Rômə 2
2
Li káyisi lí Dyǔ
1Áfánikə̌, ká njá á nyə́ awə̌ ǎ káyísí bâʼ, ká a dí ká njá, a wɔ́ŋiyǎ njɔm ká pɔ́ álí kwisí lilakɛ. Á ɛ́tútú nána njí ɛ̌ káyísí bâʼ ɛ́yə́ wə pə́ ɛ̌ bwəní mulimlim mí misam ámə́ ɛ̌ káyísíní bɔ́, ní wəmə̌n ɛ kfúndí nyǔ ɛ́ wə mukáʼ. 2Á mbálɛ sí bí nána mbakú ɛyə̌ Dyǔ lí bəní tɛ́ŋgɛnɛ baʼ ábə́ bá bwə̌ ɛbú ɛ́ mísam ngə ɛ́ mín ɛ́ tɛ́ŋgɛ́ní. 3Sɔnsɔ́nǎn njí mɔʼ nfɔ́ á nyə́ a túmbí mbakú á ampə́pə̂, ti mɔ́ pə́ a bwəlí mulimlim mú nsam, a kaní nána ɛ tiŋgání ɛ búl mbakú ɛ Dyǔ? 4Tɔ á ɛ́tútú nána Dyǔ lí wɔ́ŋí nlə́m mú líkini, lí bə nyə́ púndá, na pə́ lí wɛnsan nyə́ nyí núŋiyǎ yɔ́ ngə nsam m mbímbí. Á mbálɛ nyí bí nána wulɔʼ wú nlə́m wú nə̂n ábə́ Dyǔ lí wɔ́ŋíní á nyə́ wú dí álí bə nyə́ púndá álí makú wubî wú nyə. 5Nyí kpútí milú nyí nə́ŋiyǎ álí tim mbǐ á Dyǔ, áfánikə̌, nyí shwinj kɔ́ksɛ lí Dyǔ á nyǔ ɛ́ nyə. Ti á kɔ́ksə́ nyə́ á bǔn bû mukáʼ. Á bǔn bû Dyǔ lí lúfú píʼ ɛ́ mɔ, na lí lúfú nána lí káyísí á nyai ɛyə̌ ɛ tɛ́ŋgɛ́ní. 6Dyǔ lí sáwú mɔtɛ́ á ɛbulú ɛ́yə́ ǎ bwəní. 7Duŋgu lí bâ lí dí álə́ bá bwə̌ bwâm ɛtîtɛ́, bá saʼ wulɔʼ, ɛdúbɛ́, bá bá luŋgɛ́ kə́ŋ tá á bwindeya. Nyai ɛ́ bâʼ ɛ́yí, Dyǔ lí bə bɔ́ luŋgɛ́ álə́ lí sɛ̌ ɛ́ mɛ. 8Baʼ bápə́pə̂ bá dí nfíʼ, bá sɛ̌ kufú yə̌ ɛ́yə́ ɛ́ tɛ́ŋgɛ́ní, bá bwə wɔ̂ misam ámə́ mí tɛ́ŋgɛniyǎ. Nyai ɛ́yî Dyǔ lí lúfú bɔ́ píʼ na lí kɔ́ksɛ́ bɔ́. 9Mutakaʼ na ndutu m mbá á mɔnyuŋ tɛ́ awə̌ ǎ bwə̂ misam míbî, álí butí na baʼ bá Júda kə́ŋ ta na baʼ ábə́ bá shiyǎ baʼ bá Júda. 10Ndé á baʼ ábə́ bá bwə̌ misam mí mbâ, Dyǔ lí bə bɔ́ wulɔʼ, ɛdúbɛ́ na musaŋgu, álí butí na baʼ bá Júda kə́ŋ ta na baʼ ábə́ bá shiyǎ baʼ bá Júda. 11Nyí bí nána Dyǔ lí sɛ̌ ɛ́ tyə́ mɔʼ ká nfɔ́ á mbǐ.
12Baʼ ábə́ bá wɔ́ŋiyǎ mbéndá ɛ́ Mósisə bá bwə̂ wubî. Dyǔ lí káyísí bɔ́ ɛ́yə́ lí bwə́liyaní mbéndá ɛ́ Mósisə na bá bɔ́lɔn. Baʼ bá Júda ábə́ bá wɔ́ŋí mbéndá ɛ́ Mósisə, bá bwəlá wubî, Dyǔ lí bwəlan mbéndá ɛni álí káyísí bɔ́. 13Suká baʼ ábə́ bá wú mambéndá bɔ́ bá tyə́bí sîm á wusú wú Dyǔ, ndé baʼ ábə́ bá bwə̂ yə̌ ɛ́yə́ mbéndá ɛ́ Mósisə ɛ̌ saʼní bɔ́ bá tyə́ sîm á wusú wú Dyǔ. 14Baʼ ábə́ bá shiyǎ baʼ bá Júda, bá wɔ́ŋiyǎ mbéndá ɛ́ Mósisə ndé ɛtîtɛ́ bá bwəlán likani lí bɔ álí bwə̂ yə̌ ɛ́yə́ mbéndá ɛni ɛ̌ saʼní. Ɛ́yín ɛ́ lúfú nána ká ngə bá wɔ́ŋiyaní mbéndá ɛ́ Mósisə, bá bí yə̌ ɛ́yə́ ɛ́ lɔ́lí na yə̌ ɛ́yə́ ɛ́ dí wubî. 15Nyai ɛyə̌ bá bwəní misam mí bɔ ɛ́ lúfú nána yə̌ ɛ́yə́ mbéndá ɛ́ Mósisə ɛ̌ sakíní ɛ́ tílání á milə́m mí bɔ. Milə́m mí bɔ mí lúfú pə́ nána ɛ́yínán ɛ́ dí mbálɛ. Milə́m mí bɔ mí lúfú bɔ́ njí misam ámə́ bá bwəní mí dí mí mbâ tɔ míbî. 16Áfánikə̌, á bwǔn bú líkáyisi, Dyǔ lí káyísí baʼ básə́sə̌n tɛ́ŋgɛnɛ misam ámə́ bá kání tɔ ámə́ bá bwə́líní á kfun. Lí bə Yésu wunja bû álí káyísí bâʼ. Nsam múnán mɔ́ nǎn pɔŋní bâʼ njí nǎn lakú ndúm ɛ mbâ.
Baʼ bá Júda na mbéndá ɛ́ bɔ
17Sɔnsɔ́nǎn kə́, nyə́ ábə́ nyí bə̌ŋ nyə́mə̌n nána nyí dí baʼ bá Júda, nyí bán milə́m mí nyə á mbéndá ɛ́ Mósisə na nyí kfum ɛkɛ́ á ngingi nána Dyǔ lí dí Dyǔ lí nyə. 18Nyə́ baʼ bá Júda nyí bí yə̌ ɛ́yə́ Dyǔ lí saʼní nána nyí bwə̂, nyí mə́ pə́ ɛ wúkú á mbéndá ɛ́ Mósisə yə̌ ɛ́yə́ ɛ́ lɔ́lí. 19Nyí mə́ ɛ nǔŋ nyǔ ɛ́ nyə nána nyí dí baʼ ábə́ bá dyɛ́lɛ́ baʼ ábâ bá sə̌ ɛ́ mín wǔm ngə bá bíyǎ Dyǔ, nyí dúbɛ́ nána nyə́ nyí dí ngə ɛtrúkán á bá ábə́ bá dí á ɛfínjan átin. 20Nyí mə́ ɛ nǔŋ nyə́mə̌n ngə baʼ ábə́ bá bə̌ maléyá á baʼ ábə́ bá dí ɛlemâ. Nyí dúbɛ́ nána nyə́ nyí dí balɛ̂ á baʼ ábə́ bá bíyǎ ká yǔm. Nyí núŋí nyǔ ɛ́ nyə nâ á ɛ́tútú nána nyí kaní nána ngə nyí bíní mbéndá ɛ́ Dyǔ bwǎm, nyí bí misam mísə́sə̌n na nyí bí mbálɛ. 21Nyə́ ábə́ nyí lɛ́fú bâ bápə́pə̂ yán nyí səní ɛ lɛ́fú nyə́mə̌n? Nyí pɔ̌ŋ bâ na bá si jíb, nyə́mə̌n nyí sɛ̌ ɛ́ jíb? 22Nyə́ ábə́ bá pɔ̌ŋ bâʼ nána bá si bwə ndúmán. Nyə́mə̌n nyí sɛ̌ ɛ́ bwə ndúmán? Nyí kfwɛ́ álí bwəlí madyǔ mápə́pə̌, ndé nga nyí kə á bítana bí madyǔ mápə́pə̌ nyí jíbá? 23Nyí kfǔm ɛ́kɛ́ á ngingi nána nyí bí mbéndá ɛ́ Mósisə, ndé nga nyí wúkí Dyǔ wusɔ́n ngə nyí səní ɛ kɔŋgɔ́ mbéndá ɛ́ mɔ? 24Kâti ɛ Dyǔ ɛ̌ byá nána, “Baʼ ábə́ bá shiyǎ baʼ bá Júda bá byá mibyá míbî tɛ́ŋgɛnɛ Dyǔ á ɛ́tútú ɛ́ misam ámə́ nyí bwəní.”
25Njí nyí bwəlí ngə mbéndá ɛ́ Mósisə ɛ̌ byání, ndé ngə nyí bwəní baʼ wulɛ́ná, wulɛ́ná bû wú bá wú mbímbí á wúsú wú Dyǔ. Ndé njí nyí kfúndí mbéndá, ní ngə bá bwəní nyə́ wúlɛ́ná, wulɛ́na bû wú shiyǎ wú mbímbí. 26Sɔnsɔ́nǎn, njí ɛ́ dí nána mɔʼ awə̌ bá nan bwə́líyání wulɛ́ná ǎ bwə ngə mbéndá ɛ̌ sakíní, ní Dyǔ lí nuŋ mɔ́ ngə mɔʼ awə̌ bá bwə́líní wulɛ́ná. 27Áfánikə̌, baʼ ábə́ bá kɔŋgɔ́ mbéndá ɛ́ Mósisə ká ngə bá bwə́liyǎní bɔ́ wulɛ́ná, bá lúfú nyə́ baʼ bá Júda nána misam ámə́ nyí bwəní mí tɛ́ŋgɛniyǎ. Bá bwə́líní nyə́ wúlɛ́ná, na nyí wɔ́ŋí mambéndá ámə́ má tílání á kâti ndé nyí sɛ mɔ́ ɛ kɔŋgɔ. 28Nyí lɔ́lí ɛ bí nána suká bâ ábə́ bá kɔŋgɔ́ bilɛm bí bɔ álí lúfú nána bá dí baʼ bá Dyǔ bɔ́ bá dí baʼ bá Júda na mbálɛ. Na suká wúlɛ́ná ábə́ bá bwə́líní mɔ á nguʼ ábə́ wú míndílí bɔ́ wú bwə̂ mɔʼ ka bá mín nána a dí mɔʼ a Júda na mbálɛ. 29Ndé, mɔʼ awə̌ á mbálɛ a dí mɔʼ a Júda a dí mɔʼ awə̌ á dí mɔʼ á Júda á nlə́m átin, ɛ́ dí nâ, mɔʼ awə̌ bá bwə́líní wúlɛ́na á nlə́m átin. Mudî n Dyǔ mɔ́ nán bwə ɛbulú ɛ́yín, suká álí nǎn ɛ́yə́ mɔʼ ǎ naní mbéndá ɛyə̌ ɛ tilání áshí. Dyǔ lɔ́ lí kɛsí nyai ɛ mɔʼ ani suká mɔ̌nyuŋ.
Currently Selected:
Rômə 2: bwt
Highlight
Copy
Compare
Share
Want to have your highlights saved across all your devices? Sign up or sign in
