Jɔnə́ 11
11
Liwá lí Lázárɔsə
1Mɔʼ nfɔ́ a bílí awə̌ bá bə́ŋákíní bá Lázárɔsə, a bílí ɛ kfulu. Lázárɔsə na bǎn-bá-nyǎ bá mɔ bá balân, Meríyə́ na Matá bá bílí ɛ dyɛ á nkí m Bɛ́táni. 2Meríyə́ anínán awə̌ mǎ-n-nyǎ m mɔ Lázárɔsə a bílí ɛ kfulu, mɔ́ a ŋ kfú ɛlɔ́kɔ́ ɛ́ lábínda mákwi má Yésuwə na ti a fyákú mɔ́ na nyuŋ ɛ́ mɔ. 3Áfánikə̌ bǎn-bá-nyǎ bá mɔ bá balân, Meríyə́ na Matá bá lúmí ndúm á Yésuwə nána, “A Sáŋgúwə́, nsún n wə a nlə́m ǎ kfulu.” 4Ngə Yésuwə a wúkíní nâ, a byábí nána, “Nyambɛ̂ anínán a sî púlá mɔ́ ɛ búlu. Ɛ́yínán ɛ́ bwə́lání álí bə Dyǔ wulɔʼ, álí bwə̌ nána Mwǎn a Dyǔ a kwísi ɛdúbɛ́.” 5Yésuwə a n nə̌ŋ Matá, bû mǎ-n-nyǎ, Meríyə ná Lázárɔsə. 6Ndé ngə a kwisíní ndúm nána Lázárɔsə ǎ kfulu, a dyɛ̌ wə̌ áfə́ a bílíní madû mábɛ̂. 7Ti a byábí á bawútú bá mɔ nána, “Sí tǐm mbǐs á Judéya.” 8Bawútú bá mɔ bá pɔŋí mɔ́ nána, “Á Mulɛ̂, suká á fâ baʼ bâ n pɛ́pɛ́ní wə ɛ búlu na malɛ́ bǔn búní, ɛ́ bá wə́ pə́ álí kə á wə́?” 9Yésuwə a pushú bɔ́ nána, “Ɛ́ shiyǎ mbálɛ nána lisínj lí bwín lí wɔ́ŋí háwa dyǔm na ɛ́bɛ̂? Áfánikə̌, mɔʼ awə̌ ǎ kə lisín lí bwín a sə̌ kfún á ɛ́tútú nána, bá dí na ani awə̌ á dí mwɛnɛ n nkínshíyə. 10Ndé njí bá kə wudû bá kfún á ɛ́tútú nána mwíli n shiyǎ.” 11Ngə Yésuwə a mə́ní ɛ byá nâ, a byábí pə́ nána, “Nsún n sə Lázárɔsə ǎ nalí wuyɔ́, ndé n kə mɔ́ ɛ wumi.” 12Bawútú bá pɔ́ŋí mɔ́ nána, “A Sáŋgúwə́ njí ǎ nali wuyɔ́ ní á pwi.” 13Yésuwə a bílí ɛ byá nâ á ɛ́tútú nána a m bí nána Lázárɔsə á mə́ ɛ wá, ndé bawútú bá mɔ bá bílí ɛ kani nána mɔ́ ǎ byá nána ǎ nali wɔ̂. 14Áfánikə̌, Yésuwə a panjílí bwǎm bwǎm nána, “Lázárɔsə a wúlí, 15ndé á ɛ́tútú ɛ nyə́, ŋ wúkí munyɛŋgɛ nána m bíliyǎ á wə́ álí bwə nána nyí dúbɛ. Sí kə̌ á wə́ sɔnsɔ́nǎn.” 16Tɔ́masə (awə̌ bá bílíní ɛ bəŋ, bá lifɛ̂) a byábí á bawútú bání nána, “Sə́ pə́ sí kə̌ á wə́ álí bwə nána njí liwá sí wá na mulɛ̂.”
Yésuwə mɔ́ a dí lipumu na luŋgɛ́
17Á púndá ɛyə̌ Yésuwə na bawútú bá mɔ bá pílíní á Bɛ́táni, a tání ngə bâ m məní ɛ wushí Lázárɔsə. Á púndá ɛni, mbimba m mɔ m mə̌ bá á ndim madû mánîn. 18Lifalu á Bɛ́táni álí paʼ á Jerúsálɛmə ɛ́ bílí ngə máyilə mábɛ̂. 19Baʼ bá Júda jǐta bá pílí ɛ dyɛ bikuwá na Matá na Meríyə́ á ɛ́tútú ɛ́ liwá lí mǎ nyǎ m bɔ. 20Ngə Matá a wúkíní nána Yésuwə ǎ paʼ, a kǐ álí tán mɔ́, ndé Meríyə́ a bukɛ́ní á ndáʼ. 21Ti Matá a byábí á Yésuwə nána, “A Sáŋgúwə́ njí wə ɛ m bá á fánán, ní mǎ nyǎ m myə a wúliyǎ. 22Ndé kánâwə̌ m bí nána, Dyǔ lí bə wə̂ ká njá yǔmə́ ɛ kɔndɛ́ní mɔ́.” 23Yésuwə a pɔŋí Matá nána, “Mǎ nyǎ ŋ wə á bá pə́ á luŋgɛ́.” 24Matá a timbí Yésuwə nána, m bí nána á pumu á púndá ɛ lipumu á bǔn bú shúkan. 25Yésuwə a byábí á Matá nána, “Mi n dí li pumu na lungɛ́. Ká njá awə̌ a dúbɛ́ mî ká a wúlí á bá wə̂ á lúŋgɛ́. 26Ká njá awə̌ a dí lungɛ́ ka a dúbɛ́ á mî, a sî wá tǒm. Ɛdúbɛ́ nâni?” 27Matá a pushú nána, “Iŋ, a Sáŋgúwə́, n dúbɛ́ nána wə ɛ dí Ani-Awə̌-bá-Wɔ́kílíní, Mwǎn a Dyǔ, awə̌ Dyǔ lí byábíní nána á paʼ á nkínshíyə.”
Yésuwə a jǐ
28Ngə Matá a məní ɛ byá nâni, a timbí mbǐ a bə̂ŋ mǎ-n-nyǎ m mɔ Meríyə́ á kfun átin. Ti a pɔŋí mɔ́ nána, “Mulɛ̂ a dí fán, ǎ kɔndɛ́ áfə́ wə ɛ díní.” 29Ngə Meríyə́ a wúkíní nâ, a tyə́bí ámín ti a kǐ shám shám álí tán Yésuwə. 30Yésuwə a bílí wə̌ áfə́ Matá a táníní mɔ́, a sî m mə̌ ɛ paʼ álí kwili á nkí átin. 31Baʼ ábə́ bá bílí á ndáʼ ná Meríyə́ álí pyɛtí mɔ́ nlə́m á libum, bá pɔ́ŋí Meríyə́ á mbí ngə bá míníní mɔ́ a nyítíní na mifíli. Bá bílí ɛ kaní nána a bílí ɛ kə á ndim álí ji.
32Á púndá ɛyə̌ Meríyə́ á pílíní áfə́ Yésuwə a bílíní, ngə a míníní mɔ́, a kfúndí á makwi má Yésuwə, ti a byábí á mɔ́ nána, “Sáŋgúwə́, njí wə ɛ m mbá áfánán ní mǎ nyǎ m myə a wúliyǎ.” 33Yésuwə a míní ngə ǎ jíní, a míní pə́ ngə baʼ ábə́ bá bílí na mɔ́ bá jíní, nlə́m m mɔ n lwínjí na likini. Nlə́m m mɔ lwínjí na mutaka. 34Ti a kɔndɛ́ bɔ́ nána, “Áfə́ nyí dímíní mɔ́?” Bá pushú mɔ́ nána, “Sáŋgúwə́ pǎʼ ɛ mín.” 35Yésuwə a jǐ. 36Ti baʼ ábə́ bá bílí áwə́ bá byábí nána, nyí míniyǎ ngə a n nəŋní mɔ́ na mbálɛ? 37Ndé duŋgu lí baʼ bá byábí nána, “Nga ǎ bwə baʼ ábə́ mǐ má dímíní bɔ́ álí mín pə́, yán a bwə́liyǎní nána Lázárɔsə a si wá?”
Yésuwə a pumú Lázárɔsə
38Likini lî n lwínj pə́ Yésuwə á nlə́m. Ti a kǐ á ndim áfə́ bá dímíní Lázárɔsə. Ndim m mû m bílí ndim ámə́ bá shɛ́líní á lilɛ́ átin ti bá kfútí nsu m mɔ na lilɛ́. Yésuwə a pɔŋí baʼ ábə́ bá bílí á wə́ nána, 39“Fúláni lilɛ́ lî.” Ti Matá, mǎ-n-nyǎ m mɔʼ awə̌ a wúlí a byá nána, “Sáŋgúwə́, mbimba m mû m mə́ ɛ butí ɛ́ jum sɔnsɔ́nǎn, á ɛ́tútú nána mbimba m mû m mə̌ ɛ́ bá á ndim sɔnsɔ́nǎn madû mánîn.” 40Yɔ̂ Yésuwə a byábíní á Matá nána, “Nga m pɔŋí wə nána wə̌ti ɛ dúbɛ́, ɛ́ mín wulɔʼ wú Dyǔ?” 41Bá fúlí lilɛ́ lî, Yésuwə a mindí ámǐn ti a byábí nána, “Sáŋ nǎn sakán wə̂, nána ɛ̌ wú makáni má myə. 42M bí nána ɛ̌ wú makáni má myə ɛtîtɛ́, ndé nǎn byá nána baʼ ábə́ bá dí áfánán bá dúbɛ nána wə̌ ɛ lúmí mi.” 43Yésuwə a malíní álí byá nâ ti a pusi ngɔli ɛ́ mɔ ámǐn ti a bəŋíní Lázárɔsə nána, “Á Lázárɔsə, nyítá á wû!” 44Ti mɔʼ ani awə̌ a m mə̌ ɛ́ wá a nyít á wû. Ti mbɔ́m ɛyə̌ bá pílání makwi na makɛ́ na bɔ́kili ɛyə̌ bá tfúlíní wusú wú mɔ bí bílí wə̌ á nyǔ ɛ́ mɔ. Yésuwə a pɔŋí bɔ́ nána, “Nyí káku mɔ́ byə̌m bí á nyǔ, nyí máku mɔ́ a kə̂”
Bá lɛ́mbí Yésuwə
45Baʼ bá Júda jǐta ábə́ bá pílí ɛ́ dyɛ bikuwá na Meríyə́ bá míní yə̌ ɛ́yə́ Yésuwə a bwəlíní, ti bá n dúbɛ́ mɔ́. 46Ndé duŋgu lí bâʼ bá kǐ ɛ tán Bafárisî, ti bá pɔ́ŋí bɔ́ misam ámə́ Yésuwə a bwəlíní. 47Yɔ̂ Bafárisî na prísə a n nə̂n bá bə́ŋíní ngvwa. Bá byábí nána, “Yə̌ sí bwəní sɔnsɔ́nǎn? Sí lɔlí ɛ bwə nsam á ɛ́tútú nána mɔʼ anín ǎ bwə misam mí manyáká jǐta! 48Njí sí mákú mɔ́ nána a búti ɛ kanán misam ámínán mísə́sə̌n á wúsú, ní baʼ básə́sə̌n bá dúbɛ́ mɔ́. Njí baʼ básə́sə̌n bá dúbɛ́ mɔ́, ní baʼ bá Rómə bá paʼ bá kúwán sə́ Tɛ́mpɛl ɛ́ sə ti bá kúwání sə́ ɛkumbu ɛ́ sə.” 49Mɔʼ nfɔ́ a ndíŋgí m bɔ awə̌ bá bílí mɔ́ ɛ bə̂ŋ bá Káyífasə, awə̌ a bílí prísə a n nə̂n a nə̂n á mbú ɛni, a byábí nána, “Nyí bíyǎ ká yǔm. 50Nyí yə́mbiyǎ nána ɛ́ lɔ́lí nána mɔʼ nfɔ́ a wá á mílú mí baʼ básə́sə̌n na nána ɛkumbu ɛ́sə́sə̌n ɛ́ nyúwɛ?” 51Ká ngə a bílíní ɛ byá nâ, a bíliyǎ ɛ́ byá ná nlə́m m mɔ. Ngə a bílíní prísə a n nə̂n a n nə̂n á mbǔ ɛni, a bílí ɛ byá yə̌ ɛ́yə́ ɛ́ bwəlan á púndá ɛyə̌ ɛ̌ kə ɛ́ paʼ na Yésuwə á wá a milú mí baʼ bá Júda. 52Suká wɔ̂ álí wá á milú mí baʼ bá Júda, ndé na álí laʼ baʼ bá Dyǔ básə́sə̌n á libú lifɔ́ ábə́ bá mə̌ ɛ páŋi álí bwə na bá bá mɔʼ nfɔ́.
53Butya bǔn bû, bajaniya bá Júda bá bútí álí wíkí mwanu álí búlú Yésuwə. 54Áfánikə̌, Yésuwə a bíliyǎ pə́ ɛ nyí átítin a baʼ bá Júda Mɔ́ na bawútú bá mɔ bá nyítí bá kə́ á nkí ámə́ bá bəŋní na Éfremə, ti bá dyɛ́ á wə́. Fǔm bû wú bílí li wútán ɛ́sínj. 55Púndá ɛ ŋgandu ɛ Litúm Ámǐn ɛ m mə̌ ɛ́ wútan. Áfánikə̌, baʼ básə́sə̌n bá fí á mikí na mikí jǐta, bá kǐ ámǐn á Jerúsálɛmə, álí wǔ nyǔ ɛ bɔ ngə Mbéndá ɛ́ Mósisə ɛ byábíní, álí bunsan nyǔ ɛ́ bɔ byáná ŋgandu ɛ Litúm á Mǐn ɛ́ paʼ. 56Baʼ bá Júda bâ bá bílí wə̂ álí sa Yésuwə. Ngə bá shwínjání á Tɛ́mpɛl, bá bílí ɛ kɔndɛ́ bɔ́mə̌n, nána, “Yán nyí kaníní? Nyí kaní nána á paʼ á ŋgandu?” 57Baprîsə bá nə̂n na Bafárisî bâ m mə̌ ɛ bə ndaki nána ká njá awə̌ a bí áfə́ Yésuwə a díní, a paʼ a pɔŋ bɔ́ álí bwə nána bá paʼ bá kú mɔ́.
Currently Selected:
Jɔnə́ 11: bwt
Highlight
Copy
Compare
Share
Want to have your highlights saved across all your devices? Sign up or sign in
