ESODƆS 23
23
Afiofa Ya Nimbla Ni Asaa Di Osuku Kanya Ku Nyaami Ɔnya
1Tanklee ɔlaa wɔ fanan-ye nse kute ni nkpo faatookyiko. Tankyakaako kpileblatɛ aalaa sɛlaa kuafũnu.
2Tantikanko batii dikudi biabla lɛsaa lɛlaale. Nse foole kamaayilatɛ kaakankɔ yi, tantikanko batii dikudi baamunikĩisa ɔsaabla nwaa baafuusa. 3Tannyu piitɛ kafɔɔ dianu faabuɛ ɔlaa faatɔɔ di kakankɔ.
4“Nse lo lɛfɔ nankyue ee bɔkɛɛ wɔ nintuka ni atoo kɔlalaa-ankyi fɛɛnyɔɔ yi, faakpaa nwɔ fakyɛnko nwɔ. 5Nse fɛɛnya otii wɔ niekyidi fɔ ni bɔkɛɛ wɔ nintuka ni atoo, lɛnɔɔ ate, di atoo nwu ntika nwɔ di suoto yi, tanwaalɛ nwɔ faafe, nyu falɛ feeteke atoo nwu di suoto nɔɔ.
6“Tambuɛ ɔlaa faatika di piitɛ suoto di kakankɔ. 7Tantikanko sɛlaa kuafunu. Tanlo kafɔɔ otii wɔ di ɔlaa nɔɔ nkpe ni ee anan-ye nwu ni ole di ɔlaa nwu suoto kukpi lɛpɔɔ. Diekye namata kpileblatɛ kuonwii lɛbɛ.
8“Tanfũ koto di ditunu kamɛ, diekye koto ofũ diitunu kamɛ mbiɛsa batii ba nikɔnya ni anu, mamunikĩisa onukwale manfuusa.
9“Bitambla ɔfɔɔ amumu; diekye aye bamu biye lɛsaa le dile nii nse fale ɔfɔɔ. Diekye bitooyile bafɔɔ di Egipte kasɔ suoto.
Lɛnyɛɛtɛyi Afiofa
10“Kpɛ kasɔ lɛfɔ alɛɛ akuɔ faafee alesaa nwu nkpo fasiisa. 11Kafɔɔ di lɛlɛɛ kuɛnsinle kamɛ faata kasɔ nwu kate katɛ ɔnyɛɛ, tankpee lɛsalɛsaa diekple diputu. Ni bapiitɛ kaamɛ lee kakyɛ nfa manaayɔ alesaa, babɔkɛɛ kafɔɔ kawɛ nnya niebu ni manwee. Nkpo okle kafɔɔ faabla nta awosobi kofe ku nnɔnyi awoso lɛfɔ nɛ.
12“Ayi akuɔ faabla sɛkpɛ lɛfɔ simuu, kafɔɔ di dii kuɛnsinle suoto tambla ɔkpɛ kuonwii, alɛ nankyue lɛfɔ ku bɔkɛɛ lɛfɔ wɔ nintuka ni atoo katɛ ɔnyɛɛ. Ni ɔlanle wɔ beelofo ni leeyo lɛfɔ ku ɔfɔɔ kafɔɔ katɛ ɔnyɛɛ.
13“Lolaa fanyu falɛ fɛɛbla di ɔlaa biala lɛtɔkɔ fɔ ni suoto. Tampɛ ɔlaa faata afiɔ kuanwii. Tanlɛɛ ma bia leyooto kaanya lɛfɔ kamɛ.
Ayi Kplɛ Atiɛ Ole Afiofa Di Lɛlɛɛ Kamɛ
14“Sitiɛ di lɛlɛɛ kamɛ dikpenii biele dii biɛtɛɛ.
15“Bile bloblo wɔ Ninantaka ni Dii; ayi akuɛnsĩ biele bloblo wɔ manankpee ni lɛnyankasaa, fɛ mmle okle lakpee yi ni kufiofa. Bile dii nwu nkpo di obe wɔ lɛta ye ni di Abib suoto, diekye kɔwɛntɛ nwu kamɛ biadie di Egipte nɛ.
“Otii kuonwii atanwa mi anu nnɛɛ fukuti.
16“Bile ofiɛlɛbee Dii ku alesaa kasale ya bibafiɛlɛ minkyeko ni afe lee kamɛ.
“Biele asaa yɛntɛle ofiɛlɛ ɔwako leyo Dii di lɛlɛɛ kalookɔ, di obe wɔ bitooloo ni kofe lee kamɛ asaa ofiɛlɛ okpete ni siiwu.
17“Di lɛlɛɛ kamɛ, basuɔtɔ lee bamuu biawa ami SAATE wɔ Ninlenke ni anu sitiɛ.
18Nse biɔyɔ bɔkɛɛ minta ole mintɛɛ yi, bitan-yɔ bloblo wɔ di lɛnyankasaa nsi ni baikyakaa.
“Bɔkɛɛ wɔ biɔyɔ minta ole mintɛɛ ni kafɔɔ lɛla ditambu diayila kale lasɛ ni.
19“Biɛyɔ kofe lee kamɛ alesaa kasale biene biwako SAATE Yaa lee leyo.
“Bitanwa tie dibi di ɔya nnyɛɛntu kamɛ.
SAATE Labuɛ Aatɛ Alɛ Abanyu Israel Batii
20“Binyu, kamakyesee Yaa tɔkyɛntɛ anle ye katũ annyu ye di osuku, ankpaa ye anaabuoko lɛba le lelolaa lɛta ye nii. 21Bilolaa nwɔ binyu, biɛkyɔɔ nwɔ ɔlaa kotoko. Bitantaka biayila nwɔ di suoto; diekye alabayɔ otokopĩ lee akyɛ ye, diekye Leyooto nii kanya ayɛ. 22Nse bielolaa kotoko biɛkyɔɔ bienu nwɔ ɔlaa, biɛbla di sɛlaa se simuu lɛtɔkɔ ye nii, ni balo lee kamale mi balo, mba kafɔɔ niɛtaka bayɛ ye ni di suoto kamayila ma di suoto. 23Tɔkyɛntɛ nii kamaleko ye katũ ankpaa ye ambuoko Amori batii, Hiti batii, Perisi batii, Kanaan batii, Hiwi batii ku Yebusi batii kasɔ suoto nwɔɔsa ma fɛɛ. 24Bitanwakosa suoto kasɔ biata afiɔ lɛma ee biatɔ nya ee biatikanko ɔsaabla lɛma. Kafɔɔ bilalaasa nya biebibiɛ nfiɔfa lɛma nwu. 25Biesumu SAATE Yaa lee nwu, ni lɛtɔtɔlɔ nɔɔ nwu kamatika ye di alesaa ku ntu suoto. Kamadiki sifiɛ kaamɛ lee, 26lɛmɛ kafɔɔ dilabadie ɔsanko lee kuonwii ee akple ɔlɛma kaasɔ lee nwu suoto. Kamata ye minsiɛ nkpa minaase di nkpa lee kaloo.
27“Kamata ami lɛyɛkɛ nle ye katũ, ninkpɔkpɔtɔsa nnle be bibakpɛko nii. Kamata balo lee bamuu ntoso ye mansifi. 28Kamakyesee banwakɛ manle ye katũ manaatososa Hiwi batii, Kanaan batii ku Hiti batii di osuku lee. 29Kafɔɔ namatososa ma di lɛlɛɛ ninwii kamɛ alɛ kasɔ kate fukuti kan-yii, mmle okle babɔkɛɛ ba ninkpe ni kobe dilabakpɛ batookpee ye ni kubuɛ. 30Kamatootososa ma kɛɛkɛ kɛɛkɛ di sitũ lee, diɛlaase di obe wɔ bibakpɛ minyii ni kasɔ nwu nkpo.
31“Kamatika kɔmɛ lee nkyeko Lekpo Sɛɛle nnaase di Filisti batii Lekpo kotoko. Diɛyɔ ni di kufĩ katunkɔ ɔfaafuu diɛlaase di Eufrate okle kotoko. Kamayɔ batii ba ninsi ni kaasɔ nwu nkpo suoto nkpee ye ninnɛɛ kamɛ, mintososa ma mindiki kaamɛ lee. 32Tambla kanya ninii ku mma ee ku afiɔ lɛma. 33Bitanta ma baasiɛ di kasɔ lee suoto, nse diele nkpo babata ye mimbla okpile di suoto nii, diekye afiɔ lɛma nwu ɔtɔ kamakple okũ kundiki ye.”
Currently Selected:
ESODƆS 23: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
