Titus 1
1
1Omukanda hembu mau dhi kwaame Paulus, omupika waKalunga nomuyapostoli waJesus Kristus, mena lyeitavelo lyovaholowolwa vaKalunga okwiiwa otjatjili tjeundapelokalunga, 2pakevelelo lyomwenyo waapehe mbwaa udhikwa kuKalunga nguha kembe, tainkolo ouye háuya utwa. 3Iya otembu hiye thiki, wa hololola odhondaka dhe meteetho ndimba pewa palaka lyaKalunga, Omuhupithi wetu.
4Me sonekele Titus, ondele yandje yatjatjili paitavelo lyetu limo.
Et̯ilonkenda nouwa waKalunga Tate nowaKristus Jesus Omuhupithi wetu ngau kale nan̯e.#2 Kor. 8:23; Gal. 2:3; 2 Tim. 4:10
Ovilinga vyaTitus moKreta
5Mbe ku thiaa moKreta, u vyuukithe ovipuka mbimavi hepwa okuvyuukithwa, u holowole ovanene veongalo mondolopa aihe, ngahi mbe ku heela. 6Omunene weongalo nga kale omuntu nguhe na ombedhi, nga kale vala nomukadhintu umo, ovana ngava kale ovaitaveli, háva kala ave hole ovipala ne ovaundapi wouvi. 7Iya omunene weongalo nguma t̯ile otjiho eongalo lyaKalunga, kaa thele okukala nombedhi, hamulinomi, hawokuyumana dhiva, hankolwe, hampuhi, hamunyeki movineya. 8Iya u tha okukala omuyakuli wovayenda, nguu undapa ouwa, nguu likambula nawa, omuvyuuki, omudhilikwa nomuliyungi. 9U tha okukambulitha ondaka ndjaa thele okuliun̯ikwa ngahi tja longwa, opo e tjiiwe wo okuvandhipaleka ovakwawo nelongo ewa, nokusuka mbamava tetha ombata.#1 Tim. 3:2-7
10Iya pe na ovengi mbava tetha ombata, ovapopyapopi, novapukithi, unene tuu mboka mbava pita etanda. 11Va tha okupatwa ovinyo, mena lyokutya va ngwangwaneka odhonganda, have ve longo mbihavya thele okulongwa, mena lyokunganyana movineya. 12Omuprofeti umo owomuwo Omukreta wa tile: “Ovakreta apehe odhonkembi, ovithitu, wo ve na ondende.” 13Omukreta hengu wa popya otjatjili. Iya mena lyanyahi, ve longa otjatjili nodhonkono, opo ve tjiiwe okukala ave li nawa meitavelo, 14ahamava landula odhongano dhOvajuda nokovitumino vyovantu mboka mbava yetha otjatjili. 15Kumbava kohoka, ovipuka avihe vya kohoka, iya kumbava sila, mbahave na tja eitavelo, kave na tja nahi tja kohoka, mena lyokutya odhondunge nelityoo lyawo lya sila. 16Wo va tya ve i Kalunga, atjaa ovilinga vyawo vi mu tendela, mena lyokutya ovatyolethi kava tee, wo kava ulu okuundapa otjilinga otjiwa notjimo.
Currently Selected:
Titus 1: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.