Matius 15

Toa Adaten marakarang Ukuma Alatala malola'ani poang adat tau ijoloon

Mk. 7:1-23

1Jaji barik andian tau Parisiin nanna gulungan toa adaten mondok lo'a i Yesus dari Yerusalem. Jaji mangatoani, 2“Asi lo'a palola'u na'anna mamakai atoran pamarese tangan? Na'an tio' malola'ani atoran dari adat tau ijoloon. Mainya' kakaru' angkaan nanna tangan na'anen dabarese awan di adatka'!” ingka kenang.

3Jaji manyauti i Yesus, "Asi lo'a daikin mangalibakangen lo'a parinta Ukuma Alatala, mainya'kin to' malola'ani poang atoranna tau ijoloon? 4Kole'a andianjo Ukuma Alatala datulisangen kole'a baki' Musa,

"Arungki' paduli lo'a araama'ka', lo'a araindu'ka',

kenang bapi datulisangen,

“Tau pajau'en lo'a araamana, arainduna, arung idukum mate, Pal. 20:12; 21:17; Im. 20:9; Ul. 5:16.

ingka kenang. 5-6Poangsi daikin alibakkin mamakai ukum dinen. Mamase'angkin lo'a tauen maongkosi lo'a amana, lo'a induna. Asi na'an kenangku', kole'a andian jarum pangajaranin yang kenang. Ti' andian jarum tau manjarum lo'a aratamatoana, Na, andian lalo artaku' yang pande itiang patio' lo'in. Poangsi dalam bayaku', artaku' dinen mamin kumeang lo'a Alatala, ingka kenang manjaruma lo'a aratamatoana. Jaji kalo'in ti' andian mamin jarum balu'a dinen, daia na'an lagi' parulu paduli lo'a aratamatoana, na'an parulu maongkosi. Kenang kakaru' pangajarannin manyuro' parasumaan, manyuro' marantang unjang lo'a jaruma Alatala itiang malola'ani atorannin. Na'an lagi' isuro' paduli lo'a aratamatoaka',” ingka kenang i Yesus lo'a tau Parisiin.

7“Tau mamis baba'in masam atenin! Mandua' jaji jaruma baki' Yesaya manjarumang memen basanin daikin,

8 “Laan-laan banuaka' di'en,

ingka Alatala.

Nanna baba'a mainya' ira mamudi lo'ku'. Poangsi bajao'pi atena lo'ku'. 9Parasuma manyembana lo'ku', kole'a pangajaranda' dinen daasan kole'da' parintana Alatala, padahal okan. Pangajaran parinta mantuariin poang yang dalola'aniin kole'da', Yes. 29:13.

ingka kenang jaruma Alatala yang datulisangen kole'a baki' Yesaya.”

10Jaji barik maminna dinen i Yesus manjarum lo'a tau babangkulungen manyuro' mainso'i lo'a, “Taan talinganin ikin gulungan tau bayu'en jalu kujarumangen di'en. Tanamang di nyawanin jalu yang idalingaan ikin di'en. 11Okan jalu ikaanen yang pande manyuro' ajau' di arona Alatala. Yang manyuro' ajau'en, yang jalu ilalamen, yang minsaluanen di baba'ka'. Dinen lalo manyuro' ajau'en lo'ka',” ingka kenang i Yesus lo'da'.

12Jaji barik gulungan palola'a dinen mondok lo'a manjarum, “Ai itamu iko, ira dinen tau Parisiin apadis atena mandalingana jarumu de'i?” ingka kenang manjaruma palola'a lo'a i Yesus.

13Jaji i Yesus dinen manyauti, “Gulungan ambata akat jaluun yang na'anen datanam kole'a Ama'ku' to' darabut kausana,” ingka kenang. 14“Koronga,” ingka, “Panguluan bautaan dinen ira. Yang tau bautaan ati' mauluang lo'a tau bautaan, ona' to' alao' dua-duanna ilalam loang kaliin,” ingka kenang.Lk. 6:39.

15Jaji manjarum bapi i Petrus lo'a i Yesus, “Ai lo'a dinen ratina sama' jarumu dinen, suba ijarumang lo'am,” ingka kenang manjaruma i Petrus.

16“Daiko bapi dinen, na'an bea itamu iko?” ingka kenang manjaruma i Yesus lo'da'. 17“Ai na'an itamu iko? Yang jalu intamaan di baba'ka' laloang alao' lo'a batangka' laloang minsaluan. 18Yang jalu minsaluanen di baba'ka', mobosa dinen mobos dari ateka'. Dinen lalo jalu manyuro' ajau'en di arona Alatala.Mat. 12:34. 19Kole'a dari ilalam ateka' lalo tabobosa gulungan panamu ajau'en. Jalu basa mauno'en, basa manyiuken, jalu yang basa sitindo'anen yang dapase'angen lo'ka', dinen lalo maruaren tatulak di ateka'. Ambata basa mangaliten, basa manyaksi panganung-nganungen, basa pajau'-jau'en, maruar kausa dari ilalam ateka'. 20Dinen lalo yang manyuro' ajau'en di arona Alatala. Ati'enki' angkaan nanna tangan na'anen iputi' ijolo, okan dinen manyuro' lo'ka' ajau' di arona Alatala,” ingka kenang i Yesus lo'da'.

I Yesus manggulungi lo'a tau okanen urang Israel

Mk. 7:24-30

21Jaji barik tarangkat bapi dinen i Yesus kapi'ang kalena lo'a ambata banua yang sibiring-biringanen nanna banua Tirus nanna banua Sidon. 22Jaji barik andian babainyeen mondok, tau Kana'an yang tau lalako'en di daerah dinen, tau okanen urang Israel. Jaji mangalong, “O Paraampuane, Anaka Raja Daud, gulungiak! Kamase'iak!” ingka kenang manjaruma. “Andian anakku' babainyeen balasa padisa, dasarung jalu ajau',” ingka kenang.

23Poangsi barik i Yesus na'an kakaji'. Jaji barik andian palola'a dinen mondok, mamita tapat, mita durusi babainye dinen, “Daia dinen suro' mole'. Anangis lapoang malola'a lo'ka',” ingka kenang manjaruma palola'a lo'a i Yesus.

24Jaji barik manyauti i Yesus, “Daiak mondokku' lo'a duniaan, dasuro' lo'a di'enku', mamondoki tau Israelen, lo'a ambata domba alingoon,” ingka kenang. 25Jaji barik malingkutut babainye dinen ijolona i Yesus, “Gulungiak, Paraampuane,” ingka kenang babainyeen yang dasarung jaluun anaka.

26Jaji manjarum barik i Yesus lo'a mamakai sama' jarum. Tau okanen Yahudi dasama'ang nanna anak asuun. “Ajau' yang kenangen. Na'an pande rotina nangkanaken iala iki' itampeang, ipangkaanang lo'a anak asuun,” ingka kenang.

27Jaji barik dasauti kole'a babainye dinen, “Tapat Paraampuane. Poangsi ambata anak asuunpi yang inyaunga mejaan, pande bea malila'i bobor jalu kaanna nangkanaken,” ingka kenang manjaruma babainye dinen.

28Jaji barik dasauti kole'a i Yesus, “Sampai kaparasaya'annu daiko dinen! To' adari bua, sabangon nanna jalu ipitaan iko dinen,” ingka kenang manjaruma i Yesus lo'a babainye dinen. Jaji barik jam dinen bua maama apadisa anaka.

I Yesus pangkaan tau ampat ribuun

Mk. 8:1-10

29Jaji barik maminna dinen i Yesus lamba' bapi mangulilingi dano Galilea. Mamin dinen inait barik daia di ukiten inang laloang aduduk. 30Bayu' ira tau mondoken lo'a inang mawa tau apadisen, ambata tau araiten, ambata tau bautaan, ambata tau araboren kakina tanganna. Bayu' baranana pamadisa, gulungan tau abisuun, gulungan tau apadis bokanen, dapamaam kausana. 31Jaji tatakau tauen mamelena. Tau abisu pande manjarum. Tau araboren kakina tanganna mole' maam. Tau araiten pande lamba'. Tau bautaan pande mamele. Jaji sasau nyawana tauen, mamudi lo'a Alatala yang tau dasembaan dinen kole'a tau Israelen.

32Jaji barik i Yesus mangalong lo'a palola'a, “Jaji ira di'en ka' mase'-mase'ku' tapat. Balaun mamin lalako'a nanku'. Talung aso mamin. Kenang kosan jalu kaanda'. To' kusuro' mole', mamin mase' batangda', ungka'en manggatu' di dalanen,” ingka kenang i Yesus lo'a palola'a.

33Jaji barik dasauti kole'a palola'a, “Ai lo'a ipangkaanna tau bayu'en balu'a di'en? Disa kule'ka' rotiin indi'angen di kosan ateengen?” ingka kenang lo'a i Yesus.

34Jaji barik, “Insa' ambata rotika'?” ingka kenang lo'a palola'a.

“Tuju bua sakalana. Laukka' kakapit,” ingka barik manyautida'.

35Mamin dinen barik i Yesus dinen manyuro' lo'a tau bayu'en aduduk di tana'en. 36Dala barik roti dinen tujuun sakalana nanna lauken, dado'aang, dakasuang nyawa. Mamin dinen dabala'-bala' dinen dameang lo'a palola'a. Palola'api barik manyorongi lo'a tau bayu'en. 37Jaji samuada' ira dinen yang bayu'en angkaan bosor-bosor kausana. Mamin akaus angkaan, daunto'i bapi dinen tunana jalu kaanna kole'a palola'a, sampai bayu' tunana. Andian tuju babakul apano'en nanna bobor rotiin nanna lauken. 38Jaji yang tau tambaan angkaan inang, andian ampat ribu yang babakaan. Laan bapi babainyeen nanna nangkanaken. 39Jaji barik i Yesus manyuro' mole' lo'a tau bayu'en. Mamin dinen daiapi mauwat di parauen, lamba' lo'a daerah Magadan.

Currently Selected:

Matius 15: EBE

Highlight

Copy

Compare