Kyenesis 45
45
Yosef Ladiki Suoto Aatuo Babilɛma
1Yosef ditasinfuo otu okpee di bakpɛmblatɛ nɔɔ bamuu anu, ni aatɔkɔ ma alɛ, <<Bamuu lee bidiesa suoto kayi di anu nii!>> Nioso kuonwii ditasinwɛ fiɛ di Yosef ladiki suoto aatuo babilɛma suɔtɔbi. 2Ni afaa kaku osie kanya diata alɛ Egipte batii lanu nwɔ kaku nwu, Farao leyo batii kafɔɔ lanu nwu ole.
3Yosef latɔkɔ babilɛma suɔtɔbi alɛ, <<Ami ninle Yosef nɛ! Teemi lekple akpe nkpa?>> Kafɔɔ babilɛma suɔtɔbi ditafuo kanya ɔbɛ, diekye lɛyɛkɛ lapɛ ma ta baanyɔɔ ni oso.
4Ninfɛ di Yosef latɔkɔ babilɛma suɔtɔbi alɛ, <<Bitɛɛtɛɛ mi.>> Obe wɔ baatɛɛ nwɔ baaloo nii, ni aatɔkɔ ma alɛ, <<Ami ninle obilee suɔtɔbi Yosef, nnwɔ biasunsũ biakyesee ni Egipte nɛ! 5Kafɔɔ nunua binya otu, bitanta diabuo ye suoto alɛ biasunsũ mi biata batii ba niakpaa mi baawako ni nfũ, diekye mmle kafũ ni batii nkpa oso di Yaa lakyesee mi aalesa ye katũ nɛ. 6Diekye alɛɛ anyɔ nfɛ di kɔka kɔkpɛ ni di kasɔ ka mmle nɛ, nioso kubakple kunkpɛ alɛɛ anɔɔ di afe ɔkpɛ ku alesaa ɔyɔ dilɔbawɛ nii. 7Kafɔɔ Yaa lakyesee mi aalesa ye katũ, alɛ kanyu nlɛ batii lee basɛɛ biebu biesiɛ kaasɔ ka mmle, nfũ ye nkpa di didiki kplɛ kamɛ.
8<<Nioso, Yaa niakyesee mi nfũ, diele aye. Ɛɛblɛɛ fɛ kote ɛɛta Farao, ku saate ɛɛta leyo nɔɔ batii bamuu kanyayilatɛ ku tunletɛ di Egipte kasɔ kamuu suoto. 9Nunua bikple bisifi wla, biɛlaatɔkɔ teemi bilɛ, <Obi suɔtɔbi lɛfɔ Yosef alɛ: Yaa ntɔɔblɛɛ saate di Egipte kasɔ kamuu suoto. Sifi fawa ɔkyɛ nii; tanlalaasa obe. 10Basiɛ di Gosen kasɔ fakaakoe, afɔ ku babi lɛfɔ ku bawa lɛfɔ, bafoso ku batie ku banankyue ku asaa ya ninkpe fɔ ni amuu. 11Manyu ye kanya ninfa, diekye alɛɛ anɔɔ amu nikɔwa di kɔka makpɛ nii. Nse diele nkpo ni dipii kamamufũ afɔ ku banantii lɛfɔ ku asaa ya ninkpe fɔ ni amuu.>
12<<Aye bamu biɔnya, nkpo kafɔɔ di obiloo suɔtɔbi Benyamin kɔnya alɛ, ami Yosef omu nikokakatɛ nta ye nɛ. 13Bitɔkɔ teemi dibu le nimuu bɛɛtɛɛ ni di Egipte kasɔ ku lɛsaa biala biɛnya ni. Bikpaa teemi biwakoe wla.>>
14Ninfɛ aayɔ nnɛɛ nɔɔ aaminisa obilɛma suɔtɔbi Benyamin aawi kaku, ni di Benyamin kafɔɔ laminiko nwɔ aatoowi kaku nɛ. 15Ninfɛ aafĩfĩɔ babilɛma suɔtɔbi bamuu akpoo aawi kaku nɛ. Nni sɛmaa babilɛma suɔtɔbi lakakatɛ ko nwɔ.
16Obe wɔ di Farao lanu ni di leyo nɔɔ alɛ Yosef babilɛma suɔtɔbi ntɔɔwa nii, suoto layɔɔ Farao ku banɔɔfotii nɔɔ bamuu. 17Ni di Farao latɔkɔ Yosef alɛ, <<Tɔkɔ babilee suɔtɔbi falɛ, <Babla mmle: Biyɔ atoo lee bitika di babɔkɛɛ lee ba nintuka ni atoo suoto biekple bisifi Kanaan kasɔ, 18biɛlaakpaa teeye ku leyo lee batii biwakoe. Mata ye kasɔ ka ninlɛ ni nwaa di Egipte, minya kasɔ nwu lɛlɛ ɔmɛnɛfɛ.>
19<<Tɔkɔ babilee suɔtɔbi kafɔɔ falɛ, <Bibla mmle: Biyɔ bakeke ba di bapɔnkɔ nnanfi ni bawo di Egipte kasɔ bikpaa babi lee ku basɔfɔ lee, biɛkpaa teeye biɛwa. 20Bitannyu bilɛ biɔyɔ asaa lee amuu minwako, diekye asaa nwaa ya amuu ninkpe ni di Egipte maleye ale.> >>
21Nioso Israel babi labla nkpo. Yosef lata ma bakeke ba di bapɔnkɔ nnanfi nii, fɛ mmle di Farao labuɛ nii, ni aata ma kafɔɔ alesaa ya babale ni di osuku nɛ. 22Aata obiala lɛma dibula fɔle, kafɔɔ Benyamin nnwɔɔ aatɔɔ koto fututu akudi alafa atiɛ ku abula sɛkpa sɛnɔɔ. 23Nnya asaa ya aakyesee ni ote: aakpee atoo ya di Egipte asaa nwaa nsi ni kaamɛ aatukasa babɔkɛɛ ba nintuka ni atoo basuɔtɔ lefosi. Aayɔ atitabi ku bloblo ku asaa bamba ya di ote maklee ni osuku aatukasa babɔkɛɛ ba nintuka ni atoo basanko lefosi. 24Ninfɛ aadiki babilɛma suɔtɔbi osuku nɛ, baatoosifi nii, aatɔkɔ ma alɛ, <<Bitanlɔ di osuku lo!>>
25Nioso baadie di Egipte baawa Kanaan kasɔ di ote lɛma Yakob nfũ. 26Ni baatɔkɔ nwɔ alɛ, <<Yosef lekple akpe nkpa! Nwaako, nnwɔɔ ninle kanyayilatɛ di Egipte kasɔ kamuu suoto nɛ.>> Diabla Yakob ɔkpɛ; atafũ ma anu. 27Kafɔɔ obe wɔ baatɔkɔ nwɔ ni sɛlaa se simuu di Yosef labuɛ aatɔkɔ ma nii, aanya ni bakeke ba di bapɔnkɔ nnanfi ni, di Yosef lakyesee alɛ babatuka nwɔ ku leyo nɔɔ batii ku atoo nɔɔ bawako ni Egipte kasɔ, ni di ɔnyɛɛ lakple kuabuo ote lɛma Yakob nɛ. 28Ni di Israel labuɛ alɛ, <<Ntoofũ lenu! Obisuɔtɔbi nii Yosef lekple akpe nkpa. Makyɛ nnaanyɔɔ fiɛ ninkpi.>>
Currently Selected:
Kyenesis 45: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
