Ovilinga 1
1
1Teofilus, membo lyandje lyolutenga mba soneka mo ovipuka avihe Jesus mbyaa uta okuninga nambyaa longa ovantu,#Luk. 1:1-4 2katee ketango hiaa twalwa meulu. Iya tainkolo héya twalwa meulu, ovayapostoli mboka Jesus mbaa holowola, we ve pa omailikin̯o kodhonkono dhOmbepo Ondhilikwa. 3Kon̯ima yomatatetho net̯o lye, Jesus we liyulika movipuka ovingi okutya u na omwenyo. Oule womatango omilongo vine, Jesus we liholololela wo, ye he ve hipululile ovipuka vyotjilongo tjaKalunga. 4Iya hiaa li aa ongana nawo, we ve heela ha tyaa: “Hámu dhi mo moJerusalem, iya kevelelen̯i, mu pewe eudhiko ndyoka Tate ndyee mu udhikila, hendi ndimbe mu heela.#Luk. 24:49 5Johannes wa tjatja nomeva, iya kon̯ima yomatango omanunu n̯e mamu ka tjatjwa nOmbepo Ondhilikwa.”#Mat. 3:11; Mark. 1:8; Luk. 3:16; Joh. 1:33
Jesus ma twalwa meulu
6 Ovayapostoli tainkolo va li ava ongana pamo naJesus, ve mu pula hava tyaa: “Muhona, potembu ndjika opo mo ka tungululila Israel otjilongo?”
7Ye we ve heela ha tyaa: “Hatjipuka tjen̯i okwiiwa odhotembu nodhowola Tate ndhaa twaa po kodhonkono dhe omwene. 8Iya n̯e mamu ka pewa odhonkono katango Ombepo Ondhilikwa himai ya mun̯e, iya n̯e mamu ka ila odhombangi dhandje moJerusalem nomoJudea atjihe nomoSamaria katee mouye auhe.”#Mat. 28:19; Mark. 16:15; Luk. 24:47-48 9Iya kon̯ima hiee ve heele odhondaka hendhi, wa yelwa peulu movipathi vyawo, ekaka hali mu holeke, wo ahamave mu mono uke.#Mark. 16:19; Luk. 24:50-51
10Iya tainkolo va li amava tala keulu hima i, dhivadhiva puwo pa kulamene ovalumentu vavali mbava li ava dhala omidhalo omipembadhi, 11iya hava tyaa: “Valumentu n̯e Ovagalilea, iya mwa kulamene tji otjo mamu tala keulu? Jesus hengu ngwaa ithwa po pun̯e okuya meulu, otjo ma ka tjuna ngahi mwe mu mono hima i meulu.”
Ovayapostoli va kala amava kumbu kuKalunga
12 Ovayapostoli va tjuna koJerusalem okudha kondundu ndjii tiwa Ondundu yomiholivi, ndjii li popedhi naJerusalem, mpape na oule mbuu lithike pokilometa imo. 13Iya hive ya motjitungwalongo, va ya mondjuwo yopeulu nahi muva kala ae lukulu. Mboka mbava li po, ooPetrus naJohannes naJakob naAndreas naFilippus naTomas naBartolomeus naMateus naJakob yaAlfeus naSimon ngoka nguu tiwa ombandhi naJudas yaJakob.#Mat. 10:2-4; Mark. 3:16-19; Luk. 6:14-16 14Iya wo avehe va li nomutima umo, hava kambulitha okukumba pamo novakadhintu naMaria, ina yaJesus, novanitje vaJesus ovalumentu.
Matias ma tuwa polukalo lwaJudas
15Iya momatango ngoka pa li otjoonganene tjovaitaveli, avehe kumo ambala va li ovantu ethele limo nomilongo vivali. Petrus wa kulama mokati kawo ha tyaa: 16“Valumentu vakwetu, esoneko ndyoka lya thele okuhwithilwa po, esoneko ndyoka Ombepo Ondhilikwa ndiya popya lukulu muDavid ouhunga naJudas, ngwaa hongolela ovantu mboka mbava kambula Jesus. 17Judas wa li umo owomunt̯e, mena lyokutya wa holowolwa, a kale mo na tja motjilinga tjetu.”
18(Odhombongo ndhoka Judas ndhaa pewa hiaa undapa ovilinga ovivi, we dhi landa otjana, motjana moka omo a wila, he thikile po edhimo, ovipuka avihe vyomedhimo lye havi tipuka mo.#Mat. 27:3-8 19Ovantu avehe womoJerusalem otjipuka hehi ve tji tyaa, iya otjana soka ve tji luka ena melaka lyawo Akeldama, mali tyaa: “Otjana tjOmbindhi.”)
20Petrus wa twikila ko uke ha tyaa: “Mena lyokutya membo lyOmapisalomi mwa sonekwa hinyahi:
‘Onganda ye ngai ile etuntu,
hámu kala omuntu noumo.’
Kwa sonekwa uke:
‘Otjilinga tje ngatji pewe omuntu umo.’#Eps. 69:25; 109:8
21Iya omuntu ngoka wa thele okukala umo owomovalumentu hemba nahi mbava endaenda nant̯e otembu aihe, nahi Muhona Jesus hiaa li mokati ketu, 22okudha ketango ndyoka Jesus hiaa tjatjwa kuJohannes katee ketango ndyoka Jesus hiaa ithwa po punt̯e, ha i meulu. Omuntu ngoka nga ninge ombangi yeimuko lyaJesus pamo nant̯e.”#Mat. 3:16; Mark. 1:9; 16:19; Luk. 3:21; 24:51
23Iya wo va holowola mo ovalumentu vavali, Josef nguu tiwa oBarsabas (ena limo uke ekwawo oJustus) naMatias. 24Okudha mpoka va kumba hava tyaa: “Muhona, oove mo iwa omitima vyovantu avehe, tu yulikila oun̯i muhemba vavali nguwa holowola, 25a ile omuyapostoli polukalo lwaJudas, ngoka ngwaa thiaa po otjilinga hehi, ha i kolukalo lwe omwene.” 26Wo ve ve pa oviholowoletho, otjiholowoletho tja kambula Matias, ye wa wedhwa movayapostoli hembenya omulongo naumo.
Currently Selected:
Ovilinga 1: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.