Matius 24

I Yesus manjarumang memen arurunna Saona Alatala

Mk. 13:1-2; Lk. 21:5-6

1Jaji barik i Yesus tarangkat dinen marantang lo'a saona Alatala. Jaji barik mainso'i dinen palola'a lo'a, manyuro' lo'a i Yesus mamele lo'a gulungan pambangunan saona Alatala. 2Jaji barik manyauti i Yesus, “O', mamelekin. Manjarumak tapat-tapat, indi'angen ona', kosan batu sitataranen ibona seraan. Itampeang kausa ona', ararak,” ingka kenang i Yesus lo'da' palola'a.

I Yesus manjarumang ambata parinsa'en yang mulakataan

Mk. 13:3-13; Lk. 21:7-19

3Jaji barik i Yesus lamba' lo'a ukit Saitun aduduk. Di kakalenana inang nanna palola'a, mainso'i palola'a lo'a manjarum, “Suba jarumang lo'am. Nanga inde ona' adarina gulungan jalu yang ijarumangen iko dinen. Ai tandana ti' mamin mainso' to' adarina pamondoku, tandana to' katuntunganna,” ingka kenang lo'a i Yesus.

4Jaji barik manjarum i Yesus lo'da', “Jaji kenang. Maam-maamkin ona' mainto' kosan tau mawa alingoon lo'in. 5Kole'a bayu' ona' to' mondok mala asanku', asan kalena Kristus yang tau dabayaangen. Bayu' ona' daawa alingoon kole'da'. 6Andian ona' dongo tau suno'en, sapa dua mainso', sapa dua bajao', ada'kin atakuten. Arung adari lalo, poangsi nampi mondok lo'a katuntunganna,” ingka kenang i Yesus lo'da'. 7“Kole'a arung banua suno'anen nanna banua bokanen. Arung kangkaman suno'an nanna kangkaman bokanen. Ona' to' karaparan di duniaan. Kenang to' tatagar tana'en kole'a gempa bumiin lo'di', lo'din. 8Poangsi di'en mulakata poang lo'a parinsa'en, awan lalo padisa babainyeen to' aranaken, padis batanga yang mulakataan,” ingka kenang i Yesus lo'da'.

9“Daikin ona' to' daduangkin, to' daparinsa'i, to' dauno'. To' dakalibakangkin kole'a ambata tau banua bokanen kole'a jarum iawana ikin atas asanku',” ingka kenang 10“Nanga dinen ona' bayu' tau to' sorot kaparasaya'anna, to' siaduang, to' arabulu atena sera lo'a seraan. 11Bayu' bea ona' tau to' asan-asanen kalena panjaruma Alatala, padahal okan. Bayu' ona' tauen daawa alingo kole'da'. 12Bayu' tauen ona' to' insang sorot pangasaanga kole'a insang kayana kajau'anna tauen di duniaan. 13Poangsi intainkin ona' yang ikule'en panaat sampai mondok lo'a katuntunganna, dinen ona' dakatio',” ingka kenang.Mat. 10:22. 14“Jaji Dongo Maamen di'en, dongo to' mondok baya Alatala mangkama lo'ka' awan rajaan, arung ijarumang ijolo maira tatak banuaan inyaunga galung suanen. Baru' to' mondok katuntunganna,” ingka kenang i Yesus lo'da'.Mat. 28:19-20.

Banua Yerusalem to' darampas

Mk. 13:14-23; Lk. 21:20-24

15Jaji ikin tau mambasa indi'angen di surat buku' di'en arung manamu ratina jaruma i Yesus di'en. "Andian ona' jalu na'anen patut adariin, awan lalo jalu dajarumangen kole'a panjaruma Alatala, baki' Daniel dinen. Jalu yang palin ajau'en, ingka, to' dapakadeng di kosan bareseen, ingka kenang.Dan. 9:27; 11:31; 12:11. Jaji ti' mamin ikita adarina awan dinen, 16tau yang di propinsi Yudea arung babariar ararina lo'a gulungan ukiten mainto' na'anna darambit kole'a jalu ajau'en. 17Tau di tingkat ibona saoen ada' tadora intama lo'a saoen itiang mala jaluna. Arung arari poang. 18Tau di umanpi, ada' mole' balika lo'a saoen itiang mala ampurona. Arari poang.Lk. 17:31.

19“Ona' dinen mase' tapat tau arauntingen, tau panusu' anakaan. Lo'a tau biasaan mamin marinsa', ai lagi' ona' tau manuntuani anakaan. 20Bado'akin poang mainto' na'annin dari arari di musim dinginen, atau di aso Sabaten. 21Kole'a nanga dinen ona' marinsa' tapat tauen awan nampina kala' adariin di duniaan, tarangkat dari mulakata Alatala mamola duniaan, mondok awandi'en, mondok bea ona'.Dan. 12:1; JD. 7:14. 22Samuana dinen jalu ajau'en yang to' adariin, ati'en na'an mangamase'i Paraampuanen, kosan tau tio'. Ati'en na'an dapapondoki musim dinen kole'a mangamase'ina lo'a tau yang daile'iin, tau dakamainya'iin, kosan tau tio'. 23Inang ona' maam-maamkin yang jalu to' makalen, yang to' mawa alingoon. Belejo dinen lalo Kristus, ingka ona' tauen, ataupun, Belejo dinen lalo iaan, ingka kenang panganung-nganunga, ada'kin parasaya'en. 24Pasti ona' to' andian kristusen kaingka, andian panjarumen yang okanen tapat. To' mamayoang ona' tanda panyunyuana bua, to' datiang mawa alingo lo'a tauen. Kamainya'anda' dinen, gulungan tau daile'inpi to' daawa alingo ati'en dakule',” ingka kenang. 25“Jaji daiak maminak manjarumang lo'in ijolo memen,” ingka kenang i Yesus lo'da'.

26“Jaji andian ona' jarum tau, Belejo, ialalo dinen di kosan ateengen kaingka, ada'kin lamba'en. Ataupun, Andian bua ilalam, ada'kin parasaya'en. 27Kole'a awan lalo dinen kilaten yang dari Timur dinen mamancara lo'a barat, awan dinen lalo ona' pamondokku' Anak Mantuariin,” ingka, “Jelas datamu kole'a tauen maira tatak banuaan,” ingka kenang.Lk. 17:23-24. 28“Na, ti'en andian dinen bangkoayan jalu, inang lalo bakumpula dinen bauen,” ingka kenang dinen manjaruma i Yesus lo'da' mamakai sama' jaruma. Lk. 17:37.

Balu'ai ona' pamondoka Anak Mantuariin?

Mk. 13:24-27; Lk. 21:25-28

29“Maminna dinen,” ingka i Yesus, "maminna gulungan parinsa'en dinen,

Matasoon to' araun, bulanenpi na'an to' manyalang. Gulungan bintangen to' alao' dari suanen. Gulungan kuasa suanen to' akaru, Yes. 13:10; 34:4; Yeh. 32:7; Yl. 2:10,31; 3:15.

ingka kenang Jaruma Alatala yang datulisangenjo dinen.JD. 6:12-13.

30“Rabarik, inang di suanen to' paita tandana, manyuro' itamuna mainso' mamin bayaku' Anak Mantuariin to' mondok,” ingka kenang. “Gulungan tau duniaanpi to' anangis mamelena pamondokku', mamele kakuasa'anku', nanna arawangku' di suanen.Dan. 7:13; JD. 1:7. 31Rabarik dinen gulungan malaikatku' to' kusuro' di aset nanna unyi taba'en. To' kusuro' mala lo'a tau maminen daile'i, dakapulungang dari maira tatak banuaan inyaunga galung suanen,” ingka kenang lo'da'.

Tanda to' mondoka musim sisiaken dasama'ang lo'a tanda to' mondoka i Yesus kaduang kaliin

Mk. 13:28-31; Lk. 21:29-33

32“Balajarkin dari soal akat araan. Jaji di musim dinginen, akat araanpi dinen kosan daunna. Poangsi mainso' to' musim sisiaken, gulungan daanna dinen padari alowe', laloang aradaun barik. Jaji mamin ikita awan dinen, itamu barik iki'. Tandana lalo kole'a mamin mainso' musim sisiaken. 33Jaji gulungan jalu to' adariin dinen, ka' kenanga. Ikita ona' adarina jalu dinen de'i, tandana lalo. Itamu barik mamin ada'a baya pamondokku'. Mamin mainso' to' adariin. Mainso'a dinen sama'a, awan lalo jalu mamin mondok di baba' mambanganen,” ingka kenang. 34“Kujarumang lo'in tapat-tapat, nampina akaus adariin jalu kujarumangen dinen, nampi bua talalo tau tio'en di tataka tau maitaan dinen. 35Suanen di'en ona' to' talalo inyap. Duniaanpi ka' kenanga. Poangsi gulungan jarumku' di'en, na'an mainya' inyap. Tetap adari kausana jalu kujarumangen,” ingka kenang i Yesus lo'da'.

Kosan tau manamu asona adarina

Mk. 13:32-37; Lk. 17:26-30,34-36

36“Asona adarina jalu kujarumangen dinen, kosan tau manamu. Malaikatenpi di Surga na'an manamu. Daiak di'en, Anaka Alatala na'an manamu. Suma poang yang manamuun, Ama'ku' yang manamuun to' adarina,” ingka kenang.Mk. 13:32. 37“Awan lalo nanga tio'a baki' Nuhjo, awan dinen ona' pamondokku' Anak Mantuarin. Sadinga poang mondokku'.Mul. 6:5-8. 38-39Kole'a inangjo nampina mansang danumen manyapui duniaan, na'an bua datamu kole'a tau daukumiin jalu to' adariin dinen. Angkaan mainyum tauen, siala arainye awan kiraso, sampai dinen mondok lo'a asona baki' Nuh intamana di kapalen. Datamu, na'an datamu, mansang mamin dinen danumen, mangarami lo'da'. Jaji awan dinen lalo ona' di pamondokku' Anak Mantuariin. Mul. 7:6-24. 40Ona' dinen, ti' dua tau babakaan sama aparuken, sera dinen to' daangkatang, sera darantang. 41Ti' dua babainyeen sama bakaraja mamola tepung, sera dinen to' daangkatang, sera darantang,” ingka kenang lo'da'. “Anak ulun maamku' poang yang dalaan,” ingka kenang manjaruma.

42“Jaji bajaga-jagakin,” ingka kenang. “Kole'a na'an itamu ikin bayana pamondokku' Paraampuannin,” ingka kenang. 43“Awan lalo toa saoen dinen, to' dakaliti kole'a tauen di malamen. Ti' datamu jama, tentu dajagai. Tentu dapase'ang idintamai saona. Mamin terang lo'ka'. 44Jaji daikinpi awan dinen bea, arungkin bakamas, kole'a na'an itamu ikin ona' pamondokku' Anak Mantuariin. Itamu na'an itamu, sadinga poang mondokku', di waktu na'anna isangka,” ingka kenang lo'da'.Lk. 12:39-40.

Balu'ai basana suro'an yang maamen?

Lk. 12:41-48

45“Jaji balu' ai basanna suro'an yang datamuun pasitimbangang jalu maamen nanna jalu ajau'en, tau yang dapaten iparasaya'iin? Umpamana datugas kole'a samagata, dasuro' mangapala'iin lo'a suro'anna bokanen, dasuro' maurusi tawa'an jalu kaanda'. 46Ti' de'i mole' paraampuanna sidua' nanna waktu maurusina nanna maamen, maam lalo. Bauntung daia. 47Manjarumak tapat-tapat lo'in, daia dinen pasti datugas bapi dasuro' maurusi kausa ambata jaluna,” ingka kenang.

48“Ti' dinen ajau' suro'anna de'i, manjarum di nyawana, Na, to' laiaka bea to' mate-mateak bakarajaan. Mamalang launna paraampuanku', ingka kenang. 49Mulai dinen maniang barik lo'a suro'anna bokanen, mulai dinen angkaan mainyum nanna arakawanna, yang tau mangaloon uluna, 50sadinga poang mole'a paraampuanna, na! 51Laloang dinen paraampuanen to' maniang lo'a nanna balasaan. To' dameang kosanna nanna ambata tau bokanen yang tau mamis baba'a, ajau' atena dinen. Inang ona' to' manyanyarawanga anangis, dapasikokotang isina lasana marinsa'a inang,” ingka kenang i Yesus lo'da'.

Currently Selected:

Matius 24: EBE

Highlight

Copy

Compare