Mátyo 8
8
Yésuwə a pwisí mɔ awə̌ a n wɔ́ŋ ákúnyə
1Ngə Yésuwə a shúlíní á wukul áshí, limuti lí nə̂n lí pɔ́ŋí mɔ́ á mbís. 2Mɔʼ nfɔ́ awə̌ a bílí ɛ́ taʼ na akúnyə a pílí ti a shumí mabɔ́ŋ áshí á wúsú wú Yésuwə, a byábí á mɔ́ nána, “Sáŋgúwə́, njí wə ɛ nəŋí ɛ tiŋgání mi ɛ sáŋi.#8:2 Ɛ tiŋgání mi ɛ pwisi: nyambɛ̂ a akúnyə ɛ n mbá yə̌ ɛ bwə mɔ a si bá wusáŋí á wusú wú Dyǔ. Sí tíŋgání yî nán ɛ mín á kâti ɛ Lɛvítíkus 13:45-46. 3Yésuwə a sámí ɛkɛ́ ɛ́ mɔ, a bándí yɔ́ á nyǔ ɛ́ mɔʼ ani. Ti a pɔŋí mɔ́ nána, ‘Mi n nəŋí, sáŋ!’ Á mulimlim m púndá, mɔʼ ani na akúnyə a pwǐ. 4Ti Yésuwə a byábí á mɔ́ nána, Wúkán mî, ɛ si pɔ̌ŋ ká mɔ̂ʼ yə̌ ɛ́yə́ ɛ́ bwə́lání wə̂. Ndé kə̌ ɛ lúfú nyǔ ɛ́ wə á prísə nána a táti wə. Ti ɛ bə̂ jabeya ngə mbéndá ɛ́ Mósisə ɛ byábíní álí lúfú baʼ nána ɛ́ mə́ ɛ sáŋ.”
Yésuwə a pwisí mɔʼ a ndutu m mɔʼ sója a nə̂n
5Á mbís ɛ púndá Yésuwə a kǐ á nkí n Kapɛ́nahûmə. Ngə a pilíní á wə́, mɔʼ a nə̂n a Sója ɛ baʼ bá Róma a bílí awə̌ a ŋ wɔ́ŋ mbúki ɛ sója á wásé m mɔ. Mɔʼ ani a pilí mɔ́ ɛ yɔ́m nána, 6“A Sáŋgúwə́, mɔʼ a ndutu m myə a dí á ndáʼ á wúti a lɔ́liyǎ nyǔ. A sə̌ ɛ́ púl álí tyə́, ǎ taʼ jǐta.” 7Yésuwə a pushú mɔ́ nána, “M paʼ, ti m pwisí mɔ́.” 8Mɔʼ a nə̂n a sója ani, a pushú mɔ́ nána, “A Sáŋgúwə́, ŋ kúkiyǎ álí kasí wə̂ nkən á ndáʼ ɛ́ myə, ndé byá ká ɛ́yala ɛfɔ́ á mɔʼ a ndutu m myə á pwi. 9Mimə̌n pə́ n dí á wásé ɛ́ baʼ bá nə̂n bápə́pə̂, na mi pə́ n wɔ́ŋíní basója ábə́ bá dí á wásé ɛ́ myə. Nǎn pɔ̌ŋ nfɔ́ nána ‘Kə̌’, nǎ pə́ ǎ kəní. Nǎn pɔ̌ŋ ampə́pə̂ nána, ‘Pǎʼ’ nǎ pə́ ǎ paní. Njí m pɔŋí mɔʼ a ndutu m myə nána, ‘Bwə nán’, nǎ pə́ ǎ bwəní.” 10Yésuwə a wúkíní nâ, a bílí manyáka. Ti a byábí á baʼ ábə́ bá bílí mɔ́ ɛ pɔŋ á mbís nána, “Á mbálɛ mi nǎn pɔŋ nyə́ nána, mi nan míníyá mɔʼ ká nfɔ́ á Ísrɛl awə̌ a wɔ́ŋí nyai ɛ dúbɛ ɛnín ɛyə̌ nkən anín a wɔ́ŋíní. 11Mi nǎn pɔŋ nyə́ nána, á púndá ɛyə̌ ŋgandu ɛ́ bání á wúdya wú Dyǔ baʼ á bání jǐta ábə́ bá sî n lɔʼ álí bá á wə́, bá fí á pɛsi ɛyə̌ dúlu lí nyíní na á pɛsi ɛyə̌ dúlu lí shulní álí bá á ŋgandu ɛni fǔm bufɔ́ na basáŋ bá nyákə́, Ábrahâmə, Áyzikə na Jekɔ́bə. 12Ndé bá nyítí baʼ ábə́ bá lɔ́lí ɛ́ bá á wudya wú Dyǔ á ɛbúkatîn, bá shwá bɔ́ á ɛfínjan átin. Áfâ bá ji, bá dyá masuŋ á nsu.” 13Ti Yésuwə a byábí á mɔ a nə̂n a sója ani nána, “Tǐm á ndáʼ ɛ́ wə, ɛ́ bwə́lan ngə ɛ dúbɛ́ní.” Á mulimlim m púndá, mɔʼ ndutu m mɔʼ a nə̂n a sója ani a pwǐ.
Yésuwə a pwisí baʼ jǐta
14Á mbís ɛ púndá, Yésuwə a kǐ a ndáʼ ɛ́ Píta. A míní nyǎ mú mwalân mú Píta a nalí á wúti. Ɛfi ɛ́ bílí mɔ́ á nyǔ. 15Yésuwə a wálí mɔ́ ɛkɛ́, ti ɛfi ɛ́yî ɛ́ mə́ mɔ́ á nyǔ. Ti nyǎ m mwalân mú Píta a tyə́bí ámǐn ti a kasí Yésuwə ngə nkən. 16Ngə nkwi nkwi m pílíní, baʼ bá pánání baʼ jǐta ábə́ midî mí bî mí bílíní átin. Yésuwə a bwəlání biyala bí mɔ bí nsu álí fúl midî mí bî mî a nyǔ ɛ́ bɔ átin, ti a pwisí baʼ básə́sə̌n ábə́ bá bílí ɛ́ kfulu. 17Yésuwə a bwəlí misam mínán mísə́sə̌n álí lwínjí biyala ábə́ Dyǔ lí lúmání nlakuwa-a-mudî m mɔ, Ayzáya nána,
“A nuŋí mikfulu mí sə mísə́sə̌n. A nuŋí banyambɛ̂ bá sə básə́sə̌n.”
Baʼ ábə́ bá pɛ́pɛ́ ɛ́ pɔŋ Yésuwə á mbís
18Ngə Yésuwə a míníní limuti álə́ lí kámbú mɔ́, a pɔŋí bawútú bá mɔ nána bá túm á pɛsi ɛ mbô ɛníní. 19Mulɛ̂ a mbéndá nfɔ́ á pilí á Yésuwə ti a byábí á mɔ́ nána, “Mulɛ̂ mi m pɔŋ wə̂ á mbís ká fə́ ɛ̌ kəní.” 20Yésuwə a pushú mɔ́ nána, “Bishɔ bí wɔ́ŋí mitóm, manɔn má wɔ́ŋí mandáʼ má manɔn, ndé Mwǎn a Mɔ̌nyuŋ a wɔ́ŋiyǎ ká fǔm álí nali na álí kɔ́mbɛ.” 21Mɔʼ ampə́pə̂ awə̌ a bílí ɛ pɔŋ Yésuwə á mbís a byábí á mɔ́ nána, “Sáŋgúwə́, wə̌ n kə̂ n wúshi sáŋ m myə kəkə.” 22Ndé Yésuwə a pushú mɔ́ nána, “Pɔŋ mî á mbís, mimbimba mí wúshi bawú bá bɔ.”
Yésuwə a fwɛ́sí ɛkful
23Á mbís ɛ púndá Yésuwə a kwilí á bwálu na bawútú bá mɔ, ti bá bútí ɛ kə. 24Ngə bá pílíní áwútitîn wú mbô, ɛkful ɛ́nə̂n ɛ́ bútí ɛ wan. Ɛ́ wání kə́ŋ kə́ŋ bwálu bû bú pɛ́pɛ́ ɛ kwili á mádí átin. Ndé á púndá ɛni Yésuwə a bílí ɛ nali. 25Bawútú bá mɔ bá kí mɔ́ ɛ wumu, bá pɔ́ŋí mɔ́ nána “A Sáŋgúwə́, shuŋgɛ́ sə́, sí kə̌ ɛ́ wá!” 26Ti Yésuwə a pushú bɔ́ nána, “Yán nyí díní mbú nâ? Yán dúbɛ lí nyə lí kɔ́ŋíní nâ?” Ti a tyə́bí ámǐn, a kándí ɛkful ɛ́yə́ ɛ́ bílí ɛ́ wan, na madí ámə́ má bílí ɛ́ tatu. Áfâ áshí áshí ɛkful ɛ́ túmbí, madí pə́ ámə́ má bílí ɛ́ tatu má dyɛ́ pǐ. 27Bawútú bá mɔ bá bílí manyáká ngə bá míníní nâ, ti bá kɔ́ndɛ́ nána, “Njá ɛ́ bú ɛ́ mɔ̂ʼ ɛ́yín, awə̌ ká ɛkful na madí ámə́ má tatu má wúkán mɔ́?”
Yésuwə a pwisí baʼ bábɛ̂ ábə́ bâ n wɔ́ŋ midî míbî á nyǔ ɛ́ bɔ átin
28Á púndá ɛyə̌ Yésuwə na bawútú bá mɔ bá pílíní á pɛsi ɛ mbú ɛníní, á mbú ɛ baʼ bá Gadára, baʼ bábɛ̂ ábə́ bâ n wɔ́ŋ midî míbî á nyǔ ɛ́ bɔ átin bá tání mɔ́. Baʼ bábɛ̂ bâ bâ m fí á mídim átin. Bá bílí ɛkaŋ jǐta kə́ŋ kə́ŋ baʼ bá bíliyǎ ɛ́ púl ɛ́ túm á nji ɛyə̌ ɛ bílí á pɛsi ɛni. 29Ngə bá míníní Yésuwə, bá bútí ɛ kán nána, “Mwǎn a Dyǔ, yə̌ ɛ̌ sakání sə́? Wə ɛ pílí álí kɔ́ksɛ́ sə́ ɛ́yə́ púndá ɛ nan pílíyání wə̂?” 30Ndíŋgí n ngwi m bílí bɛbɛ na fǔm bû, ɛ́ bílí ɛ dyá lídyá. 31Ti midî mí bî mî mí yɔ́mbí Yésuwə nána, “Njí ɛ fúlí sə́ á nyǔ ɛ baʼ bánán, sûn makú sə́ sí kwíli á ndíngí n ngwi mû.” 32Yésuwə a pɔ́ŋí midî mí bî mî nána, “Nyí nyíta!” Áfâ áshí áshí, mí nyítí ti mí kwílí á ngwi ɛ́yî átin. Ti ndíŋgí n ngwi mû n kí mifílí á mbə́ŋ mú mbô áshí, ti n kfúndí á mbô átin, ti ngwi ɛ́yî ɛ́ wúlí. 33Batátiya-bá-ngwi ábə́ bá bílí ɛ́ tátí ngwi ɛ́yî bá kí mifílí, bá kí á nkí átin. Bá pɔ́ŋí baʼ misam mísə́sə̌n ámə́ mí bwə́lání, na tɛ́ŋgɛnɛ baʼ ábə́ bá n wɔ́ŋ mídî míbî á nyǔ ɛ́ bɔ átin. 34Ti baʼ básə́sə̌n ábə́ bá fí á nkí mû, bá kí ɛ tán Yésuwə. Ngə bá míníní mɔ́, bá yɔ́mbí mɔ́ nána a falú á ndɔʼ ɛ́ bɔ.
Currently Selected:
Mátyo 8: bwt
Highlight
Copy
Compare
Share
Want to have your highlights saved across all your devices? Sign up or sign in
