ESODƆS 21
21
1“Nnya kufiofa ko faayɔ fatɛ ni di Israel batii anu:
Hebri Batii Sɛlanle Kamɛ Osiɛ Afiofa
2“Nse fɛɛya Hebri batii ɔlanle, alɛɛ akuɔ dikpenii ɛɛbla ɔkpɛ ɛɛta fɔ. Di lɛlɛɛ kuɛnsinle kamɛ dikpenii ansifi koto kukunwii ɔtanta. 3Nse lete nɔɔ niawa yi, ni lete nɔɔ asifi; kafɔɔ nse manko ɔsɔfɔ niawa, ni manko ɔsɔfɔ nwu basifi. 4Nse saate nɔɔ lɛtɔɔ ɔsanko eelofo babisuɔtɔbi ku babisankobi ɛɛtɔɔ, ni babi nwu nkpo ku ɔsanko nwu kakple saate nɔɔ nwu bale. Ni osuɔtɔ nwu lete nikasifi.
5“Kafɔɔ nse ɔlanle nwu lebuɛ alɛ, ‘Mbɔmbɔ saate nii ku ɔsɔfɔ nii ku babi nii, noomiɛ nlɛ nsifi yi,’ 6ni saate nɔɔ nwu kakpaa nwɔ ansifiko bakantɛ anu. Ankpaa nwɔ anaase di kayokontũ ee kayokontũ sewoso ɔlɔɔkɔ, saate nwu ndufu nwɔ kotoko ku kotoko didufusaa. Nse atookple saate nɔɔ ole diɛlaase di dikpiiyi nɔɔ.
7“Nse osuɔtɔ owo lesunsũ obisankobi nɔɔ ɛɛta sɛlanle yi, nnwɔ dinaa alɛ eesifi fɛ mmle di ɔlanle suɔtɔ nsifi nii. 8Nse aabuo saate nɔɔ wɔ niaya nwɔ alɛ aale nwɔ ni ɔsɔfɔ anu yi, ni dikpenii eekplesa nwɔ eesunsũ ɛɛta ote. Dinaa alɛ ɛɛyɔ nwɔ eesunsũ ɛɛta kale bamba batii, diekye nnwɔɔ niɛlalaasa kanya ninii nwu. 9Kafɔɔ nse otii wɔ niɛya nwɔ ni komiɛ alɛ ale obisuɔtɔbi nɔɔ ɔsɔfɔ, ni dikpenii ambla nwɔ fɛ obisankobi nɔɔ. 10Nse osuɔtɔ wɔ niɛyɔ ni ɔlanle sanko, lekple ɛɛlaayɔ ɔsanko bamba yi, dinaa antĩi nwɔ ɔfɔtɔ antɛ. Dikpeni antɔɔ alesaa nɔɔ ku akleesaa nɔɔ, mantɔɔnya bawo kafɔɔ fɛ ɔsa ku ɔsɔfɔ. 11Nse ɔlɔɔtɔɔ asaa atiɛ ya mmle nwu yi, ni aafuo osifi koto kukunwii ɔtanta.
Afiofa Di Amumu Ɔbla Suoto
12“Otii lele niɛlaasa otii lɛsaa eelo, dikpenii nnwɔɔ kafɔɔ beelo nwɔ. 13Kafɔɔ nse diele ɔtɛ ɛɛtɛ, fiɛ di Yaa lɛta diɛwa ninkpo, ni aatoso ansifi lɛba le kamatuo nii. 14Kafɔɔ nse otii owo lɛtɛtɛɛ, ɛɛtɛ eelo owo nɔɔ nwu nkpo, ni baakpaa nwɔ mandieko di oleɔta akyikye nii katũ, manaalo nwɔ.
15“Otii lele niɛpɛ ote ee ɔya, dikpenii beelo nwɔ.
16“Otii lele nieyu otii wo nɔɔ eesunsũ ee eewofasa nwɔ di ɔkyɛ nɔɔ beemufũ nwɔ, dikpenii beelo nwɔ.
17“Otii lele niɛkpaani ote ee ɔya, dikpenii beelo nwɔ.
18“Nse diɛwa alɛ basuɔtɔ banyɔ lɛlɔ bɛɛkpɛ di onwii lɛpɛ owo nɔɔ lɛklɔɛklɔɛ ee ɛɛsafɔ nwɔ difuɔ anankpi, ate di ɔkla, 19otii wɔ niɛpɛ nwɔ ni lɛklɔɛklɔɛ, batananfi nwɔ kootoko, nse owo nɔɔ nwu lɛtaka akyɛ akle owoso ookyi, nnwɔ nkpo niepila nwɔ nii, atɔɔ obe wɔ eete ni di ɔkla suoto koto, aanyu nwɔ kafɔɔ ayɛntɛ osie.
20“Nse osuɔtɔ owo lɛpɛ ɔlanle suɔtɔ nɔɔ ee ɔlanle sanko nɔɔ owoso, eekpi nwɔ di nnɛɛ kamɛ yi, dikpenii bɛɛnanfi saate nwu kootoko. 21Kafɔɔ nse ɔlanle nwu nkpo lɛtaka kaleesɛ ee di dii nyɔɔfa kamɛ, ni batananfi nwɔ kootoko diekye nnwɔɔ nimba nwɔ.
22“Nse diɛwa alɛ basuɔtɔ banyɔ kɔkpɛ bɛɛpɛ mɛlakatɛ eefua eelofo obi nwu anayibe nii, di ɔsanko nwu diesimpila akyakaa yi, ni otii wɔ niɛpɛ ni ɔsanko nwu, kata lɛsaa lele di ɔsa alɛ oofũ, di bakantɛ lefũ beekpee nii. 23Kafɔɔ nse ɔsanko nwu lepila eelenkeesa, ni otii wɔ niepila nwɔ nii, kafũ letota nwu nkpo okle. Nse kukpi kule nnwɔɔ kafɔɔ aakpi. 24Nse ninu dile, baabiɛ nwɔ lele, nse lɛnyɛɛ dile, baakpa nwɔ lele, nse kɔnɛɛ kule, baapila nwɔ kole, nse kɔkpaa kule, baapila nwɔ kole, 25nse dififiɛ dile, baafifiɛ nwɔ, nse kakɔ kale baatika nwɔ kakɔ, nse ofifini kule, baafifini nwɔ.
26“Nse osuɔtɔ owo lɛpɛ ɔlanle suɔtɔ nɔɔ ee ɔsanko ninu eebiɛ, dikpenii eediɛ ɔlanle nwu nkpo lesifi ta ninu nwu nkpo oso. 27Nse ɛɛpɛ ɔlanle suɔtɔ nɔɔ ee ɔlanle sanko nɔɔ lɛnyɛɛ eekpa yi, dikpenii eediɛ nwɔ eesifi ta lɛnyɛɛ nwu oso.
28“Nse nankyue owo lewuo osuɔtɔ ee ɔsanko akya eelo yi, dikpenii bɛɛsafɔ nankyue nwu nkpo afuɔ beelo. Balaawee sina nɔɔ kafɔɔ. Batananfi saate nɔɔ kafɔɔ kootoko. 29Kafɔɔ nse diɛwa alɛ nankyue nwu nkpo kowuo batii akya obe lele, batɔɔtɔkɔ saate nɔɔ anansɛɛ nwɔ akpee di kɔba kamɛ, eelo osuɔtɔ ee ɔsanko owo, ni baasafɔ nwɔ afuɔ manlo, saate nɔɔ kafɔɔ baalo nwɔ. 30Kafɔɔ nse diɛwa alɛ kpi nwu nkpo basaate lɛkaalɛ letokonanfi koto di otii lɛma wɔ niekpi nii, ni nankyue saate kata koto nwu nkpo anfũ nkpa nɔɔ. 31Nse nankyue nwu nkpo lewuo osuɔtɔbi owo ee ɔsankobi owo akya, kufiofa ko mmle nwu kabla ɔkpɛ. 32Nse nankyue nwu lewuo ɔlanle suɔtɔ ee ɔlanle sanko akya eelo yi, ni nankyue saate ata ɔlanle nwu nkpo saate koto fututu afosi atiɛ. Baasafɔ nankyue nwu afuɔ balo.
33“Nse diɛwa alɛ otii owo letikiti dibiɔ kanya ɛɛtɛ ee eekutu lewo anantĩ kanya di nankyue ee bɔkɛɛ wɔ nintuka ni atoo lɛkpa eebu kaamɛ eekpi, 34dikpenii, dibiɔ nwu nkpo saate lɛta bɔkɛɛ nwu nkpo saate koto, an-yɔ bɔkɛɛ kpile nwu.
35“Nse otii owo nankyue lepila otii bamba ole diɛta alɛ eekpi, dikpenii banankyue basaate nwu nkpo banyɔ, beesunsũ nnwɔ ninkpe ni nkpa, bɛɛsɛ koto nwu nkpo ku nankyue kpile nwu kyɛkyɛ. 36Kafɔɔ nse diɛwa alɛ obe lele nankyue nwu nkpo kowuo akya fiɛ di saate diɛsɛɛ nwɔ akpee kɔɔba, ni dikpenii saate lɛta nankyue bamba, eefũ okpile nwu.
Currently Selected:
ESODƆS 21: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
