Mátyo 21
21
Yésuwə a kwilí á Jerúsálɛmə ngə kə̂ŋ
1Ngə Yésuwə na bawútú bá mɔ bá bílíní ɛ kə bɛbɛ á Jerúsálɛmə, bá pílí á nkí m Bɛfágə á Wúkul wú Ólifə. Áfâ Yésuwə á lúmí bawútú bá mɔ bábɛ̂ á wúsú 2A pɔŋí bɔ́ nána, “Kəkáni á nkí ámə́ n dí nyə́ á wúsú. Ngə nyí kwilíní, nyí mín jakásə ɛyə̌ bá tfúlíní, na mwǎn m mɔ á nsaŋ m mɔ. Nyí káku yɔ́, nyí pánán yɔ́. 3Njí mɔ a kɔndɛ́ nyə́ yándá álə́ nyí kákúní yɔ́, nyí pɔ̂ŋ mɔ́ nána Sáŋgúwə́ ǎ sa yɔ́ ɛ bwəlan. Njí nyí byábí nâ, áfâ áshí áshí, mɔ ani á mwɛsán nyə́ yɔ́.” 4Ɛ́yî ɛ́ bwə́lání álí lwínjí bíyala ábə́ Dyǔ lí lúmání nlakuwa-a-mudî nána,
5“Pɔ̌ŋ nkí n Záyɔnə nána,
Nyí táti, kə̂ŋ ɛ́ nyə ɛ̌ paʼ á nyə́,
a shulí nyǔ ɛ́ mɔ áshí, á shumání á jakásə ámǐn, njúmâ mwǎn a jakás.”
6Áfánikə̌, bawútú bá kí ti bá bwə́lí yə̌ ɛ́yə́ Yésuwə a pɔ́ŋíní bɔ́ álí bwə. 7Bá pánání jakásə na mwǎn m mɔ, bá núŋí mabaʼ má bɔ, bá wɛ́tí mɔ́ á mbís ɛ jakásə ámǐn, ti Yésuwə a pulú yɔ́ ámǐn. 8Limuti lí wɛ́tí mabaʼ á mbuka, baʼ bápə́pə̂ bá kfwə́lí bika-bí-ɛ́lɛ́n ti bá wɛ́tí bɔ́ á mbukaʼ. 9Limuti álə́ lí bílí ɛ́ kə á wúsú wú Yésuwə na álə́ lí bílí mɔ́ ɛ pɔŋ á mbís, bá bútí álí kán nána,
“Hósána, li kɛ́si lí bá na Mwǎn a nja mú Devídə.
Wunam wú bá na awə̌ a pilí á dǐn lí Sáŋgúwə́.
Hósána, li kɛ́si lí bá na Dyǔ álə́ lí dí kə́ŋ ti á nkímínyə́!”
10Áfâ áshí áshí ngə Yésuwə a kwilíní á Jerúsálɛmə, baʼ básə́sə̌n bá pámblání, ti bá kɔ́ndɛ́ nána, “Njá ani?” 11Ti limuti lí púshú nána, “Yésuwə mɔ́ a dí, nlakuwa-a-mudî a Dyǔ, á nkí n Názárɛtə á pɛsi ɛ mbú ɛ Gálilî.”
Yésuwə a naní baʼ bá nyúŋgá á Tɛ́mpɛl
12Á mbís ɛ púndá, Yésuwə a kǐ á Tɛ́mpɛl átin. Ti a naní baʼ básə́sə̌n ábə́ bá bílí ɛ́ bwə̌ nyúŋgá áwə́ átin. A wɛ́sí makwi má tíbili ámǐn áfə́ baʼ bá bílíní ɛ pəlán ngáʼ, ti a wɛ́sí pə́ makwi má bíbuŋ ámǐn áfə́ bá bílíní ɛ súm mbingá. 13Ti a pɔŋí bɔ́ nána, “Ɛ́ tílání nána Dyǔ lí byábí nána,
‘Ndáʼ ɛ́ myə bá lɔ́lí yɔ́ ɛ bə̌ŋ ndáʼ ɛ makáni.’ Ndé nyí mə́ yɔ́ ɛ timbi, ‘Wusɔmɔn wú bájíb!’”
14Bidímtí na bibə́ŋtí ábə́ bá bílí á wə́ bá pílí á Yésuwə ti a pwisí bɔ́. 15Baprîsə bánə̂n na balɛ̂ bá mbéndá bá kfwí jǐta. Bá kfwí á ɛ́tútú nána bá míní misam mí mányáká ámə́ Yésuwə a bílíní ɛ bwə, na ɛ́tútú nána bá wúkí ngə bǎn bá bílíní ɛ kán á Tɛ́mpɛl átin nána, “Li kɛsi lí bá na Mwǎn n nja mú Devídə.” 16Áfánikə̌, bá kɔ́ndɛ́ Yésuwə nána, “Ɛ́ wú yǔm ɛ́yə́ bǎn á bâ bá byání?” Yésuwə a pushú bɔ́ nána, “Iŋ ŋ wúkí. Nyí nan láŋíyá wə́ á kâti ɛ Dyǔ nána lí mə́ ɛ bunsán bǎn na mikə́ngə́ álí kɛsí mî bwǎm bwǎm?” 17Á mbís ɛ púndá, Yésuwə a makú bɔ́ á Jerúsálɛmə, ti a kǐ ɛ nali á nkí n Bɛ́táni.
Yésuwə na bwə̌ ábə́ bá bəŋní fík
18Ngə wú yílíní mushú, á púndá ɛyə̌ Yésuwə a bílíní ɛ tǐm mbís á Jerúsálɛmə, njɛ ɛ bílí mɔ́ ɛ wa. 19Ngə a bílíní ɛ kə, a míní bwə̌ ábə́ bá bəŋí fík á nsaŋ n nji. Ti a kǐ á wə́, ndé a míniyǎ ɛ́pum ká ɛfɔ́ ámǐn, ɛ́sitúm byɛ́. Yɔ̂ Yésuwə a pɔŋíní bwə̌ bû nána, “Ɛ sî yɛ́ pə́ bipum bǔn ká wúfɔ́.” Áfâ áshí áshí, bwə̌ bú fík bû bú kínjí ámǐn. 20Ngə bawútú bá Yésuwə bá míníní yə̌ ɛ́yə́ ɛ́ bwə́lání bá bílí manyáká jǐta. Yɔ̂ bá kɔ́ndɛ́ní mɔ́ nána, “Yán bwə̌ bú fík búnán bú pámíní ɛ kín nán?” 21Yésuwə á pushú, “Á mbálɛ nǎn pɔŋ nyə́ nána njí nyí dúbɛ́ na milə́m mí nyə mísə́sə̌n, ní suká yə̌ ɛ́yə́ n bwəlíní bwə̌ búnán yɔ́ na yɔ́ nyí púlní ɛ bwə. Ndé nyí púl ɛ́ pɔ̌ŋ ká wúkul wú nə̂n búnán nána, ‘Falú áfánán, kə̌ ɛ shwá wəmə̌n á mádí mánə̂n átin,’ ti ɛ́ bwəlán nâ. 22Njí nyí dúbɛ́ nána ká yǔm ɛ́yə́ nyí kɔ́ndɛ́ní Dyǔ á mákáni nyí kwisí yɔ́, ní nyí kwisí yɔ́.”
Li kɔndɛ tɛ́ŋgɛnɛ wunja wú Yésuwə
23Yésuwə á tímbí á Tɛ́mpɛl á lɛ́fúwá bâʼ. Ngə a bílíní ɛ lɛ́fú, yɔ̂ baprîsə bá nɛ̂n na bankúmə́ bá baʼ bá Ísrɛl bá pílíní, ti bá kɔ́ndɛ́, “Njá a bəkí wə wunja bún?” 24Yésuwə á pushú bɔ́ nána, “Mi pə́ n kɔ́ndɛ́ nyə́ yǔm ɛfɔ́. Njí nyí púshú, yɔ́ mi pə́ n pɔŋní nyə́ wunja ábə́ ŋ wɔ́ŋíní álí bwə̌ mísam mínán. 25Dumsɛ álə́ Jɔnə́ a bílíní ɛ dumsɛ́ bâʼ áfə́ lî n fíní? Lî n fí yə́ á Dyǔ tɔ̌ lî n fí á bǎnyûŋ?” Bá bútí ɛ táŋ na bɔ́mə̌n nána, “Njí sí byábí nána ‘Wunja wú Jɔnə́ wú fí á Dyǔ,’ ní á kɔ́ndɛ́ sə́ nána, ‘Yán kə́ nyí sî n dúbɛ́ní mɔ́?’ 26Ndé njí sí byábí nána, ‘Wunja wú mɔ wú fí á baʼ bǎnyûŋ,’ ní limuti lín lí bwə sə́ wubî á ɛ́tútú nána baʼ básə́sə̌n bá n dúbɛ́ nána Jɔnə́ á bílí nlakuwa-a-mudî a Dyǔ.” 27Áfánikə̌ bá púshú Yésuwə nána, “Sə́ sí bíyǎ.” Ti á pɔŋí bɔ́, “Ká mi pə́ n sí pɔŋá nyə́ wunja ábə́ ŋ wɔ́ŋíní álí bwə misam mínán.”
Ŋganú ɛ bǎn bá búmân bábɛ̂
28“Yésuwə a kɔndɛ́ pə́ baprîsə bánə̂n na bankúmə́ bá baʼ bá Ísrɛl nána, yán nyí míníní nsam mún tɛ́ŋgɛnɛ ŋganú ɛnínán? Mɔʼ nfɔ́ a bílí awə̌ a n yɛ́ bǎn bá bumân bábɛ̂. Yɔ̂ a kǐní ɛ pɔ̌ŋ mwǎn m mɔ a mbâ nána, ‘Mwǎn, kə ɛ bwə ndutu á ndfukú ɛ́ myə wúyə́.’ 29Ti mwǎn ani a pushú sáŋ nána, ‘N sə̌ ɛ́ kə.’ Ndé á mbís ɛ́ púndá a timbí ɛ pə́lán nlə́m m mɔ, ti á kǐ. 30Ti mɔ ani a kǐ á mwǎn-ndəm, a pɔŋí mɔ́ mulimlim m nsam. Mwǎn a pushú nána, ‘A sísə́ n kə.’ Ndé a kíyǎ.” 31Yɔ̂ Yésuwə a kɔ́ndɛ́ní baprîsə bá nə̂n nána, “Á bǎn bánán bábɛ̂, njá a bwəlí yə̌ ɛ́yə́ sáŋ m bɔ a sakákíní nána bá bwə? Bá púhsú mɔ́ nána, ‘A mɔ a mbâ.’ Áfánikə̌, Yésuwə a pɔŋí bɔ́ nána, ‘Á mbálɛ nǎn pɔ̌ŋ nyə́ nána baku-bá-táks na balân bá ákpala bá kɔ́sɛ́ ɛ́ kwili á wúdya wú Dyǔ kandíní nyí kwíli.’ 32Nǎn byá ɛ́yín á ɛ́tútú nána Jɔnə́ a dumsɛ pə́ a n lúfú nyə́ nji ɛ mbâ, nyí sî n dúbɛ́ mɔ́, ndé baku-bá-táks na balân bá ákpala bâ n dúbɛ́ mɔ́. Ká ngə nyí míníní nâ nyí sî n pəlán mílə́m mi nyə álí dúbɛ́ mɔ́.”
Ŋganú ɛ babwəla bá ndutu ɛ mungu mábɛ̂
33Á mbís ɛ púndá Yésuwə a pɔŋí bɔ́ nána, “Wúkáni ŋganú ɛpə́pə̌. Nwɔ́ŋá-a-ndfukú ɛ mə̌ a bílí nyǎ awə̌ a tə́mí ndfukú, a wún mə̌ má bípum ábə́ bá bwəlání mǐm. Ti a lúŋí wukâʼ á ndfukú ɛ́ mɔ ɛni ɛsə́sə̌n. A lúŋí pə́ fǔm ábə́ bá nwámní bipum álí bwə mǐm. Ti a lúŋí libún áwə́ á ndfukú ɛni áfə́ bá shumání álí mindí ndfukú. A bəkí ndfukú ɛni á baʼ ábə́ mɔ́ na bɔ́ bá kǎ mbuta, ti a kǐ á nkí mpə́pə̂ 34Ngə púndá ɛ pilíní ɛ́yə́ bá pání bipum, nwɔ́ŋá-a-ndfukú ani á lúmí batáŋ bá mɔ á babwəla bá ndutu álí nǔŋ likaʼ lí bipum bí mɔ. 35Áfâ babwəla bá ndutu bâ bá kúwí batáŋ bâ, ti bá lábí nfɔ́, bá búlú ampə́pə̂, ti bá búlú anínání na malɛ́. 36Á mbís ɛ púndá nwɔ́ŋá-a-ndfukú ani a lúmí batáŋ bápə́pə̂ ábə́ bâ n bwí nsɔŋgí litúm ábání. Babwəla bá ndutu bâ bá bwə́lí mulimlim n yǔm á batáŋ bâ ngə bá n bwəní bá wusúwə. 37Á mbís ɛ púndá, a lúmí mwǎn m mɔ á kaníyá nána bá bə mɔ́ ɛdúbɛ́. 38Ndé babwəla bá ndutú ngə bá míníní mwǎn ani ngə ǎ paní, yɔ̂ bá bútíní ɛ byá na bɔ́mə̌n nána, ‘Mɔ awə̌ bá mwɛsání litfu mɔ́ anínán, nyí pâʼ! Sí búlu mɔ́ ngə litfu lí mɔ lí timní lí sə.’ 39Yɔ̂ bá kúwíní mɔ́, bá nyítání mɔ́ á ndfukú ɛ mə̌, ti bá búlú mɔ́.” 40Ti Yésuwə a kɔndɛ́ bankúmə́ bá baʼ bá Ísrɛl na baprîsə bá nə̂n nána, “Sɔnsɔ́nǎn, njí nwɔ́ŋá-a-ndfukú ɛ mə̌ ani a pílí yə̌ á bwəní á babwəla bá ndutu bâ?” 41Bá pushú nána, “Á búlú baʼ bá bî bâ, ti a bəkí ndfukú ɛni á babwəla bá ndutu bápə́pə̂ ábə́ bá bə̌ likaʼ lí mɔ lí mbuta wə̌ti púndá ɛli páʼ bipum ɛ pilí.” 42Yésuwə á pɔŋí pə́ bɔ́ nána, “Nyí nan láŋíyá wə̂ bǔn ká bufɔ́ ɛyala ɛ́ Dyǔ ɛ́yə́ ɛ́ byá nána,
‘Lilɛ́ álə́ balúŋa-bá-ndáʼ bâ n yɔbíní lɔ̂ lí tímbí ɛ́ bá lílɛ́ lí mbímbí.
Sáŋgúwə́ mɔ́ a bwəlí yɔ́ nâ, ɛ dí sə́ nsam m mányáká,’
43Áfánikə̌, nǎn pɔ̌ŋ nyə́ nána, bá nuŋán nyə́ ɛpúlu ɛ́ wúdya ɛ́yə́ nyí wɔ́ŋíní ngə baʼ bá wúdya wú Dyǔ bá bə́ yɔ́ á baʼ ábə́ bá bwə̌ yə̌ ɛ́yə́ Dyǔ lí saní. 44‘Ká njá awə̌ a kumbí lilɛ́ lî, nyǔ ɛ́ mɔ ɛsə́sə̌n ɛ́ búti átin. Ndé awə̌ lí kfúndíní á nyǔ ɛ́ mɔ, nyǔ ɛ́ mɔ ɛsə́sə̌n ɛ́ myəti.’ 45Á púndá ɛyə̌ baprîsə bá nə̂n na Bafárisî bá wúkíní ŋganú ɛyə̌ Yésuwə a tfumíní, bá yə́mbí nána á bɔ́ a bílíní ɛ byá. 46Áfánikə̌, bá wánání álí kú mɔ́. Ndé bá bílí ɛ báŋ á ɛ́tútú nána limuti lî lí bílí ɛ mín Yésuwə nána mɔ́ a dí nlakuwa a mudî a Dyǔ.”
Currently Selected:
Mátyo 21: bwt
Highlight
Copy
Compare
Share
Want to have your highlights saved across all your devices? Sign up or sign in
