Matius 9

I Yesus pamaam tau tamateen mantuarina

Mk. 2:1-12; Lk. 5:17-26

1Jaji barik i Yesus mauwat bapi di parauen, manarear bapi lo'a banuana. 2Jaji mondok isuali inang, andian tau mawa tau apadisen di lenga'anna, yang tamateen mantuarina. Mamele barik i Yesus lo'a dinen, datamu barik kaparasaya'anna. Jaji manjarum i Yesus lo'a tau dinen, “Maam, pakarasang atenu anake. Dosanu mamin iamponi,” ingka kenang lo'a.

3Jaji barik gulungan toa adaten yang mandalingaan lo'a jaruma i Yesus de'i, manjarum ira ilalam atena, “Asi tau dinen pajau'-jau'a lo'a Alatala,” ingka kenang.

4Jaji barik i Yesus manjarum lo'da' kole'a datamuna pikiranda' dinen, “Asi kenang maam-maama pikirannin yang ajau'en? Na'ankin parasaya' lo'a kuasaku' pande mamponi dosaan? 5-6Daiak Anak Mantuariin, andian lalo kuasaku' indi'ang di duniaan itiang mamponi dosa tauen. Lo'ku' kosan jalu badidit. Mamponi dosana pande, manyuro' akadeng, manyuro' lamba'pi pande. Na, kumeangkin tanda bukti mainto' itamuna ikin kuasaku' itiang mamponi dosaan,” ingka kenang. Jaji barik mamalin bapi jaruma i Yesus lo'a tau tamateen mantuarina dinen, “Daiko akadengko barik. Angkat ale'u laloang lamba'ko mole',” ingka kenang. 7Jaji barik tau yang tamateen mantuarina dinen akadeng laloang lamba' mole'. 8Gulungan tau babangkulungen yang mameleen de'i, kenang atakut, kenang tatakau mamelena. Samuana mamudi lo'a Alatala yang mainya'en mameang kuasa balu'a dinen lo'a mantuariin.

I Yesus mala lo'a i Matius

Mk. 2:13-17; Lk. 5:27-32

9Jaji barik i Yesus lamba' bapi, dakita andian tau aduduken di kantor sukaien, i Matius asanna. Jaji manjarum i Yesus lo'a i Matius, “Se' malola'ko lo'ku',” ingka kenang i Yesus. Jaji i Matiuspi barik mainya' bea malola' lo'a i Yesus. Akadengpi daia terus malola' lo'a.

10Jaji barik i Yesus dinen angkaan di saona Matius. Andian bea tamba inang ambata tau panarima' sukaien nanna tau yang na'anen bayok malola'ani agama Yahudiin yang daasanen tau badosaan kole'a gulungan Parisiin. 11Jaji ambata tau Parisiin mamele awan dinen, manjarum barik ira lo'a palola'a i Yesus, “Ai lo'a Gurunin mainya'a sarilao' angkaan, aduduk ibiringa tau panagi sukaien nanna tau badosaan?” ingka kenang jarumda' lo'a palola'a i Yesus.Lk. 15:1-2.

12Jaji barik dadalinga dinen kole'a i Yesus, dasaut mamakai sama' jaruma, “Ai lo'a, intain tau yang paruluun lo'a dokteren? Okan tau yang paruluun lo'a dokteren tau babago'en, tau bangasen. Yang paruluun lo'a dokter, dinen tau apadisen, tau ajau'en,” ingka kenang. 13“Kole'a pamondokku' di'en, okanak mondok mangampitang tau maminen tapat di arona Alatala kalo'aan. Okan bea pamondokku' di'en lo'a tau maminen manamu ratina. Pamondokku' di'en lo'a tau yang badosaan, lo'a tau ajau'en. Kenang pamondokku' di'en,” ingka kenang i Yesus. "Poangsi daikin subakin balajar ratina jarum di'en,

“Yang kusariin di'en okan poang pamindaraan. Yang kusariin mainto' tauen mangamase'i sera lo'a seraan, Hos. 6:6.

ingka kenang ilalam Jaruma Alatala yang datulisangen,” ingka kenang i Yesus manyautina lo'a tau Parisiin.Mat. 12:7.

Adat joloon ada' ipasibarokanga nanna atoran baruun

Mk. 2:18-22; Lk. 5:33-39

14Jaji barik mondok dinen gulungan palola'a i Yohanes Pambaptis mangatoani lo'a i Yesus, “Ai lo'a? Daikam di'en bapuasakam. Tau Parisiinpi bapuasa. Poangsi daiko palola'u na'an bapuasa. Ai ratina yang kenangen?” ingka kenang palola'a i Yohanes Pambaptis lo'a i Yesus.

15Jaji barik dasauti kole'a i Yesus, “Asi lo'a bapuasana palola'ku'? Umpamana tau iantat arainyeen, susa te' pangabangen ti' lagi'pi andian babaka dinen nanda'? Tentu na'an. Poangsi andian ona' asona, to' dala babaka sialaan dinen. Mamin ona' talalo, mamin dala, baru' bapuasa arakawanna,” ingka kenang i Yesus manyautina lo'a palola'a i Yohanes Pambaptis. Diri'a dasama'ang awan tau yang iantat arainyeen.

16“Ai lo'a ibarokanga atoran joloon nanna atoran baruun? Umpamana kain maminen bauruk, ai lo'a itampangina nanna kain yang babaruun yang nampiin ikusuk? Na'an mainya'! Kole'a kain bauruken maunda aripaka. Kain baruunpi dinen mamin ikusuk mainya' tasintaka manyuro' aripak lo'a biringa yang itampangiin, manyuro' insang ajau',” ingka kenang i Yesus lo'da'.

17“Kenang bapi nanna danum angguren. Ati' danum anggur baruun, ai lo'a idisi'anga lo'a kambut kulit yang joloon? Tentula atatas kambut joloon kole'a akambanga, atumbang. Arugi barik danum angguren, kenang bea kambuta,” ingka kenang. “Yang mandua'en, anggur baruun arung idisi'ang ilalam kambut kulit yang baruun. Baru' kosan rugina,” ingka kenang sama' jaruma i Yesus lo'da'.

Anaka i Yairus nanna babainyeen yang manjaput kaina i Yesus dapamaam

Mk. 5:21-43; Lk. 8:40-56

18Jaji patanga'an manjaruma i Yesus dinen, mondok barik dinen panguluan sao sambayangen malingkutut ijolona i Yesus. Jaji barik manjarum, “Malaak lo'u,” ingka. “Mate di' anakku' babainyeen. Suba ilamba'i iko, ijalaang tangannu lo'a mainto' tio'a,” ingka kenang. 19Jaji barik dinen, i Yesuspi tamba nanna tau panguluan sao sambayangen. Tamba bea palola'a.

20Patanga'an lamba'a i Yesus dinen, andian babainyeen mainso'i lo'a i Yesus dari balakanga. Babainye dinen mamin dua belas taun padisa. Kamamase'a na'an tadang-tadang. Adara' lapoang. Jaji mainso'i babainye dinen manjaput rombo kainna. 21“Asal kukule'pi manjaput kainna, jaji lalo. Maamak kole'a,” ingka kenang babainye dinen ilalam nyawana.

22Jaji maminna dajaput kainna, i Yesus koengang kalena mamele lo'a babainye dinen, “Pakarasang nyawanu anake. Maminko maam kole'a kaparasaya'annu,” ingka kenang lo'a. Laloang nanga dinen maama padisa babainye dinen, tadang adara'a.

23Jaji maminna dinen de'i, i Yesus intama di saona tau dinen de'i yang panguluan sao sambayangen. Mondok lo'a dinen, dakita inang bayu' tauen manaba' suling, madan-mau manangisi tau mateen. 24Jaji manjarum lo'da', “Se' minsaluankin,” ingka kenang. “Kosan jalu mate babainye dinen, tindo'a poang dini,” ingka kenang. Jaji ira dinen mananawai poang lo'a, na'an parasaya'.

25Mamin akaus dasuro' minsaluan tauen, dalamba'i barik nangkanak dinen. Datangko' barik tanganna nangkanaken laloang aduduk nangkanak dinen. 26Jaji barik dongona dinen tadongo kira tatak banua sasara propinsi dinen.

I Yesus pamaam tau bautaan nanna tau abisuun

27Jaji barik i Yesus lamba'. Patanga'an lamba'a dinen andian tau malola'en lo'a, dua tau bautaan, babaka dua-duana. Jaji mangalong dinen lo'a i Yesus, “O tau kanturunanna baki' Raja Daud, kamase'i ikam!” ingka kenang jaruma tau bautaan dinen lo'a i Yesus.

28Jaji i Yesuspi dinen lamba' intama di saoen. Jaji intama di saoen dinen, tau bautaanpi dinen mondok lo'a dinen. Jaji mangatoani i Yesus lo'da', “Ai daikin, parasaya'kin lo'ku' andianna kuasaku' dapatku' pamaam lo'in?” ingka kenang manjaruma i Yesus lo'a tau bautaan dinen.

“O' bea Paraampuane, parasaya'kam,” ingka kenang ira manyautiin.

29Jaji barik i Yesus dinen manjaput matada'. “Na, maam matanin barik. Saimbang bua nanna kaparasaya'annin maama,” ingka kenang lo'da'. 30Laloang maam matada' dinen. Jaji i Yesus bakaras manjaruma lo'da', “Ambakinto'kin manjarum mawa dongoon di'en lo'a tauen,” ingka kenang. 31Poangsi ira dinen de'i na'an paduli jaruma i Yesus dinen. Dapandongoang lo'din, lo'din kira tatak banua daerah dinen.

32Jaji minsaluan yang tau bautaan dinen, mondok bapi dinen tau yang mawa tau dasarung jalu ajau'en, yang tau abisuun. 33Jaji i Yesus maruru jalu ajau'en dinen. Mamin barik daruru, datamu barik manjarum tau dinen. Jaji barik tatakau tauen, “Nampiki' kala' maita jalu awan dinen di banua Israel,” ingka kenang tauen manjaruma.

34Poangsi manjarum barik dinen gulungan tau Parisiin, “Kuasana dinen kuasana panguluan jalu ajau'en, ialalo dapadulina. Ialalo dapata daruru gulungan jalu ajau'en,” ingka kenang manjaruma tau Parisiin.Mat. 10:25; 12:24; Mk. 3:22; Lk. 11:15.

Na'an tuli tau mangarajaang uma

35Jaji i Yesus dinen malamba'i kira tatak banuaan. Maira banuaan dinen majara di sao sambayangen manjarumang dongo maamen kole'a to' mondoka baya Alatala to' mangkama lo'ka' awan rajaan. Yang tau apadisen kira baranana dapamaam kausana.Mat. 4:23; Mk. 1:39; Lk. 4:44. 36Jaji barik dakita dinen tau babangkulungan, talola' atena i Yesus lo'da'. Kole'a ira babangkulungen, bayu' kalangganganda', bayu' susada'. Awan lalo kalompok dombaan ira, yang angkosanen panguluanna. Na'an datamu urait kalaut.Bil. 27:17; 1Raj. 22:17; 2Taw. 18:16; Yeh. 34:5; Sak. 10:2; Mk. 6:34. 37Jaji barik manjarum dinen i Yesus lo'a palola'a, “Aseka' di'en ada'a ikatam. Bayu' bua'a aseka'. Poangsi daiki' di'en kurang jaji tanagaka',” ingka kenang. 38“Arungki' bado'a lo'a tau ampuna umaan di'en, isuro' mawa tau,” ingka kenang i Yesus mamakai sama' jaruma lo'da'.Yes. 35:5-6; Lk. 10:2.

Currently Selected:

Matius 9: EBE

Highlight

Copy

Compare