Matayo 24
24
Yecu otito pi keto ot Obaŋa
(Nen daŋ Marako 13.1-2; Luka 21.5-6)
1Yecu oya i ot Obaŋa, te medde kede wottere, jo mere a lube te bino baŋe me nyutte gedo me ot Obaŋa. 2En te dokkigi iye ni, “Ineno wunu jami magi ducu? Ateni akobbiwu ni, mom obino weko kidi moro kan acel ame ododde i wi wadgi, a mom obino coro piny.”
Ageyi me rem
(Nen daŋ Marako 13.3-13; Luka 21.7-19)
3Ka en doŋ obedo piny i wi kidi me Jeituni, jo a lube obino baŋe i muŋ, ote kobbe ni, “Tittiwa, man bino bedo awene ba? Dok gin aŋo ame bino nyuto dwogoni kede agikki piny me kare man?” 4Yecu te gamo ni, “Gwokere wunu ba, ŋattoro kur rwenywu be. 5Pien jo apol bino bino i nyiŋa, ame obino kobo ni, ‘An a Kricito’, gin bino miyo jo apol rwenyo. 6Dok ka ibino winyo wunu pi mony kede amut me mony, cunywu kur poti, pien mano myero timere, ento agikki nwoŋo pwod mom. 7Pien rok bino romo kede rok, loc bino romo kede loc ocele, kec kede oyeŋo bino bedo i kabedo apol; 8mano ducu pwod en ageyi me rem.
9 #
Mat. 10.22
“I kare-nu obino keto erupe i komwu me ite neno wunu can, obino nekowu, jo luŋ bino dagowu pi nyiŋa. 10Dok i kare-nono jo apol bino poto, obino keto erupe i komgi kengi kengi. 11Odwarpiny ame ogoba bino pello apol, obino rwenyo jo apol. 12Pi tim areco ame bino medde bino miyo mar a jo apol kwe oko. 13#Mat. 10.22Ento ŋat ame kanyakino ituno i agikki, en bino larre. 14Dok amut man aber me loc Obaŋa obino rabo i wi podo luŋ, me te bedo caden baŋ rok ducu; icennere agikki bino tuno.
Can adwoŋ
(Nen daŋ Marako 13.14-23; Luka 21.20-24)
15 #
Dan. 9.27; 11.31; 12.11 “Doŋ ka ibino neno wunu ginnoro me kwer ame balo cuny jo, a rik adwarpiny Daniel orabo pire, kun ocuŋ i kabedo acil (dano ame kwano myero niaŋ iye), 16i karenono jo a tye i Judaya myero riŋ oko i wi kiddi. 17#Luk. 17.31Dano ame tye i wi ot kur dok yitto piny ni ebino kwanyo jami i ode; 18kede dano ame tye i poto kur dok cen ni edok omo rukkere. 19Mon ayac bino neno can i kare-nono, kede mon ame doto itino! 20Kwa wunu Obaŋa wek ŋwecwuni kur timere i cwir, onyo i cabit. 21#Dan. 12.1; Nyut 7.14Pien i kare-nono bino: bedo can adwoŋ, kite a yam pe ru onen, ya i geyi keto lobo tuno naka tin, daŋ pe dok bino nen. 22Kono Rwot mom ojwiko kare-nu, kono dano moro mom obwot; doŋ pi jo ame oyero, en omio obino jwiko kare-nu oko. 23I kare-naca ka dano moro bino kobbiwu ni, ‘Neno, Kricito tye kane’, onyo ni, ‘Tye kaca’, kur iye wunu, 24pien jo ame kobo ni gin obedo Kricito bino pello, anaka odwarpiny ame ogoba, bino nyuto anyuttogo kede taŋo, wek ka twerre gin orweny anaka jo ame oyero. 25Nen ba, doŋ atyeko tittiwu con. 26#Luk. 17.23-24Doŋ ka gin bino kobbiwu ni, ‘En tye i tim’, kur iwot wunu kuno, onyo ni, ‘Tye i tyelo’, kur iye wunu. 27Pien acalo lutkot ya i tuŋ kide caro naka tuŋ to, dwogo a Wot a dano daŋ bino bedo amannono. 28#Luk. 17.37Kan a kom oto tye iye, acut daŋ bino cokere kuno.
Dwogo a Wot a dano
(Nen daŋ Marako 13.24-27; Luka 21.25-28)
29 #
Ica. 13.10; 34.4; Ejek. 32.7; Joel 2.10, 31; 3.15; Nyut 6.12-13 “Oyotoyot ka can adwoŋ me karenono otum oko, bino bedo acalo rik ocoo ni,
‘Ceŋ bino doko col, dwe mom bino ryeny,
acer luŋ bino ya i polo, ote rutte piny,
teko i polo bino yeŋere’;
30 #
Dan. 7.13; Jek. 12.10-14; Nyut 1.7 eka gin a nyuto Wot a dano te bino nen i polo, I kare-nono atekere ducu me wi lobo bino kumo, cite gin bino neno Wot a dano kun bino i wi pol me polo, kun tye kede teko kede kwogo adwoŋ. 31En bino oro omalaika mere kun gwara kok aloŋo, gin bino coko jo mere ame oyero, iya i twok piny aŋwen ducu, kun ya i tuŋ agikki polo tuŋ cel ituno kede i agikki polo tuŋ ocele.
Pwony ame oya i kom oduro
(Nen daŋ Marako 13.28-31; Luka 21.29-33)
32“Mak wunu pwony ame oya i kom oduro: ka jaŋe onyinyiro, pote olot, iŋeo wunu ni oro doŋ ceggi. 33Amannono wun daŋ, ka ineno wunu magi ducu, ber iŋe wunu ni, en doŋ tye ceggi, tye i doggola. 34Ateni akobbiwu ni, lwagi jo man mom bino tum, ituno ka koŋ magi-nogo luŋ otimere. 35Polo kede lobo bino tum oko, ento kop ame an apwonyo mom bino tum.
Ŋattoro mom ŋeo nino onyo caa-nono
(Nen daŋ Marako 13.32-37; Luka 17.26-30, 34-36)
36“Ento nino-nono, onyo caa-nono, ŋattoro a ŋeo pire mom tye, kadi amalaika ame tye i polo, kadi Wod. Kono ka Papo keken. 37#Age. 6.5-8Pien dwogo a Wot a dano bino bedo bala kare a Nua. 38I kare ca ame nwaŋ abwal pii mom ru opoŋ i wi lobo, jo nwaŋ camo, mato, awobe kede anyira onyomere, ituno i nino-nono ame rik Nua odonyo kede i yee; 39#Age. 7.6-24gin mom oŋeo ginnoro ituno ka abwal pii opoŋ, te mologi oko ducu. Bino bedo kite-nono ka Wot a dano bino dwogo. 40I kare-naca jo aryo bino bedo i poto; obino kwanyo ŋat acel, ŋat acel te doŋ. 41Mon aryo bino bedo ka rego; obino kwanyo ŋat acel, ŋat acel te doŋ. 42Kiu wunu, pien mom iŋeo wunu ceŋ a Rwotwa bino bino iye. 43#Luk. 12.39-40Ento myero iŋe wunu man, ni, kono won ot rik ŋeo kare ame ayak bino tuno iye, kono okio, mom oweko jo oturo ode. 44Pi mannono, wun daŋ bed ame doŋ iyikere wunu, pien Wot a dano bino tuno i caa a mom itamo wunu.
Amiro ame agen kede en a pe agen
(Nen daŋ Luka 12.4-48)
45“Agwok ot ame agen, aryek, en ŋa, ame adwoŋŋere bino weko jo i ode i te loccere, wek opokkigi cam megi i kare a mitte? 46Tye kede winyo amironono ame adwoŋŋere, ka odwogo, bino nwoŋo otimo kite-nono. 47Ateni akobbiwu ni, bino keto jam i mere luŋ i twerrere. 48Ento ka amiro arac-cu okobo i cunye kene kene ni, ‘Adwoŋ doŋogal wok’, 49ento te cako pwodo omiro wadgi kede aŋeca, kun camo, mato, dok mer, 50won amiro-nono bino dwogo i nino a mom etamo, kede i caa a mom en ŋeo, 51bino ŋoŋolo en, te kette i akina ogoba; kuno bino bedo iye koko kede kayo lak.
Currently Selected:
Matayo 24: La79
Highlight
Share
Copy
Want to have your highlights saved across all your devices? Sign up or sign in
Lango New Testament © Bible Society of Uganda, 1979.