ESODƆS 34
34
Mose Lawola Afuɔ Fɔle Nkyɛ Nnyɔ
1Ninfɛ di SAATE nwu latɔkɔ Mose alɛ, “Wola afuɔ fɔle nkyɛ nnyɔ fɛ akasale nwu fawako. Ninkpana sɛlaa se niatika ni di afuɔ nkyɛ kasale nwu faabiɛ ni ntika nya di suoto. 2Lolaa suoto kɔsɛɛ ku olesɛ, faakata fawa Sinai Kobokote nwu suoto, fabakyakakoe ninfa. 3Otii kuonwii atantikanko fɔ aawa ee noomiɛ nlɛ nnya otii kuonwii di kobokote nwu suoto; tanta bia bafoso ku banankyue lawa babawee sɛfa di kobokote nwu nkpaa.”
4Nioso Mose lawola afuɔ nkyɛ nnyɔ fɛ akasale nwu, ni aakata aasifi Sinai Kobokote nwu suoto ku kolesɛtũ fɛ mmle okle di SAATE nwu lakpee nwɔ ni kufiofa nɛ. Aaklee kafɔɔ afuɔ nkyɛ nnyɔ nwu di nnɛɛ. 5Ninfɛ di SAATE nwu lasoo aawa di lelokonkyɛ kamɛ aabayila ninfa ku nnwɔɔ nɛ. Ni aalɛɛ leyooto nɔɔ, SAATE nwu nɛ. 6Ninfɛ di SAATE nwu lafe di Mose anu aatoobuɛ alɛ, “Ami ninle SAATE nwu, ami ninle SAATE nwu, Yaa wɔ nieyii ni pɔ ku sifutulɛ ku nyaami ɔnya, ninnya ɔblɔ wla, leyii pɔ ku lɛbɔmbɔ ku onukwale. 7Ndiki lɛbɔmbɔ ntuo batii nkpe nkpe, n-yɔ asi osie ku ɔtaka oyila di batii suoto ku sikpile kafɔɔ nkyɛ. Kafɔɔ an-sĩ mba niekpi ni lɛpɔɔ kotoko ɔnanfi; annanfi babi ku bawa kootoko ta bate lɛma sikpile oso, annaase di kɔna tiɛfa ku kɔnaafa suoto.”
8Nfanwu, ni di Mose lase katũ kaasɔ aasumu SAATE nɛ. 9Ni aabuɛ alɛ, “O SAATE, nse feele mi sibualɛ di anu lɛfɔ yi, ni SAATE kpaa wo fasifiko. Kuntɛ batii ba mmle batokopĩtɛ bale, yɔ asi osie loo ku sikpile loo fakyɛ wo, faafũ wo fabla batii lɛfɔ.”
10Ninfɛ di SAATE nwu labuɛ alɛ, “Kɔbla kanya ninii ku Israel batii nwu. Di batii nwu bamuu anu kamabla sɛkpɛ se niɛbla ni ɔkpɛ diidii manadibla sĩ ni di kale kukanwii di kayi ka mmle kamuu kamɛ. Batii ba kamɛ bisi ni kamanya sɛkpɛ yɛkɛle se di ami SAATE nwu kamabla nta ye nii. 11Bikyɔɔ kufiofa ko kokpee ye ni miɛ atoko. Ni kamatososa Amori batii ku Kanaan batii ku Hiti batii ku Perisi batii ku Hiwi batii ku Yebusi batii di anu lee. 12Bilolaa binyu nwaa bilɛ biɛbla kanya ninii kuninwii ku batii ba ninsi ni kaasɔ ka suoto biofe ni, nse diele nkpo, babakple okũ kaamɛ lee. 13Nioso bibiɛ ma oleɔta akyikye, biɛpɛpɛɛ afiɔtii lɛma kafɔɔ bibibiɛ, biebudi ma afiɔ ya bɔɔlɛɛ ni Asera awoso biyu. 14Bitantɔ afiɔ bamba kuanwii, diekye SAATE wɔ ninkpe ni Onunsɛɛ ninle mi leyooto, Yaa wɔ ninkpɛ ni sɛsɔfɔwo nle.
15“Bilolaa binyu nwaa bilɛ biɛbla atoko ɔkyɛ ole kanya ninii ku batii ba ninsi ni kaasɔ nwu suoto. Diekye nse bɔɔtɔ afiɔ lɛma, manta nya ole yi, babalɛɛ ye alɛ biwa, manta ye minle ma afiɔsaa nwu. 16Ni babisuɔtɔbi lee kafɔɔ kamadiki babisankobi lɛma bawo man-yɔ, di obe wɔ bale ni afiɔ batɔtɛ. Babakyɔnkyɔ babisuɔtɔbi lee nwu mankpee di afiɔ ɔtɔ kamɛ.
17“Bitambla abɔɔsaa afiɔ kuanwii biatɔ nya.
18“Bile Bloblo wɔ Ninantaka ni Dii. Ayi akuɛnsĩ biele bloblo wɔ manankpee ni lɛnyankasaa, fɛ mmle lakpee ye ni kufiofa. Bile dii nwu nkpo lɛlɛɛ biala di Abib kɔwɛntɛ nwu suoto, diekye kɔwɛntɛ nwu kamɛ biadie di Egipte kasɔ suoto nɛ.
19“Bɔkɛɛ biala dibi kasale ku babisuɔtɔbi lee kasale, biyɔ ma biwakoe. Banankyue, bafoso ku batie. 20Bɔkɛɛ wɔ nintuka ni atoo nnwɔɔ yi, biakyɛlensa min-yɔ lefosobi minse kaanya. Nse biɛkyɛlɛnsa yi, ni bifee nwɔ simu. Biafuo babisuɔtɔbi lee kafɔɔ ɔkyɛlɛnsa ku lɛsaa bamba.
“Kuonwii lee atanwa mi anu ku nnɛɛ fukuti.
21“Ayi akuɔ biɛbla sɛkpɛ, kafɔɔ dii kuɛnsinle biɛtɛ ɔnyɛɛ. Apoo ɔkpɛmbee woo, ofiɛlɛbee woo, dikpenii biɛtɛ ɔnyɛɛ.
22“Lɛlɛɛ biala bile alesaa kasale ale ni akpaa ofiɛlɛ dii, biele dii kafɔɔ bita obe wɔ bitooloo ni asaa ofiɛlɛ di lɛlɛɛ kanyɛtɛlekɔ. 23Di lɛlɛɛ biala kamɛ, basuɔtɔ lee bamuu bawa SAATE wɔ ninlenke ni, Israel batii Yaa nwu anu sitiɛ. 24Kamatososa nnle be ninte ye ni siitũ, nta kasɔ lee mmpɔ, otii kuonwii kafɔɔ dilababɛbɛɛ anu kaasɔ lee suoto, nse biɛkyɛ SAATE Yaa lee anu sitiɛ di lɛɛlɛɛ kamɛ.
25“Nse biɔyɔ babɔkɛɛ oleɔta ku ntɔ minwakoe yi, bitanyɔ lɛsalɛsaa di lɛnyankasaa nsi ni kaamɛ biakyakaa. Bitanta lɛsalɛsaa di Okpi Diisi Ofe dii ole, oleɔta labu kaleesɛ.
26“Biyɔ kofe lee kamɛ alesaa kasale biene biwako SAATE Yaa lee nwu leyo kamɛ.
“Bitanwa tie dibi di ɔya nyɛɛntu kamɛ.”
27Ninfɛ di SAATE nwu latɔkɔ Mose alɛ, “Kpana sɛlaa se mmle simuu fatɛ, diekye sɛlaa se mmle suoto kɔbla kanya ninii ku afɔ ku Israel batii nɛ.” 28Nioso Mose lasiɛ ninfa ku SAATE nwu ayi afosi ana ku nkyɛ afosi ana. Atale alesaa ee anyi ntu kafɔɔ. Ni aakpana kanya ninii sɛlaa nwu ninle ni afiofa lefosi nwu di afuɔ nkyɛ nwu suoto nɛ.
Mose Anu Lakpa Di Obe Wɔ Aasoo Aakye Ni Kobokote Nwu Suoto
29Obe wɔ di Mose lasoo aakye ni Sinai Kobokote nwu suoto, aaklee afuɔ nwu nkyɛ nnyɔ be suoto aakpana afiofa lefosi nwu aatika ni ninnɛɛ. Anu nɔɔ latɔɔkpa diekye aatɔɔkakatɛko SAATE nwu, kafɔɔ atatofo alɛ anu nɔɔ latɔɔkpa. 30Obe wɔ di Aron ku Israel batii bamuu lanya ni Mose, di anu nɔɔ latɔɔkpa nii, baayɛkɛ alɛ bɔɔtɛɛtɛɛ nwɔ. 31Kafɔɔ Mose lalɛɛ ma; nioso Aron ku okpoo banɔɔfotii nwu lakple baawa ɔkyɛ nɔɔ, ni aakakatɛko ma nɛ. 32Nni kamaa Israel batii bamuu labasi di ɔlɔɔkɔ nɔɔ, ni aatɔkɔ ma afiofa ya amuu di SAATE nwu latɔɔ ni di Sinai Kobokote nwu suoto nɛ.
33Obe wɔ di Mose laloo ni ɔkakatɛko ma, ni aayɔ anu ditiĩsaa aatĩi anu nɛ. 34Kafɔɔ nse Mose kamabuo lɛkpaayo le kamɛ mansi ni di SAATE nwu anu alɛ ɔɔkakatɛko nwɔ yi, antikiti anu ditiĩsaa nwu di anu diɛlaase di obe wɔ eedie nii. Obe wɔ kafɔɔ aadie aawa alɛ ɔbatɔkɔ ni Israel batii nwu ɔlaa wɔ di SAATE nwu lakpee nwɔ ni kufiofa yi, 35baanya alɛ anu nɔɔ latɔɔkpa. Nioso Mose nkple an-yɔ ditĩisaa antĩi anu ninaase di obe wɔ ankple ansifi anaakakatɛko ni SAATE nwu.
Currently Selected:
ESODƆS 34: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
