Mátyo 14
14
Liwá lí Jɔnə́ a Dumsɛ
1Á púndá ɛni, Hɛ́rɔdə, janiya lí ɛkumbu ɛ́ Gálilî, a wúkí misam ámə́ Yésuwə a bílíní ɛ bwə. 2Ti Hɛ́rɔdə a byábí á babwəla bá mɔ nána, “Mɔʼ anínán, Yésuwə, a dí Jɔnə́ a dumsɛ awə̌ a mə̌ ɛ́ wá ti a púmu, á ɛ́tútú ɛ́yî yɔ́ a wɔ́ŋíní ngínya álí bwə misam mí mányáká mínán mísə́sə̌n.” 3Hɛ́rɔdə a byábí nâ á ɛ́tútú nána, a n lúm bâʼ álí wálí Jɔnə́, bá tfúlí mɔ́ ti bá fílí mɔ́ á bíbuwa. A bwəlí nâ á ɛ́tútú ɛ́ mwalân m mɔ Hɛrɔ́dyasə awə̌ mǎ nyǎ m mɔ Fílipə a kɔ́sɛ́ní ɛ wə́. 4Hɛ́rɔdə a fílí Jɔnə́ a dumsɛ á bíbuwa á ɛ́tútú nána Jɔnə́ a pɔŋí mɔ́ nána, “Ɛ wɔ́ŋiyǎ wúnja álí wə́ Hɛrɔ́dyasə, mwalân m mǎ nyǎ n wə.” 5Ká ngə Hɛ́rɔdə a m pɛ́pɛ́ní ɛ búlú Jɔnə́, a bílí ɛ báŋ baʼ bá Júda. Baʼ bá Júda bâ n dúbɛ́ nána Jɔnə́ a bílí nlakuwa a mudî a Dyǔ. 6Ndé Hɛ́rɔdə a timbí ɛ búlú Jɔnə́. Ɛ́yî ɛ́ bwə́lání á bǔn ábə́ Hɛ́rɔdə a kákíní ŋgandu álí kani bǔn ábə́ bá yɛ́ní mɔ́. Á bǔn bû, mwǎn a mwalân mú Hɛrɔ́dyasə ǎ n sáʼ mísáki á wúsú wú baʼ básə́sə̌n. Ɛ́yî ɛ́ bwə́lí Hɛ́rɔdə a wúkí munyɛŋgɛ jǐta. 7Yɔ́ a fílíní mɔ́ likaʼ. A byábí nána, “Nǎn mwá nguʼ nána, m bə wə̂ ká njá yúmə́ ɛ sákání mi.” 8Á maléyá má nyǎ m mɔ, á pɔŋí Hɛ́rɔdə nána, “Bə mî áfán sɔsɔnǎn nlú mú Jɔnə́ a dumsɛ á pán ɛ lákákâ.” 9Ɛ́yî ɛ́ bwə́lí kə̂ŋ Hɛ́rɔdə álí wɔ́ŋ ndutu á nlə́m, ndé ngə a n məní ɛ mwá nguʼ á wusú wú bakən bá mɔ, a m bə̌ wúnja nána bá pánán nlú mú Jɔnə́, álí bə̌ mwǎn a mwalân ani. 10Áfánikə̌, Hɛ́rɔdə a lúmí baʼ á bíbuwa átin álí shə́ nlú mú Jɔnə́. 11Bá pánání nlú mú Jɔnə́ á taplêtə, bá bə́kí mɔ́ á mwǎn a mwalân ani, ti mɔ́ pə́ a bəkí á nyǎ m mɔ. 12Á mbís ɛ púndá bawútú bá Jɔnə́ bá pílí, bá kí á bíbuwa, bá núŋí mbimba m mɔ, bá kí mɔ́ ɛ wushi, ti bá kí ɛ pɔŋ Yésuwə yə̌ ɛ́yə́ ɛ́ bwə́lání.
Yésuwə a dísí limuti
13Á púndá ɛyə̌ Yésuwə a wúkíní yə̌ ɛ́yə́ ɛ́ bwə́lání Jɔnə́ a dumsɛ, a kwilí á bwálu átin ti a kǐ á fǔm ábə́ a bílíní mɔ́mə̌n nfɔ́. Ngə baʼ bá wúkíní nána Yésuwə a kwilí á bwálu, bá mákú mikí mí bɔ́, bá pɔ́ŋí mɔ́ á mbís na makwi. 14Ngə Yésuwə a nyítíní á bwálu átin, á míní limuti línə̂n, nlə́m m mɔ́ n lwínjí na likini á bɔ́, ti a pwisí ábə́ bâ ŋ wɔ́ŋ banyambɛ̂. 15Ngə bǔn bú bútíní ɛ fín, bawútú bá mɔ́ bá pílí á mɔ́ bá byábí nána, “Bǔn bú mə́ ɛ kə jǐta, fǔm bú nán bú wátaniyǎ nkí, lúm bɔ́ bá kə̂ á míkí ámə́ mí wútání fán, álí bwə nána bá kə̂ ɛ yǎn yǔm ɛ́ lídyá.” 16Yésuwə a pushú bɔ́ nána, “Bá wɔ́ŋiyǎ álí kə, nyə́mə̌n nyí bə̂ bɔ́ yǔm ɛ́ lídyá” 17Bawútú bá mɔ bá tímbí mɔ́ nána, “Sí wɔ́ŋí mibúŋgá mí blɛ̂t mítân na shwî ɛ́bɛ̂ yɔ́ ná yɔ́ áfán.” 18Yésuwə a byábí nána, “Nyí pánan yɔ́ áfánán.” 19Ngə bawútú bá pánání yɔ́, Yésuwə a pɔŋí limuti lî nána bá shúman áshí á bíshum, ti a nuŋí mibúŋgá mí blɛ̂t mítân mî, na midim mí shwî míbɛ̂ mî, a tátí ámǐn, a bəkí masákan á Dyǔ, a kabí yɔ́, ti a bəkí á bawútú nána bá kâʼ bɔ́ á limuti lî. 20Bɔ́ baʼ básə́sə̌n bá dílí, bá kúʼ. Ti bawútú bá shwínjí bidfúŋ dyǔm na bíbɛ̂ bí blɛ̂t na shwî ámə́ mî m bukɛ. 21Nsɔŋgí m bâʼ ábə́ bá dílí lidyá lî, m bílí ká bikúlí bítân. Nsɔŋgí m bâʼ ábə́ bá dílí bá bílí bumân bikúlí bítân bɔ́ na bɔ́, bá sî ŋ lâŋ balân na bǎn.
Yésuwə a kǐ á madí ámǐn na makwi
22Á mbís ɛ púndá Yésuwə a pɔŋí bawútú bá mɔ nána bá kwíli á bwálu átin, bá kə̂ á wúsú á pɛsi ɛ mbô ɛnínání, ndé a pɔŋí limuti lî nána bá shwíya á mándáʼ má bɔ. 23Á púndá ɛyə̌ a malíní, a pulú á wúkul ámǐn álí káni. Á púndá ɛyə̌ ɛfínjan ɛ́ pílíní, Yésuwə a bílí áwə́ mɔ́mə̌n nfɔ́. 24Á púndá ɛni, bawútú bá Yésuwə bá bílí kfwáŋ á bwálu átin, á mbô átin. Bwálu bû wú bílí ɛ laman, bá puliyǎ ɛ́ kə á wusú á ɛ́tútú nána ɛkful ɛ́nə̂n ɛ́ bílí bɔ́ ɛ fí á wúsú.
25Mǎ mushú pilílí, Yésuwə a kǐ na makwi á madí ámǐn álí paʼ bɔ́ ɛtán. 26Ngə bá míníní mɔ́ ǎ kə á madí ámǐn, bá bílí ɛ sáʼ, bá búna na bɔ̌ŋ bú nə̂n. Ti bá byábá nána, “Ɛdúmú yɔ́ yín.” 27Á mulimlim m púndá Yésuwə a byábí á bɔ́ nána, “Milə́m mí si kfwəlí nyə́ á líbum, miyə́ n dí. Nyí si báŋ.” 28Ti Píta a pɔŋí mɔ́ nána, “Sáŋgúwə́, á mbálɛ njí wə, pɔ̌ŋ mî álí kə á madí ámǐn, álí paʼ áfə́ ɛ díní.” 29Yésuwə a pɔŋí mɔ́ nána, “Pǎʼ.” Áfánikə̌, Píta a nyítí á bwálu átin a bútí ɛ́ kə á mádí ámǐn álí kə ɛ́ tán Yésuwə. 30Ndé ngə a míníní ɛkful ɛ́ ngínya, bɔŋ wú kúwí mɔ́ ti a butí ɛ kwilí á madí átin. Ti a búní nána “Sáŋgúwə́, shuŋgɛ́ mî.” 31Mulimlim m púndá Yésuwə a sámbí ɛkɛ́ ɛ́ mɔ ti a wálí mɔ́ ti a byábí nána “Yán dúbɛ lí wə lí kɔ́ŋíní nán, yə̌ ɛ́ bwə́lí ká nlə́m m nkfwəlá wə̂ á líbum?” 32Ngə Yésuwə bû Píta bá kwílíní á bwálu átin, ɛkful ɛ́ túmbí. 33Ngə ɛ́yî ɛ́ bwə́lání, bawútú bání ábə́ bá bílí á bwálu átin bá bə́kí Yésuwə ɛdúbɛ́, ti bá byábí nána, “Na mbálɛ wə ɛ dí Mwǎn a Dyǔ.” 34Ngə Yésuwə na bawútú bá mɔ bá túmbíní mbô ámǐn, bá pílí á pɛsi ɛ mbú ɛ Gɛnɛ́sárɛtə. 35Á púndá ɛyə̌ baʼ ábə́ bá bílí á fǔm bû, bá yə́mbíní Yésuwə, bá lúmí baʼ álí panán baʼ básə́sə̌n na mikfulu á pɛsi ɛ ɛkumbu ɛ́yî. 36Baʼ ábə́ bá pánání baʼ na mikfulu á Yésuwə, bá yɔ́mbí mɔ́ nána, a máku baʼ na mikfulu bá nyɔ́ti ká nlú mú líbaʼ lí mɔ. Áfánikə̌, baʼ básə́sə̌n na mikfulu ábə́ bá nyɔ́tí nlú mú líbaʼ lí mɔ bá pwí.
Currently Selected:
Mátyo 14: bwt
Highlight
Copy
Compare
Share
Want to have your highlights saved across all your devices? Sign up or sign in
