DEUTERONOMY 3
3
Israel Mabi Ɔɖe Igara Og Iso
1Mose ɔsɔgu sɔ: Ne kama ne bopɛ bofiriki boya kato boki i ɔri iso bokɛlɛ Basan isɛ. Ne Basan igara, Og ku ɔ̃ makpakpɛ̃dze ɔɖuɖu ɔsɛ mabɔrɛ maba maakpɛ̃gu bo kakpã i Edrei. 2Ne Bosate ɔɣere me sɔ, "Midaanigã wũ, alasɔ loɔsu wũ ku ɔ̃ makpakpɛ̃dze ɔɖuɖu gu karɔ̃ ɔɖuɖu lopia i mi nrɔɔ̃ ame. Mibara wũ lɛ kumɛgɔ mibara Sixon awe, ma Amorise igara wɔ loɖe sigara i Xesbon."
3Ne ɔso Bosate bo Ɣaa ɔsu Og, Basan igara gu ɔ̃ makpakpɛ̃dze ɔɖuɖu ɔpia i bo nrɔɔ̃ ame. Boɖue ma ɔɖuɖu, boikuti gbanadze kuwɛ̃. 4Bomɔɛ̃ ɔ̃ simagɛ̃siare ɔɖuɖu i ɔwi wɔmɔ ame. Ɔmagɛ̃siare kuwɛ̃ iikuti i sɛ̃ sikuɔ ɔɖuɖu ame sɔ boimɔɛ̃ i ma kɔrɛ - i Argob ibuiti ɔɖuɖu ame i Og sigarakaɖekɔ̃ i Basan ame. 5Simagɛ̃siare ɔɖuɖu dzɛgbe ne, matsue abere kɔlɛa maki malɔ sɛ̃ fiɛ mapia kuyogodɔ̃ gɔ nto masɛ̃ ala abɔra. Kumagɛĩ kosoi kposu gɔ maitsue abere mapia ana ɔwe. 6Bowɔra sɛ̃ pelepele lɛ kumɛgɔ bobara Sixon, Xesbon igara awe. Bowɔra ɔmagɛ̃siare biara ku marɛrɛ̃ i marɔ̃go gu mabiɛtɛ ɔɖuɖu. 7Ɣɛɛ ara wa i ma simagɛ̃siare ame gu iyomabɔi ɔɖuɖu ne, bosore boruigu botã so.
8Ne ɔso bofɔ karɔ̃ ga mpia i Yordan ɔwore kuɣɛ̃kabɔrɛkɔ̃ isɛ. Ita i Arnon Kawɛlagbolomi ame ikɛlɛ ta Xermon Kube kɔrɛ i ma Amorise magara inyɔ magbe kɔrɛ ku ɔwi wɔmɔ. 9(Xermon kube i ma Sidonse sɛ makpere sɔ Sirion, ne ma Amorise sɛ makpere kɔ̃ sɔ Senir.) 10Bomɔɛ̃ simagɛ̃ ɔɖuɖu dzɛ i kabetɛfɛkɔ̃ gu Gilead ɔɖuɖu gu Basan ɔɖuɖu ikɛlɛ ta Saleka gu Edrei simagɛ̃ dzɛ i Og sigarakaɖekɔ̃ i Basan ame. 11(Ma Refaise ɔturi tsɔra wɔ lokuti loɖe Og Basan igara. Ɔ̃ ibɔrakpinaa karɛkɔ̃ ɔkarã meta ina awe fiɛ kabɛ meta inyɔ. Ibɔrakpinaa karɛkɔ̃ gagbe se i ma Amonse ɔmagɛ̃ wɔ marɔ sɔ Raba ame ipɛ i ɔwi wɔ matsɛrɛ ɔko wɔgbe.)
Maɣɛ Karɔ̃ Ga i Yordan Ɔwore Kuɣɛ̃kabɔrɛkɔ̃ Isɛ
12Mose ɔɣere Israel mabi sɔ, "Gɔ boɔfɔ karɔ̃ ku ɔwi wɔmɔ ne, lotã Ruben kamele gu Gad kamele karɔ̃ ga mpia i Aroer kato isɛ i Arnon kawɛlagbolomi kɔrɛ gu Gilead abemi karɔ̃ kasɛ ku kã simagɛ̃ ɔbua iso. 13Lotã Manase kamele ɔfã Gilead karɔ̃ tsɔra gu Basan karɔ̃ ɔɖuɖu ga nɖe Og sigarakaɖekɔ̃. (Argob ibuiti ɔɖuɖu nɛ i Basan mala maɔkpere sɔ ma Refaise karɔ̃. 14Yair wɔ lobɔrɛ i Manase kamele ame, ɔsu Argob ibuiti ɔɖuɖu ikɛlɛ ta ma Gesurise gu ma Maakatse kume iso. Masia ngbe ɔ̃ iyere ne ɔso ipɛ nɔme ne, masɛ makpere Basan sɔ Xavot Yair.) 15Ne losu Gilead karɔ̃ lotã Makir. 16Ɣɛɛ Ruben kamele gu Gad kamele ne, lotã ma karɔ̃ ga lota i Gilead ikɛlɛ Arnon Kawɛlagbolomi ame (kawɛlagbolomi ndɛndɛ̃ nɖe kume) ka ikɛlɛ Yabok Ɔwore ame, gɔ ne ame nɖe ma Amonse kume ne. 17Ne kuɣɛ̃kabokɔ̃ isɛ kume loɖe Yordan ɔwore i Araba, ita i Kineret ikɛlɛ Araba Ɔpo (masɛ makpere ana sɔ Mma Ɔpo), gɔ ipia i Pisga kube sikparuɛ kayirinɔ.
18Loɣere mi ku ɔwi wɔmɔ sɔ, " Bosate mi Ɣaa loɔsu karɔ̃ gagbe ɔtã mi sɔ misu. Ɣɛɛ mi marɛrɛ̃ ma lokote makpakpɛ̃dze ɔɖuɖu, si maledza so matã kakpã. Ikote sɔ maawara ɔwore maɖe mi manyii Israel mabi tsɔra katɔ̃. 19Ɣɛɛ ne, mi mare gu mabi gu mabɔi (loɣe sɔ miba iyomabɔi gbodzoo) si mawe i simagɛ̃ dzɛ lotã mi ame. 20Mibuai Israel mabi tsɔra gbɔgbɔɔgbɔ maafɔ karɔ̃ ga i Bosate mi Ɣaa aatã ma ana, i Yordan ɔwore kuɣɛ̃kabokɔ̃ isɛ lɛ ɔ̃ɔbara ɔtã mi. Si maɔfɔ karɔ̃ kama ne, si mi ɔbiara aakpese mikɛlɛ mi kawekɔ̃ ga loɔtã mi."
Ɣaa Ɔsi Mose Mmara Sɔ Ɔ̃ibawara Yordan Ɔwore Ɔbo i Kanaan Karɔ̃ Ame
21Ɔwi wɔmɔ ame ne loɣere Yosua sɔ, "Ɔɔnya ara ɔɖudu wa i Bosate bo Ɣaa ɔbara magara inyɔ magbe ku fɔ anɔmi. Ngbɔ ame i Bosate to ɔ̃abara sigarakuɖekɔ̃ ɔɖuɖu dzɛ mpia i ngbegɔ mito mikɛlɛ ne. 22Daanigã ma, Bosate mi Ɣaa mɔmɔ to ɔ̃akpɛ̃ ɔtã mi."
23Ɔwi wɔmɔ ame ne lopɛ Bosate nrɔɔ̃ sɔ, 24"O Bosate Wɔ Nsiguso, ɔɔtã fɔ ɔɖabo ɔɔtsɛ ara siare gu awawãra wa ato aaba aabara inya koko. Ala mme kuɣɔ mpia i kato ɣee karɔ̃ ngɔ loawo arabarara gu karabara siare ga asɛ abara ɔbara? 25Tã me losɛ loanyɔ karɔ̃ sɛɛ ga i Yordan ɔwore kama - kabemi karɔ̃ ku kulɛ gu Lebanon abe."
26Ɣɛɛ ala mi ɔso ne Bosate to ɔnagu me sikpã fiɛ ɔ̃isito ɔkã me atsue. Bosate sɔ, "Nnɛmɔ ka ilɛ." Ne sɔ, "Daasiɣere me kuira i itɔ̃me nɛgbe iso ana. 27Kɛlɛ Pisga kube itititɛ̃ iso si anyɔ katikpe gu kagbalɔ gu kuɣɛ̃kabɔrɛkɔ̃ gu kuɣɛ̃kabokɔ̃ isɛ. Nyɔ karɔ̃ sese ku fɔ anɔmi, alasɔ aito aawara Yordan ɔwore wɔgbe. 28Ɣɛɛ sɛra Yosua si apia wũ katetere gu ɔle alasɔ ɔ̃ loakɔ maturi magbe ɔkɛlɛgu fiɛ ɔ̃atã ma maɖe karɔ̃ ga ato aanya." 29Ne ɔso bowe i kagbolomi ame i Bet Peor kɔrɛ.
Currently Selected:
DEUTERONOMY 3: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
