Mabwəlan 2
2
Lipaʼ lí Múdî ámə́ n Sáŋí
1Ngə ŋgandu ɛ Pɛ́ntɛ́kɔstə ɛ pilíní, baʼ básə́sə̌n ábə́ bá dúbɛ́ Krísto bá shwínjání á fǔm bufɔ́. 2Ntɔkɔku n fí á nkímínyə́ təlí. Ntɔkɔku mû m bílí ngə ɛkful ɛ́nə̂n. Ntɔkɔku mû n lwínjí ndáʼ ɛ́sə́sə̌n áfə́ badúbedi bâ bá bílíní. 3Bâ m mín byə̌m ábə́ bí bílí mwǐ ámə́ m bílí ngə biyə́m bí tyə́bí mɔtɛ́ á nyǔ. 4Bɔ́ básə́sə̌n bâ n lwínj na Mudî ámə́ n Sáŋí, mɔtɛ́ a butí ɛ byá á mibyá mí baʼ bápə́pə̂ ámə́ bá sî n məní ɛ wúku. Mudî ámə́ n Sáŋí mɔ̂ n dyɛ́lɛ́ bɔ́ álí byá yə̌ ɛ́yə́ bá bílíní ɛ byá.
5Á púndá ɛni, Baʼ bá Júda ábə́ bá bílí ɛ kani á Dyǔ bá bílí á Jerúsálɛmə. Baʼ ábán bá fí á mabú másə́sə̌n á nkínshíyə. 6Ngə bá wúkíní ntɔkɔku mû, limuti lí bâ lí shwínjání á fǔm ábə́ badúbedi bâ bá bílíní. Bá bílí manyáká ngə bá yə́mbíní ngə badúbedi bâ bá bílíní ɛ byá á mibyá mí baʼ bápə́pə̂ ti mɔtɛ́ a bílí ɛ yəm mbyá m mɔ. 7Á manyáká átin, bá kɔ́ndɛ́ nána, “Nga baʼ ábán básə́sə̌n ábə́ bá byá nán bá dí baʼ bá Gálilî? 8Yán ɛ́ díní nána sə́ mɔʼ na mɔtɛ́ sí wú ngə bá byání mibyá mí sə? 9Á wútitîn wú sə, duŋgu lí bâ bá fí á ɛkumbu ɛ́ Pátiya, Mɛ́diya na Ɛ́lam; ɛkumbu ɛ́ Mɛsopotémiya, Judéya na Kapadósiya; bikumbu bí Pɔ́ntusə na Ésiya, 10bikumbu bí Frígiya na Pamfíliya, ɛkumbu ɛ́ Íjiptə na á pɛsi ɛ mbú ɛ Líbiya, bɛbɛ na Syrɛnə. Sə́ baʼ bafɔ́ sí fí á nkí n Rómə, 11Á wútitîn wú baʼ ábán básə́sə̌n, bafɔ́ bá dí baʼ bá Júda, á bání pə́ bá shiyǎ baʼ bá Júda ndé bá nǎn dúbɛ lí baʼ bá Júda. Duŋgu lí bâ á wútitîn wú sə́ bá fí á ɛkumbu ɛ́ Krɛ́tə na á ɛkumbu ɛ́ Arébiya. Mɔʼ na mɔtɛ́ sí wú ngə bá byání misam mí nə̂n ámə́ Dyǔ lí bwə́líní á mbyá n sə.” 12Á manyáká átin na lipamblan, bâ n kɔ́ndɛ́ mɔʼ na mɔtɛ́ nána, “Ɛ́yín ɛ́ dí yándá yán?” 13Ndé kánâwə̌, duŋgu lí bâʼ bá bílí ɛ nyasí badúbedi ábə́ bá dúbɛ́, ti bá byábá nána, “Baʼ á bán bá mə́ ɛ shɔ́ʼ mǐm.”
Ndúm ɛ́ Píta
14Ti Píta a tyə́bí ámǐn áwútitîn wú bawútú-bálí-lúm bání dyǔm na nfɔ́ ti a pushí ngɔli ámǐn á byábá á limuti lí bâʼ ábə́ bá bílí áwə́ nána, “Bǎn bá nyǎ bá myə bá Júda na nyə́ baʼ básə́sə̌n ábə́ bá dyɛ á Jerúsálɛmə, nyí lám matwî bwǎm m pɔŋ nyə́ yə̌ ɛ́yə́ ɛ́yínán ɛ́ díní yándá. 15Baʼ ábán bá shɔ́kiyǎ mǐm ngə nyí kaníní. Sɔnsɔ́nǎn ɛ́ dí wɔ̌ ngə́ŋ libu lí múshú. 16Ndé, ɛ́yín ɛ́ bwə́lání á njɔm ɛyə̌ nlakuwa-a-mudî Jɔ́wɛl a m byání nána,
17Dyǔ lí byábí nána,
‘Á madû má shúkán,
n lúm Mudî ámə́ n Sáŋí m myə ámə́ m paʼ á nyə́ baʼ básə́sə̌n.
Bǎn bá nyə bá bumân na balân bá pɔŋákí misam ámə́ mí bwəlan á madû ámə́ má dí á wúsú.
Kɔ́líbâʼ ɛ́ nyə ɛ́ mín biyúŋgu ábə́ bí fí á mi,
batína bá nyə bá mín milú-mí-mayɔ́.
18Îŋ nâ m bwəní.
N lúm Mudî m myə á púndá ɛni, m paʼ ká á babwəla-bá-ndutu bá myə, balân na bumân,
bá byábákí mísam ámə́ mí fí á mi, ámə́ mí bwəlan á wúsú wú púndá.
19N lúfú manyáká á libube
na n lúfú biyəmblan á nkínshíyə.
Makǐ má subi, mwǐ n kúwan, na ntútu n nyít.
20Dúlu lí tîm ɛ́ bá ɛfínjan,
ngɔn ɛ́ tim ɛ́ bá túnakɛ̂ ngə makǐ.
Misam mínán mí bwəlan byáná bǔn bú nə̂n bú wulɔʼ wú Dyǔ wú paʼní.
21Á púndá ɛni, ká njá awə̌ a pushú nána Yésuwə mɔ́ á dí Sáŋgúwə́ m mɔ, á kwisí líshuŋgɛ.’”
22Píta a kanání mbyá á wúsú nána, “baʼ bá Ísrɛl nyí lám matwî má nyə, nyí wú yə̌ ɛ́yə́ nǎn saʼní nyə́ ɛ pɔŋ. Dyǔ lî n bwə Yésuwə mɔ a Názárɛtə álí bwə mísam mí mbímbí mí mányáká na biyəmblan álí lúfú nyə́ nána lɔ́mə̌n lɔ́ lí lúmí mɔ́. Nyə́mə̌n nyí bí nâni bwǎm á ɛ́tútú nána ɛ́yínán ɛ́ bwə́lání áwútitîn wú nyə. 23Dyǔ lî n mə̌ ɛ́ kɔ́sɛ́ ɛ́ bí, na ngə lî n mə̌ ɛ́ tyə́sí nána, nyí búlú Yésuwə ngə nyî n bəní mɔ́ á makɛ́ má baʼ bá ɛkfwɛyí. 24Ndé Dyǔ lí púmú mɔ́ á líwá, lí fúlí mɔ́ á wúwa wú líwá á ɛ́tútú nána ɛ̂ n kam nána liwá lí wáli mɔ́ ngə mɔʼ a bibuwa. 25Kə̂ŋ Devídə a m byá tɛ́ŋgɛnɛ mɔ́ nána,
‘M bílí ɛ mín Sáŋgúwə́ á wúsú wú myə ɛtîtɛ́.
A dí á pɛsi ɛ ɛkɛ́ ɛ́ mbâ ɛ́ myə, áfánikə̌, n sə̌ ɛ́ táʼ.
26Munyɛŋgɛ n lwínjí mi á nlə́m átin,
na mi nǎn pɔ̌ŋ ndúm na munyɛŋgɛ nsə́sə̌n.
Ngə n díní luŋgɛ́, nyǔ ɛ́ myə pə́ ɛ́ wɔ́ŋ yándá álí bán nlə́m.
27M bá wɔ̌ ɛ bán nlə́m á ɛ́tútú nána ɛ sî makúwá mudî m myə m búkɛ á mbú ɛ bawú,
na ɛ sî pushúwá nána ngvú m mbwəlâ-a-ndutu n wə n yɔ̂ʼ á sɔŋgɔ.
28Ɛ mə́ mi ɛ lúfú nji ɛyə̌ ɛ́ panán luŋgɛ́, na ngə ɛ́ bání mi á nsaŋ n nyǔ, nlə́m m myə n lwínj na munyɛŋgɛ.’”
29Píta a kanání pə́ mbyá á wúsú nána, “Bǎn-bá-nyǎ bá myə nǎn pɔ̌ŋ nyə́ na ɛwíyɛ́ ɛsə́sə̌n nána sáŋ n sə a nyakə́ kə̂ŋ Devídə a n wá. Bâ n wushí mɔ́, ndim m mɔ n dí wə̂ kə́ŋ ta wúyə́. 30Devídə a bílí nlakuwa-a-mudî, na a m bí yə̌ ɛ́yə́ Dyǔ lí fílíní mɔ́ likaʼ na lí bə mɔ́. Dyǔ lî n mwá nguʼ nána lí bwə mwǎn m mɔ nfɔ́ á nja n Devídə álí bá kə̂ŋ ngə Devídə a m bání. 31Devídə a m mə̌ ɛ́ mín á wúsú wú púndá yə̌ ɛ́yə́ Dyǔ lí kəní ɛ bwə, áfánikə̌, a m byá tɛ́ŋgɛnɛ li pumu lí Ani Awə̌ bá Wɔ́kílíní. A m byá nána,
‘Dyǔ lí sî pushúwá nána ngvú m mɔ ɛ n díkɛ á mbú ɛ bawú,
na ngvu m mɔ n yɔ́biyǎ á ndim.’
32Dyǔ lí púmú Yésuwə anín á liwá, na sə́ básə́sə̌n sí dí mbúŋ nána a pumú. 33Dyǔ lí mə́ mɔ ɛ bə ɛbuŋ ɛ́ ɛdúbɛ́ á ɛkɛ́ ɛ́ mbâ ɛ́ mɔ. Lí mə́ mɔ́ ɛ bə̌ Mudî ámə́ n Sáŋí álə́ lî n byání nána lí bə mɔ́. Yésuwə pə́ a mə́ sə́ ɛ bə̌ Mudî m mû, na mɔ́ mú bwə nyí mín na nyí wú yǔmtɛ́ ɛ́yə́ ɛ́ bwəlan wúyə́. 34Sí bí nána Devídə a sî pumu á nkímínyə ndé ká ngə a n byání nána,
‘Sáŋgúwə́ Dyǔ lí byábí á Sáŋgúwə́ m myə nána,
Shumán á pɛsi ɛ ɛkɛ́ ɛ́ mbâ ɛ́ myə,
35kə́ŋ ta á púndá ɛyə̌ m bwə ɛ dyáŋtí baʼ bá ɛkfwɛyí bá wə na makwi má wə.’”
36Píta a kǐ pə́ á wúsú álí byá nána, “Nyə́ baʼ bá Ísrɛl básə́sə̌n nyí lɔ́lí ɛ bí na mbálɛ nána, Yésuwə anín awə̌ nyí búmíní á mbásá, mɔ́ Dyǔ lí mə́ní ɛ bwə Sáŋgúwə́ na mɔ́ a dí Ani Awə̌ bá Wɔ́kílíní.”
37Ngə baʼ bâ bá wúkíní yə̌ ɛ́yə́ Píta a byábíní, mbyá mû n tákí bɔ́ milə́m átin jǐta. Ti bá kɔ́ndɛ́ Píta na bawútú-bálí-lúm ábání nána, “bǎn-bá-nyǎ bá sə́ yə̌ kə́ sí bwəní?”
38Píta a pushú bɔ́ nána, “Mɔʼ na mɔtɛ́ á nyə́ a makú wubî wú mɔ na bá dúmsɛ mɔ́ á dǐn lí Yésu Krísto, álí bwə nána Dyǔ lí laksɛ́ wubî wú nyə. Ti Dyǔ lí bə nyə́ jabeya lí mɔ álə́ lí dí Mudî ámə́ n Sáŋí. 39Nyí bí nána yə̌ ɛ́yə́ Dyǔ lí byábíní nána lí bə nyə́ ɛ́ dí á nyə́ na bǎn bá nyə, na ɛ́ bá pə́ ká á baʼ ábə́ bá dí kfwáŋ. Ɛ́ dí na baʼ básə́sə̌n ábə́ Sáŋgúwə́ Dyǔ lí sə, a bəŋíní álí bá na mɔ́.”
40Na biyala bípə́pə̂, Píta a m bə bɔ́ maléyá ti a yɔ́m pə́ bɔ́ nána “Mɔʼ na mɔtɛ́ a shúŋgɛ luŋgɛ́, ɛ́ si bá nâ, ní Dyǔ lí kɔ́ksɛ́ nyɛ́ mulimlim ngə lí kɔ́ksɛ́ní nyɔnyi ɛbî ɛnín.” 41Baʼ jǐta ábə́ bâ n dúbɛ́ ndúm ɛ́ Píta bâ n kwisí dúmsɛ. Á bǔn bû wɔ́ na wɔ̂ nsɔŋgí ngə baʼ bikúlí bílán bâ n bándan á nsɔŋgí m badúbedi. 42Badúbedi bá bə́kí milə́m mí bɔ álí wúku yə̌ ɛ́yə́ bawútú-bálí-lúm bá bílíní ɛ lɛ́fu, na bá bílí ndíŋgí na baʼ ábə́ bá dúbɛ́ Krísto. Búwabɔ́ bá bílí ɛ bwə makáni na bá dyá pə́ lidyá fǔm bufɔ́.
Lishwinjan lí bâ ábə́ bá dúbɛ́
43Baʼ jǐta bá nyákí á ɛ́tútú ɛ́ misam mí manyáká na biyəmblan ábə́ bawútú-bálí-lúm bá bílíní ɛ bwə. 44Badúbedi básə́sə̌n bá bílí ɛ shwinjan fǔm bu nfɔ́. Yǔm tɛ́ ɛ́yə́ mɔʼ a n wɔ́ŋí ɛ́ bílí á mɔ ansə́sə̌n. 45Bá bílí ɛ súm litfu lí bɔ, bá kabá ngáʼ ngə mɔtɛ́ a bílíní ɛ sa. 46Bǔn tɛ́ bá tánákí á ɛ́búka ɛ́ Tɛ́mpɛl álí bə̌ makáni. Bá bílí ɛ dyá ɛ́yɔyɔʼ á mandáʼ má mɔʼ na mɔtɛ́. Bá bílí ɛ dyá na munyɛŋgɛ na nlə́m nfɔ́. 47Bá bílí ɛ kɛsí Dyǔ, na baʼ á bâ básə́sə̌n bâ n wɔ́ŋ nlə́m mbâ á bɔ́. Bǔntɛ́ Dyǔ lí bílí á bán baʼ á nsɔŋgí m bâʼ á ábə́ bâ m mə̌ ɛ́ kwísí lishuŋgɛ á baʼ ábə́ bá dúbɛ́.
Currently Selected:
Mabwəlan 2: bwt
Highlight
Copy
Compare
Share
Want to have your highlights saved across all your devices? Sign up or sign in
