Rômə 7
7
Baʼ bá Krísto bá shiyǎ pə́ á wásé ɛ mambéndá
1Bǎn-bá-nyǎ bá myə, bá nyí dí baʼ ábə́ bá sɔ́ntání mbéndá. Nyí bíyǎ nána mbéndá ɛ̌ dyɛ́lɛ́ mɔ̂ʼ wɔ̂ á púndá ɛyə̌ a díní luŋgɛ́? 2Sí nûŋ ɛláŋsán á wuwə́. Wə̌ti mwalân a wə́lí, mbéndá ɛ byábí nána mwalân a lɔlí ɛ bá na njúm m mɔ púndá ɛsə́sə̌n ɛyə̌ njúm m mɔ a díní luŋgɛ́. Ndé wə̌ti njúm m mɔ á gvúlí, mbéndá ɛ wuwə́ ɛ sə pə́ ɛ tfúl mwalân ani á wuwə́ bû. 3Áfánikə̌, njí a dyɛ̂ na mɔʼ ampə́pə̂ ɛ́yə́ njúm m mɔ a díní wɔ̌ luŋgɛ́, bá bə̌ŋ mɔ́ nána mwalân a ndúmán. Ndé njí njúm m mɔ a gvúlí, mbéndá ɛni ɛ sî tfúlá mɔ́. Njí a wə́lí mumân ampə́pə̂, ní a shiyǎ mwalân a ndúmán. 4Áfánikə̌, bǎn-bá-nyǎ bá myə nâ ɛ́ díní na nyə́. Mbéndá ɛ sɛ pə́ nyə́ ɛ janiya á ɛ́tútú ngə Yésuwə a mə́ní ɛ wá, nyə́ pə́ nyí mə́ ɛ wá. Sɔnsɔ́nǎn, nyí dí baʼ bá mɔ bápə́pə̂, Yésuwə awə̌ Dyǔ lí púmúní, nána nyí bwəlí Dyǔ bwǎm. 5Ɛtî ɛ́yə́ bilɛm bí ngunyǔ ɛ́ sɛ bí bílíní sɛ́ ɛ janiya, mbéndá ɛ́ bílí ɛ puŋgú sə́m ɛ́ sɛ ɛ misam mí ngunyǔ. Ɛ́yínán ɛ́ bílí ɛ bwə sí bwə̌ misam míbî ámə́ nám panan liwá. 6Ndé sɔnsɔ́nǎn, sí mə́ ɛ falu á wásé ɛ mbéndá, á liwá ámə́ sí mə́ní ɛ wá. Áfánikə̌, mbéndá ɛyə̌ ɛ bílí sə́ ɛ janiya ngə batáŋ ɛ́ sɛ pə́ sə́ ɛ janiya. Ɛ́yínán ɛ́ bwə́lí sí nǎn wɔ̂ njí ɛ kɔ́nə́ sɔnsɔ́nǎn álí bwə́lí Dyǔ. Sɔnsɔ́nǎn sí bwəlí mɔ́ á nyay ɛyə̌ Mudî n Dyǔ nǎn pɔŋní sə́, suká na álí nǎn nyay ɛyə̌ mambéndá má tílíní.
Mbéndá ɛ Dyǔ yɔ̂ ɛ̌ lúfú sɛ́ wubî wú sɛ
7Yə̌ sí tíŋgání ɛ byá? Sí tíŋgání ɛ byá nána mbéndá ɛ dí wubî? Ǎyi ɛ́ shiyǎ nâ. Á mbálɛ, ndé mbéndá yɔ́ ɛ bwəlí mî álí bí yə̌ ɛ́yə́ wubî wú díní. Njí mbéndá ɛ sî m byá nána, “Ɛ si wɔ́ŋ sə́m á yǔm ɛ́ mɔ̂ʼ”, ní mi sî m bí nána álí wɔ́ŋ sə́m á yǔm ɛ mɔʼ ɛ dí yǔm ɛ́ bî. 8Ndé mbéndá ɛnín ɛ mə́ ɛ fukú likani lí bî lí myə, ɛ mə́ ɛ bwə m mə́ ɛ butí ɛ́ wɔ́ŋ nyay na nyay ɛ sə́m á misam mí bâ. Njí mbéndá ɛ shiyǎ, ní wubî wú shiyǎ ká yǔm. 9Púndá ɛ bílí ɛyə̌ m sî bíní mbéndá. Ndé púndá ɛyə̌ m bíní mbéndá, sə́m ɛ n fukú álí bwə ɛ wubî, ti n gvúlí. 10Mbéndá ɛyə̌ Dyǔ lí bə́kíní nána ɛ panán luŋgɛ́, yɔ̂ ɛ tímbí mî liwá. 11Wubî wû wɔ́ŋ nji á mbís ɛ mbéndá, ti wú sə́ŋi mi ti m bwəlí wubî. Áfánikə̌, wubî bɔ́ wú búlú mi.
12Áfánikə̌, mbéndá yɔ́mə̌n ɛ dí wusáŋgí na yǔm ɛ́yə́ mbéndá ɛ̌ byání ɛ́ dí wusáŋgí, ɛ́ tɛ́ŋgɛ́ní na ɛ dí pə́ bwǎm. 13Ɛ́ dí nána yǔm ɛ́yə́ ɛ́ dí bwǎm, ɛ́ mə́ mi panán wɔ̂ liwá? Ǎyi, ɛ́ shiyǎ nâ. Suká mbéndá mɔ̂ m pánání mi liwá, wubî bɔ́ wú túmbí á mbís ɛ mbéndá yǔm ɛ́yə́ ɛ́ dí bwǎm, álí panán mî liwá. Ɛ́yínán ɛ́ bwə́lání nána baʼ bá mín ngə wubî wú díní. Áfánikə̌, mambéndá má Dyǔ má lúfú ngínya ɛ wubî jǐta.
Njum ɛyə̌ ɛ̌ wan ní mɔnyuŋ átin
14Sí bí nána mbéndá ɛyə̌ sí byání ɛ dí yǔm ɛ́ múdî. Ndé mi n dí mɔnyuŋ. N dí ngə mɔʼ awə̌ bá súmbíní á wásé a wubî ngə ntáŋ. 15N sə̌ ɛ́ sɔ́ntán yə̌ ɛ́yə́ mi nǎn bwəní. Yə̌ ɛ́yə́ n nəŋíní álí bwə n sə̌ yɔ́ ɛ bwə ndé yə̌ ɛ́yə́ n kfwɛ́ní yɔ́ nǎn bwəní. 16Sɔnsɔ́nǎn, wə̌ti m bwəlí yə̌ ɛ́yə́ n nə́ŋiyaní álí bwə, ɛ́yínán ɛ́ lúfú nána m pushú nána mbéndá ɛ dí bwǎm. 17Ngə ɛ́ díní nâ, suká mimə̌n nǎn bwə yɔ́, ndé wubî ábə́ wú dí mî átin bɔ́ wú bwə mî álí bwə nâ. 18M bí nána yǔm ɛ́ mbâ ká ɛ́fɔ́ ɛ́ shiyǎ mî átin, nâni ɛ dí, á nyay ɛ wubî wú myə, ká ngə nlə́m m myə n díní álí bwə yə̌ ɛ́yə́ ɛ́ dí bwǎm, n sɛ̌ yɔ́ ɛ púl ɛ bwə. 19N sə̌ bwə yǔm ɛ́yə́ ɛ́ dí bwǎm ɛ́yə́ n nə́ŋíní álí bwə, ndé yǔm ɛ́ bî ɛ́yə́ n nə́ŋiyǎ álí bwə̂ yɔ̂ nǎn bwəní. 20Sɔnsɔ́nǎn, ngə nǎn bwəní yǔm ɛ́yə́ n nə́ŋiyaní álí bwə, ɛ́yínán ɛ́ lúfú nána, suká mî pə́ nǎn bwə̌ mísam mî. Ndé wubî ábə́ wú dí mî átin bɔ́ bú bwə mî nǎn bwə.
21Áfánikə̌, nǎn mín nána mbéndá ɛ dí ɛyə̌ ɛ janiyá mî. Njí nǎn sa ɛ́ bwə nsam m bâ, wubî bɔ́ bú pa shám á mi. 22Á nlə́m m myə átin mbéndá ɛ Dyǔ yɔ́ n nəŋíní álí nan na nlə́m m myə nsə́sə̌n. 23Ndé nǎn mín mbéndá ɛpə́pə̌ ɛyə̌ ɛ̌ janiya ngunyǔ ɛ́ myə, ɛyə̌ ɛ̌ wan njum na mbéndá ɛyə̌ nlə́m m myə n nə́ŋíní. Mbéndá ɛni ɛ mə́ mi ɛ tfúl, ti ɛ bwəlí mi n dí ntáŋ á wubî. Na wubî bû bɔ́ bú janiya ngunyǔ ɛ́ myə. 24Wówô, njá ɛ́ nyútí ɛ́ mɔ̂ʼ n díní? Njá á shuŋgɛ́ mî á mákɛ́ má ngunyǔ ɛnín ɛyə̌ ɛ̌ panán mî liwá? 25Masakan má bá na Dyǔ. Lí mə́ mi ɛ shuŋgɛ́ lunŋgɛ́ lí myə á Mwǎn m mɔ, Sáŋgúwə́ n sɛ Yésu Krísto. Áfánikə̌, mimə̌n n dí á pɛsi ɛbɛ̂, nlə́m m myə nǎ m pɔ̌ŋ mî álí nǎn mbéndá ɛ Dyǔ, ndé ngunyǔ ɛ́ myə ɛ̌ nan wubî ábə́ wú dí átinə́ m myə.
Currently Selected:
Rômə 7: bwt
Highlight
Copy
Compare
Share
Want to have your highlights saved across all your devices? Sign up or sign in
