Mabwəlan 25
25
Pɔ̂lə a byábí nána Káyísa mɔ́mə̌n mɔ́ a lɔ́lí mɔ́ ɛ káyisi
1Fɛ́stusə a pílí á pɛsi ɛ Kayísaríya álí nǔŋ ɛbuŋ ɛ́ gɔ́vɔ́nɔ. Á mbís ɛ madû málán, a m falu á pɛsi ɛ Kayísaríya a kə̂ á Jerúsálɛmə. 2Áfâ á Jerúsálɛmə, baprîsə bánə̂n na milú mí baʼ bá Júda bá m pɔ̌ŋ Fɛ́stusə misam ámə́ bá byábíní nána Pɔ̂lə a bwəlí. Bá yɔ́mbí Fɛ́stusə 3nána a wúnjan bɔ́ álí bwə nána bá panán Pɔ̂lə á Jerúsálɛmə. Bâ m pɔŋ mɔ́ nâ á ɛ́tútú nána bâ n mə̌ bunsan álí búlú mɔ́ á mbukaʼ. 4Ndé Fɛ́stusə a timbílí bɔ́ nána, “Bá mə́ ɛ kɔ́ʼ Pɔ̂lə á Kayísaríya na mimə̌n n kə́lí ɛ tǐm á wə́. 5Áfánikə̌, njí ɛ́ dí nána Pɔ̂lə a bwəlí nsam mbî, baʼ bá nə̂n á bán bá pɔ̌ŋ mi á Kayísaríya, bá bwə̂ mɔ́ sɔ́mɔsə.”
6Fɛ́stusə a n dyɛ madû wam tɔ dyǔm á Jerúsálɛmə byáná ǎ tim á Kayísaríya. Ngə bǔn bú yílíní á shumání álí káyísí mikáʼ. A m byá nána bá panan Pɔ̂lə á kúti. 7Ngə bá pánání Pɔ̂lə, baʼ bá Júda ábə́ bâ n fí á Jerúsálɛmə bâ n tyə́ a nsaŋ n nyǔ m Pɔ̂lə bá shwátá mibyá míbî tɛ́ŋgɛnɛ Pɔ̂lə. Ndé bá sî n púl álí lúfú nána a bwə́lí misam ɛ́ mî. 8Pɔ̂lə a m byá nána misam ámə́ bá byání tɛ́ŋgɛnɛ mɔ́ mí shiyǎ mbálɛ. A m byá nána, “N nan bwə́líyá ká yúm tɛ́ŋgɛnɛ mbéndá ɛ baʼ bá Júda tɔ̌ tɛ́mpɛl tɔ̌ Káyísa á Rómə.” 9Ndé ngə Fɛ́stusə a bílíní ɛ sa álí wɔ́ŋ wusú wú mbâ na baʼ bá Júda, áfánikə̌, a kɔndɛ́ Pɔ̂lə nána, “Ɛ́ nəŋ álí kə̂ á Jerúsálɛmə álí bwə nána n káyisi wə́ á wə́ tɛ́ŋgɛnɛ mbaʼ ɛ́yín?” 10Ndé Pɔ̂lə a pushú mɔ́ nána, “N tyə́bí á fán sɔnsɔ́nǎn á wúsú wú kóti ɛ Káyísa. Áfánikə̌, bá lɔ́lí mi a káyísí á fán. N nan bwə́líyá ká yúm tɛ́ŋgɛnɛ baʼ bá Júda wəmə̌n ɛ bí nâni. 11Njí n kfúndí mbéndá ɛyə̌ ɛ́ bwə nána bá búlu mi, ni m mə́ ɛ pushu álí wá. Ndé njí mbaʼ ɛ́yə́ bá bándíní á nlú m myə ɛ́ shiyǎ mbálɛ, mɔʼ ká nfɔ́ a wɔ́ŋiyǎ wúnja álí bə mî á makɛ́ má bɔ. Áfánikə̌, nǎn yɔ́m nána Káyísa mɔ́mə̌n a káyisi mi.” 12Fɛ́stusə a kǐ á nsaŋ a kpɛ̂ na baʼ ábə́ bá bə mɔ́ maléyá ti a timbí a pushú Pɔ̂lə nána, “Ngə ɛ mə́ní ɛ byá nána Káyísa mɔ́ a lɔlí wə̂ ɛ káyisi, ɛ́ lɔlí ɛ kə á Káyísa”.
Fɛ́stusə a panjí mukáʼ m Pɔ̂lə á Kə̂ŋ Ágrípa
13Á mbís ɛ ngushú ɛ́ madû, kə̂ŋ Ágrípa bû Bɛ́nisə bá pílí á Kayísaríya álí kasí Fɛ́stusə. 14Ngə bâ n wɔ́ŋní álí dyɛ á wə́ madû jǐta, Fɛ́stusə a fətání nsam m Pɔ̂lə. A m pɔ̌ŋ mɔ́ nána, “Mɔʼ a dí á fán awə̌ Fɛ́liksə a m makúní á bibuwa. 15Púndá ɛyə̌ mi mi kəní á Jerúsálɛmə baprîsə bá nə̂n na baʼ bá Júda na bankúmə́ bá bándí mbaʼ tɛ́ŋgɛnɛ mɔ́ ti bá yɔ́mbí mi nána m mɛ́si nána á kfúndí mikáʼ. 16Ndé mi mi pɔŋ bɔ́ nána baʼ bá Rómə bá wɔ́ŋí ɛləm nána bá tíŋganiyǎ ɛ́ túm mbákú nána mɔʼ a kfúndí mukáʼ ɛ́yə́ a kɔ́sɛní ɛ káyísí múkaʼ á wúsú wú baʼ ábə́ bá sɔ́mɔ́sí mɔ́. Bá lɔ́lí mɔ́ ɛ bə̌ wúnja álí káyísí mukáʼ m mɔ. 17Áfánikə̌, ngə baʼ ábə́ bá bándí mɔ́ mbaʼ bá pílíní áfán, n sî fɛnja púndá. Bǔn búní, n shumání á kúti ti m bə́kí ndaki nána bá pánan Pɔ̂lə. 18Baʼ ábə́ bá sɔ́mɔ́sí mɔ́ bá n tyə́ álí byá misam ámə́ a bwə́líní, ndé bá sî n byá nána a bwəlí nsam m bî ká nfɔ́ ámə́ mi mi kaníní nána bá byá nána a bwəlí. 19Pendá ɛyə̌ bâ n wɔ́ŋní na Pɔ̂lə ɛ bílí wɔ̂ tɛ́ŋgɛnɛ dúbɛ lí bɔ na tɛ́ŋgɛnɛ mɔʼ nfɔ́ awə̌ dǐn lí mɔ́ lí bílí Yésuwə awə̌ a m mə̌ ɛ́ wá ndé Pɔ̂lə ǎ byábá nána a dí luŋgɛ́. 20Mi mi n sî m bí álí wasí ɛ́bú ɛ́ nsam ngə mún, áfánikə̌, n kɔndɛ́ Pɔ̂lə njí ǎ nəŋ álí kə á Jerúsálɛmə nána bá káyisi mɔ́ tɛ́ŋgɛnɛ mbaʼ ɛ́yín. 21Ndé Pɔ̂lə a m byá nána bá máku mɔ́ á bibuwa kə́ŋ ta á púndá ɛyə̌ Káyísa á nyítíní mbakú á mukáʼ m mɔ. Áfánikə̌, mi mi pɔ̌ŋ nána bá sója bábɛ̂ bá búti mɔ́ ɛ táti kə́ŋ ta á púndá ɛyə̌ á lúmí mɔ́ a Káyísa.” 22Kə̂ŋ Ágrípa a pɔŋní Fɛ́stusə nána, “Mimə̌n n nəŋ álí wú mɔʼ anín.” Ti Fɛ́stusə a pushú mɔ́ nána, “ɛ̌ wú mɔ́ yǎn.”
23Bǔn búní Ágrípa bû Bɛ́nisə bâ m paʼ á ndáʼ ɛ kúti na ɛdúbɛ́ ɛ́nə̂n ɛ́sə́sə̌n. Bâ m kwili á ndáʼ ɛyə̌ mbúʼ ɛ̌ mbumní bá sója bá nə̂n na baʼ bá mbímbí bá nkí. Fɛ́stusə a m byá nána bá kə̂ bá pánan Pɔ̂lə. 24Ti Fɛ́stusə a byábí nána, “Kə̂ŋ Ágrípa na baʼ básə́sə̌n ábə́ bá dí áfán. Mɔʼ anín awə̌ nyí mínní á fánán, a dí mɔʼ awə̌ baʼ bá Júda, ábə́ bá dí á fán na ábə́ bá dí á Jerúsálɛmə bá mə́ní ɛ panán mbaʼ tɛ́ŋgɛnɛ mɔ́. Bá bílí ɛ bún nána mɔʼ anínán a lɔlí ɛ wá. 25Ndé ngə m mə́ní ɛ wasi, m míní nána a bwə́liyǎ ká yúm ɛ́yə́ bá lɔ́líní mɔ́ ɛ búlu. Ngə mɔ́mə̌n a yɔ́mbíní nána Káyísa a káyisi mɔ́, áfánikə̌ m məsí nána n lúm mɔ́ á Rómə. 26Ndé n wɔ́ŋiyǎ yándá lí mbímbí álí til á Káyísa tɛ́ŋgɛnɛ mɔ́. Áfánikə̌, m mə́ mɔ́ ɛ panan á wusú wú nyə, sipɔ́n á wúsú wú wə kə̂ŋ Ágrípa álí bwə nána wə̌ti m mə́ ɛ wasi, n wɔ́ŋ yǔm álí til. 27Á ɛ́tútú nána n kaní nána, ɛ́ sî lɔlɔ́ nána n lúm mɔʼ á bíbuwa ɛ́yə́ mi n lúfúní tɛyí tɛyí yə̌ ɛ́yə́ á bwə́líní.”
Currently Selected:
Mabwəlan 25: bwt
Highlight
Copy
Compare
Share
Want to have your highlights saved across all your devices? Sign up or sign in
