Marako 1
1
Kop ame Lakana Abatija orabo
(Nen daŋ Matayo 3.1-6; Luka 3.1-6; Lakana 1.19-28)
1Man en ageyi me amut aber i kom Yecu Kricito, Wot Obaŋa, 2#Mal. 3.1acalo nwaŋ adwarpiny Icaya ocoo, ni,
“Nen, acwao aorra i nyimi;
en bino gero yo piri.
3 #
Ica. 40.3 Dwon dano a redo i tim ni,
‘Ger wunu yo pi Rwot,
yik wunu gudo mere cuŋ atira.’ ”
4Amannono Lakana Abatija obin onen i tim kun rabo kop ni, “Ŋut wunu, me batijawu, me Obaŋa wek balwu.” 5Jo rik ya i lobo ducu me Judaya, kede jo luŋ me Jerucalem, ciro bino baŋe. Gin tuco balgi, en batijagi i kulo Jordan.
6 #
2 Obak. 1.8
Lakana rik ruko boŋo yer inaga, tweo pyere kede del, camo bonyo kede moo kic me tim. 7En rabo kop kun kobo ni, “Ŋattoro tye ame alubo ŋea, en tek, kata oko; an mom aromo guŋo gonyo del amukkere. 8An abatijawu kede pii, ento en bino batijawu kede Cuny Acil.”
Yecu obatija
(Nen daŋ Matayo 3.16-17; Luka 3.21-22)
9I kare-nono Yecu rik obino kun oya i Najaret me Galilaya, Lakana obatija en i Jordan. 10Ame en pwod oya ayaa i pii, oyotoyot Yecu oneno polo obarre, Cuny Acil obino acalo amam, olyao piny, opoto i kome. 11#Age. 22.2; Jab. 2.7; Ica. 42.1; Mat. 3.17; 12.18; Mar. 9.7; Luk. 3.22Dwonnoro te ya i polo kun kobo ni, “Yin Woda ame amaro, cunya yom i komi.”
Catan obito Yecu
(Nen daŋ Matayo 4.1-11; Luka 4.1-13)
12Cucuttono Cuny Acil te cwaye itim. 13Obedo i tim nino pyeraŋwen kun Catan bite. Leyi me tim onwoŋo daŋ tye kannono, omalaika okonye.
Yecu ocako ticcere i Galilaya
(Nen daŋ Matayo 4.17; Luka 4.14-15)
14I kare a doŋ otweo Lakana i buc, Yecu obino i Galilaya kun rabo amut aber ame oya i baŋ Obaŋa, 15#Mat. 3.2kun kobo ni, “Kare doŋ oromo, loc Obaŋa doŋ onoko ceggi; ŋut wunu, iye wunu amut aber.”
Yecu olwoŋo ocik rec agwen
(Nen daŋ Matayo 4.18-22; Luka 5.1-11)
16Ka cen owoto i dog nam me Galilaya, oneno Cimon gin ominnere Anderiya; otye ka ciko bwo iyi nam, pien ceŋ gin ocik rec. 17Yecu okobbigi ni, “Biye iluba wunu, abino lokowu ocok jo akaka rec.” 18Oyotoyot gin oweko bwoyigi, ote Lube.
19Dok owoto i nyim anonok, te neno Yakobo gin ominnere Lakana itino a Jebedayo, kun obedo i yee, oropo bwoyigi. 20Cucuttono olwonogi, gin oweko papagi Jebedayo odoŋ kede opakaca i yee, ote lube.
Dano a tye kede cen arac
(Nen daŋ Luka 4.31-37)
21Gin owoto i Kapernaum. Ka ceŋ me cabit oromo, Yecu odonyo i kacokere, opwonyogi. 22#Mat. 7.28-29Gin owuro pwonnyere atek, pien opwonyogi acalo ŋat a tye kede twer, pe acalo opwony-cik. 23I kacokeregi onwoŋo tye iye dano moro a tye kede cen arac. 24En oredo ni, “Kara ilaro ŋo kedwa, yin Yecu me Najaret? Ibino pi tyekowa atyeka bo? An aŋei, yin Ŋat Acil Obaŋa.” 25Ento Yecu tejuke ni, “Liŋiti, ya oko i kome.” 26Cen arac omie oryeye, oredo kede dwon aloŋo, te ya i kome. 27Omio jo luŋ owuro atek, kun openyere kengi kengi ni, “Man ŋo kara? Man pwony anyen, tye iye twer! En ciko anaka cen areco, owinyo doge.” 28Cucuttono rwoŋe te rwo i kabedo ducu i lobo Galilaya ame omano kuno luŋ.
Yecu ocaŋo maro a Cimon
(Nen daŋ Matayo 8.14-15; Luka 4.38-39)
29Yecu oya i kacokere, te wot i paco a Cimon kede Anderiya; Yakobo kede Lakana daŋ owoto kede. 30Maro a Cimon onwoŋo obuto, kun tye kede lyeto i kome; cucut otitte pire. 31En owoto baŋe, omako ciŋe, otire malo, lyeto oya i kome, te cako konyogi.
Yecu ocaŋo jo apol otyeno
(Nen daŋ Matayo 8.16-17; Luka 4.40-41)
32Otyeno ka ceŋ doŋ opoto, jo okelo baŋ Yecu otwo ducu, kede wegi cen areco; 33jo boma-nu luŋ ocokere i dog ot! 34En ocaŋo otwo apol ame kwon toogi papat, oryemo cen apol. Pe oye ni cennoro kob kopporo, pien oŋee.
Yecu owoto i weno me rabo amut aber
(Nen daŋ Luka 4.42-44)
35Odiko con meicel ame piny pwod col, Yecu odilo, okato oko. Owoto kan a jo pe iye, orio ka kwayo Obaŋa kuno. 36Cimon kede owote mere owopo yore. 37Ka gin onwoŋe, okobbe ni, “Jo luŋ tye ka moyi.” 38En odokkigi iye ni, “Owotu dok i boma mogo ocele ame ceggiceggi kede kan, me arab kop kuno daŋ, pien cen abino pi koppono.” 39#Mat. 4.23; 9.35Owoto i dye Galilaya luŋ, orabo kop i kacokeregi, kun ryemo cen.
Yecu olonyo adobo
(Nen daŋ Matayo 8.1-4; Luka 5.12-16)
40Adobo moro obino baŋe, obako doge kun rumo piny, te kobo ni, “Ka imito, itwero lonya.” 41Kica omako Yecu, te ryeyo bade, te gude kun kobo ni, “Ee, amito; lonyere giri.” 42Cucuttono dobo te ony i kome oko, te lony. 43Yecu ocwae kun cike atek, 44#Olev. 14.1-32kobbe ni, “Winy ba, kur ikob i dano moro, ento wot giri, inyutte keni baŋ alamdog, imi mot pi lonyere meri acalo rik Muca ociko, obed anyut baŋgi.” 45Ento en owoto, oero rabo pire atek, kede lalo koppono. Pi mannono omio Yecu pe dok twero donyo i boma moro kannaler, ento bedo teŋe kan a jo pe iye; jo ya i kabedo ducu bino baŋe.
Currently Selected:
Marako 1: La79
Highlight
Share
Copy
Want to have your highlights saved across all your devices? Sign up or sign in
Lango New Testament © Bible Society of Uganda, 1979.