Mátyo 20
20
Ŋganú ɛ babwəla bá ndutu
1Ti Yésuwə a pɔŋí bɔ́ ŋganú nána, “Nǎn byá nâ á ɛ́tútú nána, wudya wú Dyǔ wú dí ngə nwɔ́ŋá-a-ndfukú awə̌ a nyítí á ndáʼ ɛ́ mɔ mǎ mushú pilílí, álí kə ɛ́ sa bâʼ ábə́ á sáwúní álí bwə̌ ndutu á ndfukú ɛ́ mɔ. 2A pushú álí sáwú bɔ́ nsáwu n bwín, ti a lúmí bɔ́ á ndfukú ɛ́ mɔ. 3Nwɔ́ŋá-a-ndfukú ani a timbí pə́ á nkí á ngə́ŋ libu. Ti a tání baʼ bá tyə́bí ábə́ bá si bwəlá ká yǔm. 4Ti a byábí á bɔ́ nána, ‘Nyə́ pə́ nyí kə̂ nyí bwə̂ ndutu á ndfukú ɛ́ myə, n sáwú nyə́ nsáwu ámə́ n tɛ́ŋgɛ́ní.’ 5Áfánikə̌, bá kí. A kǐ pə́ á ɛ́bú á ngə́ŋ dyǔm na ɛ́bɛ̂ na a ngə́ŋ ɛ́lán ɛ́ nkwin, a kǐ a bwəlí pə́ mulimlim. 6Lipǎ ngə́ŋ ɛ́tân ɛ́ nkwin, ngə mɔ ani a timbíní pə́ á nkí átin, a tání baʼ bápə́pə̂ ngə bá tyə́bíní á wə́ bá si bwəlá ká yǔm. Ti a byábí á bɔ́ nána, ‘Yán nyí tyə́bíní fán bǔn búsə́sə̌n nyí si bwəlá ká yǔm?’ 7Bá púshú mɔ́ nána, ‘Mɔʼ ká nfɔ́ a núŋiyǎ sə́ á ndutu.’ Ti a pɔŋí bɔ́ nána, ‘Nyə́ pə́ nyí kə̂ nyí bwə̂ ndutu á ndfukú ɛ́ myə.’
8Ngə nkwinkwin m pílíní, nwɔ́ŋá-a-ndfukú ani, a pɔŋí mɔ awə̌ a bílí ɛ́ tátí baʼ ábə́ bá bílí ɛ́ bwə ndutu nána a mbûm bɔ́ álí sáwú bɔ́. Ǎ a búti na baʼ ábə́ bá dínjání ɛ paʼ ti a mɛ́si na baʼ ábə́ bá kɔ́sɛ́ ɛ paʼ. 9Baʼ ábə́ bá bútí ndutu á ngə́ŋ ɛ́tân ɛ́ nkwinkwin bá kwísí nsáwu m bǔn bufɔ́ mɔtɛ́. 10Á púndá ɛyə̌ baʼ ábə́ bá kɔ́sɛ́ álí bwə̌ ndutu bá pílíní, bá mínákí nána bá sáwú bɔ́ litúm bání ábə́ bá bútí ndutu litúm ngə́ŋ ɛ́tân. Ndé bɔ́ pə́ bá kwísí nsáwu m bǔn bufɔ́ bɔ́ mɔtɛ́. 11Ngə bá kwísíní ngáʼ ɛyə̌ bá sáwúní bɔ́, bá bútí ɛ byɔʼ átin. 12Bá byábá nána, ‘Baʼ ábánán bá bwə́lí ndutu háwa pɔ́ yɔ́ na yɔ́, kánâwə̌ ɛ sáwú bɔ́ mulimlim ngə sə́ ábə́ sí bwə́lí ndutu bǔn búsə́sə̌n á ɛbɛ́ntí ɛ́ dúlu átin.’ 13Ti nwɔ́ŋá-a-ndfukú ani a timbí á mɔ nfɔ́ a baʼ bâ nána, ‘Ashí n sɛ̌ nyə́ ɛ səŋ. Nga ɛ́ dí mbálɛ nána sí púshú nána n sáwú nyə́ nsáwu m bǔn bufɔ́? 14Nyí nûŋ ngáʼ ɛ́ nyə nyí kə̂. Mimə̌n m malí nána n sáwú mɔ anínán awə̌ a dinjání ɛ́ paʼ mulimlim ngə n sáwúní wə. 15N wɔ́ŋiyǎ wúnja álí bwəlán ngáʼ ɛ́ myə ngə n nəŋíní? Yə̌ nyí fɛnjní milə́m mí nyə á libum á ɛ́tútú ɛ́ wulɔʼ wúlə́m wú myə?’” 16Ti Yésuwə a shúkí na ŋganú ɛni nána, “Áfánikə̌, ábə́ bá kɔ́sɛ́ bá tim á mbís, ábə́ bá bílí á mbís bá tim á wúsú.”
Yésuwə a byábí ɛtî ɛ́yə́ ɛ́ lwínjání bitî bílán ngə bá búlúní mɔ́
17Yésuwə na bawútú bá bílí ɛ pulu álí kə̌ á Jerúsálɛmə. Ngə bá bílíní ɛ kə, a bəŋí bɔ́ á nsaŋ ti a pɔŋí bɔ́ á kfun átin nána, 18“Nyí wúkan, sí kə̂ á Jerúsálɛmə, áwə́ bá bə̌ Mwǎn a Mɔnyuŋ á makɛ́ má prísə ɛ́ nə̂n na balɛ̂ bá mbéndá. Bɔ́ bá nyítí mbakú nána a lɔlí ɛ wá. 19Bá bə mɔ́ á mákɛ́ má baʼ ábə́ bá shiyǎ baʼ bá Júda. Bɔ́ bá wɛlí mɔ́, bá shwɛ́njí mɔ́ ti bá búmí mɔ́ á mbásá. Ndé á bǔn ábə́ bú lwínján mádû málán, Dyǔ lí pumu mɔ́.”
Mwalân a sakí madya á bǎn bá mɔ
20Á mbís ɛ púndá, mwalân mú Zɛ́bɛdíyə a pilí á Yésuwə na bǎn bá bumân bá mɔ bábɛ̂, a tɔ̌ mabɔ́ŋ áshí, ti a yɔ́mbí Yésuwə nána a bwə́li mɔ́ nsam. 21Ti Yésuwə a kɔndɛ́ mɔ́ nána, “Yə̌ wə ɛ̌ saní nána m bwə́li wə?” Ti a pushú Yésuwə nána, “Fá mî likaʼ nána á púndá ɛyə̌ ɛ́ bání á janiya, bǎn bá myə bábɛ̂ bánán bá shumán wə̂ á nsaŋ n nyǔ, nfɔ́ á ɛ́kɛ́ ɛ́ mbâ ɛ́ wə aníní á ɛ́kɛ́ ɛ́ mwɛ ɛ́ wə.” 22Yésuwə a pushú bɔ́ nána, “Nyə́ nyí bíyǎ yǔm ɛ́yə́ nyí kɔndɛ́ní. Nyí púl ɛ́ pə́m mútakaʼ n ngínya ámə́ m pə́mní? Nyí púl ɛ́ kwisí dúmsɛ lí mútaka álə́ mi n kwisíní?” Bá pushú mɔ́ nána, “Sí púl” 23Yésuwə a pɔŋí bɔ́ nána, “Á mbálɛ nyí pə́m yɔ́, ndé ŋ wɔ́ŋiyǎ wúnja álí pwɛʼ mɔ̂ʼ awə̌ á shuman á ɛ́kɛ́ ɛ́ mbâ ɛ́ myə tɔ á ɛ́kɛ́ ɛ́ mwɛ ɛ́ myə. Mabú má lí shuman mâ, má dí á baʼ ábə́ Sáŋ m myə a tambúní á bɔ́.” 24Ngə bawútú á bání dyǔm bá wúkíní nâ, bá kfwí na bǎn bá nyǎ bâ bábɛ̂. 25Áfánikə̌, Yésuwə a bumí bɔ́ baʼ básə́sə̌n ti a pɔŋí bɔ́ nána, “Nyí lɔ́lí ɛ bî nána bajaniya na baʼ bá nə̂n bá nkínshíyə bá bwəlán ngínya álí janiya bâʼ ábə́ bá dí á wásé m bɔ. 26Ndé ɛ́ lɔ́liyǎ ɛ́ bá nâ á wútitîn wú nyə. Ká njá awə̌ a sakí álí bá mɔ a nə̂n á wútitîn wú nyə, a lɔlí ɛ́ bá mbwəlâ n nyə. 27Ká njá mɔ́lə́ awə̌ á bá mɔ a wusúwə á wútitîn wú nyə a lɔlí á bá ntáŋ n nyə. 28Mulimlim nâ pə́ Mwǎn a Mɔnyuŋ a píliyaní nána baʼ bá bwə́li mɔ, ndé a pílí álí bwəlí bâʼ na álí bə̌ lúŋgɛ́ lí mɔ álí kɔtɛ́ bâʼ jǐta.”
Yésuwə a pwisí bidímtí bíbɛ̂.
29Ngə Yésuwə na bawútú bá mɔ́ bá bílíní ɛ falu a nkí n Jeríko, limuti línə̂n lí bílí bɔ́ ɛ pɔ̌ŋ á mbís. 30Á púndá ɛni, bidímtí bíbɛ̂ bí shúmání á nsaŋ n nji. Á púndá ɛyə̌ bá wúkíní nána Yésuwə ǎ túm, bá bútí ɛ́ bún nána, “Mwǎn a nja n Devídə! Wú sə́ likini.” 31Limuti álə́ lí bílí áwə́ lí kándí bɔ́, lí pɔ̌ŋ bɔ́ nána bá dyɛ́ kpiʼ. Ndé bidímtí bî bá búní litúm ɛtî ɛ́ wusúwə. “Á Mwǎn a nja n Devídə, a Sáŋgúwə́, wú sə́ likini!” 32Yésuwə a tyə́bí, a bə́ŋí bɔ́, a kɔ́ndɛ́ bɔ́ nána, “Yə̌ nyí saní nána mi m bwə́li nyə́?” 33Bá púshú mɔ́ nána, “A Sáŋgúwə́, sí sa nána ɛ bwə́ sə́ sí mín wǔm.” 34Yésuwə a wúkí bɔ́ likini, a bándí makɛ́ má mɔ á mǐ má bɔ. Á mulimlim púndá bidímtí bî bí bútí ɛ mín wǔm ti bá pɔ́ŋí mɔ́ á mbís.
Currently Selected:
Mátyo 20: bwt
Highlight
Copy
Compare
Share
Want to have your highlights saved across all your devices? Sign up or sign in
