Jɔnə́ 10
10
Ŋganú tɛ́ŋgɛnɛ ntátyá-a-mílɔŋgi na mílɔŋgi mí mɔ
1Yésuwə a byábí nána, “Á mbálɛ nǎn pɔ̌ŋ nyə́ nána ká njá awə̌ a kwíliyǎ á ɛkuʼ ɛ́ ndáʼ ɛ́ Dyǔ, ndé a pulú wɔ̂ á pɛsi ɛpə́pə̂, a dí njíb na mbúluwa a baʼ. 2Mɔʼ awə̌ ǎ kwilí á ɛkuʼ ɛ́ ndáʼ ɛ milɔŋgi, a dí ntátya-a-mílɔŋgi. 3Mɔʼ awə̌ ǎ tátí ndáʼ ɛ milɔŋgi, ǎ dfu mɔ́ ɛkuʼ ɛ́ ndáʼ ɛ mílɔŋgi. Á bə̌ŋ mílɔŋgi mí mɔ á mǐn má bɔ, ka a nyítán mɔ́. 4Wɛ̌ti a mə́ ɛ nyít na bɔ́, ǎ túm á wusú, mí pɔŋá mɔ́ á mbís á ɛ́tútú nána bá bí ŋgɔli ɛ́ mɔ. 5Ndé milɔŋgi mî mí sə̌ ɛ́ pɔ̌ŋ nkən a mɔʼ á mbǐ. Bá báŋ mɔ́ á nyǔ á ɛ́tútú nána bá yə́mbiyǎ ŋgɔli ɛ mɔ.” 6Yésuwə a pɔŋí bɔ́ ŋganú ɛni, ndé bá sɔ́ntaniyǎ.
Yésuwə a mɔ́ mú n dí Ntátyǎ-a mílɔŋgi a mbâ
7Áfánikə̌, Yésuwə a byábí pə́ nána, “Á mbálɛ nǎn pɔ̌ŋ nyə́ nána, mi n dí ɛkuʼ ɛ́yə́ mílɔŋgi mí túmní. 8Byáná nǎn paʼ, baʼ básə́sə̌n ábə́ bǎ m mə̌ ɛ́ kɔ́sɛ́ ɛ́ paʼ bá bílí bajíb na babúluwa-ba-bâ ndé mílɔŋgi mí yə́mbiyǎ bɔ́. 9Mi n dí ɛkuʼ. Ká njá mɔ́lə́ awə̌ a túmbí á mi, á kwisí lishuŋgɛ. Á kwili, a nyít pə́ ɛ́yə́ ká mɔ̂ʼ a tákiyaní mɔ́. Á kwisi ká yə̌ ɛ́yə́ a sakíní 10Njíb a pilí wə̂ álí jíb, álí búlú na álí fɛnj. Mi mə́ ɛ paʼ nána nyí kwísi luŋgɛ́ álə́ lí lwínjí litúm limɛnɛ. 11Mi n dí ntátya-mílɔŋgi a mbâ. Ntatya-mílɔŋgi a dí mbunsan álí wá á mílú mí mílɔŋgi mí mɔ. 12Mɔʼ awə̌ bá núŋíní wɔ̂ á ɛ́bulú, awə̌ mɔ́mə̌n a shiyǎ ntátya-a-mílɔŋgi, ti mílɔŋgi mî mí shiyǎ mí mɔ, njí a mínní ngə ngvwɛʼ ɛ̌ paní, ǎ makú mílɔŋgi mî a búngú mifílí. Á púndá ɛni, ngvwɛʼ ɛni ɛ̌ paʼ ɛ kú nlɔŋgi, ti á mínání mí páŋili. 13Mbwəlâ á ndutu ǎ kə mifílí á ɛ́tútú nána bá núŋí mɔ́ wɔ̂ álí bwə ɛ́bulú, á wɔ́ŋiyǎ púndá na mílɔŋgi mî. 14Mi n dí ntátya-a-mílɔŋgi a mbâ. M bí mílɔŋgi mí myə, mílɔŋgi mí myə pə́ mí bí mi. 15Mulimlim, nâ pə́ Sáŋ m myə a bíní mi, mi pə́ m bí mɔ́. N dí mbunsan álí wá á mílú mí mílɔŋgi mí myə. 16N wɔ́ŋí mílɔŋgi mípə́pə̂ ámə́ mí shiyǎ á ndáʼ ɛ mílɔŋgi ɛnín. N lɔlí myɔ́ pə́ ɛ panan, álí bwə nána myɔ́ pə́ mí wú ngɔli ɛ́ myə. Áfánikə̌ ndáʼ ɛ mílɔŋgi ɛ́ bá pɔ́, ntatya-a-mílɔngi pə́ á bá nfɔ́. 17Sáŋ m myə a nə́ŋí mi á ɛ́tútú nána, mi mə́ ɛ bunsan álí wá álí bwə nána n kwisí pə́ luŋgɛ́ lí myə lî. 18Mɔʼ ká nfɔ́ a sə̌ nuŋ luŋgɛ́ lí myə á mi, ndé nǎn bə lɔ́ na mimə̌n. N wɔ́ŋŋí wunja álí bə luŋgɛ́ lí myə, na wunja álí nǔŋ pə́ lɔ́ mbǐ. Nâ Sáŋ m myə a pɔŋíní mi álí bwə.”
19Biyala bí Yésuwə bín bí pánání pə́ makabán átítin na baʼ bá Júda. 20Bɔ́ baʼ jǐta bá bílí ɛ byá nána, “Mudî m bî n dí mɔ́ á nyǔ, A mə́ ɛ búmu! Yán nyí tíŋgání mɔ́ ɛ wúkan?” 21Ti baʼ bápə́pə̂ bá bílí ɛ byá nána, “Mɔʼ awə̌ mudî m bî n díní mɔ́ átin, a tíŋganiyǎ ɛ́ byá ɛbú ɛ́ misam ngə mín. Yán Mudî m bî n tíŋgání ɛ bwə mɔʼ awə̌ a sə̌ ɛ́ mín wǔm, a mín?”
Baʼ bá Júda bá báŋí Yésuwə
22Ŋgandu ɛ Linamsɛ́ Tɛ́mpɛl ɛ bílí á Jerúsálɛmə. Ɛ bílí á púndá ɛyə̌ ɛfiʼ ɛ́ bílíní jǐta. 23Yésuwə a bílí ɛ yə́ŋ á Libɛpɛ́ lí Tɛ́mpɛl álə́ bá bə́ŋákíní Libɛpə́ lí Sólómonə. 24Baʼ bá Júda bá kámbú mɔ́, bá kɔndɛ́ mɔ́ nána, “Njá púndá ɛ̌ bwəní sə́ sí si tɛdan pə́? Njí wə ɛ dí Ani Awə̌ bá Wɔ́kílíní, pɔ̌ŋ sə́ mbálɛ tɛyí tɛyí.” 25Yésuwə a pushú nána, “Mi mə́ nyə́ ɛ pɔŋ ndé nyí si dúbɛ́. Ɛbulú ɛ́yə́ nǎn bwəní á dǐn lí Sáŋ m myə mɔ́mə̌n mɔ́ á tyə́ mi mbúŋ 26Ndé nyí sə̌ púl álí sɔ́ntán mî, á ɛ́tútú nána nyí shiyǎ mílɔŋgi mí myə, 27Mílɔŋgi mí myə mí wú ŋgɔli ɛ́ myə. M bí bɔ́, bɔ́ pə́ mí pɔ̌ŋ mî á mbǐ. 28M bəkí bɔ́ luŋgɛ́ álə́ lí sə̌ ɛ́ mɛ na bá sî wá. Mɔʼ a tíŋganiyǎ bɔ́ ɛ shukan á makɛ́ má myə. 29Yǔm ɛ́yə́ Sáŋ m myə a bəkíní mi ɛ́ túmbí byə̌m bísə́sə̌n, ká mɔ̂ʼ a tíŋganiyǎ bɔ́ ɛ shu á makɛ́ má Sáŋ m myə. 30Mi na Sáŋ ŋ myə sí dí mɔʼ nfɔ́.”
31Baʼ bá Júda bá núŋŋí pə́ malɛ́ álí dfúm Yésuwə. 32Ndé Yésuwə a pɔŋí bɔ́ nána, “Mi mə́ nyə́ ɛ lúfú bibulú bí mbâ jǐta ábə́ bí fí á Sáŋ ŋ myə. Nyí sa mî ɛ dfúm malɛ́ álí búlú mî. Ɛbulú ɛ́fə́ ɛ́ bwə́lí ka nyí saká mî ɛ dfúm málɛ́?” 33Yɔ̂ bá púshúní nána, “Sí sə ɛ́ sa álí dfúm wə́ malɛ́ á ɛ́tútú ɛbulú ɛ́ mbâ ɛ́yə́ ɛ bwəlíní. Ndé sí dfúm wə̂ malɛ́ á ɛ́tútú nána ɛ lwí Dyǔ.” 34Yésuwə a pɔŋŋí bɔ́ nána, “Nga ɛ́ tílání á kâti ɛ́ nyə ɛ mbéndá nána, Dyǔ lí byábí nána, ‘Nyí dí madyǔ.’ 35Sí bí nána ɛyala ɛ́ Dyǔ ɛ́ sə̌ ɛ́ kfún. Dyǔ lí bə́ŋíní baʼ ábə́ lí lúmíní na ɛyala ɛ́yî na bá dí madyǔ 36Míyə́ Dyǔ lí námsɛ́ní ti lí lúmí mi á nkínshíyə, yán nyí tíŋgání ɛ byá nána n lwí Dyǔ á ɛ́tútú nána m byábí nána n dí Mwǎn a Dyǔ? 37Njí n sə̌ ɛ bwə ɛbulú ɛ́ Sáŋ m myə, nyí si dúbɛ́ mî. 38Ndé njí ɛ́ dí na nǎn bwə ɛbulú ɛ́yî, nyí dúbɛ ɛbulú ɛ́yî ká nyí dúbɛ̌ mî. Ɛ́yínán ɛ́ bwə nyí bî ti nyí sɔ́ntánní bitî bísə́sə̌n nána, Sáŋ m myə a dí mi átin, mi pə́ m bá mɔ́ átin bitî bísə́sə̌n.”
39Misam mínán mísə́sə̌n ámə́ a byábíní mí bwə́lí bá kə́kí álí kú pə́ mɔ́ ndé a nyítí bɔ́ á makɛ́.
40Á mbís ɛ púndá, Yésuwə a tímbí á pɛsi ɛ Jódan ɛnínání, áfə́ Jɔnə́ a dumsɛ a bílíní baʼ ɛ dumsɛ, ti a dyɛ̌ á wə́. 41Limuti lí bílí ɛ paʼ á mɔ́. Baʼ á bâ bá byábákí nána, “Jɔnə́ a dumsɛ a bíliyǎ ɛ bwə misam mí manyáká,” ndé yǔm tɛ́ ɛ́yə́ a byábíní tɛ́ŋgɛnɛ mɔʼ anín ɛ́ dí mbálɛ. 42Áfánikə̌ limuti lí baʼ ábə́ bá bílí á wə́ bá dúbɛ́ Yésuwə.
Currently Selected:
Jɔnə́ 10: bwt
Highlight
Copy
Compare
Share
Want to have your highlights saved across all your devices? Sign up or sign in
