Kyenesis 3
3
Otii Otokopĩ
1Di obe nwu kamɛ kɔsaanwu labe anu kualenkee babɔkɛɛ ba ninkpe ni kobe bamuu di Saate Yaa labla nii. Ni kuakaalɛ Ɔsanko nwu alɛ, <<Nwaako di Yaa lebuɛ alɛ, <Bitanle kowoso kukunwii dibi di kɔba nwu nkpo kamɛ?> >>
2Ni di ɔsanko nwu latɔkɔ kɔsaanwu alɛ, <<Buale kowoso biala dibi di kɔba nwu kamɛ, 3kafɔɔ Yaa labuɛ alɛ, <Bitanle kowoso ko nin-yɛ ni di kɔba nwu ntɛɛ dibi, bitankpanko ni kafɔɔ, nse diele nkpo bibakpi.> >>
4Ninfɛ di kɔsaanwu nwu latɔkɔ ɔsanko nwu alɛ, <<Bilɔbakpi.>> 5<<Diekye Yaa n-ye alɛ nse biele dibi nwu nkpo yi, dibakpa ye minte fɛ Yaa, mintofo dibiene ku dikpile.>>
6Obe wɔ di ɔsanko nwu lanya alɛ kowoso nwu dibi nlɛ alɛ baale ni ku mmle diɔlɛ ni onyu, ku mmle aamiɛ alɛ aawɛ ni ninumbe yi, ni aatɛsɛ lewo aale nɛ. Ni aayɔ lewo kafɔɔ aata ɔsa nɔɔ wɔ niawɛ ni di ɔkyɛ nɔɔ aale nɛ. 7Ninfɛ diakpa akyuu lɛma anyɔ nwu nɛ, ni baatofo alɛ basi lɛkyɔtɔ nɛ. Nioso baakaa kubue afata baakyasa, ni baayɔ baatĩi lɛkyɔtɔ lɛma nɛ.
8Obe wɔ di osuɔtɔ nwu ku ɔsɔfɔ nɔɔ lanu ni Saate Yaa lɛkpanko akyɛ ni di kɔba nwu kamɛ di kɔtɔɔfɔ lebe yi, ni baawofa Saate Yaa di awoso kamɛ di kɔba nwu kamɛ nɛ. 9Kafɔɔ Saate Yaa lalɛɛ osuɔtɔ nwu aakaalɛ nwɔ alɛ, <<Ɔfɛ fakpe?>>
10Ninfɛ aatɔkɔ nwɔ alɛ, <<Lenu fɔ lɛkpanko di kɔba nwu kamɛ, ni lɛyɛkɛ lɛwofasa suoto nɛ. Diekye nsi lɛkyɔtɔ.>>
11Ni di Saate Yaa lakaalɛ nwɔ alɛ, <<Owe niɛtɔkɔ fɔ alɛ fasi lɛkyɔtɔ? Feele kowoso ko dibi lakpee fɔ kufiofa nlɛ tanle niɛ?>>
12Ni di osuɔtɔ nwu labuɛ alɛ, <<Ɔsanko wɔ fɛɛyɔ fɛɛtɛ ni di ɔkyɛ nii ninfũ niatɛɛ kowoso nwu dibi lewo, ni lale nɛ.>>
13Ninfɛ di Saate Yaa lakaalɛ ɔsanko nwu alɛ, <<Be lɛsaa fɛɛbla nkpo nɛ?>>
Ni di ɔsanko nwu labuɛ alɛ, <<Kɔsaanwu nwu niakyɔnkyɔ mi, ni lale nɛ.>>
Yaa Letokonafi
14Nioso Saate Yaa latɔkɔ kɔsaanwu nwu alɛ, <<Ta lɛsaa le fɛɛbla ni oso,
<<Bɛɛkpaani fɔ balenke babɔkɛɛ sele bamuu
ku lepoo kamɛ babɔkɛɛ bamuu kamɛ!
Kafutu lɛfɔ suoto fabawududu
fabale kɔtɛ kafɔɔ
di nkpa lɛfɔ mmuu disiɛbi kamɛ.
15Kamakpee kakyidi kafɔɔ
minko ɔsanko nwu ntɛɛ,
ku ɔnantii lɛfɔ ku ole nwɔ ntɛɛ;
ababiɛ fɔ disi,
afɔ kafɔɔ fabanu nwɔ lɛnankpo.>>
16Ɔsanko nwu kafɔɔ aatɔkɔ nwɔ alɛ,
<<Kamata dibuo lɛfɔ mpɔ di babi olofo kamɛ;
dibuo kamɛ fabalofo babi.
Anu lɛfɔ matika di ɔsa lɛfɔ suoto,
abale sɛsaate di suoto lɛfɔ kafɔɔ.>>
17Ni aatɔkɔ Adam alɛ, <<Ta faakyɔɔ ni ɔsɔfɔ lɛfɔ atoko faale ni kowso dibi le lakpee fɔ kufiofa nlɛ, <Tanle ni oso,>
<<Lɛkpaani kasɔ ta afɔ oso
dibabuo fɔ fiɛ fabale ka
di nkpa lɛfɔ mmuu osiɛ kamɛ.
18Siwuu ku akũmii nimakɔntɔ ka di suoto kanta fɔ,
fabale kafɔɔ kasɔ ka mmle sɛfa.
19Apipi makpɛ fɔ
fiɛ fabawɛ lelesaa fanle
diɛlaase di obe wɔ fabakple fansifi ni kɔtɛ kamɛ,
diekye nkũ kamɛ beediki fɔ nɛ;
diekye kɔtɛ fale
nkũ kamɛ kafɔɔ fabakple fansifi nɛ.>>
20Ni di Adam latika ɔsɔfɔ leyooto alɛ Ewa nɛ. Diekye nnwɔɔ nimale batii bamuu kɔya nɛ.
21Ni di Saate Yaa layɔ kɔbɔkɛɛ kũ aabla akpeele aakpee Adam ku ɔsɔfɔ nɛ.
Yaa Latososa Adam Ku Ewa Di Edem Kɔba Kamɛ
22Ninfɛ di Saate Yaa labuɛ alɛ <<Osuɔtɔ nwu nfɛ nte fɛ onwii loo, aye ni dibiene ku dikpile. Dinaa alɛ bɛɛtɔɔ osuku ɛɛtɛsɛ nkpa kowoso dibi nwu eele alɛ, aasiɛ nkpa dinaa ni kaloo.>> 23Nioso Saate Yaa ladiki nwɔ di Eden kɔba nwu kamɛ alɛ atɔɔkyɛ aalaatɔɔkpɛ kasɔ ka kamɛ bɛɛbla nwɔ beekyeko ni. 24Obe wɔ aadiki ni Adam ku Ewa aaloo nii, ni aayɔ kerubim ku ɔtɔ kapamii bembe aase di kufĩ katũnkɔ di Eden kɔba nwu kamɛ, kaatɔɔnwanyi kaatoofe katoo ku kala alɛ kaatoonyu osuku wɔ niefe ni nkpa kowoso nwu katũ.
Currently Selected:
Kyenesis 3: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
