Mabwəlan 24
24
Pɔ̂lə a tyə́bí mukáʼ á wúsú wú Fɛ́liksə
1Á mbís ɛ madû mátân prísə a nə̂n a nə̂n Ananíyasə a kǐ á Kayísaríya na baʼ bá mbímbí bá nkí, mɔʼ a mbéndá nfɔ́ awə̌ dǐn lí mɔ lí bílí Tɛtúlusə. Bâ m paʼ á wúsú wú gɔvɔnɔ Fɛ́liksə ti bá byábí misam ámə́ bá byábíní nána Pɔ̂lə a byábí. 2Ti Tɛtílusə a butí ɛ byá misam tɛ́ŋgɛnɛ Pɔ̂lə nána, “Mɔʼ a ɛdúbɛ́ Fɛ́liksə, á ɛ́tǔm ɛ́ púndá sɔnsɔ́nǎn janiya lí wə lí wukínjú lí mə́ ɛ panán musaŋgu. Ɛ mə́ bwə mápəlán má mbâ jǐta ámə́ mí mə́ ɛ panán wúlɔʼ á ɛ́kumbu ɛ́ sə. 3Na sí mə́ ɛ pushú nâ á wǔm másə́sə̌n na ɛtîtɛ́. Na sí sákán wə̂ jǐta. 4N nə́ŋiyǎ álí nǔŋ púndá ɛ́ wə jǐta, kánâwə̌, nǎn yɔ́m wə nána ɛ bwə́lan nlə́m m wə m mbâ, bə sə́ mǎ ɛpúlu, wú yǔm ɛ́yə́ sí wɔ́ŋí álí byá. 5Sí mə́ ɛ yəm nána mɔʼ anín á dí mɔ m bî áwútitîn wú bâ. Ǎ panán mpungú wútitîn wú baʼ bá Júda á nkínshíyə̌ nsə́sə̌n. A dí pə́ nlú mú ɛ́pipá ɛfɔ́ ɛyə̌ bá bəŋní Názarinə. 6Mɔʼ anín a pɛpɛ́ ɛ shulí ɛdúbɛ́ ɛ́ Tɛ́mpɛl yɔ̂ sí kúbíní mɔ́. 7[Sî n sa álí kə mɔ́ ɛ káyisi ngə mambéndá má sə má saʼní ndé mɔʼ a sója a nə̂n, Lísiyasə a m paʼ na baʼ bá mɔ, bá núŋí mɔ́ á makɛ́ ma sɛ na ngínya.] 8Njí ɛ kɔndɛ́ mɔʼ anín wɔmə̌n ɛ̌ yəm á mɔ́ nána, misam mísə́sə̌n ámə́ sí bání mɔ́ mbaʼ mí dí mbálɛ.” 9Baʼ bá Júda ábə́ bɔ́ pə́ bá bílí á wə́ bá byábí nána misam ámə́ Tɛtúlusə ǎ byání mí dí mbálɛ.
Pɔ̂lə a káyísí muká á wúsú wú gɔvɔnɔ Fɛ́liksə
10Yɔ̂ gɔvɔnɔ Fɛ́liksə a pɛpí Pɔ̂lə nána a byá. Pɔ̂lə a byábí nána, “M bí nána wə ɛ mə́ ɛ bá nkáyisidi á ɛ́kúmbu ɛ́yín mimbfú jǐta. Áfánikə̌, munyɛŋgɛ n dí mî átin jǐta á ɛ́tútú nána nǎn fúl mbaʼ á nyǔ ɛ́ myə á wusú wú wə.” 11Njí ɛ wasi, wəmə̌n ɛ̌ mín nána ɛ nan túmbíyǎ madû dyǔm na mábɛ̂ ɛ́yə́ n kǐní á Jerúsálɛmə álí kɛsí Dyǔ. 12Baʼ bá Júda bá nan táníyǎ mî á ɛbámí na mɔʼ a tɛ́mpɛl. Na bá nan táníyá mî ngə nǎn pəlání baʼ milə́m ká á ndáʼ ɛ makáni tɔ̌ á nkí átin. 13Baʼ bán bá tíŋganiyǎ ɛ lúfú nána misam mí mə́ bá byání tɛ́ŋgɛnɛ mi, mí dí mbálɛ. 14M pɔ̌ŋ wə mbálɛ ɛ́ myə, Mi nǎn bwəlí Dyǔ álə́ basáŋ bá sə bá nyákə́ bá bílíní ɛ bwəli ngə nǎn nanní Nji ɛyə̌ ɛ tɛ́ŋgɛ́ní. N dúbɛ pə́ misam mísə́sə̌n ámə́ mí tílání á Mbéndá ɛ́ Mósisə na kâti ɛ balaku bá mudî. 15M bándí nlə́m á Dyǔ mulimlim ngə baʼ bán bá bándíní nána mɔʼ ansə́sə̌n á pumu ká baʼ bá bî tɔ̌ baʼ bá mbâ. 16Áfánikə̌, nǎn wanan ɛtîtɛ́ álí bwə nána nlə́m m myə n sáŋ mi á líbum na á wusú wú Dyǔ. 17Mimbú jǐta ɛ́tɛ̂n ɛ́yə́ nan kíyání á Jerúsálɛmə. Mi mi kə á wə́ álí kanan bɔ́ mǎ ngáʼ na álí bə Dyǔ jabeya. 18Ngə m bílíní ɛ nǎn misam mín, yɔ́ baʼ á bánán bá táníní mi á tɛ́mpɛl ɛ́yə́ m mə́ní ɛ bwə misam mí líwusan. Limuti lí bíliyǎ áwə́ na mpungú pə́ m bíliyǎ. 19Ndé dungu lí baʼ bá Júda ábə́ bá fí á pɛsi ɛ Ésiya bá bílí á wə́. Bɔ́mə̌n bǎ n lɔʼ bá pâʼ á wúsú wú wə álí bán mî mbaʼ wə̌ti bá wɔ́ŋí mbaʼ tɛ́ŋgɛnɛ mi. 20Tɔ̌ baʼ bán ábə́ bá dí á fán bá pɔ̂ŋ wə mbaʼ ɛyə̌ bâ n mínní á mi púndá ɛyə̌ n tyə́bíní álí káyísí á wusú wú ɛ́yə́ŋgə́ ɛ́ bɔ 21ɛ́sitúm yǔm ɛfɔ́ ɛ́yə́ mi mi bwəní. Mi mi pusí ngɔli ɛ́ myə nána, “Bá káyísí mî wúyə́ á ɛ́tútú nána n dúbɛ́ nána baʼ ábə́ bá mə́ ɛ wá bá pumu.”
22Gɔvɔnɔ Fɛ́liksə a bílí mɔʼ awə̌ a m bí misam tɛ́ŋgɛnɛ Nji ɛ Sáŋgúwə́. Ti a panání likáyísi á bǔn bû á shúʼ. A pɔŋí bɔ́ nána, “Nyí sîn Lísiyasə, mɔʼ a sója a nə̂n a pâʼ yɔ̂ n túmní mbakú á míká mín.” 23A pɔŋí mɔʼ a sója awə̌ a bílí ɛ tátí Pɔ̂lə nána a nûŋ Pɔ̂lə, na a si fúl mɔ́ mǐs á nyǔ. Ndé a byábí nána a bə̂ mɔ́ mǎ wunja na a máku pə́ basún bá mɔ bá pánan mɔ́ yə̌ ɛ́yə́ ǎ saní.
Pɔ̂lə a tyə́bí á wusú wú Fɛ́liksə na Drusíla
24Ngushú ɛ́ madû má túmbíní Fɛ́liksə a pílí na mwalân m mɔ Drusíla. Drusíla a bílí mwǎn a Júda. Fɛ́liksə a n lúm mɔ̂ʼ nána bá bə̂ŋ Pɔ̂lə, álí wú ndúm ɛyə̌ Pɔ̂lə ǎ pɔŋní mɔ́ tɛ́ŋgɛnɛ lidúbɛ lí Yésu Krísto. 25Pɔ̂lə a butí álí pɔ̌ŋ mɔ́ ngə mɔʼ a lɔlíní ɛ wɔ́ŋ libá lí mbâ, ngə mɔʼ a lɔlíní ɛ wálí nyǔ bwǎm na Bǔn bú Likáyisi ábə́ bú paʼ, yɔ̂ bɔŋ wú kúbí Fɛ́liksə. Yɔ̂ Fɛ́liksə a pɔŋíní Pɔ̂lə nána, “Kɔ́sɛ́ ɛ kə sɔnsɔ́nǎn. Njí n wɔ́ŋí pə́ púndá m bəŋ wə̂.” 26Á púndá ɛni Fɛ́liksə a m bán nlə́m nána Pɔ̂lə á bə mɔ́ ngáʼ á mbís. Ɛ́yínán ɛ̂ m bwə á bəŋá mɔ́ bitî na bitî álí byábán mɔ́.
27Ɛ́yínán ɛ́ bwə́lání á mimbvú míbɛ̂, yɔ̂ Pɔ́kusə Fɛ́stusə a núŋíní wudya á Fɛ́liksə ngə gɔ́vɔ́nɔ. Ngə Fɛ́liksə a bílíní ɛ sa wúsú wú mbâ na baʼ bá Júda, a m makú Pɔ̂lə á bibuwa.
Currently Selected:
Mabwəlan 24: bwt
Highlight
Copy
Compare
Share
Want to have your highlights saved across all your devices? Sign up or sign in
