Mátyo 18
18
Njá a kukí álí bá a nə̂n á wúdya wú Dyǔ
1Á púndá ɛni, bawútú bá pílí á Yésuwə, bá kɔndɛ́ mɔ́ nána, “Njá a kukí álí bá mɔ a nə̂n á wúdya wú Dyǔ?” 2Ti Yésuwə a bəŋí mǎ mwǎn, a bwəlí mɔ́ a tyə́bí á wútitîn wú bɔ, 3ti a byábí nána, “Á mbálɛ mi nǎn pɔ̌ŋ nyə́, kə́ŋ ta mɔ a pə́lán lúŋgɛ́ lí mɔ, a bá ngə mwǎn anín, a tíŋganiyǎ ɛ́ kwili á wúdya wú Dyǔ. 4Awə̌ a kukí ɛ́ bá a nə̂n á wúdya wú Dyǔ a dí awə̌ a shulí nyǔ ɛ́ mɔ áshí ngə mwǎn anín. 5Ká njá mɔ́lə́ awə̌ a kasí mwǎn ngə anínán á dǐn lí myə, ní a kasí mi.
Makiksan álí bwə wúbî
6Ká njá mɔ́lə́ awə̌ a bwəlí mwǎn ngə anín awə̌ a dúbɛ mî álí bwə wúbî, ɛ́ lɔʼ nána bá tfúl ɛbú ɛ́ mɔ̂ʼ ngə ani lilɛ́ lí nə̂n á líbɔʼ lí mɔ bá shwá mɔ́ á ndiba ɛ mbô ɛnə̂n. 7Ɛbúmán na nkínshíyə á ɛ́tútú ɛ́ misam ámə́ mí bwə bâʼ álí bwə̌ wúbǐ. Misam á mî mí lɔ́lí ɛ paʼ, ndé ɛbúmán na mɔʼ awə̌ á bwə̌ mɔʼ ampə́pə̂ álí bwə̌ wúbî. 8Njí ɛkɛ́ tɔ ɛkwi ɛ́ wə ɛ́ bwə́lí wə álí bwə̌ wúbî, shə́ yɔ́ ɛ pûm. Ɛ́ lɔʼ nána ɛ kwísi lúŋgɛ́ álə́ lí sə̌ ɛ́ mɛ na ɛ pɛsí ɛ́ nyǔ búka na wə lí wɔ́ŋ mákɛ́ tɔ makwi mábɛ̂ ti bá shwá wə̂ á mwǐ ámə́ n sə̌ ɛ́ dím. 9Njí dǐ lí wə lí bwə́lí wə ɛ bwə̂ wubî fúl lɔ́ ɛ pûm lɔ́. Ɛ́ lɔʼ nána ɛ wɔ́ŋ luŋgɛ́ na dǐ lifɔ́, na nána ɛ wɔ́ŋ mǐ mábɛ̂ ti bá shwátí wə á mwǐ ámə́ n sə̌ ɛ́ dím.
Ŋganú ɛ nlɔ́ŋgi ámə́ m gbɛ́
10Nyí lɔ́lí ɛ mín nána nyí yáŋiyǎ bǎn bánán ká nfɔ́. Mi nǎn pɔ̌ŋ nyə́ nána áŋgɛl ɛ́yə́ ɛ́ tátí bɔ́, ɛ́ dí á wusú wú Sáŋ m myə awə̌ a dí á nkímínyə́. 11‘Nyí lɔ́lí ɛ bí nána Mwǎn a Mɔnyuŋ a pilí álí shuŋgɛ́ baʼ ábə́ bá gbɛ́.’ 12Yán nyí míníní nsam mû? Njí mɔ a wɔ́ŋí mílɔ́ŋgi mbúki, ti nlɔ́ŋgi nfɔ́ m gbɛ́, nga á makú mílɔ́ŋgi mûm libu na libu ámǐn áfə́ mí dyání lidyá á wúkul ámǐn álí kə ɛ́ sa nlɔ́ngi nfɔ́ ámə́ m gbɛ́? 13Á mbálɛ, mi nǎn pɔ̌ŋ nyə́ nána njí a dibí mɔ́, á wúkán mɔ́ munyɛŋgɛ jǐta litúm míní mûm libu na libu ámə́ mí gbɛ̌. 14Mulimlim nâ pə́ Sáŋ m nyə awə̌ a dí á nkímínyə́, a sákiyaní nána ká mwǎn ndəm ngə anínán a gbɛ̂.
Mwǎn-n-nyǎ n wə awə̌ a bwəlí wə̂ liwusɛ́
15Njí mwǎn-n-nyǎ n wə a bwəlí wə liwusɛ́, kə̌ ɛ tán mɔ́ áfə́ nyə́ baʼ bábɛ̂ wɔ̂ nyí díní, ɛ pɔ̂ŋ mɔ́ liwusɛ́ lí mɔ tɛyí tɛyí. Njí a yəmbí liwusɛ́ lí mɔ́, ní nyî mɔ́ nyí mə́ ɛ bwə musaŋgu. 16Ndé njí a púshuwǎ nána a bwəlí wə liwusɛ́, nǔŋ mɔʼ ampə́pə̂ tɔ̌ baʼ bábɛ̂ na wə, á ɛ́tútú nána, ‘Liwusɛ́ ká lífɔ́ álə́ ɛ byábíní nána a bwəlí wə lí bíyan á baʼ bábɛ̂ tɔ baʼ bálán’ 17Njí a púshuwǎ ká yə̌ ɛ́yə́ mbúŋ ɛ́yî ɛ́ byábíní, kanán mɔ́ á mwɛmbá. Njí a púshuwǎ álí wúkán ká bɔ́, nǔŋ mɔ́ ngə mɔ awə̌ a dúbɛ̌, tɔ mɔ awə̌ ǎ kú táks.
Yésuwə ǎ bawútú bá mɔ bá wɔ́ŋí ngínya álí kángan na álí bə wúnjan
18Á mbálɛ mi nǎn pɔ̌ŋ nyə́ nána ká njá yǔmə́ ɛ́yə́ nyí fílíní mbéndá á nkínshíyə nâ pə́ ɛ́ bání á nkímínyə́. Ká njá yǔmə́ ɛ́yə́ nyí bə́kíní wunja á nkínshíyə, nâ pə́ wunja wú bəkání á nkímínyə́. 19Nǎn pɔ̌ŋ pə́ nyə́ nána njí nyí kásí yǔm nyə́ baʼ bábɛ̂ ka nyí fílí yɔ́ á makáni átin, Sáŋ m myə awə̌ a dí á nkímínyə́ á bə nyə́ yǔm ɛ́yî 20Áfə́ baʼ bábɛ̂ tɔ baʼ bálán bá búmíní á dǐn lí myə, mi pə́ m bá áwútitîn wú bɔ.”
Ŋganú ɛ mɔ a ndutu n kə̂ŋ awə̌ a sî n laksɛ́ nsún m mɔ
21Á mbís ɛ púndá, Píta a pilí a Yésuwə ti a byábí nána, “A Sáŋgúwə́, njí mwǎn-n-nyǎ m myə a bwəlí mi liwusɛ́ ɛtîtɛ́, bitî bítín n lɔ́líní mɔ́ ɛ laksɛ? Kə́ŋ ti bitî shyǎmbɛ?” 22Yésuwə a pushú mɔ́ nána, “Mi nǎn pɔ̌ŋ nyə́ nána suká bitî shyǎmbɛ, ndé bitî mûm shyǎmbɛ na shyǎmbɛ. 23Áfánikə̌, nânə́ ɛ́ díní á wúdya wú Dyǔ. Janiya lí Dyǔ lí dí ngə kə̂ŋ ɛyə̌ ɛ bəŋí baʼ ábə́ bá bwə ndutu á wásé m mɔ, álí bí nsɔŋgí n ngáʼ ámə́ a bílíní mɔtɛ́ ɛ kaʼ. 24Ngə a butíní ɛ wasí ngáʼ ɛyə̌ a bílíní bɔ́ ɛ kaʼ, bá pánání mɔ nfɔ́ awə̌ kə̂ŋ ɛ bílíní ɛ káʼ libɔ̂ʼ lí ngáʼ. 25Mɔ a ndutu ani a sî n púlá ɛ́ sáwú wúdúm wú mɔ, áfánikə̌, kə̂ŋ ɛni ɛ pɔŋí nána, bá súm mɔ́, mwalân m mɔ, bǎn bá mɔ na lisaŋ lí mɔ lísə́sə̌n, álí bwə nána á tfwa wúdúm bû. 26Mɔ a ndutu ani a tɔ̌ mabɔ́ŋ a kfúndí áshí á makwi má kə̂ŋ ti a yɔ́mbí mɔ́ nána, ‘Bə mî púndá, n tfwa wudúm wú wə wúsə́sə̌n.’ 27Kə̂ŋ ɛni ɛ wúkí mɔ́ likini, ti a laksɛ́ mɔ́ á wúdúm bû, ti a makú mɔ́ nána a kə̂. 28Á púndá ɛyə̌ mɔ ani a nyítíní áwə́ a búmání na nsún m mɔ awə̌ mɔ́ pə́ a bílí ɛ bwə ndutu á wasé ɛ́ kə̂ŋ ɛni. nsún m mɔ ani a n wálí mɔ́ mǎ ngáʼ ɛyə̌ ɛ sî n bwi átin. Yɔ̂ a tɔlíní nsún m mɔ á ntúŋ n ngɔm nána a tfwa wudúm wú mɔ. 29Nsún m mɔ ani a kfúndí áshí á makwi má mɔ ti a yɔ́mbí mɔ́ nána a bə̂ mɔ́ mǎ púndá, mú n sáwú wudúm wú mɔ. 30Ndé a púshuwǎ. Ti a fílí mɔ́ á bibuwa nána kə́ŋ kə́ŋ a sáwú wudúm bû yɔ́ bá fúlní mɔ́ á bibuwa. 31Ngə baʼ bá ndutu bání bá míníní yǔm ɛ́yə́ ɛ́ mə́ ɛ bwəlan bá wúkí pí jǐta, ti bá kí ɛ pɔ̌ŋ kə̂ŋ misam mísə́sə̌n ámə́ mí bwə́lání. 32Áfánikə̌, kə̂ŋ a bəŋí mɔ a ndutu ani, ti a pɔŋí mɔ́ nána, ‘Ɛyə́lí ɛ́ yǔm ngə wə! Mi n laksɛ́ wə wudúm ábə́ n bílíní wə ɛ káʼ a ɛ́tútú nána ɛ yɔ́mbí mi. 33Yə̌ ɛ́ bwə́lí ka ɛ si wú nsún n wə likini ngə mi pə́ n wúkíní wə likini.’ 34Kə̂ŋ ɛni ɛ wúkí pí jǐta, ti a fílí mɔ a ndutu ani á bibuwa, na bá kɔ́ksɛ mɔ́ kə́ŋ ta púndá ɛyə̌ á tfwání wudúm wu mɔ wúsə́sə̌n. 35Ti Yésuwə a mɛsí álí byá nána Nâ Dyǔ Sáŋ n sə awə̌ a dí á nkímínyə́ lí bwəní. Njí ɛ láksɛ̌ mwǎn-n-nyǎ n wə na nlə́m m wə nsə́sə̌n ní Dyǔ lí kɔ́ksɛ́ wə̂ ngə kə̂ŋ ɛni ɛ́ kɔ́ksɛ́ní mɔ ani.”
Currently Selected:
Mátyo 18: bwt
Highlight
Copy
Compare
Share
Want to have your highlights saved across all your devices? Sign up or sign in
