DEUTERONOMY 1
1
Israel Mabi Ɔrui i Xoreb Kube Kɔrɛ
1Atɔ̃me wagbe i Mose ɔɣere Israel mabi ɔɖuɖu i fafuĩ ame, i Yordan ɔwore kuɣɛ̃kabɔrɛkɔ̃ isɛ i Araba. Araba pia i Suf kanɔsɔ̃, i Paran ɔmagɛ̃ gu Tofel gu Laban gu Xazerot gu Dizaxab ndɛ̃. 2(Irisɛ ita i Xoreb kube kɔrɛ isɛ iabo Kades Barnea iki i Seir Kube ɔri sɛ ifɔ ayi aweo-ɔwɛ̃.)
3Ikɔ sinaare ame iyi ɖeakatɔ̃ i kuwa kuweoɖeakatɔ̃ ame ne, Mose ɔɖisilɔ ɔtã Israel mabi i nnɛ ɔɖuɖu i Bosate sɔ ɔɣere ma iso. 4Ɔbara nnɛgbe ku ɔwi wɔ ɔ̃ɔɖe ma Amorise igara, nwɔ loɖe sigara i Xesbon marɔ sɔ Sixon iso kama. Mose ɔɖe Basan igara wɔ marɔ Og iso i Edrei ana, nwɔ loɖe sigara i Astarot.
5Mose ɔtsɛ mmara mɛgbe karɔ̃ iɖiite Israel mabi, i Moab ibuiti nɛ mpia i Yordan ɔwore kuɣɛ̃kabɔrɛkɔ̃ isɛ. Ne Mose ɔɣɛ sɔ:
6 Bosate bo Ɣaa ɔɣere bo i Xoreb kube kɔrɛ sɔ, "Miɔwe i kube gɔgbe kɔrɛ iɔna ɔpã. 7Mitara kasɛkɔ̃ si mikɛlɛ katɔ̃ i ma Amorise kabemi karɔ̃ ame. Mikɛlɛ magbamikui maturi ɔɖuɖu ma i ma Amorise kɔrɛ i Araba. Mikɛlɛ abe ame gu i kuɣɛ̃kabokɔ̃ isɛ abemi nrɔ̃ mɛ nfere gu ikɛlɛ Kagbalɔ gu mmɛ nfere i Ɔpo siare ɔkpokpo iso kɔrɛ. Mikɛlɛ Kanaan karɔ̃ ɔɖuɖu gu kama i Lebanon ame, si mikɛlɛ miabo ta Frat ɔwore siare kɔrɛ. 8Minyɔ, loɔsu karɔ̃ gagbe lotã mi. Mibo i kã ame si mifɔ karɔ̃ ga i Bosate, ɔɣɛ ɔsɛ ku ndamu sɔ ɔ̃atã mi mawa Abraham gu Isak gu Yakob - gu ma sikparɛ."
Maɖi Matɔ̃ɖedze Gu Matɔ̃meɣɛdze
9Ɔwi wɔmɔ ame ne Mose ɔɣere maturi sɔ, "Miɖe ato wa mba ɔrɔrã aɖo me loasore wũ ɔnɔwɛ̃. 10Bosate mi Ɣaa ɔɔtã miɔɣe sɔ nɔme ne miɔsi lɛ awãmi i kuɖokpo. 11Si Bosate mi mawa Ɣaa, si ɔtã misi ikpɛ kakpi si ɔfere mi kusɛkusɛ lɛ kumɛgɔ ɔɣɛ ɔsɛ! 12Ɣɛɛ nda loawo mi amɔrɛã gu ato gu mi atɔ̃mekaɣɛ ɔɖuɖu ɔsore wũ ɔnɔwɛ̃? 13Miɖi mawolai, makarɔ̃inɔse gu mma mba kuwarɛ, mawɛ̃ i mi kumele biara ame, si loasɛra ma i mi kanya."
14Ne mitã me mmuai sɔ, "Nnɛ aɖi abɔ sɔ aabara ne, ilɛ."
15Ne ɔso losu mi kumele matɔ̃ɖedze ma nɖe mawolai fiɛ maba kuwarɛ, ne loɖi ma sɔ maɖe mi iso, lɛ kumele matɔ̃ɖedze matã akuri i maturi kakpi, mamɔi maturi kulafa gu maturi siru gu maturi iweo ame lɛ kumele makpakpa, si manyɔ mi maturi iso. 16Lotã mi matɔ̃meɣɛdze ɔri ku ɔwi wɔmɔ ame sɔ: Minɔ atɔ̃mekaɣɛ wa loaba i mi ndɛ̃, si miɣɛ atɔ̃me i ɔri iso, si manyiibi Israel mabi kere kere ndɛ̃ iɖe oo ɣee Israelse ɔwɛ̃ gu ɔfɔ ndɛ̃ iɖe. 17Midaaɣɛ atɔ̃me miya i ɔturi kama, miɣɛgu ɔturi biara i ɔri iso ɔkoso ɔɖe oo ɣee ɔsiare ɔɖe. Midaanigã ɔturi kuwɛ̃ alasɔ nnɛ miaɣɛ misiaita ɔbɔrɛ i Ɣaa kɔrɛ. Si itɔ̃me irere ba ɔle iɖo mi ne, misu ne mibɔ me fiɛ loasia ne ita. 18I ɔwi wɔmɔ ame ne loɣere mi irabiara nɛ ikote sɔ miabara.
Masese Mavɛlɛdze Mabɔrɛgu i Kades Barnea
19Ne Mose ɔɣɛ sɔ: Kere ne, lɛ kumɛgɔ i Bosate bo Ɣaa ɔɣere bo ne, boɣo ɔri bobɔrɛ i Xoreb kube kɔrɛ, ne bokɛlɛ ma Amorise abemi karɔ̃ isɛ ne. Boki i fafuĩ siare ɔɖuɖu ku afɔ̃ra wa minya ame fiɛ bobo Kades Barnea. 20Kere ne loɣere mi sɔ, "Miɔbo i ma Amorise kabemi karɔ̃ iso. Nga i Bosate bo Ɣaa ka ɔto ɔsu ɔtã bo. 21Minyɔ, Bosate mi Ɣaa ɔɔsu karɔ̃ ɔtã mi. Mikɛlɛ miafɔ kã misu lɛ Bosate mi mawa Ɣaa, ɔɣere mi. Midaanigã, miwe katetere."
22Kere ne mi ɔɖuɖu ɔba i wũ kɔrɛ ne miɣɛ sɔ, "Tã bosese maturi si masɛ maaɖekatɔ̃ mavɛlɛ karɔ̃ manyɔ matã bo. Si maba ne maawo ara wa manya, i simagɛ̃ dzɛ boanya gu siri dzɛ boaki fiɛ boabo i mmɔ, iso ara ɔɣere bo."
23Adzuni wamɔ lɛ me, ne ɔso loɖi marɛrɛ̃ iweo-inyɔ, kamele biara ne ɔturi ɔwɛ̃. 24Marui ne makɛlɛ kato i kabemi karɔ̃ iso gu Eskol Kagbolomi ame, masɛ maavɛlɛ karɔ̃ manyɔ. 25Gɔ maɔsɛ fiɛ mato maba ne, mabɔ bo karɔ̃ aɖedziribi awɛ̃. Matã itsue sɔ, "Karɔ̃ sɛɛ i Bosate bo Ɣaa to ɔtã bo."
Israel Mabi Ɔta Maya i Bosate Iso
26Ɣɛɛ miito mibie sɔ miabo i karɔ̃ ame. Mita miya i nnɛ i Bosate mi Ɣaa ɔɣɛ iso. 27Miwe i mi akpayo ame fiɛ miwararã i mi ame miɣɛ sɔ, " Bosate ɔtsiri bo, ne ɔso ɔkɔ bo ɔbɔrɛgu i Egipte karɔ̃ iso, si ɔsu bo ɔpia i ma Amorise nrɔɔ̃ ame si mawɔra bo. 28Lɛ boto boakɛlɛ? Bo manyii ɔɔbara bo ka boto bonigã. Marɛrɛ̃ ma losɛ maavɛlɛ karɔ̃ manyɔ ɔɣere bo sɔ, 'Maturi ba ɔle fiɛ makɔlɛ maɖo bo; simagɛ̃siare dzɛmɔ ɔmɔ fiɛ abere ɔkɔlɛ dzoroo i kuɖokpo. Bonya ta Anak ɔkparɛ i mmɔ.' "
29Kere ne loɣere mi sɔ, "Midaati mikpakpa; midaanigã maturi mamɔ. 30Bosate mi Ɣaa to ɔ̃aɖe mi katɔ̃. Ɔto ɔ̃akpɛ̃ ɔtã mi lɛ kumɛgɔ minya ara ɔɖuɖu wa ɔbara ma Egiptese ku mi anɔmi, 31gu i fafuĩ ame. Mmɔ minya kumɛgɔ i Bosate mi Ɣaa ɔnyɔ mi iso i irisɛ ɔɖuɖu ame, lɛ kumɛgɔ i ɔse sɛ ɔla ɔ̃ ɔbi awe, gbɔgbɔɔgbɔ miɔbo i ngbe."
32Ɣɛɛ i nwa loɔɣere mi kama ne, miifɔ Bosate mi Ɣaa miɖe. 33Ɣaa loɖe mi katɔ̃ i irisɛ ame fiɛ ɔɖi so ɔte lɛ adɔdɔ ku ikpɛnɛ ame fiɛ lɛ ɔtɔ awe ku kasɛ̃ ame. Ɔnyɔnyɔ ngbegɔ miabara kasɛkɔ̃ fiɛ ɔte mi ngbegɔ miaki ana.
34Ɔwi wɔ i Bosate ɔnɔ nnɛ miɣɛ ne, ɔna sikpã ne ɔso ɔkã sɔ, 35“Ɔɣekparɛ nyanyariã wɔgbe ndɛ̃ kuwɛ̃ iibabo, i karɔ̃ sɛɛ ga lokã sɔ loatã mi mawa ame. 36Kaleb wɔ nɖe Yefune ɔbibirɛrɛĩ kere lobɔrɛ i ne ame. Ɔ̃ loanya kã fiɛ loasu karɔ̃ ga ɔ̃ɔsia kukpa iso lotã ma gu ɔ̃ ɔkparɛ, alasɔ ɔsiai Bosate ku ɔ̃ ɔtu ɔɖuɖu."
37Ala mi Israel mabi ɔso ne Bosate to ɔnagu me sikpã ana, ne ɔso ɔɣɛ sɔ, "Fɔ wũ, aibabo i karɔ̃ gamɔ ame. 38Ɣɛɛ Nun ɔbibirɛrɛĩ, Yosua wɔ nɖe fɔ buaidze to ɔ̃abo i kã ame. Pia wũ katetere alasɔ ɔ̃ nto ɔ̃akɔ Israel mabi masɛ maaɖe karɔ̃. 39Mabi ma maiɣe fiɛ maikpa anɔ gɔ maiɣe isɛɛ i ilalaa iso ne, ma loabo i karɔ̃ gamɔ ame ne. Makoso ma miɣɛ sɔ maamɔɛ̃ makɛlɛgu sisande ame ne, loasu lotã ma fiɛ maafɔ kã. 40Ɣɛɛ mi ne, mipɛ mifiriki mitsueiti i fafuĩ ame isɛ, i ɔri wɔ loki ɔkpa Ɔpo Rɛtɛa kɔrɛ.”
41Kere ne mitã mmuai sɔ, "Bobara ikpi i Bosate iso. Boto boakɛlɛ boakpɛ̃ kakpã, lɛ kumɛgɔ i Bosate bo Ɣaa ɔɣere bo." Ne ɔso mi ɔbiara ɔledza so ku akpakpɛ̃ra, mibu sɔ ito iase pɔkɔsɔɔ si mimɔɛ̃ ɔri mikɛlɛ abemi karɔ̃ ame.
42Ɣɛɛ Bosate ɔɣere me sɔ, “Ɣere ma sɔ, 'Midaakɛlɛ miakpɛ̃ kakpã, alasɔ loito loawegu mi. Mi matsrise to maaɖe mi iso.' ”
43Ne ɔso loɣere mi ɣɛɛ miikã atsue. Mita miya i nnɛ i Bosate ɔɣɛ iso fiɛ i mi katoikɔlɛso ame ne, miso ɔri mikɛlɛ kabemi karɔ̃ ame. 44Ne ma Amorise ma losɛ i abemi karɔ̃ ame, ɔso mafere i mi iso lɛ maɣe ikuri awe ne. Matere masiai mi fiɛ maɖe mi iso, ita i Seir gbɔgbɔɔgbɔ isɛ iabo ta Xorma. 45Mikpese miba miabiɛ kaku mipia Bosate ɣɛɛ ɔ̃ikpa mi anya fiɛ ɔtɛ̃ra atsue i mi kaku ibiɛ iso. 46Ne ɔso miwe i Kades ayi gbodzoo ina ɔpã.
Currently Selected:
DEUTERONOMY 1: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
