Mátyo 7
7
Yésuwə a lɛ́fú tɛ́ŋgɛnɛ likáyisi lí baʼ bápə́pə̂
1“Mɔʼ a si káyísí wɛ́n álí bwə nána Dyǔ pə́ lí sî káyísí mɔ́. 2Nyai ɛyə̌ ɛ káyísíní wɛ́n yɔ́ Dyǔ pə́ lí káyísíní wə. Mulimlim m límɛnɛ ámə́ ɛ bwəlání, mɔ́ pə́ Dyǔ lí bwəlaní álí káyísí wə̂. 3Yə̌ ɛ́ bwə́lí ka ɛ pámí ɛ́ mín ɛputáʼ ɛ́yə́ ɛ́ dí mǎ nyɔ̌ á dǐ, ɛ́yə́ ɛ səní ɛ púl ɛ́ mín ɛkɔʼ ɛ́yə́ ɛ́ dí wə̂ á dǐ? 4Yán ɛ tiŋgání ɛ pɔŋ mǎ nyɔ̌ nána wə̌ mú n fúl mɔ́ ɛputáʼ ɛ́yə́ ɛ́ dí mɔ́ á dǐ, ɛ́yə́ ɛkɔʼ ɛ́ díní wə á dǐ? 5Á wə, mɔ a ɛlaŋgá! Kɔ́sɛ́ ɛ fúl ɛkɔʼ ɛ́yə́ ɛ́ dí wə̂ á dǐ, yɔ́ ɛ́ púlní ɛ mín ɛ́putáʼ ɛ́yə́ ɛ́ dí mǎ nyɔ̌ á dǐ, ti ɛ fúlí yɔ́. 6Ɛ sə̌ ɛ́ nǔŋ byə̌m bí Dyǔ ɛ bə̌ bɔ́ á mbwá, á ɛ́tútú nána ɛ́ tim ɛ́ tɛ́ŋgɛ́n wə̂, tɔ ɛ tásán wə̂. Nâ pə́, ɛ sî shwá máfíya má wə má mbímbí á ngwi, njí ɛ bwə́lí nâni ngwi ɛ́yî ɛ́ dyaŋtí máfíya mâ na makwi.
Kɔndɛ́, sǎʼ, ɛ kfûm yə̌ ɛ́yə́ ɛ̌ sakání Dyǔ
7Kɔndɛ́ Dyǔ, lí bə wə̂. Sǎ, Dyǔ lí bwə wə̂ ɛ mín. Kfǔm ɛkuʼ Dyǔ lí dfǔl wə̂ yɔ́. 8Á ɛ́tútú nána, mɔtɛ́ awə̌ a kɔndɛ́ Dyǔ yǔm, á kwisí yɔ́. Mɔtɛ́ awə̌ a sakání Dyǔ yǔm á mín yɔ́. Ká njá mɔ́lə́ awə̌ a kfumbí ɛ́kuʼ, Dyǔ lí dfǔl mɔ́ yɔ́. 9Njá sáŋ a mwǎn awə̌ mwǎn a kɔ́ndɛ́ní mɔ́ blɛ̂t, ti a bəkí mɔ́ lilɛ́? 10Tɔ njá awə̌ mwǎn m mɔ á kɔ́ndɛ́ mɔ́ shwî ka a bə́ mɔ́ nyɔ̌? 11Njí nyə́ ábə́ nyí dí baʼ bá bî nyí bí ɛ bə̌ mábeya má mbâ á bǎn bá nyə, bitî bítín na Sáŋ n nyə awə̌ a dí á mǐn? Yán lí sî bəní mabeya má mbâ á baʼ ábə́ bá kɔ́ndɛ́ mɔ́? 12Áfánikə̌, bwəlâni á baʼ bápə́pə̂ yə̌ ɛ́yə́ nyí saní nána bá bwəlí nyə́ nâ mbéndá ɛ Dyǔ na balakuwa-bá-mudî bá mə́ní ɛ lɛ́fu.
Nji ɛ luŋgɛ́ álə́ lí sə̌ ɛ́ mɛ ɛ kambí ɛkə
13Ti Yésuwə a pɔŋí pə́ bɔ́ nána, Nyí túm á ɛkuʼ ɛ́yə́ ɛ́ kɔ́ŋí, á ɛ́tútú nána ɛkuʼ ɛ́yə́ ɛ́ kə á mwǐ ámə́ n sə̌ ɛ́ dím ɛ́ kɔ́lí, nji pə́ ɛyə̌ ɛ̌ kə á wə́ ɛ́ púwání, nsɔŋgí m bâ ábə́ bá túm á wə́ m bwí átin. 14Ndé ɛkuʼ ɛ́ nji ɛ luŋgɛ́ álə́ lí sə̌ ɛ́ mɛ ɛ́ kɔ́ŋí. Nji pə́ ɛ́yə́ ɛ́ kə á wə́ ɛ́ kámbí, nsɔŋgí m bâ ábə́ bá túm á wə́ bá bwíyǎ átin.
Yésuwə a lɛ́fú tɛ́ŋgɛnɛ balakuwa-bá-mudî bá mátúm
15Nyí nûŋ púndá na balakuwa-bá-mudî bá matúm. Wə̌ti ɛ míní bɔ́, bá dí pǐ ngə mílɔŋgi, ndé átinə́ m bɔ bá kaŋ ngə mbɛ. 16Nyí yə̌mb ɛ́ bú ɛ́ bâ ɛ́yə́ bá díní á misam ámə́ bá bwəní. Nsínjí n tíŋganiyǎ ɛ́ yɛ́ bipum bí músálúwə́? Tɔ ɛju ɛ́ wúshá ɛ́ tíŋganiyǎ ɛ́ yɛ́ bipum bí fík. 17Nâ pə́ bwə̌ ábə́ bú kɔ na nkfu m mbâ wú yɛ́ bipum bí mbâ. Ndé bwə̌ ábə́ bú sə̌ ɛ́ kɔ na nkfu m mbâ wú sə̌ ɛ́ yɛ́ bipum bí mbâ. 18Bwə̌ wú mbâ wú tíŋganiyǎ ɛ́ yɛ́ bipum bí bî. Bwə̌ wú bî wú tíŋganiyǎ ɛ́ yɛ́ bipum bí mbâ. 19Bwə̌ tɛ́ ábə́ wú sə̌ ɛ́ yɛ́ bipum bí mbâ, nwɔ́ŋ a ndfukú á kfwə bɔ́, a shwá bɔ́ á mwǐ átin. 20Áfánikə̌, nyí yəmb balakuwa-bá-mudî bá matúm á misam ámə́ bá bwəní.
Baʼ ábə́ bá pɔŋ Yésuwə á mbís na milə́m míbɛ̂
21Suká mɔʼ ansə́sə̌n awə̌ ǎ bəŋ mî ‘Sáŋgúwə́, Sáŋgúwə́,’ mɔ́ á kwili á wudya wú Dyǔ. Ndé baʼ ábə́ bá bwə̌ yə̌ ɛ́yə́ Sáŋ m myə awə̌ a dí ámín ǎ saní nána bá bwə bɔ́ bá kwili á wudya wú Dyǔ. 22Á púndá ɛyə̌ bǔn bú líkáyisi lí bâʼ wú paní, baʼ jǐta bá paʼ á mi ti bá pɔŋ mî nána ‘Sáŋgúwə́, Sáŋgúwə́, nga sí bílí baʼ ɛ pɔ̌ŋ misam ámə́ Dyǔ lí lúmíní sə́ álí pɔŋ bɔ́ nána mí bwəlan á dǐn dí wə, na nga sí bílí ɛ bwəlan dǐn lí wə álí fúl mídî míbî á nyǔ ɛ́ bâ, nga sí bwə́lí misam mí mányáká jǐta’? 23Áfâ mi m pɔŋ bɔ́ tɛyí tɛyí nána, ‘M bíyǎ nyə́. Nyí fálu mi á wúsú, nyə́ baʼ bá bî!’
Balúŋa-bá-ndáʼ bábɛ̂: A wukínjú na a ɛlemâ
24Ti Yésuwə a byábí pə́ nána, Áfánikə̌, ká njá awə̌ a wúkí biyala bí myə bínán, ti ǎ bwə ngə bí byání, a dí ngə mɔ a wukínjú awə̌ a lúŋí ndáʼ ɛ́ mɔ á ɛ́lábán álí bwə nána ɛ kpú. 25Á púndá ɛyə̌ mbfú ɛ mə́ní ɛ yúwɛ, madí má lwínjí jǐta, ɛkful ɛ́ wání ɛ́ lábí ndáʼ ɛyə̌, ndé ndáʼ ɛ́ mɔ ɛ páŋtiliyǎ, á ɛ́tútú nána bá lúŋí yɔ́ á ɛ́lábán ámǐn. 26Ndé ká njá awə̌ a wúkí biyala bí myə bínán, ka a si bwə́ ngə ɛ́ sakiní, a dí ngə mɔ a ɛlemâ awə̌ a lúŋí ndáʼ ɛ́ mɔ a fyangú ámǐn. 27Á púndá ɛyə̌ mbfú ɛ mə́ní ɛ yúwɛ, madí má lwínjí, ɛkful ɛ́ wání ɛ lábí ndáʼ ɛyə̌, ti ndáʼ ɛni ɛ lábání áshí, ɛ páŋtílí.”
Wunja ábə́ Yésuwə a wɔ́ŋíní álí lɛ́fú
28Á púndá ɛyə̌ Yésuwə a málíní álí byá misam mî, limuti álə́ lí bílí mɔ́ ɛ wúkan, bá bílí manyáká á nyai ɛyə̌ a bílíní ɛ lɛ́fu. 29Limuti lî lí bílí manyáká á ɛ́tútú nána, a bílí ɛ lɛ́fu ngə mɔʼ awə̌ wə̌ti a byábí ní ɛ́ mə́. A bíliyǎ ɛ́ lɛ́fu ngə balɛ̂ bá mbéndá bá bílíní ɛ lɛ́fu.
Currently Selected:
Mátyo 7: bwt
Highlight
Copy
Compare
Share
Want to have your highlights saved across all your devices? Sign up or sign in
