ESODƆS 13
13
Babi Kasale Ɔyɔ Ɔta SAATE Nwu
1SAATE nwu latɔkɔ Mose alɛ, 2“Kleklesa obisuɔtɔbi kasale biala fase lete fatɛɛ. Lelofo kasale biala nimadie di olofofɔtɔ kamɛ di Israel batii kamɛ, ole mi ale. Otii woo, ee bɔkɛɛ.”
Bloblo Wɔ Di Lɛnyankasaa Diesi Ni Dii Ole
3Ninfɛ di Mose latɔkɔ Israel batii alɛ, “Binyuma dii le mmle, dii le biadie ni di Egipte kasɔ suoto di sɛlanle kamɛ, diekye SAATE nwu niayɔ kɔnɛɛ nɔɔ siene aakpaa ye aadieko ninfa. Nioso bitanle lɛsalɛsaa di lɛnyankasaa nsi nii. 4Miɛ, biodie di Egipte di kɔwɛntɛ kasale ko manlɛɛ ni Abib. 5Nse SAATE nwu lɛkpaa ye ɛɛlaabuoko kasɔ ka aabuɛ aatɛ alɛ abata ni bawa lee yi, dile ni Kanaan batii ku Hiti batii ku Amori batii ku Hiwi batii ku Yebusi batii kasɔ yi, bienyuma bile dii le mmle nkpo di kɔwɛntɛ ko mmle suoto: Kasɔ ka di nnyɛɛntu ku bablɔ kobiɛ ninfe ni. 6Di ayi akuɛnsĩ kamɛ bile bloblo wɔ di lɛnyankasaa diesi ni kaamɛ. Di dii kuɛnsinle suoto yi, biele dii bita SAATE nwu. 7Bile bloblo wɔ ninantaka ni di ayi akuɛnsĩ nwu nkpo suoto. Bitanta baanya lɛsalɛsaa di lɛnyankasaa nsi ni kaamɛ lee ee baanya lɛyankasaa kuninwii di kasɔ lee suoto. 8Di dii nwu nkpo suoto, biɛtɔkɔ babisuɔtɔbi lee bilɛ, ‘Kɔbla nle mmle ta lɛsaa le di SAATE nwu nkpo labla aatɛɛ ni di obe wɔ ladie ni di Egipte kasɔ suoto.’ 9Ɔsaabla wɔ mmle mate fɛ nsũ lɛtɛsaa di kanɛɛtũ lɛfɔ ku nsũ lɛtɛsaa di katũ lɛfɔ alɛ SAATE nwu kufiofa katoodie fɔ kaanya kamɛ. Diekye SAATE nwu lakpaa fɔ aadieko di Egipte kasɔ suoto ku kɔnɛɛ nɔɔ siene. 10Nioso bile dii le mmle nwu lɛlɛɛ biala di obe wɔ di SAATE nwu lɛtɛ ye ni.
Lɛsaa Le Oso Di Obi Kasale Nle Ni SAATE Ole
11“Nse SAATE nwu ntɔɔkpaa ye ɛɛwako Kanaan batii kasɔ nwu, ɛɛyɔ ka ɛɛta ye fɛ mmle aabuɛ aatɛ aata ni bawa lee yi, 12dikpenii, biɛɛyɔ babisuɔtɔbi kasale biala ku babɔkɛɛ abi suɔtɔbi kasale biala biɛta SAATE nwu, diekye bale nwɔ bale. 13Kafɔɔ bɔkɛɛ wɔ nintuka ni atoo nnwɔɔ yi, biakyɛlɛnsa min-yɔ lefosobi minse kaanya. Nse biɛkyɛlɛnsa yi, ni biefee nwɔ simu. Dikpeni biɛkyɛlɛnsa babisuɔtɔbi lee kasale biala ku bɔkɛɛ.
14“Di kayi kamaa nse babisuɔtɔbi lee lɛkaalɛ ye alɛ, ‘Be lɛsaa di nle mmle kotuo?’ yi, biɛtɔkɔ ma bilɛ, ‘SAATE nwu lakpaa wo ku kɔnɛɛ nɔɔ siene aadieko di Egipte kasɔ suoto di sɛlanle kamɛ. 15Di obe wɔ di Farao lawɛnsa ni otu nɔɔ osie alɛ ɔlɔɔta wo busifi nii, SAATE nwu lalo obisuɔtɔbi kasale biala di Egipte kasɔ suoto, batii ku babɔkɛɛ abi suɔtɔbi kasale. Nle mmle oso kɔta ole nta SAATE nwu di olofofɔtɔ biala obisuɔtɔbi kasale, nkyɛlɛsa kafɔɔ babisuotɔbi kasale ku babɔkɛɛ nɛ.’ 16Ɔsaabla wɔ mmle male nsũ lɛtɛsaa di kanɛɛtũ lee ku nsũ lɛtɛsaa di ntũ lee alɛ SAATE nwu lakpaa wo aadieko di Egipte kasɔ suoto ku kɔnɛɛ nɔɔ siene.”
Lelokonkyɛ Ku Ɔtɔ Takale Nwu
17Obe wɔ di Farao ladiɛ batii nwu baasifi nii, Yaa ditakpaa ma aafenko di Filisti batii kale osuku suoto, nu di osuku nwu labla kakuii. Diekye Yaa labuɛ alɛ, “Nse bɛɛlaakyakako kakpɛ, babakyɛlɛnsa disibu lɛma mankple mansifi Egipte kasɔ suoto.” 18Nioso Yaa lakpaa ma aakɔnsa aalaafenko di ɔfaafuu osuku wɔ niefe ni Lekpo Sɛɛle. Israel batii nwu ladie di Egipte kasɔ suoto baalolaa suoto baata kakpɛ.
19Mose lata baayɔ Yosef akufi baasifiko. Diekye Yosef lata Israel babisuɔtɔbi laka ntam baatɔɔ. Aabuɛ alɛ, “Nwaako Yaa kamadiki ye. Nioso nse eediki ye biɛyɔ mi akufi ninfũ bisifiko.”
20Obe wɔ di Israel batii ladie ni di Sukot, ni baalaasoosa di Etam kɔmɛ di ɔfaafuu nɛ. 21Di obe wɔ bakyɛ ni osuku nwu, di dii kamɛ SAATE nwu nleko ma katũ ku lelokonkyɛ takale antootuo ma osuku. Di kakyɛ kafɔɔ ankpa anta ma fɛ ɔtɔ takale, di mmle okle baafuo ni ɔtɔɔkyɛ kakũ ku kakyɛ. 22Dituntũ takale ku ɔtɔ takale nwu nkpo ditakyɛ diadiɛ ma. Obe lele anleko ma katũ di dii kamɛ, kakyɛ kafɔɔ anle ma ɔtɔ.
Currently Selected:
ESODƆS 13: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
