” Tapi uluh are mansanan'ah bahwa ewen dia manekap-Ah, tapi Petrus tuntang karen uluh je umba'ah hamauh: “Guru, awi uluh are je mandorong Ikau tuntang kea buhen Ikau misek auh hal jite?”
46Tapi Yesus hamauh: “Tege uluh je manekap Aku dengan sengaja, awi Aku mangkeme tege kuasa je balua bara Aku.” 47Tuntang uluh bawi te mikeh bahwa Yesus jadi mangatawan narai je jadi inguanah, iye dumah manukep dengan hagenjeh tuntang sujud intu taharep Yesus. Metuh te uluh are uras mahiningah, tuntang kea uluh bawi te mansanan alasan'ah manekap jubah Yesus te mansanan kilenampi iye tau keleh metuh jite kea. 48Balalu kea Yesus hamauh umba bawi te: “Oi uluh bawi je paling inyayang, awi iman mu ih umba Aku je jadi manyalamat ikau. Awi te buli ih tuntang mundahan Allah tau manenga kasanang kamangat-Ah akam mu.”
49Katika Yesus metuh bapander dengan bawi jite, dumah ih ije biti uluh bara keluarga imam huma ibadah tuntang hamauh umba Yairus: “Anak bawimmu jadi matei.” Awi te, ela manderoh guru ndai. 50Metuh Yesus auh hal jite, Yesus hamauh umba Yairus: “Ela ih ikau mikeh, tatap ih percaya umba Aku tuntang anak mu akan inyalamat.” 51Metuh Yesus sampai intu huma Yairus, Iye cuma mimbit telu biti murid-Ah, Petrus, Yohanes tuntang Yakobus tuntang uluh bakas bawi jite balalu tame huang kamar uka intu hete hantun bawi te impenter. 52Metuh ewen tame akan huma te uras uluh are hete manangis tuntang masi umba anak te. Tapi Yesus hamauh: “Ela ketun manangis; awi iye dia matei, cuman batiruh ih.”
53Metuh ewen mahining auh jite, ewen mambaka'ah, awi ewen katawan bahwa bawi te jadi matei. 54Balalu Yesus mangguang bawi jite tuntang manekap lengeah tuntang kea sambil hamauh: Oi Anak-Ku, misik ih! 55Limbas te dengan segera bawi te belum haluli tuntang hingkat. Balalu Yesus manyuhu uluh bakas'ah manenga panginan'ah. 56Uluh bakas'ah puna heran tutu. Yesus mameteh umba ewen: “Ela masanan akan eweh bewei narai je jadi tarjadi te.”
Currently Selected:
Lukas 8: AMGV
Highlight
Copy
Compare
Share
Want to have your highlights saved across all your devices? Sign up or sign in
Manuhing Bible by Beyond Translation is licensed under Creative Commons Attribution-ShareAlike 4.0 License.
