ESODƆS 3
3
Yaa Lalɛɛ Mose
1Mose latoonyu ɔlɔ nɔɔ Yetro#3.1 Yetro nwu mankple manlɛɛ Reuel nɛ. wɔ niale ni Midian batii oletatɛ bafoso. Dii ninwii, aakpaa bafoso nwu nkpo aasifiko ɔfaafuu lɛba le niakyo nii, ni aalaadu Horeb, Yaa kobokote nwu nɛ. 2Nfa di SAATE nwu tɔkyɛntɛ onwii ladiki suoto aatuo nwɔ ku ɔtɔ wɔ nikofiɛ ni di owuufa onwii kamɛ nɛ. Mose lanya alɛ, owuufa nwu nkpo n-yɛ ɔtɔ kafɔɔ kutatoofiɛ. 3Nioso Mose labuɛ alɛ, “Kamakpukuti ntɛɛtɛɛ, ninlolaa nnyu lɛsaa le mmle niɛbla ni ɔkpɛ, lɛsaa le oso di owuufa nwu nkpo diloofiɛ nii.”
4Obe wɔ di SAATE nwu lanya alɛ Mose ntookpukuti ɛɛtɛɛtɛɛ alɛ oonyu ni yi, ni di Yaa lalɛɛ nwɔ di owuufa nwu kamɛ alɛ, “Mose! Mose!”
Ninfɛ di Mose latuna alɛ, “Nnyɛɛ.”
5Ninfɛ di Yaa latɔkɔ nwɔ alɛ, “Tansinkpukuti faawa, diki ntokota lɛfɔ. Diekye lɛba le fayɛ nii, kasɔ klekle kale.” 6Ninfɛ aakple aatɔkɔ nwɔ alɛ, “Ami ninle bawa lɛfɔ Yaa, Abraham Yaa, Isak Yaa, ku Yakob Yaa nɛ.” Ta nle mmle oso, Mose latĩi anu, diekye aayɛkɛ alɛ aanyu Yaa anu.
7Ninfɛ di SAATE nwu latɔkɔ nwɔ alɛ, “Nwaako, ntɔɔnya batii nii dibuo di Egipte kasɔ. Ntoonu ma diwilɛɛ ta balanle banyuntɛ lɛma amumu ya bɔɔbla ma ni oso, ntɔɔyɔ nwu ole diibuo lɛma suoto. 8Ntoosoo lɛwa nlɛ kɔmadiki ma nkyeko Egipte batii nnɛɛ kamɛ, nkpaa ma ndieko di kasɔ nwu nkpo suoto nsifiko kasɔ ka ninlɛ ni keemuɔ ni suoto. Kasɔ ka di nnyɛɛntu ku bablɔ kobiɛ ninfe ka ni di suoto, kale ni Kanaan batii, Hiti batii, Amori batii, Perisi batii, Hiwi batii ku Yebusi batii kale. 9Nwaako ntoonu Israel batii nii diwi, ntɔɔnya kafɔɔ mmle okle di Egipte batii kɔbla ma ni amumu. 10Nioso nunua tɔɔkyɛ. Kokpee fɔ Farao nfũ nlɛ, faalaakpaa batii nii, Israel batii fadieko di Egipte kasɔ.”
11Kafɔɔ Mose latɔkɔ Yaa alɛ, “Ami owe nle, alɛ ami kakyɛ Farao nfũ nlɛ kɔkpaa Israel batii ndieko di Egipte?”
12Ninfɛ di Yaa latɔkɔ nwɔ alɛ, “Kamasiɛko fɔ. Nle mmle nimale nsũ lɛtɛsaa ninta fɔ alɛ, Ami niekpee fɔ kɔtɔ nɛ. Nse fatɔɔkpaa batii nii feedieko di Egipte yi, bibasumu mi di kobokote ko mmle osi.”
13Ninfɛ di Mose latɔkɔ Yaa alɛ, “Nse lɛkyɛ Israel batii nfũ, lɛtɔkɔ ma nlɛ, ‘Bawa lee Yaa niekpee mi ɔkyɛ lee,’ bɛɛkaalɛ mi alɛ, ‘Lɛ manlɛɛ nwɔ?’ Ni be nintɔkɔ ma?”
14Ninfɛ di Yaa latɔkɔ Mose alɛ, “AMI NINLE AMI. Nya ɔlaa wɔ mmle faatɔkɔ ni Israel batii: ‘AMI niekpee mi ɔkyɛ lee.’”
15Yaa lakple aatɔkɔ Mose alɛ, “Tɔkɔ Israel batii falɛ, ‘SAATE nwu, bawa lee Yaa, Abraham Yaa, Isak Yaa ku Yakob Yaa niekpee mi ɔkyɛ lee.’ Nle mmle ninle mi leyooto dinaa ni kaloo nɛ. Leyooto le mmle dikpeni bɛɛtɔɔlɛɛ mi diɛyɔ ni kɔɔna diesfi ni kɔna.
16“Tɔɔkyɛ, faalaasiisa Israel banɔɔfotii faatɔkɔ ma falɛ, ‘SAATE nwu, bawa lee Yaa, Abraham Yaa, Isak ku Yakob Yaa niadiki suoto aatuo mi aabuɛ alɛ: Anu nii ntika ye di suoto, ntɔɔnya lɛsaa le batɔɔbla ye ni di Egipte. 17Nioso labuɛ latɛ nlɛ kamakpaa ye ndieko di dibuo lee kamɛ di Egipte nsifiko Kanaan batii, Hiti batii, Amori batii, Perisi batii, Hiwi batii ku Yebusi batii kasɔ suoto, nfũ di nnyɛɛtu ku bablɔ kobiɛ ninfe nii.’
18“Israel banɔɔfotii kamanu fɔ ɔlaa. Ni minko banɔɔfotii nwu biɛkyɛ Egipte ɔka nfũ biɛlaatɔkɔ nwɔ bilɛ, ‘SAATE nwu, Hebri batii Yaa ladiki suoto aatuo wo alɛ, tawo osuku buɔɔkyɛ ayi atiɛ osuku di ɔfaafuu buɔlaata ole buta SAATE Yaa loo.’ 19Kafɔɔ n-ye nlɛ Egipte ɔka dilabata ye osuku bisifi diediki kɔnɛɛ nii siene lɛblako nwɔ suoto ɔkpɛ fiɛ. 20Nioso kamayɔ kɔnɛɛ nii nnanfi Egipte batii kootoko ku sɛkpɛ se niɛbla ni ɔkpɛ kaamɛ lɛma. Nni kamaa, abata ye osuku minsifi.
21“Kamata kafɔɔ Egipte batii nle batii ba mmle sibualɛ ku asa ɔta, alɛ nse biodie minsifi, bilaasifi nnɛɛ fukuti. 22Ɔsanko biala akaalɛ owo nɔɔ ku ɔsanko lele ninsi leeyo nɔɔ koto sɛɛle ku koto fututu ku akleesaa. Alɛ biayɔ asaa ya mmle minlolaa babisuɔtɔbi ku babisankobi lee. Di nle mmle ɔbla kamɛ, bibafũ Egipte batii lɛsaawɛ.”
Currently Selected:
ESODƆS 3: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
