Mátyo 28
28
Yésuwə a pumú
1Ngə Bǔn bú Líkɔ́mbɛ wú baʼ bá Ísrɛl bú túmbíní, mushú pilílí á bǔn bú Sɔ́ndi, Meríyə́ Magdalɛnə, Meríyə́ nyǎ mú Jémsə na Jósɛfə, bá kí ɛ mindí ndim m Yésuwə. 2Ndɔʼ ɛ sakí na ngínya təlí, ti áŋgɛl ɛ́ Dyǔ ɛ fí ámǐn, ɛ́ makí lilɛ́ álə́ bâ n bání á nsu mú ndim á nsaŋ, ti ɛ shumání lɔ́ ámǐn. 3Wusú wú áŋgɛl ɛni wú bílí ɛ nwáŋ ngə mwǐ n Dyǔ, mabaʼ má mɔ́ má bílí ɛ pú ngə mbɔ́m. 4Ɛ́yî ɛ́ bwə́lí basója ábə́ bá bílí ɛ tátí ndim m Yésuwə bá wú bɔŋ jǐta. Ɛ́yî ɛ́ bwə́lí bɔ́ bá sáka, bá kfúndí áshí, bá bá ngə bawú. 5Ti áŋgɛl ɛni ɛ byábí á balân bâ nána, “Nyí sí báŋ. M bí nána Yésuwə awə̌ bá búmíní á mbásá mɔ́ nyí pílíní ɛ táti. 6A shiyǎ á fánán, a mə̌ ɛ pumu ngə a n pɔŋní nyə́ nána ɛ́ bwəlan. Nyí paʼ nyí míndi áfə́ bâ n nənjíní mɔ́. 7Kəkání shám sɔnsɔ́nǎn nyí pɔ̌ŋ bawútú bá mɔ, a mə̌ ɛ pumu á líwá, ngə ɛ́ díní nán a mə̌ ɛ pumu, a mə̌ ɛ kə á wusú a Gálilî, nyí mín mɔ́ á wə́. Nyí si yasán yə̌ ɛ́yə́ m pɔŋní nyə́.” 8Áfánikə̌, balân bâ bá mákú ndim á mpɛ́si átin na bɔŋ, ndé ká ngə bɔ̌ŋ wú bílíní bɔ́, munyɛŋgɛ m bílí bɔ́ átin. Ti bá mbuŋgú mifílí álí kə̌ ɛ pɔ̌ŋ bawútú bá Yésuwə yə̌ ɛ́yə́ ɛ́ bwə́lání. 9Ngə balân bâ bá bílíní ɛ kə̌, Yésuwə a tání bɔ́ təlí, ti a byábí á bɔ́ nána, “Musaŋgu m bá ná nyə́.” Bá pílí á mɔ́, bá wálí mɔ́ á makwi, bá bə́kí mɔ́ ɛdúbɛ́. 10Yésuwə a pɔŋí bɔ́ nána, “Nyí sí báŋ. Kəkání nyí pɔ̂ŋ bawútú bá myə ábə́ bá dí ngə bǎn-bá-nyǎ nána bá kə̌ á Gálilî. Bá mín mî á wə́.”
Sója ɛ́ byábí yə̌ ɛ́yə́ ɛ́ bwə́lání
11Á mbís ɛ púndá ngə balân bâ bá bílíní ɛ kə̌ álí pɔ̌ŋ bawútú bá Yésuwə yə̌ ɛ́yə́ ɛ́ bwə́lání, duŋgu lí sója ɛ́yə́ ɛ bílí ɛ tátí ndim m Yésuwə, ɛ́ kí á nkí átin, ti bá pɔ́ŋí baprîsə bánə̂n misam mísə́sə̌n ámə́ mí bwə́lání á púndá ɛyə̌ áŋgɛl ɛ pilíní. 12Ti baprîsə bánə̂n na bankúmə́ bá búmí bá wíkí mwanú m bɔ. Ngə bá málíní álí wikí mwanu m bɔ, bá bə́kí sója ɛ́yî ɛkfúna ngáʼ. 13Ti bá pɔŋí bɔ́ nána, “Nyí lɔ́lí ɛ byá nána, bawútú bá Yésuwə bá pílí á wudû átin á púndá ɛyə̌ nyí bílí ɛ nali, ti bá jíbí mbimba m mɔ. 14Njí Páyílɛtə a wúkí nâ, sí bwə mɔ́ a dúbɛ́ nána, sí wɔ́ŋiyǎ makɛ́ á nsam ɛ́ mû. Áfánikə̌, ɛ́yî ɛ́ bwə nyí sí wɔ́ŋ kɔkɔ.” 15Sója ɛ́yî ɛ núŋí ngáʼ ɛni, ti ɛ́ bwə́lí yə̌ ɛ́yə́ bá pɔ́ŋíní bɔ́ nána bá bwə. Áfánikə̌, kə́ŋ ta bǔn bú yə̌, pɔ́li ɛni yɔ́ baʼ bá Júda bá díní wə̌ ɛ́ fətan.
Yésuwə a lúfú nyǔ ɛ́ mɔ á bawútú bá mɔ
16Á mbís ɛ púndá, bawútú dyǔm na nfɔ́ bá Yésuwə, bá kí á wúkul ábə́ wú bílí á Gálilî, áfə́ Yésuwə a pɔŋíni bɔ́ nána bá kə̂. 17Á púndá ɛyə̌ bá míníní mɔ́, bá bə́kí mɔ́ ɛdúbɛ́, ká ngə duŋgu lí bɔ lí sî n dúbɛ́ní nána Yésuwə mɔ́ a bílí nâ. 18Yésuwə a kǐ bɔ́ ɛ wútan ti a pɔŋí bɔ́ nána, “Dyǔ lí bəkí mi wunja wúsə́sə̌n ámǐn na a nkínshíyə 19Kəkáni kə̌ á bíkumbu bísə́sə̌n á nkínshíyə, nyí bwə baʼ bá tîm bawútú bá myə. Na nána nyí dúmsɛ bɔ́ á dǐn lí Sáŋ, á dǐn lí Mwǎn, na á dǐn lí Mudî ámə́ n Sáŋí. 20Nyí lɛ́fú bɔ́ álí nǎn mísam mísə́sə̌n ámə́ m mə́ní nyə́ ɛ pɔŋ nána nyí bwə̂. Nyí lɔ́lí ɛ bí nána m bá na nyə́ kə́ŋ ta á shú lí nkínshíyə.”
Currently Selected:
Mátyo 28: bwt
Highlight
Copy
Compare
Share
Want to have your highlights saved across all your devices? Sign up or sign in
