Tutulan Karajana Imamen 14
14
1Jaji manjarum i Yahuwe lo’a baki’ Musa, 2“Jaji adat pamareseen lo’a tau akudungen yang daawa lo’a imamen, kenang paratoranna. 3Arung dalamba’i tajolo kole’a imamen insaluanna kosan pakadengan kakalangen. Ati’en tau dinen daanggap mamin maam padisa, 4inang rabarik manjaruma imamen manyuro’ mawa pamindaraan. Yang arung dasuro’ awa, burung yang pandeen ipamindaraan dua, burung tio’. Mamin dinen kayu cemara, satatak. Mamin dinen banang bus warna dadara’en, sabungkus. Mamin dinen daun isop, sajaratan.
5“Jaji maminna akaus daawa, imam dinen arung manjarum, burung seraan dinen isuro’ gantung ibona jawi kasuangan danumen. Laloang burung dinen arung iduno’.
6“Mamin dinen arung dala burung tio’enpi dinen, sarata kayu cemara, banang bus, nanna daun isopen. Samuana arung dasalapang di dara’ burung dauno’en ibona danumen de’i. 7Tau to’ dabareseen dinen arung dapiriki barik nanna dara’ burung dauno’en dinen. Tuju kali dapirikina. Laloang tau dinen arung daasan barese kole’a imamen. Burung tio’enpi dinen barik arung dapalapas di kosan maneengen.
8“Maminna dapiriki dinen, tau to’ dabareseen dinen arung mamarese kalena. Kainna dinen arung daputi’. Samuana ambata buka, buluna arung dasising kausana. Laloang daia arung mandi’. Maminna dabarese kalena awan dinen, baru’ daanggap barese rabarik. Baru’ pande lamba’ mole’ lo’a kakalang palamba’en kosan tau Israelen dinen. Poangsi nampi pande daia lalako’ ilalam kakalanga. Arung daia lalako’ insaluanna kakalanga tuju aso launna.
9“Mondok aso yang katujuun rabarik, arung dasising bapi ambata buka. Samuana ambata buluna arung dasising kausa, ambata bulu arena, bulu kaninganna matana. Kainna dinen arung daputi’. Diri’a arung mandi’. Baru’ daia tapat barese.
10“Di aso kalapanen barik, daia arung mawa anak domba lakiin dua nanna sera anak domba bainye umur sataunen. Samuana arung maam jaji. Arung kosan sakina kosan rabora. Sarata arung daawa tepung palin alusen tiga kilo yang maminen ibarokang nanna inyak saitunen. Arung iawa bapi inyak saitunen sapertiga liter. 11Maminna akaus daawa, tau to’ dabareseen dinen nanna ambata gulungan jalu dapamindaraangen dinen arung daawa lo’a arona i Yahuwe inang di baba’ mambangan Kakalang Pasidua’ang Kaleen nanna i Yahuwe dinen kole’a imaam yang masan bareseen lo’a tau dinen.
12“Maminna dinen, arung dala sera inatang domba lakiin dinen, arung dapamindaraang datiang pamindara pamayar sala’a. Arung dapamindaraang bea inyak saitunen sapertiga literen dinen. Domba dinen arung dajaput sarata kole’a imamen nanna tau mawaan pamindara dinen, isorongang inang kole’da’ duaan ijolona i Yahuwe itiang tanda kole’a jalu dinen tapat dameang lo’a i Yahuwe. 13Maminna dinen arung dasembali anak domba dinen inang di kosan bareseen, kosan isembelina ambata gulungan pamindara panyauti dosaan nanna pamindara jalu itutungen. Inang isembelina. Jalu dapamindaraan barik dinen padari imaam ampunaan, sama nanna pamindara panyauti dosaan. Mamin dalaanang itiang lo’a karajana i Yahuwe.
14“Jaji arung dala barik dara’a inatang dapamindaraan sapa dua, arung dalulukang lo’a talinga katona tau to’ dabareseen dinen. Arung dalulukang bea lo’a indu tunjuk tanganna katoen nanna indu tunjuk di kakina katoen. 15Maminna dinen barik, arung dala inyak saitun sapertiga literen dinen kole’a imamen, arung daolongang sapa dua lo’a jampak tangan diri’a kayoko’en. 16Laloang tunjuk panunjuk tangan katona arung dasalapang lo’a inyak di tanganna dinen laloang arung dapiriki ijolona arona i Yahuwe tuju kali. 17Mamin dinen arung dalulukang inyak dinen sapa dua lo’a talinga katona tau to’ dabareseen dinen. Arung dalulukang bea lo’a indu tunjuk tanganna katoen nanna indu tunjuk kakina katoen di kosan lulukanga dara’ dari pamindara pamayar sala’a dinen de’i. 18Tunana inyak daolongang de’i di jampak tanganna dinen arung dalulukang barik lo’a uluna tau to’ dabareseen dinen itiang maurus sala’a.
19“Maminna dinen pamindara panyauti dosaan dinen arung dapamindaraang kole’a imamen itiang maurus dosana tau to’ dabareseen dari kotora dinen. Maminna akaus pamindara maurus dosaan, arung dapamindaraang bea pamindara jalu itutungen dinen, 20itutung di kas panutung pamindaraan sarata nanna pamindara tepungan itiang maurus dosana. Baru’ daia iasan barese rabarik.”
....................
Currently Selected:
Tutulan Karajana Imamen 14: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
