Jɔnə́ 13
13
Yésuwə a wǔ makwi má bawútú bá mɔ
1Ɛ m búkɛ́ bǔn bufɔ́ byáná Ŋgandu ɛ Litúm Ámǐn. Yésuwə a m bí nána púndá ɛ́ mɔ ɛ mə̌ ɛ paʼ ɛ́yə́ a lɔlíní ɛ makú nkínshíyə álí kə á Sáŋ m mɔ. A n nə̌ŋ baʼ bá nkínshíyə ábə́ bâ n dúbɛ́ mɔ́, ti a lúfú ɛniŋgán ɛ́yî kə́ŋ ta á shúʼ.
2Yésuwə na bawútú bá mɔ bá bílí ɛ dyá lídyá li nkwin. Dɛ́vəl ɛ̂ m mə̌ ɛ́ fá likani lí bî á Júdasə Ískáriyɔtə álí súm Yésuwə. Júdasə Ískáriyɔtə a bílí mwǎn mú Sáyímɔnə. 3Yésuwə a m bí nána, Sáŋ m mɔ a m mə̌ ɛ́ bə misam mísə́sə̌n á makɛ́ má mɔ. A m bí pə́ nána a n fí á Dyǔ, ǎ tǐm pə́ á Dyǔ, 4Áfánikə̌, ngə bá bílíní ɛ dyá lídyá nâ, Yésuwə a falú áshí, a fúlí kúti á nyǔ ti a tfúlí táwili á ɛ́búsá ɛ́ mɔ. 5Ti a fílí madí á ɛkfu, ti a butí ɛ wú makwi má bawútú bá mɔ, ti a tushú mɔ́ na táwili ɛyə̌ a tfúlíní á ɛ́búsá ɛ́ mɔ. 6Ngə a pilíní á Sáyímɔnə Píta, Píta a kɔ́ndɛ́ Yésuwə nána, “Sáŋgúwə́, wə ɛ̌ sǎ wǔ mákwi má myə?” 7Yésuwə a pushú mɔ́ nána, “Ɛ tíŋganiyǎ ɛ́ sɔ́ntan yə̌ ɛ́yə́ nán bwəní sɔnsɔ́nǎn, ndé á mbís ɛ misam mínán mísə́sə̌n yɔ̂ ɛ́ sɔ́ntání.” 8Píta a byábí á mɔ́ nána, “Ǎ yě, tǒm ɛ sî wúwá mî makwi.” Yésuwə a pushú mɔ́ nána, “Njí m wúwǎ wə̌ makwi, wə ɛ wɔ́ŋiyǎ ká yǔm álí bwə na mi.” 9Sáyímɔnə Píta a byábí á mɔ́ nána, “Sáŋgúwə́ áfâkə̌ ɛ si wu wɔ̂ mákwi má myə, ndé wu pə́ makɛ́ na nlú m myə!” 10Yésuwə a byábí á mɔ́ nána, “Mɔʼ awə̌ a mə̌ ɛ wɔ́ mádí, nyǔ ɛ́ mɔ ɛsə́sə̌n ɛ mə̌ ɛ sáŋ, a lɔ́liyǎ pə́ ɛ wɔ́ ɛ́sitúm li wǔ mákwi. Nyí mə́ ɛ sáŋ, ndé suká nyə́ mɔsə́sə̌n nyí sáŋí.” 11Yésuwə a n mə̌ ɛ bí mɔʼ awə̌ á naŋ mɔ́. Yɔ́ ɛ́ bwəlí mɔ́ a byábí nána suká nyə́ baʼ básə́sə̌n nyí sáŋí.
12Púndá ɛyə̌ a málíní álí wu mákwi má bɔ, a n fá pə́ kúti ɛ́ mɔ, ti a timbí pə́ á ɛ́buŋ ɛ́ mɔ. A kɔndɛ́ bawútú bá mɔ nána, “Nyí sɔ́ntání yúm ɛ́yə́ n məní nyə́ ɛ bwə?” 13Nyí bə̌ŋ mî “‘Mulɛ̂’ na nyí bə̌ŋ mî ‘Sáŋgúwə́,’ nyí tɛ́ŋgɛ́ní, á ɛ́tútú nána nâ n díní. 14Áfánikə̌, njí mi awə̌ n dí Sáŋgúwə́ n nyə na m bá pə́ Mulɛ̂ n nyə, n wǔ makwi má nyə, nyə́ pə́ nyí lɔ́lí ɛ wǔ makwi má mɔʼ na mɔtɛ́. 15M mə́ nyə́ ɛ lúfú ɛyəmblan á yə̌ ɛ́yə́ nyí lɔ́líní ɛ láŋgan, álí bwə nána, nyə́ pə́ nyí bwə ngə mi m bwəlíní nyə́. 16Á mbálɛ, mi nǎn pɔ̌ŋ nyə́, mbwəlâ a túmbíyǎ sísə́ m mɔ, tɔ̌ awə̌ bá lúmíní a tumbiyǎ mɔʼ awə̌ a lúmí mɔ́. 17Ngə nyí bíní misam mín, wunam wú bá na nyə́ njí nyí bwə́lí mɔ́.
18N sə̌ ɛ́ byá tɛ́ŋgɛnɛ nyə́ baʼ básə́sə̌n, m bí baʼ ábə́ m pwɛsíní. Ndé bilaya ábə́ bí tílání á kâti ɛ Dyǔ bí lɔ́lí ɛ lwínjan. Ɛ́ tílání nána ‘Mɔʼ awə̌ sî mɔ́ sí dyá lidyá, a shiyǎ pə́ na mi.’ 19Sɔnsɔ́nǎn nǎn pɔ̌ŋ nyə́ byáná ɛ́ bwəlan̂ álí bwə nána njí ɛ́ bwə́lání, nyí dúbɛ́ nána, ‘Mi N dí Ani Awə̌ bá Wɔ́kílíní.’ 20Á mbálɛ, nǎn pɔ̌ŋ nyə́ nána, ká njá mɔ́lə́ awə̌ a kwisí mɔʼ awə̌ n lúmíní, a kwisí mi. Na ká njá mɔ́lə́ awə̌ a kwisí mi ní a kwisí ani awə̌ a lúmí mî.”
Yésuwə a byábí byáná púndá ɛ́ paʼ nána bá naŋ mɔ́
21Ngə Yésuwə a n məní ɛ byá misam mínán mísə́sə̌n, ti a panjí á bawútú bá mɔ nána, “Á mbálɛ nǎn pɔ̌ŋ nyə́ nána, mɔʼ nfɔ́ á nyə́ ǎ naŋ mî.” 22Bawútú bá mɔ bá tátíyá bɔ́mə̌n á ɛ́tútú nána bá sî m bí mɔʼ awə̌ a bílíní ɛ byá. 23Muwútú m mɔ nfɔ́ awə̌ Yésuwə a nəŋní, a shumání bɛbɛ na Yésuwə á nsaŋ m mɔ. 24Áfánikə̌, Sáyímɔnə Píta a búkí muwútú mû mǐ, “Kɔ́ndɛ́ mɔ́ mɔʼ awə̌ ǎ byání.” 25Ti muwútú ani a makí nyǔ á nsaŋ n Yésuwə ti a kɔ́ndɛ́ mɔ́ nána, “A Sáŋgúwə́, njá ɛ̌ byání?” 26Yésuwə a pushú mɔ́ nána, “Mɔʼ awə̌ n juní blɛ̂t bí myə á pán átin ti m bəkí mɔ́, mɔ́ a dí mɔʼ ani.” Yɔ́ a núŋíní blɛ̂t a jú á pán átin, a bə́kí Júdasə Ískáriyɔtə, mwǎn mú Sáyímɔnə. 27Á mulimlim m púndá mû ngə Júdasə a nuŋíní blɛ̂t bî, sátan ɛ kwilí mɔ́ átin. Yésuwə a byábí á mɔ́ nána, “Yǔm ɛ́yə́ wə ɛ̌ saʼní ɛ bwə, bwə yɔ́ shám shám.” 28Ndé mɔʼ ká nfɔ́ á wə́ áfə́ bɔ́ na mɔ́ bá bílíní ɛ dyá lídyá á tíbili a sî n sɔ́ntán yə̌ ɛ́yə́ ɛ́ n bwə ka Yésuwə a pɔ́ŋ Júdasə nâ. 29Ngə ɛ́ bílíní nána Júdasə mɔ́ a bílí ɛ́ kɔŋgɔ ɛ́kpa ɛ́ ngáʼ, duŋgu lí bawútú lí n kaní nána Yésuwə a pɔŋí mɔ́ nána a kə̂ a yán byə̌m ábə́ bí saki á ŋgandu, tɔ yǔm ɛ́ lí bə baʼ bá líban. 30Mulimlim m púndá ámə́ Júdasə a nuŋíní blɛ̂t ábə́ Yésuwə a bə́kíní mɔ́, a nyítí á ɛ́bú. Ɛfínjan ɛ́ pílí.
Yésuwə a bəkí mbéndá ɛ kɔ́nə́
31Púndá ɛ́yə́ Júdasə a n mə́ní ɛ kə á ɛ́bú, Yésuwə a byábí nána, “Sɔnsɔ́nǎn wulɔʼ wú Mwǎn a Mɔ̌nyuŋ wú míndi. Wulɔʼ wú Sáŋ pə́ wú míndi á ɛ́tútú ɛ́ Mwǎn. 32Njí Dyǔ lí kwísí wulɔʼ á ɛ́tútú ɛ́ Mwǎn, ní Dyǔ lɔ́mə̌n pə́ lí bwə̌ wulɔʼ wú Mwǎn m mɔ wú míndi. Á bwə lɔ́ áfâ áshí áshí. 33Bǎn-bá-nyǎ bá myə, púndá ɛ́ myə álí bá na nyə́ ɛ dí ɛ shúŋ. Nyí sa mî, ndé ngə m pɔŋíní baʼ bá Júda, mulimlim m pɔŋní pə́ nyə́ sɔnsɔ́nǎn nána, ‘Fǔm ábə́ n kəní, nyí sî púlá ɛ́ paʼ á wə́.’ 34Sɔnsɔ́nǎn m bə nyə́ mbéndá ɛ kɔ́nə́, nyí nə̂ŋ nyə́ na nyə́. Ngə n nə́ŋí nyə́, nyə́ pə́ nyí nə̂ŋ nyə́ na nyə́. 35Njí nyí nə́ŋí nyə́ na nyə́ ní mɔtɛ́ á bí nána nyí dí bawútú bá myə.”
Yésuwə a byábí ngə Píta á báŋ mɔ́
36Sáyímɔnə Píta a kɔ́ndə́ Yésuwə nána, A Sáŋgúwə́, áfə́ wə ɛ̌ kəní? Yésuwə a pushú mɔ́ nána, “Fǔm ábə́ mi nan kəní, wə ɛ tíŋganiyǎ ɛ pɔ̌ŋ mî á mbǐ, ndé á mbís ɛ púndá wə ɛ́ pɔ̌ŋ mî á mbǐ.” 37Píta a kɔndɛ́ mɔ́ nána, “A Sáŋgúwə́ yán kə́ n tíŋganiyaní wə ɛ pɔ̌ŋ á mbǐ sɔnsɔ́nǎn? Mi m bunsání álí wá á nlú ɛ́ wə.” 38Ti Yésuwə a pushú mɔ́ nána, “Wə ɛ bunsání na mbálɛ álí wá á nlú m myə? Á mbálɛ mi nǎn pɔ̌ŋ wə̂, byáná njúm á kfú á kɔ́n, wə ɛ̌ báŋ mî bitî bílán.”
Currently Selected:
Jɔnə́ 13: bwt
Highlight
Copy
Compare
Share
Want to have your highlights saved across all your devices? Sign up or sign in
