1 Korinti 1

Amot

1Waraga man oya i baŋ Paulo ame pi mit Obaŋa rik olwoŋe me bedo akwena a Kricito Yecu, kede i baŋ ominwa Cocetene.

2 # Tic 18.1 Baŋ lwak jo oye Obaŋa a tye i Korinti, a gin jo ame olonyo odoko acil i Kricito Yecu, ame Obaŋa olwoŋogi me bedo jo mere ikome, karacel i jo luŋ a tye i kabedo luŋ, ame lwoŋo nyiŋ Rwotwa Yecu Kricito, en Rwotgi kede megwa daŋ:

3Obaŋa Papawa kede Rwotwa Yecu Kricito miwu winyo kede kuc.

Pwoc pi mot me cuny

4An nino luŋ amio pwoc baŋ Obaŋana pi winyo ame omiowu i Kricito Yecu, 5pien pi bedowu i Kricito omio doŋ idoko wunu olonyo i yore luŋ, Itye wunu doŋ i ŋec luŋ dok daŋ itwero kobo wunu aber, 6pien kop a wan orabo i kom Kricito odonyo atek i yiwu. 7Omio mom ikeŋ wunu mottoro me cuny a kun pwod ikuro wunu kare me nyuto Rwotwa Yecu Kricito. 8En bino miyo icato wunu atek naka iyi agikki, kun mom tye ginnoro a myero dotwu iye i nino a Rwotwa Yecu Kricito. 9Obaŋa ame olwoŋowu me notte karacel i Wode Yecu Kricito Rwotwa, en genne.

Apokapoka ame obedo i akina lwak jo oye Yecu

10Abako doga baŋwu, omegona, pi nyiŋ Rwotwa Yecu Kricito, ni wun luŋ myero ikob wunu kop acel, apokapoka moro daŋ myero kur bedo i akinawu; ento myero ikubere wunu i cuny acel kede tam acel. 11Pien jo mogo ame oya i baŋ Koloe otitta kop i komwu kannaler, ni mano daa tye i akinawu, omegona. 12#Tic 18.24Gin ame akobo ene: ŋat acel acel iyi akinawu tye ka kobo ni, “An gira a dano a Paulo”, “An gira a dano a Kepa”, “An gira a dano Apolo”, “An a dano a Kricito.” 13Kom Kricito opokere bo? Rik oguro Paulo i kom yataria pirwu? Rik obatijawu i nyiŋ Paulo? 14#Tic 18.8; 19.29; Rom. 16.23An apwoo Obaŋa, pien rik an gira mom abatija ŋattoro iyi akinawu, kono ka Kricipo gin i Gayo, 15me ŋattoro kur kob ni ebatija i nyiŋa. 16#1 Kor. 16.15Abatija daŋ jo i ot a Citepano; mom doŋ atwero poyo ka kono abatija dok ŋattoro ocele. 17Kricito mom ocwaa pi batija jo, ento pi rabo amut aber, ame mom arabo i ryeko moro me limdog, me to a Kricito i kom yataria kur konnyere bed pe.

Kricito en teko Obaŋa kede ryeko Obaŋa

18Kop i kom yataria i tuŋ baŋ jo ame arwenyo odoco, gin neno bala kop me miŋo, cite i tuŋ baŋ wan jo ame Obaŋa tye alarowa, obedo teko Obaŋa. 19#Ica. 29.14 Pien yam ocoo ni,

“Abino balo ryeko a jo aryek,

abino keto ŋec a jo a ŋeo piny oko,”

20 # Yubu 12.17; Ica. 19.12; 33.18; 44.25 Ane kara jo aryek? Ane opwony-cik? Ane jo apyem me kare-ni? Mom Obaŋa doŋ oloko ryeko me lobo man odoko me miŋo? 21Pien pi ryeko Obaŋa omio lobo mom oŋee pi ryekogi, ento Obaŋa pi mittere gire olunyo laro jo oye en pi kop me miŋo ame orabo. 22Ojudaya mito neno anyuttogo, jo Grik yenyo ryeko; 23aco wan giwa orabo pi Kricito a rik oguro i kom yataria, ame koppere tuŋ baŋ Ojudaya obedo gin a retogi, i baŋ Orok nen me miŋo. 24Cite baŋ jo ame olwoŋo, Ojudaya kede jo Grik, en Kricito ame obedo teko kede ryeko Obaŋa. 25Pien miŋo Obaŋa kato ryeko a dano oko i ryeko, goro Obaŋa daŋ tek kato teko a dano oko.

26Omegona, koŋ iparu lwoŋo ame Obaŋa olwoŋowu kede. Jo apol i akinawu onwoŋo mom tye i ryeko moro me lobo-ni, polwu onwoŋo mom wegi twer, polwu onwoŋo mom obedo wegi kwogo. 27Cite Obaŋa oyero gigi mogo ame lobo lwoŋo ni omiŋo, me miyo oryeko lewic; Obaŋa oyero gigi mogo ame lobo lwoŋo ni ogoro, me miyo oteko lewic; 28Obaŋa oyero gigi mogo ame lobo cao ni ojotojot, anaka gigi mogo a mom tye, me mi jami a tye dok piny ata, 29me dano moro kur wakere i nyim Obaŋa. 30Obaŋa en omio ikwo wunu i Kricito Yecu, ame Obaŋa omio odoko ryekowa. Pi Kricito omio Obaŋa okwanowa ni kitewa atira, olonyowa obedo jo acil, olakorowa. 31#Jer. 9.24Doŋ acalo bala rik ocoo, “Ŋat a wakere, myero wakere pi Rwot.”

Currently Selected:

1 Korinti 1: La79

Highlight

Copy

Compare