ESODƆS 32
32
Israel Batii Nwu Labla Koto Sɛɛle Lɛnankyuebi Baatɔ
1Obe wɔ di batii nwu nkpo lanya alɛ Mose ntɔɔklɛ ni di kobokote nwu nkpo suoto yi, ni baalaasi di Aron suoto baatɔkɔ nwɔ alɛ, “Buoye lɛsaa le nintɔɔbla ni Mose, osuɔtɔ nwu nkpo niakpaa wo aadieko ni di Egipte kasɔ suoto ɛɛwako ni nfũ. Nioso, pɛsɛwa faabla afiɔ ya nimaleko wo ni katũ fata wo.”
2Ninfɛ di Aron latɔkɔ ma alɛ, “Bidiki koto sɛɛle atokosakasaa ya di basɔfɔ lee ku babisuɔtɔbi lee ku babisankobi lee lɛsaka ni biwakoe.” 3Nioso batii nwu nkpo bamuu ladiki atokosakasaa lɛma, ni baayɔ baakyɛnko Aron nɛ. 4Ninfɛ di Aron lafũ koto sɛɛle atokosakasaa nwu, ni aanyanakĩisa nya aayɔ akpɛnsaa aabla afiɔ di lɛnankyuebi letembi kanya nɛ. Ninfɛ di Israel batii nwu labuɛ alɛ, “O Israel, nnya yaa lee wɔ niakpaa ye aadieko ni di Egipte kasɔ nɛ.”
5Obe wɔ di Aron lanya ni batii nwu nkpo suoto lɛyɔɔ, ni aapɛ oleɔta akyikye di lɛnankyuebi nwu katũ aabuɛ alɛ, “Kɔsɛɛ bubale dii munta SAATE nwu.” 6Nioso kaleesɛ batii nwu lawolaa ɔtaka, baata ofiɛ asaaɔta ku atoko ɔkyɛ ole asaaɔta. Nni kamaa, baasiɛ baale, baanyi, ni baataka baakyako akyɔnkuu okpee nɛ.
7Ninfɛ di SAATE nwu latɔkɔ Mose alɛ, “Taka faasoo fasifi, diekye batii lɛfɔ ba faakpaa faadieko ni di Egipte kasɔ suoto, ntɔɔlalaa. 8Batɔɔpɛsɛwa beediɛ osuku wɔ suoto lakpee ma kufiofa nlɛ bakyɛ nii, batɔɔbla lɛnankyuebi afiɔ bɛɛta suoto bɔɔtɔ ni. Batɔɔta ni ole boobuɛ kafɔɔ alɛ, ‘Oo Israel, nnya yaa lee wɔ niakpaa ye aadieko ni di Egipte kasɔ suoto.’
9Ninfɛ di SAATE nwu labuɛ aatɔkɔ Mose alɛ, “Ntɔɔnya nlɛ batii ba mmle batokopĩtɛ bɛɛtɛ bale. 10Tɛɛ osuku nindiki ɔblɔ nii di suoto lɛma, ninwɔɔsa ma, nin-yɔ fɔ mbla kale kplɛ.”
11Kafɔɔ Mose latikiti SAATE Yaa nɔɔ lekoto aabuɛ alɛ, “O SAATE, be oso faadiki ɔblɔ lɛfɔ di batii lɛfɔ suoto, batii ba faakpaa faadieko ni di Egipte kasɔ suoto ku osie kplɛ ku kɔnɛɛ siene lɛfɔ? 12Tambla lɛsaa le nimata Egipte batii nwɛ ɔlaa mambuɛ ni alɛ, ‘Yaa lɛma lɛkpaa ma eedieko di kale loo, alɛ oolo ma di abokote suoto, andiki di kasɔ ka mmle suoto.’ Ɔblɔ buɛɛ; faakyɛlɛnsa disibu, tanta okpile lawa di batii lɛfɔ suoto. 13Faanyuma bakpɛmblatɛ lɛfɔ Abraham ku Isak ku Israel, batii ba faaka ntam faata ni ku leyooto lɛfɔ falɛ, ‘Kamata banantii lee mpɔ fɛ awɛntrɛbi koolo, kamayɔ kasɔ ka mmle kamuu kafɔɔ nta banantii lɛfɔ fɛ mmle labuɛ nii, kankple ma kale dinaa ni kaloo.’” 14Nioso SAATE nwu lakyɛlɛnsa disibu di batii nɔɔ suoto, atasimbla ma lɛsaa le aatɛ alɛ ɔɔbla ma nii.
15Nioso Mose lamunikĩi aasoo aakye di kobokote nwu osi, aaklee afuɔ nkyɛ nnyɔ ya suoto baakpana ni kufiofa nwu kɔɔnɛɛ. Baakpana asaa di afuɔ nwu sitũ ku sɛmaa. 16Yaa omu niawola afuɔ nwu nkpo, nnwɔɔ omu nɔɔ kafɔɔ niakpana kufiofa nwu aatika nya di suoto.
17Obe wɔ di Yosua lanu ni batii nwu nkpo kudu oyiisa yi, ni aatɔkɔ Mose alɛ, “Kakpɛ kudu nkpe di kasikɔ nwu nkpo.”
18Ninfɛ di Mose ladiki kanya alɛ,
“Diele nse batii lelenkee kaakpɛ kudu kule,
diele kafɔɔ nse beelenkee batii bawo kaakpɛ kudu kule;
sinu ɔsa kudu konu.”
19Obe wɔ di Mose latɛɛtɛɛ ni kasikɔ nwu aanya ni lɛnankyuebi nwu ku katũ nwu, ɔblɔ lafiɛ nwɔ, ni aafuki afuɔ nkyɛ nwu aaklee ni di nnɛɛ aayu di kobokote nwu nkpaa aabiɛ nya nɛ. 20Ninfɛ aayɔ afiɔ lɛnankyuebi nwu nkpo aafiɛ di ɔtɔ kamɛ; ni aakuɔ ni aabla mpu, ni aayɔ aakpete di ntu aata Israel batii baanyi nɛ.
21Ninfɛ aakaalɛ Aron alɛ, “Be di batii ba mmle lɛbla fɔ, feeleko ma katũ feekpee di okpile kplɛ wɔ mmle okle kamɛ?”
22Ninfɛ di Aron ladiki kanya alɛ, “Ɔblɔ buɛɛ, saate ni Mose. Afɔ omu lɛfɔ faye mmle okle baatii ba mmle nle ni batii kpile. 23Mma niatɔkɔ mi alɛ, ‘Mose, osuɔtɔ nwu nkpo niakpaa wo aadieko ni di Egipte kasɔ suoto yi, buoye lɛsaa le nintɔlaabla nwɔ nii. Nioso bla afiɔ ya nimaleko wo ni katũ fata wo.’ 24Nioso latɔkɔ ma nlɛ, ‘Otii lele ninkpe koto sɛɛle atokosakasaka, adiki awako.’ Nioso baadiki baayɔ baatɛɛ, ni lafũ lafuki lakpee di ɔtɔ kamɛ, ni di lɛnankyuebi le mmle ladie kamɛ nɛ!”
25Mose lanya alɛ batii nwu ntooyie kobe, Aron kafɔɔ niɛta ma beeyu osuku nwu, beekple lɛmansaa kafɔɔ bɛɛta balo lɛma. 26Nioso Mose layila di kasikɔ lɛma nwu kayoko ni aabuɛ alɛ, “Aye ba bamuu ninkpe ni di SAATE kakyɛ biwa ɔkyɛ nii.” Ninfɛ di Lewi banantii bamuu lakyɛ baalaamana nwɔ baakyi nɛ.
27Ninfɛ aatɔkɔ ma alɛ, “Nnya ɔlaa wɔ di SAATE Israel batii Yaa, kobuɛ ni: ‘Obiala lee ayɔ kapamii nɔɔ asaka di ɔtɔ. Biɛkyɛ bikyi katoo ku kala di kasikɔ nwu, disi le ku disi le, di obiala alo obilɛma-suɔtɔbi ku siɛwo ku manko mba ninsi bakaako ni bawo.’” 28Lewi batii nwu labla fɛ mmle okle di Mose lakpee ma ni kufiofa, nioso dii nwu nkpo batii fɛ nkpe ntiɛ lakpi. 29Ninfɛ di Mose labuɛ alɛ, “Miɛ bitoodiki suoto biese biɛta SAATE nwɔ ɔkpɛ, diekye bieyila di aye bamu babisuɔtɔbi ku babilee-suɔtɔbi suoto. Miɛ SAATE nwu ntoowii ye lɛyɔɔ.”
30Kaleesɛ, Mose latɔkɔ batii nwu alɛ, “Bitɔɔbla okpile kplɛ. Kafɔɔ nunua kamakata nkyɛ SAATE nwu nfũ, loobia kamafuo lekoto otikiti di sikpile lee suoto.”
31Nioso Mose lakple aasifi SAATE nwu nfũ ni aatɔkɔ nwɔ alɛ, “O SAATE, lekoto, batii ba mmle lɛbla okpile kplɛ! Diekye bɛɛyɔ koto sɛɛle bɛɛbla afiɔ bɛɛta suoto lɛma. 32Kafɔɔ nunua, lekoto, yɔ sikpile lɛma fakyɛ ma. Nse faayɔ fakyɛ ma, ni faaklee leyooto fadiki di kukũ ko fɛɛkpana ni kamɛ.”
33Ninfɛ di SAATE nwu ladiki Mose kanya alɛ, “Otii lele niɛbla okpile di suoto nii, nnwɔɔ leyooto kamadiki di kukũ nii kamɛ nɛ. 34Nunua tɔɔkyɛ, faalaakpaa batii nwu fasifiko lɛba le latɔkɔ fɔ ni, tɔkyɛntɛ nii kamaleko ye katũ. Kafɔɔ nse obe nwu lewo alɛ nnanfi kootoko, kamananfi ma kootoko di okpile lɛma suoto.”
35Ninfɛ di SAATE nwu lata ofiɛ kpile lapɛ batii nwu nkpo ta lɛsaa le baabla ni ku lɛnankyuebi le di Aron labla ni oso.
Currently Selected:
ESODƆS 32: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
