Tutulan Tau Israelen 34
34
1Jaji baki’ Musa barik lamba’ marantang tana’ rata negeri Moap laloang inait di ukit Nebo sampai mondok lo’a tompok Pisga. Ukit dinen isualina banua Yeriko. Dari inang rabarik dapayoanga negeri Kana’an lo’a baki’ Musa kole’a Alatala. Dapayoang kausa kuliling, dari propinsi Gilead maro utara sampai mondok lo’a banua Dan. 2Dapayoang propinsi Naptali, propinsi Epraim nanna Manase, nanna propinsi Yehuda maro barat sampai mondok lo’a Laut Tengah. 3Maro barat bagian Negeb nanna tana’ rataan inang, ialalo Yeriko dinen banua bayu’en kayu kurmaan, dapayoang, sampai mondok lo’a Soar. 4Jaji manjarum i Yahuwe lo’a baki’ Musa, “Na, tana’ negeri di’en lalo yang kubayaangen nanna jarum basumpaku’ to’ kumeang lo’a arabaki’ baki’ Abraham, baki’ Isak nanna baki’ Yakub. Tana’ di’en kumeang lo’a anak kanturunannu turun-manurun, uka’ kenang. Kuparuarang lo’u mamele lo’a dinen nanna matanu poangsi na’an pandeko manarear lo’a dinen,” ingka kenang manjaruma i Yahuwe lo’a baki’ Musa.
5Jaji mate barik baki’ Musa suro’anna i Yahuwe inang di negeri Moap awan bua jaruma i Yahuwe. 6Dakubur bua kole’a i Yahuwe inang di Moap di tana’ rataan antarana ukit tumbalianen nanna Bet Peor. Poangsi kosan tau manamuun lo’a kosan kubura sampai mondok lo’a aso di’en. 7Di matena dinen mamin mondok saratus dua pulo’ taun umura baki’ Musa. Di matena bakajungkpi bua, na’an bea aruntur. Matana maita bua, na’an bea akabur. 8Jaji datamuna matena baki’ Musa, sabulan dinen daulitanga kole’da’ ambata anak kanturunanna baki’ Israel. Inang di tana’ rataan negeri Moap lalako’a sampai akaus maulita itiang parandam lo’a baki’ Musa.
9Jaji baki’ Yosua anaka baki’ Nun dinen palin datamu pasitimbangang jalu maamen nanna jalu ajau’en. Andian panamu nanna, kole’a mamin tanganna baki’ Musa dajalaang lo’a datiang manugas lo’a. Jaji mainya’ ira ambata anak kanturunanna baki’ Israel dinen manaantalinga lo’a. Dalola’ani bua ambata gulungan parintana i Yahuwe yang darantangen nanna baki’ Musa.
10Tarangkat dari nanga dinen sampai mondok lo’a di’en, kosan mobosen panjaruma i Yahuwe yang sabangonen nanna baki’ Musa dinen. Kosan sitamuun lindo’ sama lindo’ nanna i Yahuwe awan baki’ Musa. 11Kosan bokan yang mamolaan ambata gulungan tanda panyunyuaan nanna jalu laan-laanen awan yang dasuro’ karajajo lo’a baki’ Musa kole’a i Yahuwe. Awan panyunyuana yang dapolaan nanga datugasa itiang mole’ lo’a negeri Mesir, yang dasuro’ karaja lo’a raja Mesiren nanna ambata gulungan anak buana nanna ambata suang negerina, ia poang yang kala’en mamola. 12Kole’a kosan bokan yang kala’en mamayoang kuasana yang baraa’en atau mamolaan ambata gulungan basa yang manyuro’ ikatakutangen awan dapolaan kole’a baki’ Musa di arona ambata gulungan tau Israelen.
Currently Selected:
Tutulan Tau Israelen 34: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
