Matius 7

Ada'ki' mawa ate bakarasen yang to' pajau' lo'a tauen

Lk. 6:37-38,41-42

1“Ada'ki' mawa ate bakarasen. Ada' pasala'en lo'a tauen, mainto' na'anka' dapasala'. 2Kole'a ati'enki' pasala' lo'a tauen, awan dinen bea dapasala'ka' kole'a Alatala. Sesuai nanna takaran mameangka' lo'a tauen, awan dinen bea mamalasa lo'ka'.Msm. 50:10-11; 73:25; Yer. 17:7-8; Plp. 4:4-8. 3Asi lo'a daiki' ibelena iki' jalu akeke'en di matana arasairunka', padahal pakayuun di mata diri'ka' pande na'an ipaduli?#7:3 Papalak darum di biring jawaan pandeen dakita, gaja di talapak mataka' na'an ikita. 4Baraniki' kakaru' manjarum lo'a, Se' jalu arebo' di matanu kudunjang. Padahal andian pakayuun di mata diri'ka'! 5Dinen lalo tau mamis baba'a masam atenaan. Yang maamen, arung idunjang iki' tajolo pakayuun yang di mataka'en. Baru' maam mataka'. Itamu iki' barik maunjang jalu akeke'an di matana arasairunka',” ingka kenang.

Jaruma Alatala na'an daragai kole'a tauen sapa dua

6“Ambata jalu bareseen, ada' idunjukanga lo'a gulungan asuun. Ungka'en ona' asuun dinen koengang kalena mokot lo'ka'. Ati'en mutiaraan, ada' itampeanga lo'a gulungan bawiin. Ungka'en ona' dalat-lat poang kenang,” ingka kenang sama' jaruma i Yesus lo'da'.

Tau mamitaan to dameang bua kole'a Ama'ka'

Lk. 11:9-13

7“Jaji se' mamitaki' lo'a Alatala, ka' bea dameangka'. Se' manyariki' lo'a, ka' bea idua'anga. Se' manodokki' di mambanganna, ka' bea dabae'angka'. 8Kole'a intain yang mamitaan tentu to' dameang bua. Intain dinen yang manyariin, to' mandua'ang bua. Intain yang manodoken to' dabae'ang bua,” ingka kenang.

9“Umpamana yang daiki' babakaan, ti' andian anakka' mamita jalu kaan, na'an patut imeang batu. 10Ti' mamita lauken itiang patamaan, na'an patut imeang urar yang balasaan. 11Na, ti' daiki' tau ajau'en itamu iki' mameang jalu maamen lo'a anakka', ai lagi' maama Ama'ka' di Surga. Ti'enki' mamita lo'a Ama'ka' dinen, tentula dameangki' bua gulungan jalu maamen,” ingka kenang.

12“Jaji basaka' lo'a tauen kenang. Ati'en daiki' kakadakka', kakadaka bea tauen. Dinla basa ipakaien lo'a tauen. Awan dinen lalo akata gulungan Ukuma baki' Musa nanna pangajaranna gulungan panjaruma Alatala,” ingka kenang i Yesus lo'da'.Lk. 6:31.

Lo'a inde tujuanna mambangan baraa'en?

Lk. 13:24

13“Ti'ki' to' intama, intamaki' lo'a mambangan asandaten. Kole'a mambangan yang baraa'en buka'a, dinen lalo mambangan lo'a kamateanen. Arawang bea dalanna, bayu' tau yang mansangen lo'a dinen.Lk. 13:24. 14Sabalika, yang mambangan asandaten, dinen lalo mambangan lo'a katio'anen. Tarapit bea dalanna. Kakapit poang mantuariin yang mandua'angen,” ingka kenang.

Dari basana ikilalana tauen

Lk. 6:43-44,46; 13:25-27

15“Jaji daikin jagai kalenin. Andian ona' tauen, panjarum yang okanen dari nanna Alatala. Tau dinen ona' to' manyaru' lo'in balu' dombaan, balu' tau nanka'. Poangsi atena dinen lalo sama nanna asu garangen. 16Poangsi pande bea ikilala iki'. Ibele iki' dari basana. Umpamana bua' angguren, na'an mainya' iala di akat jalu arapati'en. Umpamana bua' araan, na'an mainya' iala di rimput arapati'en. 17Ti' akat kayu yang maamen, tentula ambua' maamen. Ti' akat kayu ajau'en, tentu dinen ambua' ajau'en. Jaji inang ikilalana. 18Akat yang maamen na'an mainya' ambua' ajau'en. Kenang bea akat yang ajau'en na'an mainya' ambua' bua' maamen. 19Jaji gulungan kayu yang ajau'en dinen, yang na'anen ambua' maamen, dinen to' databang, to' datampeang lo'a apiin.Mat. 3:10; Lk. 3:9. 20Jaji ibele iki' dari bua'a, ibele iki' dari basana,” ingka kenang.Mat. 12:33.

21“Yang masanen lo'ku' Paraampuanna, okan samuana ona' to' padari panduduk kangkaman Surga. Tau yang malola'aniin lo'a panamuna Ama'ku' di Surga, dinen poang yang to' padari kangkaman Surga. 22Mondok ona' di asona iputusina tauen, bayu' tau yang manjarumen, Paraampuane, O Paraampuannam, daikam di'en, biasakam manjarumang jaruma Alatala atas asannu. Biasakam maruru jalu ajau'en atas asannu. Bayu' bua panyunyuanam ipolaan atas asannu! ingka kenang ona' lo'ku'. 23Poangsi inang rabarik daiak to' manjarumak bapi lo'da', manjarum terus terang, Saja na'anak mangilala lo'in. Babajao'kin lo'ku'. Ikin lalo tau mamola kajau'anen, uka' kenang ona' lo'da',” ingka kenang i Yesus lo'da'.Msm. 6:9.

Tau manaantalingaan andian dua baranana

Lk. 6:47-49; Mk. 1:22

24“Jaji mamakai sama' jarumak lo'a tau yang mandalingaan lo'a jarumku' di'en. Yang mandalingaan sarata malola'aniin kuasan iak awan tau maamen panamuna yang mamola saona di tana' yang batuanen. 25Jaji mondok ona' sariuten, mondok danum raa'en, mondok sariut manumpu maniangen, sao dinen na'an arurun, na'an araba'. Kole'a tagapa, kole'a dapakadenga ibona batuun. 26Tau yang mandalingaan lo'a jarumku' di'en, yang na'anen malola'ani, tau dinen kuasan arabor. Dapakadeng saona dinen di kasiken. 27Jaji mondok ona' sauranen, mondok danum raa'en, mondok sariuten manumpu maniangen, arurun barik saona dinen, araba'. Akaus ararak saona dinen. Kenang tau na'anen malola'ani,” ingka kenang i Yesus lo'da'.Yeh. 33:31.

28Akaus barik gulungan jaruma i Yesus dinen, tau bayu'enpi tatakau tapat mandalingana lo'a pangajaranna dinen. 29Na'an awan pangajaranna gulungan toa adaten dinen. Maam tapat pangajaranna, awan tau majarumen atas kuasa tugasa.Mk. 1:22; Lk. 4:32.

Currently Selected:

Matius 7: EBE

Highlight

Copy

Compare